நீங்கள் தேடியது "People"

தஞ்சாவூர்:

நள்ளிரவு 12 மணிக்கு 2023-ம் ஆண்டு ஆங்கிலப் புத்தாண்டு பிறந்தது. ஆங்கில புத்தாண்டு உலகம் முழுவதும் உற்சாகமாக கொண்டாடப்பட்டு வருகிறது.

அதனை முன்னிட்டு தஞ்சை மேரீஸ்கார்னர் அருகே உள்ள திரு இருதய பேராலயத்தில் புத்தாண்டை முன்னிட்டு நேற்று இரவு நன்றி வழிபாடு திருத்தொண்டர் அரவிந்த் தலைமையில் நடந்தது. இதில் கடந்த ஆண்டில் நடந்த நன்மைகளுக்காக நன்றி செலுத்தப்பட்டது.

மேலும் உலக அமைதிக்காகவும், கொரோனா தொற்றில் இருந்து மக்களை காப்பாற்றவும் வழிபாடு நடத்தப்பட்டது. அதன்பின்னர் பேராலய பங்கு தந்தை பிரபாகர் தலைமையில் புத்தாண்டு கூட்டு பாடல் திருப்பலி நடந்தது. இதில் உதவி பங்குத்தந்தை பிரவீன் மற்றும் பங்கு பேரவையினர், இளைஞர் மன்றத்தினர் உள்ளிட்ட கிறிஸ்தவர்கள் திரளாக கலந்து கொண்டு பிரார்த்தனை செய்தனர்.

இதேப்போல் தஞ்சை சிவகங்கை பூங்கா அருகே உள்ள கோட்டை சி.எஸ்.ஐ. கிறிஸ்துநாதர் ஆலயம், தஞ்சை மானம்புச்சாவடியில் உள்ள சி.எஸ்.ஐ. தூய பேதுரு ஆலயம், தஞ்சை புதுக்கோட்டை சாலையில் உள்ள புனித அடைக்கல மாதா ஆலயம், தஞ்சை குழந்தை ஏசு திருத்தலம் உள்ளிட்ட மாவட்டம் முழுவதும் உள்ள கிறிஸ்தவ தேவாலயங்களில் புத்தாண்டு கூட்டுத்திருப்பலி நடந்தது. இதில் ஏராளமான கிறிஸ்தவர்கள் கலந்து கொண்டனர். 

தஞ்சாவூர்:

தஞ்சாவூர் நாஞ்சிக்கோட்டை சாலை உழவர் சந்தை எதிரில் சிட்கோ வளாகத்தில் கவின்மிகு தஞ்சை - சமுதாய நாற்றங்கால் தோட்டம் என்ற திட்டத்தை இன்று கலெக்டர் தினேஷ் பொன்ராஜ் ஆலிவர் தொடங்கி வைத்தார்.

பின்னர் அவர் பேசியதாவது:-

ஆங்கில புத்தாண்டு தினத்தில் சமுதாய நாற்றங்கள் தோட்டம் என்ற திட்டம் தொடங்கி வைக்கப்பட்டுள்ளது. இன்றைய தினம் லயன் சங்கங்கள், ரோட்டரி சங்கங்கள், பல்வேறு அமைப்புகள் , தன்னார்வலர்கள் என அனைவரும் ஒரு இடத்தில் கூடியுள்ளோம்.

சமுதாய நாற்றங்கால் தோட்டம் முக்கியத்துவம் வாய்ந்தது. கவின்மிகு தஞ்சை இயக்கத்தின் மரக்கன்றுகள் நடுதல், தற்போது சமுதாய மாற்றங்கள் தோட்டம் என அவர்களது பல்வேறு சமுதாய , பசுமையான பணிகள் பாராட்டுக்குரியது. விரைவில் கவின்மிகு தஞ்சை இயக்கத்திற்கு கிரீன் சாம்பியன் விருது கிடைக்க வாய்ப்பு உள்ளது. எனக்கு விருது கிடைத்தது கூட்டு முயற்சியால் தான்.

