நீங்கள் தேடியது "slug 102691"

நெல்லை:

நெல்லை மாவட்டத்தில் கடந்த சில நாட்களாக பரவலாக மழை பெய்து வருகிறது. அணைகளின் நீர்ப்பிடிப்பு பகுதியில் பெய்து வரும் மழையினால் அணைகளுக்கு நீர்வரத்து அதிகரித்துள்ளது.

ஏற்கனவே தென்மேற்கு பருவ மழையினால் பெரும்பாலான அணைகள், குளங்கள் நிரம்பியிருந்தன. இந்த அணைகள், குளங்களில் இருந்து பாசனத்துக்கு தண்ணீர் வழங்கப்பட்டு வருகிறது.

இந்த நிலையில் தற்போது வடகிழக்கு பருவ மழை காரணமாக மாவட்டம் முழுவதும் பரவலாக மழை பெய்து வருகிறது. இதனால் அணைகளுக்கு நீர்வரத்து அதிகரித்து உள்ளது. நேற்று மாவட்டத்தில் பல பகுதியில் இடி, மின்னலுடன் மழை கொட்டியது. குறிப்பாக மணி முத்தாறு, நெல்லை, சேரன்மகாதேவி பகுதியில் கன மழை பெய்தது.

இதனால் தாழ்வான இடங்களில் மழை நீர் தேங்கியது. சாலைகளில் வெள்ளம் பெருக்கெடுத்து ஓடியது. குற்றாலம், பாபநாசம் மலைப் பகுதியில் பெய்த மழையினால் குற்றாலம் மெயினருவி, ஐந்தருவி, பாபநாசம் அகஸ்தியர் அருவி, மணிமுத்தாறு அருவி ஆகிய அருவிகளில் அதிகளவு தண்ணீர் கொட்டியது.

தற்போது அரையாண்டு தேர்வுகள் முடிந்து பள்ளிகளுக்கு விடுமுறைவிடப்பட்டுள்ளதால் அருவிகளில் குளிக்க சுற்றுலா பயணிகள் கூட்டம் அதிகமாக காணப்பட்டது.

ஐயப்ப சீசன் என்பதால் குற்றாலம் அருவிகளில் குளிக்க ஐயப்ப பக்தர்களும் அதிகளவில் வந்தனர். இதனால் கூட்டத்தை ஒழுங்கு படுத்த அருவிகளில் போலீசார் நிறுத்தப்பட்டனர். தொடர் மழை காரணமாக பாபநாசம், சேர்வலாறு, மணிமுத்தாறு உள்ளிட்ட அணைகளுக்கு நீர் வரத்து அதிகரித்துள்ளன. இதனால் அணைகளில் நீர் மட்டம் உயர்ந்து வருகிறது.

இன்று காலை நிலவரப்படி பாபநாசம் அணையின் நீர்மட்டம் 120.60 அடியாகவும், சேர்வலாறு அணை நீர்மட்டம் 122.87 அடியாகவும், மணிமுத்தாறு அணை நீர்மட்டம் 104.30 அடியாகவும் உள்ளன. பாபநாசம் அணைக்கு வினாடிக்கு 1410 கன அடி தண்ணீர் வந்து கொண்டிருக்கிறது. மணிமுத்தாறு அணைக்கு வினாடிக்கு 922 கன அடி தண்ணீர் வருகிறது.

பாபநாசம் அணையில் இருந்து 20 கன அடி தண்ணீரும், மணிமுத்தாறு அணையில் இருந்து 480 கன அடி தண்ணீரும் வெளியேற்றப்படுகின்றன. பாபநாசம் கீழ் அணையில் இருந்து 856 கன அடி தண்ணீர் தாமிரபரணியில் திறந்து விடப்பட்டுள்ளது.

இதேபோல் கடனா அணை நீர்மட்டம் 79.40 அடியாகவும், ராமநதி அணை 65.75 அடியாகவும், கருப்பாநதி அணை 59.01 அடியாகவும், குண்டாறு அணை 32.25 அடியாகவும், வடக்கு பச்சையாறு அணை 29 அடியாகவும், நம்பியாறு அணை 12.74 அடியாகவும், கொடுமுடியாறு அணை 20.50 அடியாகவும், அடவிநயினார் அணை 73 அடி யாகவும் உள்ளன.

