நீங்கள் தேடியது "slug 102422"

சேலம்:

தமிழகத்தில் அடுத்த மாதம் (ஏப்ரல்) 18-ந்தேதி பாராளுமன்ற தேர்தல் நடைபெறுகிறது. இதையொட்டி தேர்தல் நடத்தை விதி முறைகள் அமுலுக்கு வந்துள்ளதால் பறக்கும் படையினர் அதிரடி சோதனையில் ஈடுபட்டுள்ளனர்.

சேலம் மேற்கு தாசில்தார் வள்ளி தலைமையிலான பறக்கும் படையினர் சேலம் திருவாக்கவுண்டனூர் ரவுண்டானா பகுதியில் வாகன சோதனையில் ஈடுபட்டனர். அப்போது அந்த வழியாக வந்த கார் ஒன்றை நிறுத்தி சோதனை செய்தனர்.

அப்போது அந்த காரில் ரூ.3 லட்சம் இருந்தது தெரிய வந்தது. இது தொடர்பாக காரில் வந்த ஈரோட்டை சேர்ந்த சண்முகம் (வயது 50) என்பவரிடம் நடத்திய விசாரணையில் மருத்துவ மனையில சேர்த்துள்ள தாயின் சிகிச்சைக்காக கிருஷ்ணகிரி மாவட்டம் காவேரிப்பட்டணத்தில் இருந்து நண்பரிடம் அந்த பணத்தை வாங்கி வந்ததாக கூறினார்.

ஆனால் அதற்கான ஆவணங்கள் எதுவும் அவரிடம் இல்லை. இதுகுறித்து தாசில்தார் வள்ளி மாவட்ட தேர்தல் அதிகாரியான கலெக்டர் ரோகிணிக்கு தகவல் தெரிவித்தார். உடனே கலெக்டர் சம்பவ இடத்திற்கு வந்து விசாரணை நடத்தினார். பின்னர் போதிய ஆவணம் இல்லாததால் அந்த பணத்தை கருவூலத்தில் ஒப்படைக்க உத்தரவிட்டார். பணத்தை கொண்டு வந்தவர் உரிய ஆவணங்களை காண்பித்து பணத்தை பெற்றுக் கொள்ளலாம் என்று கலெக்டர் கூறினார்.

இதேபோல் வீரபாண்டி பகுதியில் பறக்கும் படை அதிகாரி செல்வகுமார் தலைமையிலான போலீசார் நேற்று சோதனையில் ஈடுபட்டனர். அப்போது அந்த காரை மறித்து சோதனை செய்தபோது அதில் ரூ.73 ஆயிரம் பணம் இருந்தது. இது தொடர்பாக காரை ஓட்டி வந்த சேலம் பேர்லேண்ட்ஸ் பகுதியை சேர்ந்த சேகர் (வயது 59) என்பவரிடம் விசாரித்தனர். அப்போது அவர் பவர்லூம் வைத்திருப்பதாகவும், தன்னிடம் வேலை பார்ப்பவர்களுக்கு சம்பளம் கொடுப்பதற்காக கொண்டு செல்வதாகவும் கூறினார். ஆனால் அவரிடம் ஆவணங்கள் ஏதும்இல்லாததால் அந்த பணத்தை பறிமுதல் செய்து கருவூலத்தில் ஒப்படைத்தனர்.

தொடர்ந்து 2-வது நாளாக இன்றும் 33 பறக்கும் படையினர் மாவட்டம் முழுவதும் அதிரடி சோதனையில் ஈடுபட்டு வருகிறார்கள். இதனால் வியாபாரிகள் தொழில் அதிபர்கள் அத்தியாவசிய தேவைக்குகூட பணத்தை கொண்டு செல்ல முடியாமல் தவித்து வருகிறார்கள்.

சேலம்:

சேலம் மாவட்டத்தில் கடந்த சில மாதங்களாக 10 ரூபாய் நாணயத்தை வியாபாரிகள் வாங்குவது கிடையாது.

தமிழ்நாட்டில் மற்ற மாவட்டங்களில் 10 ரூபாய் நாணயங்கள் புழக்கத்தில் இருக்கிறது. ஆனால் சேலம் - நாமக்கல் மாவட்டங்கள் உள்பட சில பகுதிகளில் 10 ரூபாய் நாணயங்கள் செல்லாது என்ற முடிவுக்கு வியாபாரிகள் வந்துவிட்டனர். இதனால் பொதுமக்களும் 10 ரூபாய் நாணயத்தை வாங்குவதும் கிடையாது, கொடுப்பதும் கிடையாது.

