நீங்கள் தேடியது "slug 100341"

சென்னை:

தமிழ்நாடு காங்கிரஸ் தலைவர் திருநாவுக்கரசர் வெளியிட்டுள்ள அறிக்கையில் கூறி இருப்பதாவது:-

திருநெல்வேலி பகுதியில் உள்ள ஏழைஎளிய மாணவர்களுக்கு கல்வியை வழங்க வேண்டுமென்ற உன்னத நோக்கத்தோடு, தொன்னூறுகளில் தமிழக அரசால் உருவாக்கப்பட்டது மனோன்மணியம் சுந்தரனார் பல்கலைக் கழகம். தொடக்க காலத்தில் துணை வேந்தர்களின் நேர்மையான நிர்வாகத்தினால் கல்விப் பணி சிறப்பாக இருந்தது. ஆனால் காலப்போக்கில் ஆட்சியாளர்களின் தலையீடு காரணமாக பல்வேறு குளறுபடிகள் ஏற்பட ஆரம்பித்தன.

தமிழக பல்கலைக் கழகங்களில் துணை வேந்தர் நியமனம் என்பது தகுதி அடிப்படையில் இல்லாமல் அரசியல் சார்பான முடிவாக மாறி, பின் ‘கோடிகள்‘ மட்டுமே தகுதியை தீர்மானிப்பதாக அமைந்து விட்டது. அதன் காரணமாக பின்பகுதியில் வந்த துணை வேந்தர்கள் பல்கலைக் கழக வளர்ச்சியைப் பற்றி கவலைப்படாமல் முதலீட்டு பணத்திற்கு லாபம் சம்பாதிக்கிற நோக்கத்தில் முனைப்பு காட்ட ஆரம்பித்தார்கள்.

பல்கலைக் கழகத்தில் ஆசிரியர் மற்றும் ஆசிரியர் அல்லாத அலுவலர் நியமனங்களில் ஊழல் கரை புரண்டு ஓடத் தொடங்கியது. எங்கும் ஊழல், எதிலும் ஊழல் என்பது பல்கலைக் கழகத்தின் தாரக மந்திரமாக மாறியது. இதனால் கல்வியின் தரம் அதளபாதாளத்தை நோக்கி செல்ல ஆரம்பித்தது.

மனோன்மணியம் சுந்தரனார் பல்கலைக் கழகத்தில் சமீபகாலமாக பல்கலைக் கழக மானியக் குழு பரிந்துரைத்த அடிப்படை தகுதிகளை காற்றில் பறக்க விட்டு பேராசிரியர், இணை பேராசிரியருக்கான பணி நியமனங்கள் நடைபெற்றுள்ளன. 27 பணி நியமனங்களில் பல கோடி ஊழல் நடந்துள்ளதாக கூறப்படுகிறது. அதேபோல, பல்கலைக் கழகத்தின் கீழ் செயல்படும் கல்லூரிகளில் புதிய பாடப்பிரிவு தொடங்க அங்கீகாரம் வழங்குவதில் அப்பட்டமான விதிமுறை மீறல்கள் நடைபெற்று ஊழலுக்கு வழிவகுத்துள்ளன.

பல்கலைக் கழக மானியக் குழு விதிகளின்படி ஒருவர் துணை வேந்தர் ஆவதற்கு 10 வருடங்கள் பேராசிரியராக பணிபுரிந்திருக்க வேண்டும். ஆனால் தற்போது துணை வேந்தராக உள்ளவர் 7 வருடங்கள் தான் பேராசிரியராக பணிபுரிந்துள்ளார். எனவே, இவரது நியமனம் செல்லாது என்பதை கூறுவதற்கு நிறைய ஆதாரங்கள் உள்ளன.

மேற்சொன்ன அப்பட்டமான விதிமீறல்கள் அனைத்தையும் ஆதாரங்களோடு அறிக்கையாக தொகுத்து தமிழக ஆளுநரிடம் 18.4.2018 அன்று நேரிடையாக மதுரை காமராஜ், மனோன்மணியம் சுந்தரனார், மதுரை தெரசா, அழகப்பா பல்கலைக் கழக ஆசிரியர்கள் சங்கம் வழங்கியிருக்கிறார்கள்.

ஆளுநர் அறிக்கையை பெற்றுக் கொண்டு உரிய நடவடிக்கை எடுப்பதாக உறுதியளித்திருந்தும் இது வரை எந்த நடவடிக்கையும் கடந்த இரண்டு மாதங்களாக எடுக்கப்படவில்லை.

