பீஜிங்:
மத்திய கிழக்கு நாடுகளில் ஒன்றான ஈரான் கடந்த 2015-ம் ஆண்டு அமெரிக்கா, இங்கிலாந்து, ரஷியா, பிரான்ஸ், சீனா மற்றும் ஜெர்மனி ஆகிய வல்லரசு நாடுகளுடன் வரலாற்று சிறப்பு வாய்ந்த அணு ஆயுத தவிர்ப்பு ஒப்பந்தம் ஒன்றை செய்துகொண்டது.
ஈரான் அணு ஆயுத திட்டங்களை செயல்படுத்துவதை முடிவுக்கு கொண்டுவர வேண்டும், அதற்கு பதிலாக அந்த நாட்டின் மீது விதிக்கப்பட்ட பொருளாதார தடைகளை மேற்கத்திய நாடுகள் படிப்படியாக விலக்கிக்கொள்ள வேண்டும் என்பது இந்த ஒப்பந்தத்தின் சாராம்சம். இந்த ஒப்பந்தம் அமெரிக்காவின் முன்னாள் ஜனாதிபதி ஒபாமாவின் ஆட்சி காலத்தில் செய்யப்பட்டதாகும்.
இதற்கிடையே, ஈரானுடனான அணுசக்தி ஒப்பந்தத்தை விட்டு அமெரிக்கா வெளியேற முடிவு செய்துள்ளதாக அமெரிக்க அதிபர் டொனால்ட் டிரம்ப் கடந்த 9-ம் தேதி அறிவித்தார். டிரம்ப்பின் இந்த முடிவுக்கு இஸ்ரேல், சவூதி அரேபியா உள்ளிட்ட அமெரிக்க பாசம் கொண்ட நாடுகள் ஆதரவு தெரிவித்துள்ளன. இதனால் ஈரான் கடும் பொருளாதார நெருக்கடிகளுக்கு உள்ளாகும் நிலை ஏற்பட்டுள்ளது.
அதேவேளையில் முன்னாள் அதிபர் ஒபாமா மற்றும் ரஷியா, சிரியா உள்ளிட்ட சில நாடுகள் டிரம்ப் முடிவுக்கு எதிர்ப்பு தெரிவித்துள்ளன. இருப்பினும், இந்த ஒப்பந்தத்தில் இருந்து பின்வாங்க போவதில்லை என இங்கிலாந்து, பிரான்ஸ், சீனா, ரஷியா ஆகியவை அறிவித்துள்ளன. எனவே பொருளாதார நெருக்கடிகளை சரிசெய்யும் முயற்சிகளில் ஈரான் ஈடுபட்டுள்ளது.
அதன் தொடர்ச்சியாக அணு ஆயுத ஒப்பந்தம் குறித்து சீனாவுடன் ஆலோசனை செய்ய ஈரான் நாட்டின் வெளியுறவுத்துறை மந்திரி மொகமது ஜாவித் சாரிப் இன்று சீனா சென்றார். அதைத்தொடர்ந்து சீன வெளியுறவுத்துறை மந்திரி வாங் யியை சந்தித்து பேசினார்.
அங்கு சென்றடைந்த அவர் பேசுகையில், ஈரான் எடுக்க வேண்டிய முடிவுகள் குறித்து விவாதிப்போம். ஒப்பந்தம் செய்யப்படுவதற்கு முன்னரும், பின்னும் சீனாவுடன் நட்புறவில் இருந்து வருகிறோம். சீனாதான் ஈரானின் முதன்மை பொருளாதார பங்குதாரர். சீனா இப்போழுதும் எங்களுக்கு ஆதரவாக தான் இருக்கிறது, என அவர் கூறினார். #IranNuclearDeal #IranFM #ChinaVisit