தற்போது சேலத்தில் 5 ரூபாய் நோட்டுக்கும் சிக்கல் வந்துவிட்டது. இந்த ரூபாய் நோட்டை வியாபாரிகள் வாங்க மறுத்து வருகின்றனர்.

இதனால் வியாபாரிகளுக்கும் பொதுமக்களுக்கும் இடையே பல இடங்களில் வாக்குவாதம் ஏற்படுகிறது. 5 ரூபாய் நோட்டை வாங்க மறுப்பது ஏன்? என்று வியாபாரிகளிடம் கேள்வி கேட்டால் இந்த ரூபாய் செல்லாது, எனவே நாங்கள் வாங்க மாட்டோம் என்று கூறுகிறார்கள்.

இதனால் பொதுமக்கள் அதிருப்தி அடைந்துள்ளனர். வெளியூரில் இருந்து சேலத்துக்கு வரும் பயணிகள் தவிப்புக்குள்ளாகி உள்ளனர். எல்லா ஊரிலும் 10 ரூபாய் நாணயம், 5 ரூபாய் நோட்டு செல்லும்போது இங்கு மட்டும் ஏன் செல்லாது என்று அவர்கள் பஸ் கண்டக்டர் மற்றும் ஓட்டல்களில் தகராறில் ஈடுபட்டு வருகின்றனர். தினம் தினம் இந்த காட்சிகளை பார்க்க முடிகிறது.

இதுபற்றி பொதுமக்கள் கூறும்போது, சேலத்துக்கு மட்டும் 10 ரூபாய் நாணயம், 5 ரூபாய் நோட்டை வாங்கக்கூடாது என்று தனி சட்டமா இருக்கிறது? யாரோ வி‌ஷமிகள் இதுபோன்ற செய்தியை பரப்பி பொதுமக்களை குழப்பி வருகின்றனர்.

இந்த பிரச்சினையை தீர்க்க அதிகாரிகள் தெளிவான விளக்கத்தை வியாபாரிகளுக்கு தெரிவிக்க வேண்டும் என்று கூறினார்கள்.

இதுகுறித்து அதிகாரி ஒருவரிடம் கேட்டபோது, 10 ரூபாய் நாணயம் , 5 ரூபாய் நோட்டு செல்லாது என்று அரசு எதுவும் அறிவிக்கவில்லை. இதை வியாபாரிகள் வாங்க மறுப்பது கண்டனத்துக்குரியது.

இதுகுறித்து சம்பந்தப்பட்டவர்களிடம் புகார் கொடுத்தால் அவர்கள் மீது நடவடிக்கை எடுக்கப்படும் என்று கூறினார்.

சேலம்:

பெங்களூருவில் இருந்து நேற்று இரவு சேலம் மாவட்டம் வழியாக பொள்ளாச்சிக்கு தனியார் ஆம்னி பஸ் ஒன்று புறப்பட்டது. படுக்கை வசதியுடன் கூடிய இந்த பஸ்சில் 28 பயணிகள் பயணம் செய்தனர்.

இந்த பஸ்சை சேலம் மாவட்டம் தாரமங்கலம், நாச்சினம்பட்டி பகுதியை சேர்ந்த டிரைவர் சரவணன் என்பவர் ஓட்டி வந்தார்.

இன்று அதிகாலை 4 மணிக்கு பஸ் சேலம் கொண்டலாம் பட்டி பட்டர்பிளை மேம்பாலத்தில் சென்றபோது திடீரென நிலைதடுமாறி தலைகீழாக பாலத்தில் இருந்து 30 அடி பள்ளத்தில் கவிழ்ந்தது.இதனால் பஸ்சில் பயணம் செய்த பயணிகள் உயிர் பயத்தால் அலறினார்கள்.

இந்த விபத்தில் பஸ்சில் இருந்த திருப்பூர், ஜம் ஜம் நகரை சேர்ந்த பனியன் நிறுவன உரிமையாளர் தனசேகரன் (வயது 42) என்பவர் உடல் நசுங்கி சம்பவ இடத்திலேயே பலியானார். மேலும் டிரைவர் சரவணன், துரைசாமி, அஸ்வின், அபினாஸ், திஸ்முகமது உள்பட 16 பேர் படுகாயம் அடைந்தனர்.

இது பற்றி போலீசாருக்கும், தீயணைப்பு நிலையத்துக்கும் தகவல் தெரிவிக்கப்பட்டது. உடனடியாக போலீசார் மற்றும் தீயணைப்பு நிலைய வீரர்கள் சம்பவ இடத்திற்கு விரைந்து வந்தனர்.

