நீங்கள் தேடியது "மாதவரம்"

சென்னை:

சென்னை மாநகர போக்குவரத்து நெருக்கடியை குறைப்பதற்காக மெட்ரோ ரெயில் திட்டம் உருவாக்கப்பட்டது. முதல் கட்டமாக கோயம்பேடு- ஆலந்தூர், சின்னமலை- விமான நிலையம் வரை உயர் மட்ட பாதையிலும், திருங்கலம்- சென்ட்ரல், சைதாப்பேட்டை- வண்ணாரப்பேட்டை வரை சுரங்கபாதையிலும் மெட்ரோ ரெயில் சேவை நடந்து வருகிறது.

பயணிகள் பொது மக்கள் வரவேற்பை தொடர்ந்து 2-வது கட்டமாக மாதவரம்- சிறுசேரி 52 கி.மீட்டர் வழித்தட பாதை திட்டப்பணிகள் ரூ.69,180 கோடியில் இந்த ஆண்டு இறுதியில் தொடங்கப்படுகிறது. 2026-ம் ஆண்டுக்குள் இப்பணிகள் நிறைவடையும், வட சென்னை- தென் சென்னை பகுதிகளை இணைக்கும் விதமாக மெட்ரோ ரெயில் சேவை நடைபெற உள்ளது.

2-வது கட்ட மெட்ரோ ரெயில் இயக்கம், மற்றும் பராமரிப்பு பணிகள் தனியாருக்கு விட மெட்ரோ ரெயில் நிர்வாகம் திட்டமிட்டுள்ளது. இதன் மூலம் 2-வது கட்டமாக உருவாக்கப்படும் மெட்ரோ ரெயில் நிலையங்கள் பராமரிப்பு, இயக்க பணிகள் அனைத்தும் தனியார் ஊழியர்கள் நிர்வகிக்கிறார்கள். மும்பை, ஐதராபாத் உள்ளிட்ட மெட்ரோ ரெயில் நிலையங்கள் தனியார் மூலம் சிறப்பாக பராமரிக்கப்பட்டு வருகிறது.

அதேபோல சென்னை மெட்ரோ 2-வது கட்ட வழித்தட பாதை ரெயில் நிலையங்களும் தனியார் பராமரிப்பு பணிக்கு விடப்படுகிறது. இதன் மூலம் கூடுதல் செலவுகள் குறைக்கப்படுகிறது.

சென்னை:

சென்னை மாதவரம் பகுதியில் அரியானா மாநிலத்தைச் சேர்ந்த கூலிப்படை ரவுடிகள் 6 பேர் பதுங்கி இருந்தனர்.

இவர்களை பிடிக்க அரியானா மாநில போலீஸ் டி.ஐ.ஜி. சதீஷ்பாலியான் தலைமையிலான தனிப்படை போலீசார் சென்னை வந்தனர். மாதவரம் பகுதியில் கூலிப்படை கும்பல் பதுங்கி இருந்த இடத்தை நேற்று இரவு முற்றுகையிட்டனர். அப்போது மாதவரம் போலீசாரும் பாதுகாப்புக்காக சென்றனர்.

பின்னர் துப்பாக்கிமுனையில் ரவுடிகளை மடக்கி பிடித்து கைது செய்தனர். அரியானாவைச் சேர்ந்த சுபாஷ், மதன்சர்மா, அனில், சந்தீப், ராகுல்சிங், சுமித் ஆகிய 6 பேர் பிடிபட்டனர்.

இவர்கள் அனைவரையும், சென்னையில் இருந்து அரியானா மாநிலத்துக்கு கொண்டு செல்வதற்கான நடவடிக்கைகள் மேற்கொள்ளப்பட்டுள்ளன.

அரியானா கூலிப்படைக்கு சென்னையைச் சேர்ந்த ரவுடிகள் சிலர் தான் அடைக்கலம் கொடுத்திருக்கலாம் என்று கருதப்படுகிறது. கூலிப்படை கும்பல் அரியானாவில் இருந்து சென்னை வந்தது எப்படி? என்பது பற்றி மாதவரம் போலீசாரும் விசாரணை நடத்தி வருகிறார்கள்.

