நீங்கள் தேடியது "slug 102422"

சேலம்:

தொழிலாளர் நலச்சட்டங்களை முறையாக அமல் படுத்த வேண்டும், பொதுத்துறை பங்குகளை தனியாருக்கு விற்க கூடாது, விலைவாசி உயர்வை கட்டுப்படுத்த வேண்டும், குறைந்த பட்ச மாத ஊதியம் 18 ஆயிரம் வழங்க வேண்டும் என்பது உள்பட பல்வேறு கோரிக்கைகளை வலியுறுத்தி மத்திய, மாநில அரசு ஊழியர்கள் மற்றும் தொழிலாளர்கள் 2 நாட்கள் வேலை நிறுத்த போராட்டத்தை நேற்று தொடங்கினர்.

நேற்று கோரிக்கைகளை வலியுறுத்தி அனைத்து தொழிற்சங்கத்தினர், அரசு ஊழியர்கள், தொழிலாளர்கள், பி.எஸ்.என்.எல். மற்றும் எல்.ஐ.சி. ஊழியர்கள் திரண்டு ஆர்ப்பாட்டத்தில் ஈடுபட்டனர்.

2-வது நாளான இன்றும் கோரிக்கைகளை வலியுறுத்தி அனைத்து தொழிற்சங்கங்கள் சார்பில் சேலம் பழைய பஸ் நிலையம் அருகில் உள்ள தபால் நிலையம் முன்பு மறியல் போராட்டம் நடந்தது.

அரசு ஊழியர்கள், ஏற்காடு எஸ்டேட் தொழிலாளர்கள் நாட்டாமை கட்டிடம் முன்பு ஆர்ப்பாட்டத்தில் ஈடுபட்டனர். ஸ்ரீரங்கா பாளையம் பி.எஸ்.என்.எல்.அலுவலகம் முன்பு பி.எஸ்.என்.எல். ஊழியர்கள் ஆர்ப்பாட்டத்தில் ஈடுபட்டனர்.

காந்திரோட்டில் உள்ள எல்.ஐ.சி. அலுவலகம் முன்பு எல்.ஐ.சி. ஊழியர்கள் ஆர்ப்பாட்டத்தில் ஈடுபட்டனர். ஆர்ப்பாட்டத்தில் ஈடுபட்டவர்கள் கோரிக்கைகளை வலியுறுத்தி மத்திய, மாநில அரசுகளுக்கு எதிராக கண்டன கோ‌ஷங்களையும் எழுப்பினர்.

இந்த ஆர்ப்பாட்டம் மற்றும் போராட்டங்களால் அரசு பணிகள் பாதிக்கப்பட்டது. இதனால் பொதுமக்கள் கடும் அவதி அடைந்தனர்.

கொண்டலாம்பட்டி:

சேலம் மாவட்டம் சித்தர் கோவிலிலிருந்து சேலம் நோக்கி, இன்று பகல் 25 வயது மதிக்கத்தக்க வாலிபர் ஒருவர் மோட்டார் சைக்கிளில் வந்து கொண்டிருந்தார். சித்தர் கோவில் மெயின்ரோடு பனங்காடு அருகே வந்தபோது, அந்த வழியாக வந்த டாடா சுமோ கார் அவர் மீது பயங்கரமாக மோதியது.

இந்த விபத்தில் படுகாயம் அடைந்த வாலிபர் சம்பவ இடத்திலேயே பரிதாபமாக இறந்தார். இதுபற்றி அறிந்ததும் போலீசார் அங்கு விரைந்து சென்று உடலை கைப்பற்றி சேலம் அரசு ஆஸ்பத்திரிக்கு அனுப்பி வைத்தனர். அவர் யார்? எந்த ஊரை சேர்ந்தவர்? என்பது குறித்து போலீசார் விசாரணை நடத்தி வருகின்றனர்.

சேலம்:

சேலம் கோட்டை பெருமாள் கோவில் பின் பகுதியில் சின்னசாமி தெரு உள்ளது.

இந்த தெருவில் வசிக்கும் கவுதீப்முகைன் என்பவர் நேற்றிரவு வழக்கம் போல தனது மோட்டார் சைக்கிளை வீட்டு முன்பு நிறுத்தி விட்டு தூங்க சென்றார்.

இன்று அதிகாலை 2.30 மணியளவில் வீட்டிற்குள் புகை வாடை வருவதை அறிந்த அவர் சமையல் அறைக்கு சென்று பார்த்தார்.அப்போது அங்கிருந்து புகை வரவில்லை என்பதை உணர்ந்த அவர் கதவை திறந்து வெளியே வந்தார்.

வீட்டின் முன்பு நிறுத்தியிருந்த மோட்டார் சைக்கிள் தீப்பிடித்து எரிந்து கொண்டிருந்தது. இதனால் அதிர்ச்சி அடைந்த அவர் தண்ணீரை ஊற்றி தீயை அணைக்க முயன்றார்.

அப்போது 5 வீடுகளை தாண்டி ஒரு டிரான்ஸ்பார்மரின் கீழ் பகுதியில் நிறுத்தப்பட்டிருந்த 5 மோட்டார் சைக்கிள்கள் மற்றும் ஒரு சைக்கிளும் தீப்பிடித்து எரிவதை பார்த்து மேலும் அதிர்ச்சி அடைந்தார். உடனே சத்தம்போட்டு அவர்களை எழுப்பினார்.