மேலும் இந்த விபத்து குறித்து கேள்விப்பட்டதும் சேலம் மாவட்ட கலெக்டர் ரோகிணி மற்றும் மாநகர போலீஸ் கமி‌ஷனர் சங்கர் ஆகியோர் சம்பவ இடத்திற்கு வந்து பார்வையிட்டு மீட்பு பணிகளை துரிதப்படுத்தினர்.

பஸ் இடிபாடுகளில் சிக்கியவர்களை போலீசார் மற்றும் தீயணைப்பு துறையினர் ஆகியோர் சேர்ந்து மீட்டு வெளியே கொண்டு வந்தனர். அவர்களுக்கு முகம், கை, கால், தலை உள்ளிட்ட இடங்களில் பலத்த அடிப்பட்டு இருந்தது. வலியால் அய்யோ, அம்மா என கதறியபடி இருந்தனர். பயணிகள் சிலர் பதட்டத்துடனே இருந்தனர்.

பின்னர் அவர்கள் சிகிச்சைக்காக ஆஸ்பத்திரிக்கு அனுப்பி வைக்கப்பட்டனர். இதில் 12 பேர் சேலம் அரசு ஆஸ்பத்திரியில் சேர்க்கப்பட்டனர். 4 பேர் சிகிச்சைக்காக தனியார் ஆஸ்பத்திரியில் சேர்ந்தனர். அவர்களுக்கு அங்கு தொடர்ந்து சிகிச்சை அளிக்கப்பட்டு வருகிறது.

விபத்தில் சிக்கிய ஆம்னி பஸ் 5 கிரேன்கள் மூலம் தூக்கி நிலைநிறுத்தப்பட்டு, அங்கிருந்து அப்புறப்படுத்தப்பட்டது.

விபத்து குறித்து விசாரணை நடத்தியதில் பஸ்சின் மேற்கூரையில் அதிக பொருட்கள் ஏற்றி வந்ததே விபத்துக்கு காரணம் என தெரியவந்தது.

காயம் அடைந்த பயணிகள் கூறுகையில், நாங்கள் எப்படியோ அதிர்ஷ்டவசமாக உயிர் பிழைத்துக் கொண்டோம். கடவுளுக்கு நன்றி கண்ணீர் மல்க என்றனர்.

சேலம்:

சேலம் அழகாபுரத்தில் பெருமாள் கோவில் உள்ளது. இதன் அருகே எஸ்.எஸ். பழக்கடை செயல்பட்டு வந்தது. இந்த கடையில் நேற்று வியாபாரத்தை முடித்த ஊழியர்கள் வழக்கம் போல கடையை பூட்டி சென்றனர்.

இன்று காலை மீண்டும் கடையை திறக்க வந்த போது கடையின் கதவு திறந்து கிடந்தது. இதை பார்த்த கடை ஊழியர்கள் உரிமையாளருக்கு தகவல் தெரிவித்தனர். உடனே அங்கு விரைந்து சென்ற கடை உரிமையாளர் உள்ளே சென்று பார்த்தார்.

அப்போது கல்லாவில் இருந்த பணத்தை மர்ம நபர்கள் கொள்ளையடித்து சென்றதாக கூறப்படுகிறது. ஆனால் எவ்வளவு பணம் கொள்ளை போனது என்ற விவரத்தை அவர் சொல்ல மறுத்து விட்டார். எப்போதும் ஆள் நடமாட்டம் உள்ள இந்த பகுதியில் துணிகர கொள்ளை நடந்த சம்பவம் அந்த பகுதி மக்களிடம் பெரும் பீதியை ஏற்படுத்தி உள்ளது.

இதுகுறித்து அழகாபுரம் போலீசார் விசாரணை நடத்தி வருகிறார்கள்.

சேலம்:

சேலம் கந்தம்பட்டியை சேர்ந்தவர் பழனிசாமி (வயது 45). இவர் நேற்று அந்த பகுதியில் நடந்து சென்று கொண்டிருந்தார்.

அப்போது அங்கு வந்த தொளசம்பட்டியை சேர்ந்த பிரபல ரவுடி மாரியப்பன் (56) என்பவர் கத்தியை காட்டி மிரட்டி அவர் அணிந்திருந்த ஒரு பவுன் செயினை பறித்தார்.

இது குறித்து பழனிசாமி சூரமங்கலம் போலீசில் புகார் கொடுத்தார். அதன் பேரில் வழக்கு பதிவு செய்த போலீசார் மாரியப்பனை கைது செய்தனர். மாரியப்பன் மீது ஏற்கனவே செவ்வாய்ப்பேட்டை போலீஸ் நிலையம் உள்பட பல்வேறு போலீஸ் நிலையங்களில் 13 வழக்குகள் உள்ளது குறிப்பிடத்தக்கது.