மாதவரம்:

மாதவரம் பால் பண்ணை சி.கே.எம். காலனியைச் சேர்ந்தவர் விஜயன். இவரது மனைவி சரளா. ஓய்வு பெற்ற போலீஸ் சப்-இன்ஸ்பெக்டர்.

கணவன்-மனைவி இருவரும் திருமண நிகழ்ச்சியில் கலந்து கொள்வதற்காக கடந்த வாரம் கேரளா சென்றனர். இந்த நிலையில் அவர்களது வீட்டின் கதவு திறந்து கிடந்தது. வீட்டு முன்பு நிறுத்தப்பட்டிருந்த காரும் மாயமாகி இருந்தது.

சந்தேகம் அடைந்த அவர்களது உறவினர் மாதவரம் போலீசில் புகார் செய்தார். போலீசார் விரைந்து வந்து விசாரணை நடத்தினார்.

பீரோவில் இருந்த 50 பவுன் நகை, ரூ.10 ஆயிரம் ரொக்கம், வெள்ளிப் பொருட்கள் கொள்ளை போய் இருந்தன. வீட்டில் ஆட்கள் இல்லாததை நோட்ட மிட்ட மர்ம நபர்கள் நகை- பணத்தை கொள்ளையடித்து காரையும் திருடி சென்றிருப்பது தெரிந்தது.

போலீஸ் விசாரணையில் கொள்ளையர்கள் கதவை உடைத்து வீட்டுக்குள் சென்றதும், அங்கு இருந்த சாவியை எடுத்து நகை-பணத்தை திருடியதும், வீட்டின் முன்பு நின்ற காரை திருடி சென்றதும் தெரியவந்தது.

உலகத்தரம் வாய்ந்த நகர்புறப் பொதுப்போக்கு வரத்து சேவையை சென்னை மாநகரில், சென்னை மெட்ரோ ரெயில் உருவாக்கி உள்ளது.

2019-ம் ஆண்டு ஜனவரி மாதத்திற்குள் முதற் கட்டத்திட்டத்தின் அனைத்து வழித்தடங்களிலும் சேவைகள் முழுமையாக இயக்கப்படும்.

சுமார் 3,770 கோடி ரூபாய் செலவில் வண்ணாரப்பேட்டையில் இருந்து விம்கோ நகர் வரையிலான முதற்கட்ட விரிவாக்க திட்டச்சேவைகள். 2020-ம் ஆண்டு ஜூன் மாதத்திற்குள் திட்டமிட்டபடி துவங்கப்படும்.

மூன்று வழித்தடங்களை உள்ளடக்கிய இரண்டாம் கட்ட சென்னை மெட்ரோ ரெயில் திட்டத்தினை, 107,55 கிலோ மீட்டர் நீளத்திற்கு செயல்படுத்துவதற்கு மாநில அரசு ஏற்கனவே கொள்கை அளவிலான ஒப்புதல் வழங்கி உள்ளது.

ஜப்பான் பன்னாட்டுக் கூட்டுறவு முகமையானது 20,196 கோடி ரூபாய் நிதிஉதவியினை, 52 கிலோ மீட்டர் நீளத்திற்கான மாதவரம்- சோழிங்கநல்லூர் மற்றும் மாதவரம்- சென்னை புறநகர் பேருந்து நிலையம் வரையிலான முன்னுரிமை வழித்தடப்பகுதிகளுக்கு தற்போது ஒப்புதல் வழங்கி உள்ளது.

ஏறத்தாழ 4,770 கோடி ரூபாய்க்கான முதல் தவணைக்கான கடன் ஒப்பந்தம் 2018-ம் ஆண்டு டிசம்பர் மாதம் 21-ம் நாளன்று கையொப்பமிடப்பட்டுள்ள நிலையில், இத்திட்டத்திற்கான பணிகள் விரைவில் தொடங்கப்பட உள்ளது.

