நீங்கள் தேடியது "பூந்தமல்லி"

சென்னை:

சென்னை மாநகர போக்குவரத்து நெருக்கடியை குறைப்பதற்காகவும் விரைவு பயணத்துக்காகவும் மெட்ரோ ரெயில் திட்டம் உருவாக்கப்பட்டது.

முதல்கட்டமாக கோயம்பேடு - ஆலந்தூர், சின்னமலை - விமான நிலையம் வரை உயர்மட்ட பாதையிலும், திருமங்கலம் - வண்ணாரப்பேட்டை, சைதாப்பேட்டை- வண்ணாரப்பேட்டை வரை சுரங்கப்பாதையிலும் மெட்ரோ ரெயில் சேவை நடந்து வருகிறது.

2-வது கட்டமாக 118.9 கிலோ மீட்டர் தூரத்துக்கு மெட்ரோ ரெயில் வழித்தட பாதைகள் அமைக்க திட்டமிடப்பட்டுள்ளது.

முன்னாள் முதல்-அமைச்சர் ஜெயலலிதா 2012-ல் சென்னையில் ‘மோனோ ரெயில் திட்டம்’ தொடங்குவது குறித்து அறிவித்தார். ஜெயலலிதா விரும்பிய மோனோ ரெயில் திட்ட வழித்தடப் பாதைகள் குறித்து அதிகாரிகள் ஆய்வு செய்து வந்தனர். போக்குவரத்து நெருக்கடி நிறைந்த போரூர், அய்யப்பன்தாங்கல், பூந்தமல்லி பாதையில் மோனோ ரெயில் திட்டம் தொடங்குவது சாத்தியமில்லை.

அங்கு 4-வது வழித்தடத்தில் மெட்ரோ ரெயில் பாதை அமைத்து மெட்ரோ ரெயில் விட அதிகாரிகள் ஆய்வு செய்து முடிவு செய்தனர். கலங்கரைவிளக்கம் முதல் பூந்தமல்லி வரை 26 கிலோ மீட்டர் தூரத்துக்கு மெட்ரோ ரெயில் நிலையங்கள் அமைக்கப்படுகிறது.

கலங்கரைவிளக்கம் - பூந்தமல்லி வரையிலான மெட்ரோ ரெயில் திட்டப் பணிகள் விரைவில் தொடங்கப்படுகிறது. உலக வங்கிகள் நிதி உதவி மூலம் இந்த திட்டப்பணிகள் தொடங்கப்படுகிறது.

மெட்ரோ ரெயில் அதிகாரிகள் இதற்கான பணிகளில் மும்முரமாக ஈடுபட்டு வருகிறார்கள். #MetroTrain

பூந்தமல்லி:

சென்னை தனிப்படை போலீசார் தடைசெய்யப்பட்ட புகையிலை பொருட்களான குட்கா பதுக்கி வைத்துள்ள இடங்களை கண்டுபிடித்து நடவடிக்கை எடுத்து வருகிறார்கள்.

கடந்த மாதம் அடையாறை சேர்ந்த புருஷோத்தமன் என்பவரை குட்கா பதுக்கி வைத்ததாக போலீசார் கைது செய்தனர். அவரிடம் விசாரணை நடத்தியதில் பல்வேறு தகவல்கள் போலீசாருக்கு கிடைத்தன. அதனை தொடர்ந்து பல இடங்களில் சோதனை நடந்து வருகிறது.

பூந்தமல்லியில் பெங்களூர் நெடுஞ்சாலையில் உள்ள ஒரு குடோனில் குட்கா புகையிலை பொருட்கள் பதுக்கி வைத்திருந்ததாக தகவல் கிடைத்தது. அதனை தொடர்ந்து அடையார் துணை கமி‌ஷனர் சகாயி காங் உத்தரவின் பேரில் 5 பேர் அடங்கிய தனிப்படையினர் இன்று காலை அங்கு சோதனையில் ஈடுபட்டனர்.