தனி மரம் என்றைக்கும் தோப்பு ஆகாது. கடந்த சில நாட்களுக்கு முன்பு தனியார் தொலைக்காட்சி நிறுவனம் உங்களது சேவையை பாராட்டி விருது வழங்குகிறோம் என கூறினர். அதன்படி அவர்களும் எனக்கு விருது வழங்கினர். ஆனால் தனிப்பட்ட என்னால் மட்டும் இந்த விருது உள்பட பல்வேறு விருதுகளும் எனக்கு கிடைக்கவில்லை.

அனைவரும் ஒன்று சேர்ந்து பணி செய்த கூட்டு முயற்சியால் மட்டுமே அது சாத்தியமானது. முதலமைச்சர் கையால் விருது வாங்க வேண்டும் என்று எனக்கு ஆசை. அந்த ஆசையும் நிறைவேறி விட்டது. முதலமைச்சர் கையால் விருது வாங்கிய பிறகு இன்னும் எனது பணியை திறம்பட செய்ய வேண்டும் என்று எனக்கு ஒரு உந்துதல் கிடைத்துள்ளது.

தஞ்சை மாவட்டத்தில் விளிம்பு நிலை மக்களுக்கு வீடுகளை கட்டிக் கொடுக்க வேண்டும் என்று செந்தமிழ் நகர் திட்டம் உருவாக்கப்பட்டது. முற்றிலும் விளிம்பு நிலையில் உள்ள ஏழை மக்களுக்காக வீடுகள் கட்டிக் கொடுக்கும் திட்டம் தொடங்கப்பட்டது. ஆண்டுக்கு ஏழு வீடுகள் என கடந்த இரண்டு ஆண்டுகளில் 14 வீடுகள் இலக்கு நிர்ணயம் செய்யப்பட்டது.

இதில் 11 வீடுகள் கட்டி முடிக்கப்பட்டுள்ளது. இன்னும் மூன்று வீடுகள் மட்டுமே பாக்கி உள்ளது. வீடுகள் கட்டிக் கொடுக்க லயன் சங்கங்கள், ரோட்டரி சங்கங்கள், அறக்கட்டளைகள் இன்னும் பல்வேறு தன்னார்வ அமைப்புகள் உறுதுணையாக இருந்து தேவையான நிதி வழங்கினர். அதனால்தான் விளிம்பு நிலை மக்களுக்கு வீடு கட்டிக் கொடுக்க முடிந்தது.

அவர்களுக்கு பட்டா வழங்கி வீடு கட்டி கொடுப்பது என்பது கடினமான பணி. இருந்தாலும் அனைவரது கூட்டு முயற்சியால் அந்த பணியையும் திறம்பட செய்து முடித்துள்ளோம். விளிம்பு நிலை மக்களுக்கு வீடு கட்டிக் கொடுத்தது எனக்கு மன நிறைவை கொடுத்துள்ளது. அரசு பணியில் சேர்ந்து இந்த பணியை செய்தது மன நிறைவு. தொடர்ந்து அரசின் திட்டங்கள் அனைத்தும் கடை கோடி மக்களுக்கு சென்று சேரும் வகையில் நடவடிக்கை எடுக்கப்படும்.

இவ்வாறு அவர் கூறினார். இந்த நிகழ்ச்சியில் ஏராளமானோர் கலந்து கொண்டனர்.

தஞ்சாவூர்:

தஞ்சை தலைமை தபால் நிலையத்தில் இன்று கொரோனா காலத்தில் ஆஸ்பத்திரியில் பணிபுரிய எம்.ஆர்.பி. தேர்வு மூலம் தேர்வு செய்யப்பட்ட செவிலியர்கள் தமிழக முதல் -அமைச்சருக்கு தபால் அட்டை அனுப்பும் போராட்டம் நடத்தினர்.