ஒருங்கிணைக்கப்பட்ட பன்முகப் போக்குவரத்து அமைப்பை செயல்பாட்டிற்கு கொண்டு வரும்முயற்சியாக, சென்னை ஒருங்கிணைந்த பெருநகரப் போக்குவரத்துக் குழுமச் சட்டம் மற்றும் அதற்கான சட்ட விதிகள், 2019-ம் ஆண்டு ஜனவரி மாதம் 16-ம் நாளன்று அறிவிக்கை செய்யப்படும்.

சென்னை:

கோயம்பேடு புறநகர் பஸ் நிலையத்தில் கடும் போக்குவரத்து நெரிசல் ஏற்படுவதால் அதை குறைக்க மாதவரத்தில் நவீன அடுக்கு மாடி பஸ் நிலையம் கட்டப்பட்டது.

இங்கிருந்து ஆந்திர மாநிலம், திருப்பதி, காளகஸ்தி, நெல்லூர், ஐதராபாத் போன்ற நகரங்களுக்கும் திருவள்ளூர் மாவட்டத்தில் சில பகுதிகளுக்கும் பஸ்கள் இயக்கப்படும் என்று தெரிவிக்கப்பட்டது.

கோயம்பேட்டில் இருந்து இயங்கி வந்த 468 பஸ்கள் மாதவரம் அடுக்கு மாடி பஸ் நிலையத்தில் இருந்து செல்லும் என்று தெரிவிக்கப்பட்டது.

ரூ.95 கோடி செலவில் கட்டப்பட்ட மாதவரம் அடுக்குமாடி பஸ் நிலையம் கடந்த 10-ந்தேதி திறக்கப்பட்டது.

ஆந்திரா மாநிலத்துக்கு செல்ல கூடிய பயணிகள் மாதவரம் புதிய பஸ் நிலையத்துக்கு செல்ல வேண்டும் என்று அறிவிக்கப்பட்டுள்ளது.

ஆனால் கோயம்பேடு பஸ் நிலையத்தில் இருந்து மாதவரம் அடுக்குமாடி பஸ் நிலையத்துக்கு ஒரே ஒரு மாநகர பஸ் மட்டுமே செல்வதால் அவதியடைந்து உள்ளதாக பயணிகள் கூறுகின்றனர்.

சென்னை மாநகரில் இருந்து மாதவரம் புதிய பஸ் நிலையத்துக்கு இரண்டு பஸ்கள் மாற வேண்டியது உள்ளதாக தெரிவிக்கின்றனர்.

இது தொடர்பாக பயணிகள் கூறும் போது, மாதவரத்தில் இருந்து திருப்பதிக்கு பஸ்கள் இயக்கப்படுகின்றன. ஆனால் சென்னை நகருக்குள் தெற்கு மற்றும் வடக்கு பகுதியில் வசிப்பவர்கள். கோயம்பேட்டில் இருந்து மாதவரத்துக்கு செல்பவர்கள். ஆனால் கோயம்பேட்டில் இருந்து மாதவரம் புதிய பஸ் நிலையத்துக்கு ஒரே ஒரு பஸ் மட்டுமே இயக்கப்படுகிறது.

கோயம்பேட்டில் இருந்து 170ஏ, 121 ஆகிய எண்கள் கொண்ட பஸ்கள் மாதவரம் புதிய பஸ் நிலையம் அருகே செல்கின்றன.

114 எண் மாநகர பஸ் மாதவரம் பஸ் நிலையத்துக்கு எதிரே சென்னை- தடா தேசிய நெடுஞ்சாலையில் நிற்கிறது. அதிலிருந்து பயணிகள் இஎஸ்சி சாலையை கடந்து பஸ் நிலையத்துக்குள் செல்ல மிகவும் சிரமமாக உள்ளது என்றனர்.

குரோம்பேட்டையை சேர்ந்த பயணி ஒருவர் கூறும் போது, குடும்பத்துடன் திருப்பதிக்கு செல்ல புறப்பட்ட போது மாதவரம் பஸ் நிலையத்துக்கு சென்றடைய இரண்டு பஸ்கள் மாறினோம். ஆனால் நேரடியாக மாநகர பஸ்களை இயக்கினால் டிக்கெட் கட்டணம் இதை விட குறைவாக இருக்கும் பயணமும் எளிதாக இருக்கும் என்றார்.