அங்கு மூட்டை மூட்டையாக பான்மசாலா, ஹான்ஸ் போன்ற புகையிலை பொருட்கள் இருந்தன. தடை செய்யப்பட்ட புகையிலை பொருட்களை பதுக்கி விற்பனை செய்வதற்காக வைத்திருந்தனர். சுமார் 10 டன் அளவிலான புகையிலை பொருட்கள் இருக்கும் என்று மதிப்பிடப்பட்டுள்ளது. அவற்றின் மதிப்பு ரூ.80 லட்சம்.

குட்கா பதுக்கி இருந்த குடோன்கள் உரிமையாளர் செந்தில் தப்பி ஓடி விட்டார். அவரை போலீசார் தேடி வருகிறார்கள். அவரது சகோதரர் முத்துலிங்கம் உள்ளிட்ட 5 பேர் போலீசாரிடம் சிக்கியுள்ளனர். அவர்களிடம் தொடர்ந்து விசாரணை நடைபெற்று வருகிறது. குடோன் உரிமையாளர் செந்திலிடம் இருந்து ஏற்கனவே குட்கா பறிமுதல் செய்யப்பட்டது குறிப்பிடத்தக்கது.

சென்னை:

போக்குவரத்து நெரிசலை கருத்தில் கொண்டும், துறைமுகத்துக்கு எளிதில் கண்டெய்னர் லாரிகள், சரக்குகளை எடுத்து செல்ல வசதியாக மதுரவாயல்- துறைமுகம் பறக்கும் சாலை திட்டம் தி.மு.க. ஆட்சியில் ரூ.1815 கோடி மதிப்பீட்டில் நடந்து வந்தது.

2011-ம் ஆண்டு ஜெயலலிதா ஆட்சிக்கு வந்தபோது சுற்றுச்சூழல் பாதிக்கப்படும் எனக்கூறி பறக்கும் சாலை திட்டத்தை நிறுத்தி வைத்தார். 6 ஆண்டுகளாக பறக்கும் சாலை திட்டம் முடக்கப்பட்டது.

இந்த நிலையில் 19 கிலோ மீட்டர் துறைமுகம்- மதுரவாயல் பறக்கும் சாலை திட்டம் விரைவில் தொடங்கப்பட உள்ளது.

தேசிய நெடுஞ்சாலை துறை சார்பில் ரூ.2,400 கோடி மறுமதிப்பீட்டில் எல் அண்ட் டி நிறுவனம் இந்த பணிகளை செயல்படுத்துகிறது. துறைமுகம் நேப்பியர்பாலம் அருகில் 14,000 சதுர மீட்டர் கடற்படை நிலம் ஒப்பந்தம் மூலம் கையகப்படுத்தப்பட்டுள்ளது.

புதிய ஒப்பந்தப் பணிகள் மூலம் இந்த திட்டப் பணிகள் செயல்படுத்தப்படுகிறது. கோயம்பேட்டில் இருந்து கூவம் ஆற்றில் 5 கிலோ மீட்டர் தூரத்துக்கு இரட்டை பில்லர் அமைக்க நிபுணர் குழு பரிந்துரை செய்துள்ளது.

இது குறித்து அதிகாரி ஒருவர் கூறியதாவது:-

மதுரவாயல் - துறைமுகம் பறக்கும் சாலை திட்டப் பணிகள் ரூ.2,400 கோடியில் மறு மதிப்பீடு செய்யப்பட்டுள்ளது. இப்பணிகள் விரைவில் தொடங்கப்பட உள்ளது.

மேலும் மதுரவாயல்- பூந்தமல்லி வரை 10 கிலோ மீட்டர் தூரத்துக்கு பறக்கும் சாலை திட்டப்பணிகள் நீட்டிக்கப்படுகிறது. எல் அண்ட் டி நிறுவனம் பறக்கும் சாலை திட்டப் பணிகளை மேற்கொள்கிறது.

தமிழக முதல்-அமைச்சர் எடப்பாடி பழனிசாமி, மத்திய மந்திரி பொன்.ராதா கிருஷ்ணன் முயற்சியில் இந்த பணிகள் நிறைவேற்றப்படுகிறது.

இவ்வாறு அவர் கூறினார். #MaduravoyalFlyover

பூந்தமல்லி:

பூந்தமல்லி கண்டோன்மென்ட் அம்மன் கோவில் தெருவை சேர்ந்தவர் வெங்கடேசன்(25) தொழிலாளி.