கயத்தாறு:

சிவகங்கை மாவட்டம் காரைக்குடி அருகே உள்ள பள்ளத்தூர் பகுதியில் இருந்து 15 பேர் ஒரு வேனில் தூத்துக்குடி மாவட்டம் உடன்குடி தேரிக்குடியிருப்பு கற்குவேல் அய்யனார் கோவிலில் சாமி தரிசனம் செய்வதற்காக வந்தனர். வேனை பள்ளத்தூர் கருமாரியம்மன் கோவில் தெருவை சேர்ந்த சிவஞானம் (வயது31), என்பவர் ஓட்டினார்.

வேன் இன்று காலை 5.20 மணிக்கு நெல்லை மாவட்டம் கங்கைகொண்டான் புலவர்த்தான்குளம் விலக்கு அருகே வந்து கொண்டிருந்தது. அப்போது லேசான மழை பெய்து கொண்டிருந்தது. இந்த வேளையில் மதுரையில் இருந்து நாகர்கோவில் நோக்கி ஒரு அரசு பஸ் வந்தது. அந்த பஸ் காரைக்குடி வேனை முந்தி செல்ல முயன்றது.

அப்போது பஸ், வேனின் பின்பகுதியில் லேசாக உரசியது. உடனே வேனில் வந்தவர்கள் அதில் இருந்து இறங்கி பஸ் டிரைவரிடம் வாக்குவாதத்தில் ஈடுபட்டனர். நடுவழியில் நின்று வாக்குவாதம் செய்து கொண்டிருந்தார்கள். சிறிது நேரம் வாக்குவாதம் முடிந்து வேனும், பஸ்சும் புறப்பட தயாரானது. இந்த வேளையில் அந்த வழியாக சென்னையில் இருந்து நாகர்கோவில் நோக்கி ஒரு அரசு பஸ் வந்தது.

காலை நேரம் என்பதாலும், மழை தூறிக்கொண்டு இருந்ததாலும் நடுரோட்டில் நின்ற வேன் மற்றும் அரசு பஸ்சையும் டிரைவர் கவனிக்கவில்லை. இதனால் அந்த பஸ் முன்னால் நின்ற வேன் மற்றும் பஸ் மீது பயங்கரமாக மோதியது. பின்னர் சாலையோர தடுப்பில் மோதியது. இந்த பயங்கர விபத்தில் வேன் ரோட்டோரம் கவிழ்ந்தது. முன்னால் நின்ற பஸ்சின் பின்பகுதியும், பின்னால் மோதிய பஸ்சின் முன்பகுதியும் பயங்கரமாக சேத மடைந்தன. பஸ்சில் இருந்தவர்கள் அலறினார்கள்.

இந்த விபத்தில் இடிபாடுகளுக்குள் சிக்கி மோதியதில் பஸ்சில் இருந்த பயணிகள் திருச்சி துறையூரை சேர்ந்த ஆனந்த ஜோதி மகன் அம்ஜத் குமார், பேச்சிமுத்து மகன் முருகன், தேவதாஸ் மகன் ஜீவா ரூபி, பாஸ்கர் ஆகிய 4 பேர் உடல் நசுங்கி சம்பவ இடத்திலேயே பலியானார்கள். வேன் மற்றும் பஸ்சில் இருந்த 18 பேர் படுகாயம் அடைந்தனர்.

இதுகுறித்து தகவல் அறிந்த தாழையூத்து துணை போலீஸ் சூப்பிரண்டு பொன்னரசு, தாழையூத்து இன்ஸ்பெக்டர் ஜெயந்தி மற்றும் போலீசார் சம்பவ இடத்திற்கு விரைந்து சென்றனர். மேலும் பாளை தீயணைப்பு நிலைய வீரர்களும் அப்பகுதிக்கு விரைந்தனர்.

இதைத்தொடர்ந்து காயம் அடைந்த 18 பேரையும் மீட்டு நெல்லை அரசு மருத்துவ மனைக்கு சிகிச்சைக்காக அனுப்பி வைத்தனர். செல்லும் வழியிலேயே மதுரையை சேர்ந்த மகாராஜன் மகன் பிரதீப் (26), குமரி மாவட்டம் விளாச்சேரியை சேர்ந்த தவசிமுத்து (47) ஆகிய 2 பேர் பலியானார்கள்.

விபத்தில் காயமடைந்த வர்கள் பெயர் விவரம் வருமாறு:-

வேனில் இருந்த காளியப்பன் (84), சேர்மராஜ் (55), செல்வி (50) மற்றொரு செல்வி (34), அனந்தராஜ் (10) (இவர்கள்) 5 பேரும் வேனில் இருந்தவர்கள்.