எனவே, பல்கலைக் கழக மானியக்குழுவின் விதிமுறைகளுக்கு புறம்பாக செயல்பட்டு வருகிற மனோன்மணியம் சுந்தரனார் பல்கலைக் கழக நிர்வாகம் குறித்து விரிவான விசாரணை நடத்த தமிழக அரசு உரிய நடவடிக்கை எடுக்க வேண்டுமென கேட்டுக் கொள்கிறேன்.

இவ்வாறு அதில் கூறியுள்ளார்.  #Thirunavukkarasar

ஈரோடு:

தமிழ்நாடு காங்கிரஸ் கட்சியின் மாநில தலைவர் திருநாவுக்கரசர் தமிழகத்தில் உள்ள அனைத்து மாவட்டங்களுக்கும் சென்று கட்சி ஆய்வுக்கூட்டம் நடத்தி வருகிறார்.

அதன்படி ஈரோடு தெற்கு மாவட்டத்தில் ஆய்வுக்கூட்டம் ஈரோடு பூந்துறை ரோட்டில் உள்ள தனியார் திருமண மண்டபத்தில் நடந்தது. இந்த கூட்டத்துக்கு தெற்கு மாவட்ட தலைவர் மக்கள் ஜி.ராஜன் தலைமை தாங்கினார்.

கூட்டத்தில் மாநில தலைவர் திருநாவுக்கரசர் கலந்து கொண்டு கட்சி நிர்வாகிகள் மற்றும் தொண்டர்கள் மத்தியில் பேசினார்.

தற்போது தமிழகத்தில் 60 கட்சிகள் உள்ளன. ரஜினி கட்சி தொடங்க இருக்கிறார். விஜய் போன்றோர் கட்சி தொடங்க போவதாக தகவல் உள்ளது. ஏற்கனவே கமல் கட்சி தொடங்கி விட்டார். எனவே தேர்தலுக்கு முன்பு இன்னும் 10 கட்சிகள் வரை வருவதற்கு வாய்ப்பு இருக்கிறது. ஆனால், அதைப்பற்றி நாம் கவலைப்பட வேண்டியது இல்லை. அ.தி.மு.க. பல அணிகளாக இருக்கிறது. எனவே தற்போதைய நிலையில் தி.மு.க.வுக்கு அடுத்த பெரிய கட்சியாக காங்கிரஸ் கட்சி இருக்கிறது.

பின்னர் நிருபர்களுக்கு பேட்டி அளித்த அவர் கூறியதாவது:-

தமிழகத்தில் உள்ளாட்சி அமைப்புகள் செயல்படாததால் மக்கள் நலத்திட்டப்பணிகள் செய்யப்படவில்லை. எனவே உடனடியாக உள்ளாட்சி தேர்தல் நடத்தப்பட வேண்டும். 18 எம்.எல்.ஏ.க்கள் வழக்கு விரைந்து முடிக்கப்பட வேண்டும். இந்த தீர்ப்பு வந்தால் தமிழகத்தில் அரசியல் மாற்றம் நிகழலாம்.

சேலத்தில் இருந்து சென்னைக்கு 8 வழிச்சாலையில் சென்றால் 30 நிமிடம் குறைவாக இருக்கும் என்கிறார்கள். அது 10 ஆயிரம் கோடி திட்டம் என்றும் கூறுகிறார்கள். நேரத்தை மிச்சப்படுத்த வேண்டும் என்றால், ஏற்கனவே இருக்கிற கிராம சாலைகள், நகர சாலைகள், ஒன்றிய சாலைகள், 4 வழி மற்றும் தேசிய சாலைகளை செப்பனிட்டு சரி செய்தாலே அவர்கள் குறிப்பிடும் அளவு நேரத்தை மிச்சப்படுத்த முடியும். எந்த திட்டமாக இருந்தாலும் மக்கள் விருப்பம் இல்லாமல் நிறைவேற்றக்கூடாது. மக்களை மிரட்டி சிறையில் அடைப்பதை அரசு கைவிட வேண்டும்.