மாதவரம் அடுக்குமாடி பஸ் நிலையம் திறக்கப்பட்டதால் பயணிகள் மத்தியில் பெரிதும் எதிர்பார்ப்பு ஏற்பட்டது. ஆனால் அங்கு சென்னை நகரில் இருந்து செல்ல போதுமான மாநகர பஸ்கள் இல்லாததால் பயணிகள் அவதியடைந்து உள்ளனர்.

இது பற்றி போக்குவரத்து கழக வட்டாரங்கள் கூறும் போது, நகரின் பல்வேறு பகுதிகளில் இருந்து மாதவரம் பஸ் நிலையத்திற்கு பஸ்கள் இயக்குவது கடினமான ஒன்று. ஏனென்றால் கோயம்பேட்டில் இருந்து போதுமான பஸ்கள் இயக்கப்படுகிறது.

கோயம்பேட்டுக்கு வந்து நகரில் எந்த பகுதிக்கும் பயணிகள் செல்லலாம் என்றார்.

மாதவரம், அக்.19-

சென்னை கோயம்பேடு புறநகர் பஸ்நிலையம் போக்குவரத்து நெரிசலில் சிக்கி தவிப்பதால் பயணிகள் கடுமையாக பாதிக்கப்பட்டு வருகிறார்கள்.

பல்வேறு மாவட்டங்களில் இருந்தும், வெளி மாநிலங்களில் இருந்தும் பஸ்கள் அங்கு வருவதால் நெரிசல் ஏற்படுகிறது. இதனால் வெளியூர்களுக்கு குறித்த நேரத்தில் பஸ்கள் செல்ல முடியவில்லை. குறிப்பாக பண்டிகை காலங்களில் சிறப்பு பஸ்களை கையாள்வதிலும் சிரமம் ஏற்பட்டு வருகிறது.

கோயம்பேட்டில் போக்கு வரத்து நெரிசலை குறைக்க மாதவரத்தில் புதியதாக புறநகர் பஸ்நிலையம் கடந்த 10-ந்தேதி முதல்-அமைச்சர் எடப்பாடி பழனிசாமி திறந்து வைத்தார். இந்த புதிய புறநகர் பஸ்நிலையத்தில் இருந்து ஆந்திர மாநிலம் செல்லக்கூடிய அனைத்து பஸ்களும் இயக்கப்படும் என்று அறிவிக்கப்பட்டது.

திருப்பதி, நெல்லூர், காளகஸ்தி, சத்தியவேடு, மற்றும் ஐதராபாத் போன்ற நகரங்களுக்கு பஸ்கள் புறப்பட்டு செல்லும் என்று பொதுமக்களுக்கு தெரிவிக்கப்பட்டது. கோயம்பேடு பஸ்நிலையத்தில் இருந்து ஆந்திரா மார்க்கமாக 238 தமிழக அரசு பஸ்கள், 25 தனியார் பஸ்கள் மேலும் 205 ஆந்திர மாநில அரசு பேருந்துகள் என மொத்தம் 468 பஸ்கள் இயக்கப்பட்டு வருகின்றன.

இந்த பஸ்கள் அனைத்தும் மாதவரம் புதிய புறநகர் பஸ் நிலையத்தில் இருந்து இனி இயக்கப்படும் என அறிவித்தும் இதுவரையில் முழுமையாக செயல்பட வில்லை. ஒருசில அரசு பஸ்கள் மட்டுமே இயக்கப்படுகின்றன. தனியார் பஸ்களும், ஆந்திர மாநில பஸ்களும் முற்றிலும் இயக்கப் படவில்லை. இதனால் பயணிகள் கூட்டமின்றி எப்போதும் வெறிச்சோடி காணப்படுகிறது.

ஆயுத பூஜை, விஜய தசமியையொட்டி 4 நாட்கள் அரசு தொடர் விடுமுறையாகும். அதனால் கடந்த புதன்கிழமை அன்றே வெளியூர் செல்லும் பஸ்கள் எல்லாம் நிரம்பி வழிந்தது.