முத்துக்குமார் (26), அன்பு (24), இசக்கிமுத்து (25), அரிச்சந்திரா (26), முத்து கிருஷ்ணன் (24), ஹென்ஸ் (20), பால கிருஷ்ணன் (24), சதீஷ் (24), சேகர் (45), முத்துப் பாண்டி (29), வேல்முருகன் (24), பிரபு (34), தங்கத்துரை (40) (இவர்கள் 13 பேரும் பஸ்சில் இருந்தவர்கள்) என மொத்தம் 18 பேருக்கு தீவிர சிகிச்சை அளிக்கப்பட்டு வருகிறது.

இந்த விபத்து காரணமாக அப்பகுதியில் சிறிது நேரம் போக்குவரத்து பாதிப்பு ஏற்பட்டது. போலீசார் போக்குவரத்தை சரி செய்தனர்.

நெல்லை:

நெல்லை அருகே உள்ள ராமையன்பட்டியை சேர்ந்தவர் முருகன் (வயது63), கூலித்தொழிலாளி. இவர் அடிக்கடி மது குடித்து வந்ததால் வயிற்று வலி ஏற்பட்டது. இதனால் முருகன் வேலைக்கு செல்லாமல் வீட்டில் இருந்து வந்தார்.

இதனால் அவருக்கு குடிக்க பணம் கிடைக்க வில்லை. இதில் மனமுடைந்த முருகன் நேற்று வீட்டில் தூக்கு போட்டு தற்கொலை செய்து கொண்டார்.

இது குறித்து மானூர் போலீசார் வழக்குப்பதிவு செய்து விசாரணை நடத்தி வருகிறார்கள்.

சேரன்மகாதேவி:

நெல்லை மாவட்டம் வீரவநல்லூர் அருகே உள்ளது வெள்ளாங்குளி. இங்குள்ள தாமிரபரணி ஆற்றுக்கரையில் இன்று காலை ஒரு வாலிபர் பிணமாக கிடந்தார். அவரது உடலில் பல இடங்களில் வெட்டுக்காயங்கள் இருந்தன. இதனால் அவர் சரமாரியாக வெட்டி கொலை செய்யப்பட்டிருப்பது தெரிய வந்தது.

இதுபற்றி வீரவநல்லூர் போலீசுக்கு தகவல் கொடுக்கப்பட்டது. போலீசார் சம்பவ இடத்துக்கு சென்று விசாரணை நடத்தினர். விசாரணையில் கொலை செய்யப்பட்டவர் அதே பகுதியை சேர்ந்த இசக்கிசங்கர்(வயது 33) என்பது தெரியவந்தது.

இசக்கி சங்கர் களக்காட்டில் உள்ள மாவட்ட மத்திய கூட்டுறவு வங்கியில் ஊழியராக பணியாற்றி வந்தார். இவர் வழக்கமாக அதிகாலையில் அப்பகுதியில் உள்ள ஆற்றில் குளிப்பது வழக்கம். இன்று காலையில் அவர் வழக்கம்போல் ஆற்றில் குளிக்க சென்றபோது மர்ம நபர்கள் அவரை வெட்டி கொலை செய்துள்ளனர்.

இசக்கிசங்கரை கொலை செய்தவர்கள் யார்? எதற்காக கொன்றனர்? என்று போலீசார் விசாரணை நடத்தி வருகிறார்கள். சம்பவ இடத்துக்கு மோப்பநாய் வர வழைக்கப்பட்டது. அது சம்பவ இடத்தை மோப்பம் பிடித்தபடி சிறிது தூரம் ஓடியது. தடய வியல் நிபுணர்களும் வந்து தடயங்களை பரிசோதித்தனர்.

சம்பவ இடத்துக்கு சேரன்மகாதேவி ஏ.எஸ்.பி. ஆசிக் ராவத், அம்பை டி.எஸ்.பி. ஜாகீர் உசேன், சேரன்மகாதேவி இன்ஸ்பெக்டர் ஸ்டீபன் ஜோஸ் ஆகியோர் வந்து விசாரணை நடத்தினர். கொலை செய்யப்பட்ட இசக்கி சங்கருக்கும், அப்பகுதியில் வேறு யாருக்கும் முன்விரோதம் இருந்ததா? என்பதுபற்றி போலீசார் விசாரணை நடத்தி வருகிறார்கள்.