இவ்வாறு திருநாவுக்கரசர் கூறினார். #thirunavukkarasar #dmk #congressparty

திண்டுக்கல்:

தமிழ்நாடு காங்கிரஸ் கமிட்டி மாநில தலைவர் திருநாவுக்கரசர் திண்டுக்கல் வந்தார். அவர் நிருபர்களுக்கு பேட்டியளித்தார். அவர் கூறியதாவது:-

தூத்துக்குடியில் ஸ்டெர்லைட்டுக்கு எதிராக போராட்டம் நடத்திய மக்களின் உணர்வுகளை மத்திய மாநில அரசுகள் புரிந்து கொள்ளவில்லை. காவல் துறையை கொண்டு அடக்கு முறையை ஏவி விட்டதால் 13 பேர் பலியாகி உள்ளனர். முன்னரே மக்களை அழைத்து பேச்சுவார்த்தை நடத்தி ஆலையை மூடியிருந்தால் உயிர் பலி ஏற்பட்டு இருக்காது.

தற்போது 8 வழிச்சாலை பிரச்சினையிலும் அதே போன்ற நிலையைத்தான் தமிழக அரசு கையாண்டு வருகிறது. போராட்டம் நடத்துபவர்கள் மீது வழக்கு பதிவு, கைது, தடியடி, போலீசாரை கொண்டு மிரட்டல் போன்றவற்றை எடுத்து வருகிறது. மக்கள் எதிர்க்கும் எந்த திட்டத்தையும் அரசு செயல்படுத்த நினைக்க கூடாது. மக்களின் எதிர்ப்பை மீறி செயல்படுத்தும் திட்டம் வெற்றி பெறாது.

ஆளுனரை எதிர்த்தால் 7 ஆண்டு, முதல்-அமைச்சரை எதிர்த்தால் 6 ஆண்டு, பாராளு மன்ற உறுப்பினரை எதிர்த்தால் 3 ஆண்டு, சட்ட மன்ற உறுப்பினரை எதிர்த்தால் 1 ஆண்டு என மக்களை மிரட்டி தமிழக அரசு ஆட்சி நடத்துகிறது. அரசு தவறு செய்தால் அதனை சுட்டிக் காட்டி போராட்டம் நடத்துவதுதான் எதிர் கட்சிகள் மற்றும் மக்களின் வேலை. ஆனால் குரல் கொடுத்தாலே அவர்களின் குரல் வளையை நெரிக்கும் பாசிச போக்கை அரசு கையாளுகிறது. இந்த சர்வாதிகார போக்கை கைவிட்டு ஜனநாயக ரீதியில் அரசை வழி நடத்த வேண்டும்.

உச்ச நீதிமன்றம் நேற்று வழங்கிய வரலாற்று சிறப்பு மிக்க தீர்ப்பு டெல்லி மற்றும் புதுச்சேரி மாநிலங்களுக்கு மட்டும் பொருந்துவது கிடையாது. இந்தியாவில் உள்ள அனைத்து மாநிலங்களுக்கும் பொருந்தும். ஆனால் சுப்ரீம் கோர்ட்டு உத்தரவு புதுச்சேரிக்கு பொருந்தாது என கிரண்பெடி பேசி வருகிறார். அது போன்ற நிலையில்தான் தமிழக ஆளுனரும் நடந்து வருகிறார். மக்களால் தேர்ந்தெடுக்கப்பட்ட பிரதிநிதிகள்தான் அரசை வழி நடத்த வேண்டும். ஆளுனருக்கு அந்த அதிகாரம் கிடையாது.

பாராளுமன்றத்துக்கும், சட்டமன்றத்துக்கும் ஒரே நேரத்தில் தேர்தல் நடத்த வேண்டும் என்பது மோடியின் விருப்பமாக வேண்டுமானால் இருக்கலாம். ஆனால் இது சாத்தியமல்ல என்று தேர்தல் கமி‌ஷனே கூறியுள்ளது. தன்னிச்சையான இந்த முடிவை கைவிட்டு காங்கிரஸ் மற்றும் மாநில கட்சிகளை அழைத்து பேசி மத்திய அரசு ஒருமித்த கருத்தை எட்ட வேண்டும். காவிரி மேலாண்மை வாரிய பிரச்சினையில் தனது மாநிலத்துக்கு ஆதரவான நிலைப் பாட்டையே குமாரசாமி எடுத்து வருகிறார். தமிழகத்துக்கு உரிய தண்ணீரைப் பெற முதல்வர் எடப்பாடி பழனிச்சாமி தொடர்ந்து அழுத்தம் தர வேண்டும்.

இவ்வாறு அவர் கூறினார்.