இதில் ஏராளமான செவிலியர்கள் கலந்து கொண்டனர்.

அவர்கள் அனுப்பி உள்ள மனுவில் கூறியிருப்பதாவது:-

நாங்கள் எம்.ஆர்.பி. தேர்வு மூலம் கடந்த 2019-ம் ஆண்டு கட்டாய பணி ஆணை மூலம் கொரோனா மூன்று அலைகளிலும் பல லட்சம் மக்களின் உயிர்களை காப்பாற்றி உள்ளோம்.

எங்களுக்கு நிரந்தர தன்மை உடைய ஒப்பந்த பணி வழங்க வேண்டும்.

ஆனால் தற்போது தற்காலிக முறையில் ஒப்பந்த பணிக்கு செல்லுங்கள் எனக் கூறியுள்ளனர். இதனை நாங்கள் ஏற்றுக்கொள்ள மாட்டோம்.

இட ஒதுக்கீடு பின்பற்றவில்லை என்ற தவறான தகவல் தெரிவிக்கின்றனர். இதனால் நாங்கள் பாதிக்கப்பட்டுள்ளோம்.

எனவே தற்காலிக ஒப்பந்த பணியை ரத்து செய்து நிரந்தர ஒப்பந்த பணி வழங்க வேண்டும் .

இவ்வாறு அதில் கூறப்பட்டுள்ளது.

நாமக்கல்:

பொங்கல் பண்டிகை உலகம் முழுவதும் உள்ள தமிழர்களால் நாளை மறுநாள் உற்சாகமாக கொண்டாடப்பட உள்ளது. இதையொட்டி புத்தாடைகள் மற்றும் பொங்கலுக்கு தேவையான பொருட்களை வாங்க கடைவீதிகளில் பொதுமக்கள் அதிகளவில் குவிந்துள்ளனர்.

குறிப்பாக நாமக்கல்லில் கடைவீதிகளில் உள்ள நகைக்கடை, ஜவுளி கடை களில் கூட்டம் அதிக அளவில் காணப்பட்டது. பெரும்பாலானோர் தங்க ளது குடும்பத்தினருடன் வந்து புத்தம் புதிய டிசைன்க ளில் தங்களுக்கு தேவையான பிடித்தமான துணிகளை தேர்வு செய்தனர். இதே போல நகைக்கடைகளிலும் குடும்பத்துடன் வந்த பெண்கள் புதிய டிசைன்களில் நகைகளை தேர்வு செய்து அணிவித்து மகிழ்ந்தனர்.

பொங்கல் பண்டிகையை யொட்டி பூஜைக்கு படைக்க தேவையான காய்கறிகளை வாங்க, இன்றே நாமக்கல்லில் காய்கறி சந்தைகளிலும் மற்றும் உழவர் சந்தைகளிலும் அதிக அளவில் மக்கள் கூட்டம் காணப்பட்டது. இதனால் காய்கறி விற்பனையும் சூடு பிடித்தது.

மேலும் மாடுகளை அலங்கரிக்கும் பொருட்கள் விற்பனை செய்யப்படும் கடைகளிலும் அதிக அளவில் கூட்டம் காணப்பட்டது. பல வண்ணங்களில் கயிறுகள், கொம்பு கயிறுகள், திருஷ்டி கயிறு, சங்கு, குஞ்சங்கள், கழுத்தில் அணியும் பலவகை மணிகள், சலங்கைகள், குப்பி, பட்டை சங்கிலி, ஜங்குபட்டை, வண்ணபூச்சிகள், வாய் பூட்டு, சாட்டை ஆகிய அலங்கார பொருட்கள் விற்பனைக்கு குவித்து வைக்கப்பட்டிருந்தன. இதனையும் ஏராளமான விவசாயிகள் மாட்டுப் பொங்கல் அன்று மாடுகளை அழகு படுத்துவதற்காக வாங்கி சென்றனர்.