அன்றைய நாளில் கூட மாதவரம் புதிய பஸ் நிலையத்தில் இருந்து பஸ்கள் முழுமையாக இயக்கப்பட வில்லை. பயணிகள் கோயம்பேட்டில் இருந்துதான் புறப்பட்டு சென்றனர்.

புதிய பஸ்நிலையம் தொடங்கப்பட்ட நிலையிலும் கோயம்பேட்டில் இருந்து பஸ்களை இயக்கி வருவதால் மக்கள் குழப்பம் அடைந்துள்ளனர். புதிய பஸ்நிலையம் தொடங்கியது முதல் இனி ஆந்திர மார்க்க பஸ்கள் அங்கிருந்து இயக்கப்படும் என்று அறிவிக்கப்பட்டாலும் பெயர் அளவிற்கு மட்டுமே ஒருசில பஸ்கள் இயக்கப்பட்டு வருகின்றன. இதனால் மாதவரம் புதிய பஸ்நிலையம் களை இழந்து காணப்படுகின்றன.

பண்டிகை காலங்களில் ஏற்படும் நெரிசலை குறைக்கத்தான் புதிய பேருந்து நிலையம் கட்டி திறக்கப்பட்டாலும் அதனை முழுமையாக செயல்பாட்டிற்கு கொண்டுவராமல் அதிகாரிகள் அலட்சியம் காட்டி வருகின்றனர்.

தினமும் 468 பஸ்களை மாதவரத்தில் இருந்து இயக்கினால்தான் மக்களுக்கு இந்த தகவல் முழுமையாக தெரியவரும். அவர்கள் தானாக அந்த இடத்திற்கு சென்று விடுவார்கள். ஆனால் அந்த நடவடிக்கையை எடுக்காமல் தொடர்ந்து கோயம்பேட்டில் இருந்து இயக்கி வருகின்றனர்.

மேலும் மாநகர பஸ்களும் புதிய பேருந்து நிலையத்தில் இருந்து இயக்கப்படும் என்று அறிவித்தார்கள். ஆனால் இதுவரையில் பஸ்நிலையத்திற்குள் எந்த பஸ்சும் வரவில்லை. இணைப்பு மாநகர பஸ்கள் மட்டும் பஸ்நிலையத்திற்கு வெளியே நின்று செல்கின்றன. பஸ்கள் முழுமையாக இயக்கப்படாததால் பயணிகளும் வருவதில்லை.

இதுகுறித்து அரசு போக்குவரத்து கழக அதிகாரி ஒருவர் கூறியதாவது:-

புதிய புறநகர் பஸ்நிலையத்தில் இருந்து இன்று முதல் முழுமையாக பஸ்கள் இயக்கப்படும். இதுவரையில் அரசு பஸ்கள் மட்டுமே புறப்பட்டு சென்றன. இன்று முதல் ஆந்திர மாநில அரசு பஸ்களும், தனியார் பஸ்களும் புறப்பட்டு செல்லும். ஆந்திர அரசு பஸ்களுக்கு முன்பதிவு செய்த பயணிகள் தங்களது பயணத்தை மாதவரம் புதிய பஸ்நிலையத்தில் இருந்து தொடங்குவார்கள்.

திருப்பதிக்கு முன்பதிவு செய்த பயணிகளையும் மாதவரத்திற்கு செல்லும் படி அறிவிப்பு வெளியிட்டு வருகிறோம். கோயம்பேட்டில் ஆந்திர மாநில பஸ்கள் நிற்கும் பகுதியில் ஒலிபெருக்கி மூலம் தகவல் தெரிவிக்கிறோம்.

ஆந்திராவிற்கு செல்லக் கூடிய பயணிகள் மாதவரத்திற்கு செல்ல வேண்டும் எனவும், அங்கிருந்துதான் பஸ்கள் புறப்பட்டு செல்லும் எனவும் அறிவிக்கின்றோம்.

இவ்வாறு அவர் கூறினார்.