அதிகாலை 2.30 மணி என்பதால் வீட்டில் அயர்ந்து தூங்கி கொண்டிருந்த மோட்டார் சைக்கிள்களின் உரிமையாளர்களான ரகுமத்துல்லா, சர்தீன், சுல்தான், முபாரக், சானாஷ் மற்றும் சைக்கிள் உரிமையாளரான ரி‌ஷன் (19) மற்றும் அவர்களது உறவினர்கள் அதிர்ச்சி அடைந்த படி வெளியே ஓடி வந்தனர்.

பின்னர் மோட்டார் சைக்கிளில் எரிந்த தீயை அணைக்க முயன்றனர். ஆனால் தீ கொளுந்து விட்டு எரிந்ததால் அவர்களால் அருகில் செல்ல முடியவில்லை. இதனால் அந்த மோட்டார் சைக்கிள்கள் முற்றிலும் எரிந்து நாசமானது.

இதனால் அதிர்ச்சியில் உறைந்த அவர்கள் கதறினர். மேலும் மர்ம நபர்கள் பெட்ரோலை ஊற்றி மோட்டார் சைக்கிளுக்கு தீ வைத்ததாக அவர்கள் புகார் கூறினர்.

தகவல் அறிந்த கோட்டை போலீசார் சம்பவ இடத்திற்கு விரைந்து சென்று விசாரணை நடத்தினர். அப்போது அங்கு திரண்ட அந்த பகுதியினர் மோட்டார் சைக்கிளுக்கு தீ வைத்த மர்மநபர்களை உடனே பிடித்து கடும் நடவடிக்கை எடுக்க வேண்டும் என்று கோரிக்கை விடுத்தனர்.

மேலும் அந்த பகுதியில் உள்ள கடைகளில் ஏதாவது கேமிராக்கள் பொருத்தப்பட்டுள்ளதா? அல்லது அதில் மர்ம நபர்கள் உருவம் பதிந்துள்ளதா? என்பது குறித்து போலீசார் விசாரணையில் இறங்கி உள்ளனர்.

சேலம் மாநகரின் முக்கிய பகுதியான கோட்டையில் ஒரே நேரத்தில் 6 மோட்டார் சைக்கிள்கள் மற்றும் ஒரு சைக்கிளுக்கும் தீ வைத்து எரிக்கப்பட்ட சம்பவம் அந்த பகுதியில் இன்று அதிகாலை பெரும் பரபரப்பை ஏற்படுத்தியது.

சேலம்:

சேலம் இளம்பிள்ளையை சேர்ந்தவர் சக்திவேல் (வயது 22). இவர் இன்று அதிகாலை சேலம் புதிய பஸ் நிலையத்தில் சந்தேகத்திற்கு இடமளிக்கும் வகையில் சுற்றி திரிந்தார். இதை பார்த்த பள்ளப்பட்டி போலீசார் அவரிடம் விசாரித்தனர்.

அப்போது அவர் முன்னுக்கு பின் முரணாக பேசியதால் அவர் வைத்திருந்த கைப்பையை சோதனை செய்தனர். அதில் லேப்-டாப் மற்றும் ஆப்பிள் போனும் இருந்தது.

இது குறித்து தொடர்ந்து விசாரணை நடத்திய போது அந்த பொருட்களை பெங்களூரில் இருந்து நெல்லைக்கு ரெயிலில் சென்ற கார்த்திகா என்ற பெண்ணிடம் ரெயிலில் இருந்து திருடியதாக கூறப்படுகிறது. இதையடுத்து ரெயில்வே போலீசார் அவரிடம் விசாரணை நடத்தி வருகிறார்கள்.

சேலம்:

சேலம் அஸ்தம்பட்டி கள்ளிக்காட்டை சேர்ந்தவர் ஜெயராமன் (வயது 60). இவருக்கு கடந்த சில நாட்களுக்கு முன்பு திடீரென காய்ச்சல் பாதிப்பு ஏற்பட்டது.

பின்னர் அந்த பகுதியில் உள்ள ஆஸ்பத்திரிகளில் சிகிச்சை பெற்றும் குணமாகாததால் 2 நாட்களுக்கு முன்பு ஜெயராமனை அவரது உறவினர்கள் சேலம் அரசு ஆஸ்பத்திரியில் சிகிச்சைக்காக சேர்த்தனர்.

அங்கு அவரை டாக்டர்கள் பரிசோதித்த போது வைரஸ் காய்ச்சல் பாதிப்பு இருப்பது கண்டறியப்பட்டது. தொடர்ந்து காய்ச்சல் வார்டில் அனுமதிக்கப்பட்ட அவருக்கு தீவிர சிகிச்சை அளிக்கப்பட்டது.

2 நாட்களாக தீவிர சிகிச்சை அளித்தும் பலனின்றி ஜெயராமன் நேற்றிரவு பரிதாபமாக இறந்தார். இதை பார்த்த உறவினர்கள் கதறி அழுதனர்.

அஸ்தம்பட்டி பகுதியில் மேலும் பலருக்கு இதே போல காய்ச்சல் பாதிப்பு இருப்பதாகவும், சுகாதாரத்துறை அதிகாரிகள் கண்டு கொள்ளவில்லை என்றும் அந்த பகுதி மக்கள் புகார் கூறி உள்ளனர்.

எனவே சுகாதாரத்துறை அதிகாரிகள் அந்த பகுதியில் முகாமிட்டு காய்ச்சலை கட்டுப்படுத்த நடவடிக்கை எடுக்க வேண்டும் என்று அந்த பகுதி மக்கள் கோரிக்கை விடுத்துள்ளனர்.