நாமக்கல் மாவட்ட புறநகர் பகுதிகளான ராசிபுரம், திருச்செங்கோடு, பரமத்தி வேலூர், குமாரபாளையம், பள்ளிபாளையம், மோக னூர் உள்பட பல பகுதி களிலும் பொங்கல் பண்டி

கையொட்டி ஜவுளிக்கடை கள், நகை கடைகளில் கூட்டம் அதிகமாக இருந்தது. இதனால் பொங்கல் பண்டிகை களைகட்ட தொடங்கியுள்ளது. நாளை மேலும் கூட்டம் அதிகரிக்கும் என்று வியாபாரிகள் நம்பிக்கை தெரிவித்தனர். 

கோவை

தமிழர் திருநாளான பொங்கல் பண்டிகை நாளை (15-ந் தேதி) கொண்டாடப்படுகிறது. தொடர்ந்து திருவள்ளுவர் தினம், உழவர் திருநாள் என 3 நாட்கள் விழா கொண்டாடப்படுகிறது.

நாளை பொங்கலை முன்னிட்டு அதற்கு தேவையான பொருட்களை வாங்குவதற்காக கோவை, நீலகிரி மாவட்டத்தில் உள்ள மார்க்கெட்டுகளில் பொதுமக்கள் கூட்டம் இன்று அலைமோதியது.

பொங்கலுக்கு தேவையான அடுப்புகள், பச்சரிசி, பானை, வெல்லம் ஆகியவற்றின் விற்பனை சூடு பிடித்து காணப்பட்டது. இதர பொருட்களான கரும்பு, மஞ்சள் கொத்து, பூளைப்பூ, தேங்காய், பழங்கள் விற்பனையும் களை கட்டி இருந்தது.

கவுண்டம்பாளையம் ஹவுசிங் யூனிட் பகுதியில் பொங்கல் பானைகள், பொங்கல் அடுப்பு விற்பனைக்கு குவித்து வைக்கப்பட்டு இருந்தது. இதில் அரைகிலோ, ஒரு கிலோ, 5 கிலோ பொங்கல் பானைகள் வண்ணம் பூசியும், சாதாரணமாகவும் விற்பனை செய்யப்பட்டது.

இந்த பானைகள் ரூ.150 முதல் ரூ.850 வரை விற்பனை செய்யப்பட்டது. மண் அடுப்பு ரூ.150, ரூ.180, ரூ.350-க்கு விற்பனை செய்யப்பட்டு வருகிறது. கடந்த ஆண்டை காட்டிலும் இந்த ஆண்டு பொங்கல் பானை விற்பனை அதிகளவில் நடந்து வருவதாக வியாபாரிகள் தெரிவித்தனர்.

கோவை கடை வீதிகளில் பொங்கல் பொருட்கள் வாங்க ஏராளமானோர் குவிந்தனர். குறிப்பாக வெல்லம் வாங்க ரெங்கே கவுடர் வீதியில் பொதுமக்கள் திரண்டனர். சேலம், ஈரோடு, கவுந்தப்பாடி, தாராபுரம் உள்ளிட்ட பகுதிகளில் இருந்து கொண்டு வரப்பட்ட உருண்டை வெல்லம் விற்பனைக்கு வைக்கப்பட்டிருந்தது. இதனை பொதுமக்கள் ஆர்வமுடன் வாங்கிச் சென்றனர்.

கோவை பூ மார்க்கெட்டில் கரும்பு மற்றும் மஞ்சள் குலைகள் விற்பனை சூடுபிடித்து இருந்தது. பூக்கள் விற்பனையும் விறுவிறுப்பாக நடந்தது. அதேசமயம் பனி காரணமாக பூக்கள் வரத்து குறைந்து இருந்ததால் பூக்கள் விலை கடுமையாக உயர்ந்து காணப்பட்டது.

