நாகர்கோவில்:
தோவாளை வட்டார காங்கிரஸ் தலைவர் நாஞ்சில் செல்வராஜ் தலைமையில் குமரி கிழக்கு மாவட்ட காங்கிரஸ் தலைவர் வக்கீல் ராதாகிருஷ்ணன் மற்றும் நிர்வாகிகள் நாகர்கோவில் கலெக்டர் அலுவலகத்தில் மாவட்ட வருவாய் அதிகாரி ரேவதியை சந்தித்து ஒரு மனு கொடுத்தனர். அதில் கூறியிருப்பதாவது:-
தோவாளை ஊராட்சிக்கு உட்பட்ட பகுதியில் 10-க்கும் மேற்பட்ட கிராமங்கள் உள்ளன. இங்கு ஏராளமான ஏழை விவசாயிகள், தொழிலாளிகள் வசித்து வருகிறார்கள். அவர்கள் 100 நாள் வேலை திட்டத்தின் மூலம் வாழ்க்கை நடத்தி வருகிறார்கள். தற்போது இந்த திட்டம் முறையாக நடைபெறவில்லை.
எனவே மாவட்ட நிர்வாகம் மீண்டும் 100 நாள் வேலை திட்டத்தை செயல்படுத்தி ஏழை தொழிலாளிகளின் வாழ்வாதாரத்தை பாதுகாக்க உரிய நடவடிக்கை எடுக்க வேண்டும்.
குமரி மாவட்டத்தை களக்காடு முண்டன்துறை புலிகள் காப்பகத்துடன் இணைக்க அரசு முடிவு செய்துள்ளது. இதனால் இம்மாவட்ட மக்கள் பெரிதும் பாதிக்கப்படுவார்கள். எனவே குமரி மாவட்டத்தை முண்டன்துறை புலிகள் காப்பகத்துடன் இணைக்கும் முடிவை கைவிட வேண்டும்.
இவ்வாறு அந்த மனுவில் கூறியுள்ளனர்.
வட்டார காங்கிரஸ் தலை வர்கள் ஜெரால்டு கென்னடி, காலபெருமாள், வைகுண்டதாஸ், முருகானந்தம் உள்பட பலர் உடன் இருந்தனர்.
