மதுரை:
சிவகங்கை மாவட்டம் மங்கப்புஞ்சை பகுதியைச் சேர்ந்தவர் பீர்முகம்மது. இவரது மனைவி முகைதீன் பாத்திமா (43) செம்பனூரில் உள்ள அரசு ஆரம்ப சுகாதார மையத்தில் ஊழியராக பணிபுரிந்து வருகிறார்.
இவர் சம்பவத்தன்று மதுரை மாட்டுத்தாவணியில் இருந்து தனியார் பஸ்சில் கல்லூரிக்கு சென்றார். அவர் பயணம் செய்த பஸ் ஒத்தக்கடை பஸ் நிறுத்தத்தில் நின்றபோது 28 வயது மதிக்கத்தக்க இளம்பெண் ஏறினார்.
முகைதீன் பாத்திமா அருகே அமர்ந்திருந்த அந்த பெண் மேலூர் பஸ் நிலையத்தில் இறங்கினார். அப்போது முகைதீன் பாத்திமா பையில் 5½ பவுன் நகை இருந்த மணிபர்சு மாயமாகி விட்டது. இதனை அந்த பெண் அபேஸ் செய்து விட்டு தப்பியதை அறிந்த முகைதீன் பாத்திமா கூச்சலிட்டார். உடனே மற்ற பயணிகள் அந்த பெண்ணை மடக்க பிடித்து மேலூர் போலீசில் ஒப்படைத்தனர்.
போலீசார் நடத்திய விசாரணையில் அந்த பெண் முகைதீன் பாத்திமா வின் மணிபர்சை திருடியது தெரியவந்தது. அதில் இருந்த 5½ பவுன் நகையும் மீட்கப்பட்டது. மணிபர்சை திருடி தப்ப முயன்ற அந்த பெண் திருச்சி சமயபுரத்தை சேர்ந்த கார்த்திக் மனைவி மீனாட்சி (28) என்பது தெரியவந்தது.
அவரை கைது செய்த போலீசார் வேறு சம்பவங்களில் தொடர்பு உள்ளதா? என்பது குறித்து விசாரணை நடத்தி வருகிறார்கள்.