இவருடைய மனைவி துர்கா(23). இருவரும் 3 ஆண்டுகளுக்கு முன்பு காதலித்து திருமணம் செய்து கொண்டனர். இவர்களுக்கு சுப்ரியா(2),சிவன்யா(1) என இரண்டு பெண் குழந்தைகள் உள்ளனர்.

வெங்கடேசன் அடிக்கடி குடித்துவிட்டு வருவார். இதனால் கணவன்-மனைவி இடையே தகராறு ஏற்பட்டு வந்தது.

நேற்று இரவு வெங்கடேசன் தனது 2 குழந்தைகளையும் அருகில் உள்ள துர்காவின் பாட்டி மீராபாய் வீட்டில் விட்டு விட்டு வந்தார். இன்று அதிகாலை 3 மணி அளவில் குழந்தைகள் அழுதன.

துர்காவின் பாட்டி, 2 குழந்தைகளையும் அழைத்துக்கொண்டு வெங்கடேசன் வீட்டுக்கு வந்தார். கதவு பூட்டிக் கிடந்தது. நீண்ட நேரம் தட்டியும் கதவை திறக்கவில்லை.

மனைவியை கொலை செய்வதற்காக தான், வெங்கடேசன் தனது குழந்தைகளை மனைவியின் பாட்டி வீட்டில் விட்டு வந்துள்ளார். அதன் பிறகு அவரும் தூக்கில் தொங்கி தற்கொலை செய்து கொண்டிருக்கிறார்.

பிணமாக கிடந்த துர்காவின் உடலில் காயங்கள் இல்லை. அவர் கொலை செய்யப்பட்டது எப்படி என்பது குறித்து விசாரணை நடந்து வருகிறது. மருத்துவ பரிசோதனை அறிக்கை வந்த பிறகே துர்கா கொலை பற்றிய விவரம் தெரிய வரும்.

சென்னை:

சென்னை மாநகர போக்குவரத்து நெரிசலை குறைப்பதற்காகவும் விரைவு பயணத்திற்காகவும் மெட்ரோ ரெயில் திட்டம் உருவாக்கப்பட்டது. கோயம்பேடு-ஆலந்தூர், சின்னமலை-விமான நிலையம் வரை உயர்மட்ட பாதையிலும் திருமங்கலம்-சென்ட்ரல், சைதாப்பேட்டை-டி.எம்.எஸ் வரை சுரங்கப்பாதையிலும் மெட்ரோ ரெயில் சேவை நடந்து வருகிறது.

பயணிகள், பொதுமக்கள் இடையே மெட்ரோ ரெயில் திட்டத்துக்கு பெரிதும் வரவேற்பு ஏற்பட்டதையொட்டி சென்னை மாநகரம் முழுவதும் மெட்ரோ ரெயில் திட்டம் விரிவுபடுத்தப்பட்டு வருகிறது. 2-வது கட்டமாக ஜப்பான் நாட்டு நிதி உதவியுடன் மாதவரம்- சிறுசேரி வரை ரூ.85 ஆயிரம் கோடி செலவில் 105 கி.மீட்டர் தூரத்துக்கு மெட்ரோ ரெயில் பணிகள் தொடங்கப்பட்டு உள்ளது. இதில் மாதவரம்- சிறுசேரி, ஆயிரம்விளக்கு- வளசரவாக்கம், மாதவரம்- சோழிங்கநல்லூர் வரை மெட்ரோ ரெயில் பாதை அமைக்க திட்டமிடப்பட்டது.

மெட்ரோ ரெயில் திட்டம் பூந்தமல்லி வரை நீட்டிக்கப்படுவதால் சென்னை மேற்கு பகுதியை சேர்ந்த பல ஆயிரக்கணக்கான பொதுமக்கள், பயணிகள் பெரிதும் பயன் பெறுவார்கள்.