மேலும் பொங்கல் பூஜைக்கு தேவையான பொருட்களும் அங்கு விற்பனையானது. இதனால் பூ மார்க்கெட்டில் மக்கள் கூட்டம் அலைமோதியது.

இதேபோல பொள்ளாச்சி, ஊட்டி போன்ற இடங்களில் உள்ள மார்க்கெட்டுகளிலும் இன்று மக்கள் கூட்டம் அலைமோதியது. 

திருத்துறைப்பூண்டி:

திருத்துறைப்பூண்டி பாலம் தொண்டு நிறுவனம் சார்பில் வடகிழக்கு பருவமழையால் பாதிக்கப்பட்ட பெரியநாயகிபுரம், விசுவகொத்தமங்கலம், வீரன் நகர் பகுதியை சேர்ந்த 376 கூரை வீடுகளில் வசிக்கும் குடும்பங்களுக்கு ரூ. 2.50 லட்சம் மதிப்பில் தார்பாய் வழங்கும் நிகழ்ச்சி நடைபெற்றது.

நிகழ்ச்சிக்கு செயலாளர் செந்தில்குமார் தலைமை தாங்கினார்.

நகர்மன்ற தலைவர் கவிதாபாண்டியன் மக்களுக்கு தார்பாய் வழங்கி நிகழ்ச்சியை தொடங்கி வைத்தார். இதில் கவுன்சிலர் கோமதி செந்தில்குமார், பாலசுப்பிரமணியன் மற்றும் பலர் கலந்து கொண்டனர்.

தஞ்சாவூர்:

தஞ்சை கலெக்டர் அலுவலகத்தில் இன்று வாராந்திர குறை தீர்க்கும் நாள் கூட்டம் நடைபெற்றது. இதற்கு மாவட்டத் கலெக்டர் தினேஷ் பொன்ராஜ் ஆலிவர் தலைமை தாங்கினார். மாவட்டத்தின் பல்வேறு இடங்களில் இருந்து வந்திருந்த பொதுமக்கள் தங்களது கோரிக்கை மனுக்களை அளித்தனர்.

அப்போது பூதலூர் தாலுகா செங்கிப்பட்டி சேர்ந்த பொதுமக்கள் 60-க்கும் மேற்பட்டோர் மார்க்சிஸ்ட் கம்யூனிஸ்ட் கட்சி பூதலூர் ஒன்றிய செயலாளர் பாஸ்கர், விவசாய சங்க ஒன்றிய செயலாளர் தமிழரசன், விவசாய தொழிலாளர் சங்கம் ஒன்றிய தலைவர் காமராஜ், மாதர் சங்க மாவட்ட செயலாளர்கள் தமிழ் செல்வி , தமிழ்நாடு விவசாயிகள் சங்க மாவட்ட செயலாளர் என்.வி.கண்ணன் ஆகியோர் தலைமையில் அளித்துள்ள மனுவில் கூறியிருப்பதாவது:-

தஞ்சை மாவட்டம் பூதலூர் தாலுகா செங்கிப்பட்டியில் எங்களுக்கு சொந்தமாக குடிமனையோ, வீடும் கிடையாது.

ஆதிதிராவிடர் நலத்துறை மூலமாக ஆதிதிராவிட மக்களுக்கு இலவச குடிமனை பட்டா வழங்கி உள்ளது. அதில் நீண்டகாலமாக குடியேறாமல் காலிமனை உள்ளது.

குடியேறாமல் இருக்கும் காலி குடிமனை பட்டாவை ரத்து செய்து புதிதாக குடியேறி இருக்கும் எங்களுக்கு இலவச குடிமனை பட்டா வழங்க வேண்டும்.இவ்வாறு அதில் கூறப்பட்டுள்ளது.