பேட்டியின்போது திண்டுக்கல் கிழக்கு மாவட்ட காங்கிரஸ் தலைவர் அப்துல்கனிராஜா, மாநகர தலைவர் சொக்கலிங்கம், துணைத்தலைவர் ஆறுமுகம், நிஜகண்ணன், நிர்வாகிகள் வக்கீல்குப்புசாமி, கணேசன், ஹைருல்லா மற்றும் பலர் உடன் இருந்தனர். #thirunavukkarasar #tngovt

காங்கயம்:

திருப்பூர் மாவட்டம் காங்கயத்தில் உள்ள ஒரு திருமண மண்டபத்தில் திருப்பூர் வடக்கு மாவட்ட காங்கிரஸ் கமிட்டி வாக்குச்சாவடி முகவர்கள் கலந்தாய்வு கூட்டம் நடந்தது. கூட்டத்திற்கு திருப்பூர் வடக்கு மாவட்ட தலைவர் ப.கோபி தலைமை தாங்கினார்.

கூட்டத்தில் முன்னாள் எம்.பி.குப்புசாமி, முன்னாள் எம்.எல்.ஏ. பழனிசாமி, மாநில மகிளா காங்கிரஸ் தலைவர் ஜான்சிராணி, மாவட்ட இளைஞர் காங்கிரஸ் தலைவர் சரவணன், பொதுக்குழு உறுப்பினர் காட்டூர் வெங்கடாச்சலம், பொங்கலூர் வட்டார தலைவர் தியாகராஜன், மற்றும் காங்கயம், வெள்ளகோவில், பொங்கலூர், அவினாசி, பல்லடம் ஆகிய வட்டாரங்களை சேர்ந்த நிர்வாகிகள் கலந்து கொண்டனர்.

கூட்டத்தில் கலந்து கொண்ட தமிழக காங்கிரஸ் கமிட்டி தலைவர் திருநாவுக்கரசர் நிருபர்களுக்கு பேட்டி அளித்தார். அப்போது அவர் கூறியதாவது:-

தமிழகத்தில் 18 எம்.எல்.ஏ.க்களை தகுதி நீக்கம் செய்த வழக்கில் சுப்ரீம் கோர்ட்டு தலையிட்டு மூன்றாவதாக மூத்தநீதிபதி ஒருவரை நியமித்து தற்போது வழக்கு விசாரணை தொடங்கி இருப்பது நல்லது. தமிழகத்தில் உள்ளாட்சி தேர்தலை மீண்டும் தள்ளி வைத்து இருப்பது கண்டிக்க தக்கது. உள்ளாட்சி தேர்தல் நடைபெறாததால் மக்கள் தங்களது குறைகளை தெரிவிக்க முடியவில்லை. எனவே உள்ளாட்சி தேர்தலை நடத்த அரசு முன்வர வேண்டும். தற்போது சேலம்-சென்னை 8 வழிச்சாலை விவகாரத்தில் மக்கள் போராடி வருகிறார்கள். மக்கள் விருப்பத்திற்கு எதிராக திட்டத்தை நிறைவேற்ற அரசு முயற்சி செய்யக்கூடாது. பா.ஜனதாவுக்கு தமிழகத்தில் வாய்ப்பு இல்லை. எனவே மக்களுக்கு நன்மை பயக்கும் திட்டங்களை செயல்படுத்தாமல் தமிழக மக்களை தொல்லைகளுக்கு உள்ளாக்கும் திட்டங்களை மட்டுமே செயல்படுத்தி வருகிறது.

தமிழகத்தில் பா.ஜனதா வளர்ந்து விட்டதாக கனவுலகில் மிதந்து வருகிறது. டெல்லி கவர்னர் வி‌ஷயத்தில் சுப்ரீம் கோர்ட்டின் தீர்ப்பு வரவேற்கத்தக்கது. அது அனைத்து மாநில கவர்னர்களுக்கும் பொருந்தும். அதன்படி கவனர்கள் நடந்து கொள்ள வேண்டும். தமிழக அரசு வேறு அல்ல. மத்திய அரசு வேறு அல்ல, இரண்டும் பா.ஜனதா அரசுதான். பா.ஜனதா மற்ற மாநிலங்களில் ஒன்றிரண்டு எம்.எல்.ஏ.க்களை வைத்து ஆட்சி நடத்துகிறது. ஆனால் தமிழகத்தில் எம்.எல்.ஏ.க்கள் இல்லாமல் ஆட்சி நடத்தி வருகிறது. தி.மு.க.வுடன் கூட்டணி தொடரும். காங்கயத்தில் இரும்பு தாது எடுக்கும் விவகாரத்தில் மக்கள் பக்கம் காங்கிரஸ் நிற்கும்.

இவ்வாறு அவர் கூறினார். #thirunavukkarasar #bjp