இதுகுறித்து மெட்ரோ ரெயில் அதிகாரி ஒருவர் கூறியதாவது:-

மாதவரம்-சிறுசேரி வரை 2-வது கட்டமாக ரூ.85 ஆயிரம் கோடி செலவில் 3 வழித்தடப்பாதை வழியாக மெட்ரோ ரெயில் திட்டம் உருவாக்கப்படுகிறது. சென்னை மேற்கு பகுதியை சேர்ந்த பொதுமக்கள், பயணிகள் பயன்பெறும் வகையில் தற்போது பூந்தமல்லி வரை மெட்ரோ ரெயில் பாதை நீட்டிக்கப்படுகிறது.

ரூ.3850 கோடி மதிப்பீட்டில் 13 கி.மீட்டர் தூரத்துக்கு சுரங்க மெட்ரோ பாதை அமைக்கப்படுகிறது. இதில் 10 மெட்ரோ ரெயில்நிலையங்கள் கட்டப்படுகிறது. பல வங்கி கடன் நிதிஉதவியுடன் இந்த திட்டம் செயல்படுத்தப்படுகிறது.

இவ்வாறு அவர் கூறினார். #MetroTrain

பூந்தமல்லி:

சென்னை பூந்தமல்லியை அடுத்த கரையான்சாவடியில் மத்திய ரிசர்வ் போலீஸ் படை உள்ளது. இங்கு பல்வேறு மாநிலங்களைச் சேர்ந்த மத்திய ரிசர்வ் படை போலீஸ்காரர்கள் மற்றும் அதிகாரிகள் உள்ளனர். அதில் ஏராளமான போலீஸ்காரர்கள் அங்கேயே தங்கி உள்ளனர்.

அரியானா மாநிலத்தைச் சேர்ந்த ராஜேஷ்குமார்(வயது 40) என்ற போலீஸ்காரரும் அங்கேயே தங்கி உள்ளார். நேற்று காலை அவர் பணிக்கு செல்வதற்காக தான் தங்கி உள்ள கூடாரத்தில் இருந்து சீருடை அணிந்துகொண்டு புறப்பட்டார்.

பின்னர் பணிக்கு செல்லும்போது அவர் எடுத்துச் செல்ல வேண்டிய துப்பாக்கியை எடுக்க மற்றொரு கூடாரத்துக்குள் சென்றார். திடீரென அந்த கூடாரத்தின் உள்ளே இருந்து துப்பாக்கி சுடும் சத்தம் கேட்டது. இதனால் அதிர்ச்சி அடைந்த சக போலீஸ்காரர்கள், அங்கு சென்று பார்த்தனர்.

அப்போது ராஜேஷ்குமார், ரத்த வெள்ளத்தில் விழுந்து கிடந்தார். அவருக்கு அருகில் துப்பாக்கி கிடந்தது. அவர், துப்பாக்கியால் சுட்டு தற்கொலைக்கு முயன்று இருப்பது தெரிந்தது. இதனால் மேலும் அதிர்ச்சி அடைந்த சகபோலீஸ்காரர்கள், உயிருக்கு போராடிய அவரை மீட்டு அரசு மருத்துவமனைக்கு கொண்டு சென்றனர். ஆனால் செல்லும் வழியிலேயே ராஜேஷ்குமார் பரிதாபமாக இறந்தார்.

இது குறித்து தகவல் அறிந்து வந்த பூந்தமல்லி போலீசார், ராஜேஷ்குமார் உடலை மீட்டு பிரேத பரிசோதனைக்காக சென்னை கீழ்ப்பாக்கம் அரசு மருத்துவமனைக்கு அனுப்பி வைத்து விசாரணை நடத்தினர்.

ராஜேஷ்குமார், கடந்த 2001-ம் ஆண்டு மத்திய ரிசர்வ் போலீஸ் படையில் சேர்ந்தார். காஷ்மீரில் பணியாற்றி வந்த அவர், கடந்த ஆண்டுதான் பூந்தமல்லிக்கு மாற்றப்பட்டதாக கூறப்படுகிறது.

நேற்று முன்தினம் பணியில் இருந்த ராஜேஷ்குமார், தனது மனைவியிடம் செல்போனில் பேசினார். அப்போது கணவன்-மனைவி இடையே செல்போனிலேயே வாக்குவாதம் ஏற்பட்டு உள்ளது.