நாமக்கல்:

நாமக்கல் மாவட்ட ஒருங்கிணைந்த நீதிமன்றத்தில் தேசிய மக்கள் நீதிமன்றம் (லோக் அதாலத்) நடைபெற்றது. மாவட்ட முதன்மை நீதிபதி குணசேகரன் நிகழ்ச்சிக்கு தலைமை வகித்தார். நீதிமன்றத்தில், குடும்ப நலநீதிபதி முனுசாமி, கூடுதல் மாவட்ட நீதிபதி சுந்தரையா, தலைமை குற்றவியல் நீதிபதி வடிவேல், கூடுதல் சார்பு நீதிபதி ஜெயபிரகாஷ் உள்ளிட்ட பல்வேறு நீதிபதிகள் கலந்துகொண்டு, நிலுவையில் உள்ள வழக்குகளை விசாரணை செய்தனர். சாலை விபத்துகள், வங்கி காசோலை வழக்குகள், கல்விக் கடன் பிரச்சினைகள் உள்ளிட்ட பல்வேறு வழக்குகள் சமரசம் மூலம் செய்து தீர்வு செய்யப்பட்டன.

இதில் ராசிபுரம், கோனே ரிப்பட்டியைச் சேர்ந்த, கவிதா என்பவர், அவரது 3 சக்கர வாகனத்தில் கடந்த 18.2.2012 ல் அன்று நாமக்கல்லில் இருந்து ராசிபுரம் செல்லும் போது, கருங்கல்பாளையம் அருகே ரோட்டில் சென்றபோது, போது அவ்வழியாக வந்த லாரி மோதி ஏற்பட்ட விபத்தில், அவரது இடது கால் துண்டிக்கப்பட்டது. இதற்காக தொடரப்பட்ட வழக்கு, மக்கள் நீதிமன்றத்தல் விசாரணைக்கு எடுத்துக்கொள்ளப்பட்டு, அவருக்கு, ரூ17.66 லட்சம் இழப்பீடு வழங்கப்பட்டது. நாமக்கல் மாவட்டத்தில் உள்ள சேந்தமங்கலம், ப.வேலூர், திருச்செங்கோடு, ராசிபுரம் உள்ளிட்ட கோர்ட்டுகளிலும் மக்கள் நீதிமன்றம் நடைபெற்றது. இந்த தேசிய அளவிலான மக்கள் நீதிமன்ற ஏற்பாடுகளை மாவட்ட சட்டப்பணிகள் ஆணைகுழு செயலாளர் விஜய்கார்த்திக் செய்திருந்தார்.

விருதுநகர்

திருச்சுழி அருகே உள்ள சித்தலகுண்டு பகுதியைச் சேர்ந்தவர் முத்துக்குமார் (வயது 27). இவருக்கு 5 வருடங்களுக்கு முன்பு ராமுத் தாய் என்பவருடன் திருமணம் நடந்துள்ளது. இந்த நிலையில் மதுப்பழக்கத்திற்கு அடிமையான முத்துக்குமார் அடிக்கடி மனைவியுடன் தகராறு செய்துவந்துள்ளார். சம்பவத்தன்று முத்துக்குமார் மது குடித்து விட்டு தகராறு செய்வதை மனைவி கண்டித்ததால் தகராறு ஏற்பட்டதாகக் கூறப்படுகிறது. இந்த நிலையில் வீட்டில் யாருமில்லாத நேரத்தில் முத்துக்குமார் தூக்குப்போட்டு தற்கொ லை செய்து கொண்டார். இதுகுறித்து அவரது தந்தை முத்துராமன் கொடுத்த புகாரின்பேரில் திருச்சுழி போலீசார் வழக்குப் பதிவு செய்து விசாரித்து வருகின்றனர்.

