நீங்கள் தேடியது "கோத்தகிரி"

கோத்தகிரி:

கோத்தகிரி அருகே உள்ள போத்திமுக்கு கம்பியூர் பகுதியை சேர்ந்தவர் சண்முகம். கூலித்தொழிலாளி. இவரது மகன் சக்திவேல்(வயது 6). இவன் அங்குள்ள அரசு பள்ளியில் 2-ம் வகுப்பு படித்து வந்தான்.

நேற்று பள்ளிக்கு சென்றுவிட்டு வீட்டுக்கு வந்த மாணவன் சக்திவேல் பின்னர் விளையாட சென்றான். ஆனால் அதன்பின்னர் வீடு திரும்பவில்லை. இதனால் சந்தேகம் அடைந்த அவனது பெற்றோர் அவனை பல்வேறு இடங்களில் தேடிப் பார்த்தனர். அப்போது அந்த பகுதியில் உள்ள ஊராட்சிக்கு சொந்தமான 10 அடி ஆழமுள்ள கிணற்றில் சிறுவன் கிடந்துள்ளான். விளையாடி கொண்டிருந்த போது சிறுவன் தவறி கிணற்றுக்குள் விழுந்துவிட்டான். இதனையடுத்து அவனது பெற்றோர் மற்றும் அந்த பகுதி மக்கள் சிறுவனை மீட்டு சிகிச்சைக்காக கோத்தகிரி அரசு ஆஸ்பத்திரியில் சேர்த்தனர். அங்கு அவனை பரிசோதித்த டாக்டர்கள் அவன் இறந்து விட்டதாக தெரிவித்தனர். இதுகுறித்து சோலூர்மட்டம் போலீசார் வழக்குப்பதிவு செய்து விசாரணை நடத்தி வருகின்றனர்.

கோத்தகிரி:

கோத்தகிரி மற்றும் அதன் சுற்றுவட்டார பகுதியில் தேயிலை விவசாயமே பிரதானமாக இருக்கிறது. அதற்கு அடுத்தபடியாக மலைக்காய்கறிகள் சாகுபடி செய்யப்படுகிறது. கடந்த 2 மாதங்களாக கோத்தகிரி மற்றும் அதன் சுற்றுவட்டார பகுதிகளில் போதிய அளவு மழை பெய்தது. இதையொட்டி தங்களது விளைநிலங்களை தயார்படுத்தி கேரட், பீட்ரூட், முட்டைக்கோஸ், காலிபிளவர், பீன்ஸ், உருளைக்கிழங்கு, மேரக்காய், முள்ளங்கி உள்ளிட்ட காய்கறிகளை விவசாயிகள் பயிரிட்டனர். தற்போது மழை குறைந்து பயிர்களுக்கு ஏற்ற காலநிலை நிலவுவதால், களை பறித்து மழைநீர் செல்லும்படி தோட்டங்களில் கால்வாய் அமைக்கும் பணி நடந்து வந்தது. மேலும் அவ்வப்போது மழை பெய்வதால் உரமிட்டு, செடிகளுக்கு பூச்சி மருந்து தெளிக்கும் பணியில் விவசாயிகள் மும்முரமாக ஈடுபட்டு வருகின்றனர். இதுகுறித்து கோத்தகிரி பாண்டியன் பார்க் பகுதியை சேர்ந்த விவசாயிகள் கூறியதாவது:-

கோத்தகிரி பகுதியில் போதியளவு மழை பெய்ததால், தரிசாக கிடந்த நிலத்தை உழுது காய்கறிகளை பயிரிட்டு உள்ளோம். அதிலும் தற்போது பீட்ரூட்டுக்கு நல்ல கொள்முதல் விலை கிடைத்து வருகிறது. இதனால் எங்களது தோட்டத்தில் பீட்ரூட் பயிரிட்டுள்ளோம். நடவு செய்து 2 மாதங்களில் பீட்ரூட் அறுவடைக்கு தயாராகிவிடும். தற்போது பூச்சிகள் தாக்காமல் இருக்க 10 லிட்டர் தண்ணீருக்கு 20 மில்லி லிட்டர் என்ற அளவில் டுபோண்ட் என்ற பூச்சி மருந்தை கலந்து செடிகளில் தெளித்து வருகிறோம். மேட்டுப்பாளையம் காய்கறி மண்டிகளில் பீட்ரூட் கிலோவுக்கு ரூ.25 முதல் ரூ.30 வரை கொள்முதல் விலை கிடைக்கிறது. எனவே இந்த முறை பீட்ரூட் விவசாயிகளுக்கு கணிசமான லாபம் கிடைக்கும் என்று எதிர்பார்க்கிறோம்.

இவ்வாறு அவர்கள் கூறினார்கள். 

கோத்தகிரி:

கோத்தகிரி நெடுகுளா, கூக்கல்தொரை, ஈளடா உள்ளிட்ட பகுதிகளில் அதிக பரப்பளவில் மலை காய்கறி கேரட், முட்டைகோஸ், உருளைகிழங்கு, பீட்ரூட், மேரக்காய் உள்ளிட்ட மலை காய்கறிகள் பயிரிடப்பட்டுள்ளது.

கணிசமான நிலப்பரப்பளவில் கேரட் சாகுபடி செய்யப்பட்டுள்ளது. மேட்டுபாளையம் மண்டிகளுக்கு தான் இங்கு விளைவிக்கப்படும். மலை காய்கறிகளை விற்பனைக்கு கொண்டு செல்லப்படுகிறது. ஆனால் தற்போது ஒரு கிலோ கேரட்டுக்கு அதிக பட்சமாக 8 ரூபாய் விலை மட்டுமே கிடைக்கிறது என்று விவசாயிகள் கூறுகின்றனர்.

தோட்ட பராமரிப்பு செலவினங்களை கடந்து அறுவடைசெய்த கேரட் விவசாயிகளுக்கும், தொழிலாளர்களுக்கும் கூலி மற்றும் லாரி வாடகை என கணக்கிட்டால் விவசாயிகளுக்கு ஒரு கிலோ கேரட் குறைந்தப்பட்சம் 50 ரூபாய்க்கு விற்றால் மட்டுமே விவசாயிகளுக்கு ஓரளவு லாபம் கிடைக்கும். ஆனால் மேட்டுபாளையம் கமி‌ஷன் மண்டியில் 8 ரூபாய்க்கு விலை கிடைப்பதால் செலவிட்ட முதலீடு கூட விவசாயிகளுக்கு கிடைக்க வாய்ப்பில்லை என்று விவசாயிகள் கூறுகிறார்கள்.

பெரும்பாலான தோட்டங்களில் அறுவடைக்கு தயாராகியும் அறுவடை செய்வதை விவசாயிகள் தவிர்த்து வருகின்றனர். மழை பெய்தாலும் தாழ்வான பகுதியில் பயிரிடப்பட்டுள்ள கேரட் தோட்டம் அழுகிவிடும் அபாயம் உள்ளது.