இதை அறிந்த உயர் அதிகாரிகள், பணியின் போது செல்போனில் பேசிக்கொண்டு இருந்ததாக கூறி ராஜேஷ்குமாருக்கு அந்த இடத்திலேயே தண்டனை வழங்கியதாக கூறப்படுகிறது. மனைவியுடன் தகராறு, செல்போனில் பேசியதற்காக அதிகாரிகள் தண்டனை வழங்கிய சம்பவங்களால் அவர் மிகுந்த மன உளைச்சலில் இருந்து வந்ததாகவும் தெரிகிறது.

இந்தநிலையில் நேற்று காலை பணிக்கு செல்ல துப்பாக்கியை எடுக்க வந்தபோது, அதில் அதிக சத்தம் வராமல் இருக்க ‘சைலன்சரை’ பொருத்தி, தனது தாடை பகுதியில் துப்பாக்கியை வைத்து, காலால் அதன் விசையை அழுத்தியதால் குண்டுகள் பாய்ந்து அவர் இறந்து உள்ளார்.

அந்த துப்பாக்கியால் ஒரு முறை சுட்டால் ஒரே நேரத்தில் 20-க்கும் மேற்பட்ட தோட்டாக்கள் வெளியே வரும். ஆனால் ராஜேஷ்குமார் தான் தற்கொலை செய்துகொள்வதற்காக துப்பாக்கியில் ஒரே ஒரு தோட்டாவை மட்டும் போட்டு, அதால் சுட்டு தற்கொலை செய்து கொண்டு இருப்பது முதல் கட்ட விசாரணையில் தெரிய வந்துள்ளதாக போலீசார் தெரிவித்தனர்.

அவரது தற்கொலைக்கு இவைதான் காரணமா? அல்லது வேறு ஏதேனும் காரணங்கள் உள்ளதா? என்ற கோணத்திலும் போலீசார் விசாரித்து வருகின்றனர்.

இந்த வளாகத்திலேயே வெடிகுண்டு வழக்குகளை விசாரிக்கும் சிறப்பு நீதிமன்றம், தேசிய புலனாய்வு சிறப்பு நீதிமன்றம், சிறப்பு தனிச்சிறை உள்ளது குறிப்பிடத்தக்கது.

மத்திய ரிசர்வ் படை போலீஸ்காரர் துப்பாக்கியால் சுட்டு தற்கொலை செய்து கொண்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது. இந்த சம்பவத்தை அடுத்து அந்த பகுதியில் யாரும் அனுமதிக்கப்படவில்லை. 

பூந்தமல்லி:

சென்னை வளசரவாக்கத்தை சேர்ந்த நெடுமாறன் என்பவர் கருணாநிதி மகள் செல்வி மற்றும் செல்வியின் மருமகன் ஜோதிமணி ஆகியோர் மீது கடந்த 2009-ம் ஆண்டு வளசரவாக்கம் போலீசில் புகார் மனு ஒன்றை கொடுத்தார்.

அதில் செல்வி, அவரது மருமகன் ஜோதிமணி ஆகியோர் பனையூரில் உள்ள அவர்களது நிலத்தை என்னிடம் விற்க ஒப்பந்தம் செய்தனர். அதற்காக ரூ.4½ கோடியை முன் பணமாக கொடுத்தேன். ஆனால் நிலத்தை எனக்கு விற்காமல் வேறு நபருக்கு விற்றுவிட்டனர். நான் முன்பணமாக கொடுத்த ரூ.4½ கோடியை திருப்பி கேட்டபோது மிரட்டல் விடுத்தனர்.

அதனால் எனது பணத்தை மீட்டு தர வேண்டும் என்று கூறி இருந்தார். இவ்வழக்கு பூந்தமல்லி குற்றவியல் நடுவர் நீதிமன்றத்தில் எண்.1-ல் நடந்து வருகிறது. இந்த வழக்கு நேற்று நீதிபதி குருலட்சுமி முன்பு விசாரணைக்கு வந்தது. அப்போது கருணாநிதி மகள் செல்வி கோர்ட்டில் ஆஜர் ஆனார்.

வழக்கை விசாரித்த நீதிபதி குருலட்சுமி வருகிற 25-ந் தேதி செல்வியை மீண்டும் ஆஜராகும்படி உத்தரவிட்டார். #Tamilnews