சிவகாசி அருகே உள்ள சங்கர்செவல் பகுதியைச் சேர்ந்தவர் ராமர் (34). இவர் கடந்த சில மாதங்களாக உடல்நிலை பாதிப்பால் அவதிப்பட்டு வந்தார். இதனால் அவர் விரக்தியடைந்து காணப்பட்டதாகக் கூறப்படுகிறது. இந்த நிலையில் தூக்குப்போட்டு ராமர் தற்கொலை செய்துகொண்டார். இதுகுறித்த புகாரின்பேரில் ஆலங்குளம் போலீசார் விசாரணை நடத்தி வருகின்றனர்.

உத்தரப்பிரதேச மாநிலம், நாரிபாரி பகுதியைச் சேர்ந்தவர் ராகுல் (19). இவரும், இவரது சகோதரர் அசோக் குமாரும் விருதுநகர் அருகே மல்லாங்கிணறு பகுதியில் உள்ள நூற்பாலை ஒன்றில் வேலை செய்து வந்தனர். கடந்த டிசம்பர் மாதத்தில் ராகுல் சொந்த ஊர் சென்று வந்துள்ளார். அதன்பின்னர் அவர் விரக்தியடைந்து காணப்பட்டதாகக் கூறப்படுகிறது. இந்த நிலையில் அவர் தங்கியிருக்கும் இடத்திற்கு அருகில் உள்ள புளியமரத்தில் தூக்கில் தொங்கிய நிலையில் பிணமாக காணப்பட்டார். தகவலறிந்த போலீசார் சம்பவஇடத்திற்கு வந்து ராகுலின் உடலை மீட்டு பிரேத பரிசோதனைக்காக அனுப்பிவைத்தனர். மேலும் இதுகுறித்து சகோதரர் அசோக் குமார் கொடுத்தபுகாரின் பேரில் வழக்குப்பதிவு செய்து விசாரணை நடத்தி வருகின்றனர்.

சிவகாசி பிச்சாண்டி தெருவைச் சேர்ந்தவர் குருசாமி (26). இவர் பட்டாசு ஆலையில் வேலை பார்த்து வந்தார். மதுப்பழக்கத்திற்கு அடிமையான இவர் திருமணமாகாத ஏக்கத்தில் இருந்ததாகக் கூறப்படுகிறது. இந்த நிலையில் வீட்டில் யாருமில்லாத நேரத்தில் தூக்குப் போட்டு தற்கொலை செய்துகொண்டார். இதுகுறித்து இவரது தாய் தங்கமாரி கொடுத்த புகாரின்பேரில் சிவகாசி கிழக்கு போலீசார் வழக்குப்பதிவு செய்து விசாரணை நடத்தி வருகின்றனர்.

மன்னார்குடி:

திருவாரூர் மாவட்டம், மன்னார்குடியில்உள்ள காமராஜர் பஸ்நிலையம் பழுதடைந்து காணப்பட்ட தால் புதிய கட்டிடம் கட்டும் பணிகளுக்கான அடிக்கல் நாட்டு விழா நடைபெற்றது.

இதில் டி.ஆர்.பி.ராஜா எம்.எல்.ஏ. கலந்து கொண்டு அடிக்கல் நாட்டி வைத்து பணிகளை தொடங்கி வைத்தார்.

பின்னர் நிருபர்களிடம் கூறுகையில்:-

முதல்-அமைச்சர் மு.க.ஸ்டாலின் நவீன வசதிகளுடன் கூடிய ஒருங்கிணைந்த பஸ் நிலையம் கட்டுவதற்கு நிதி ஒதுக்கீடு செய்துள்ளார்.

இதற்கான கட்டுமான பணிகள் முதற்கட்டமாக ரூ. 26 கோடியே 76 லட்சம் மதிப்பில் இன்று தொடங்கப்பட்டுள்ளது.

இந்த பணிகள் 18 மாதங்களுக்குள் முடிக்கப்பட்டு மக்கள் பயன்பாட்டிற்கு கொண்டு வரப்படும்.

இதேபோல், மன்னார்குடியில் பாதாள சாக்கடை பணிகளும், பைபாஸ் சாலை பணிகளும் விரைவில் தொடங்கப்படும் என்றார்.

விழாவில் நகர்மன்ற தலைவர் மண்ணை சோழராஜன், தி.மு.க. நகர செயலாளர் வீரா கணேசன், நகராட்சி ஆணையர் சென்னுகிருஷ்ணன் ஆகி யோர் கலந்து கொண்டனர்.

தென்காசி:

தென்காசி மாவட்டத்தில் மேற்கு தொடர்ச்சி மலைப்பகுதியில் கோடை காலம் நிலவி வருவதால் நீர் நிலைகளும் வறண்டு வருகின்றன.

இதன் காரணமாக வனப்பகுதியில் இருந்து யானை, கரடி, மான்,மிளா போன்ற வனவிலங்குகள் விளை நிலங்களுக்குள்ளும், குடியிருப்பு பகுதிகளுக்கும் தண்ணீர் தேடி வரும் சூழ்நிலை ஏற்பட்டுள்ளது.

மரங்களை சாய்த்தது

இந்நிலையில் குற்றாலம் ஐந்தருவி அருகே உள்ள குடியிருப்பு பகுதிக்குள் புகுந்த யானை ஒன்று அங்கிருந்த 7 தென்னை மரங்களை வேருடன் பிடுங்கி சாய்த்து சென்றுள்ளது.

தொடர்ந்து அருகில் இருந்த வாழை தோட்டத்தில் புகுந்த யானை அங்கிருந்த வாழைக்கன்றுகளையும் பிடுங்கி சேதப்படுத்தி சென்றது. காலையில் பொதுமக்கள் சிலர் குடி யிருப்பு பகுதிகளில் யானை கால் தடம் உள்ளதை கண்டும், தென்னை, வாழை மரங்கள் சாய்க்கப்பட்டு இருப்பதையும் கண்டும் அதிர்ச்சி அடைந்தனர்.

பொதுமக்கள் பீதி

இரவில் குடியிருப்பு பகுதிக்குள் நுழைந்த யானையால் அதிர்ஷ்ட வசமாக பொதுமக்கள் யாருக்கும் எவ்வித பாதிப்பும் ஏற்படவில்லை. எனினும் ஒற்றை யானையின் நட மாட்டம் இருப்பதால் அப்பகுதி பொதுமக்கள் பீதி அடைந்துள்ளனர்.

மேலும் வனத்துறையினர் ஒற்றை யானையை கண்டறிந்து அதனை வனப்பகுதிக்குள் விரட்டும் பணியை மேற்கொள்ள வேண்டும் எனவும் அப்பகுதியினர் கோரிக்கை விடுத்துள்ளனர்.

திருப்பூர் :

திருப்பூர் நகரப்பகுதி மட்டுமின்றி ஊரக பகுதிகளிலும், கோடை வெயில் வெளுத்து வாங்கியது. அதிகபட்ச வெப்பநிலை 98 டிகிரி பாரன்ஹீட் வரை இருந்தது. இந்நிலையில் மாநிலத்தின் பல இடங்களில் கோடை மழை பெய்து வரும் நிலையில் நேற்று மாலை திருப்பூர் நகரப்பகுதி மட்டுமின்றி அவிநாசி, பல்லடம், மங்கலம் என மாவட்டத்தின் பல இடங்களில் கோடை மழை பெய்தது. இதனால் வெயிலின் தாக்கம் குறைந்து குளிர்ச்சி நிலவியதால் பொதுமக்கள் மகிழ்ச்சி அடைந்தனர்.

மழையின் காரணமாக சாலைகளில் வெள்ளம் பெருக்கெடுத்து ஓடியது. சில இடங்களில் ஆக்கிரமிப்பு காரணமாக மழைநீர் குளம் போல் தேங்கியது. இதனால் வாகன ஓட்டிகள் மற்றும் பொதுமக்கள் மிகுந்த சிரமத்திற்கு உள்ளாகினர்.