நீங்கள் தேடியது "விளாத்திகுளம்"

விளாத்திகுளம்:

தூத்துக்குடியில் கடந்த 22-ந்தேதி ஸ்டெர்லைட் ஆலைக்கு எதிராக போராட்டம் நடத்திய பொதுமக்கள் மீது போலீசார் துப்பாக்கியால் சுட்டதில் 13 பேர் கொல்லப்பட்டார்கள்.

இந்த சம்பவத்தை தொடர்ந்து மாவட்டத்தில் பல பகுதில் வன்முறை சம்பவங்கள் நடந்தன. தூத்துக்குடி கலெக்டர் அலுவலகம் சூறையாடப்பட்டன. வாகனங்களுக்கு தீவைக்கப்பட்டன. ஸ்ரீவைகுண்டம் அருகே அரசு பஸ்சுக்கு தீவைக்கப்பட்டது.

இதேபோல விளாத்திகுளம் அருகேயுள்ள குளத்தூர் போலீஸ் நிலையத்தில் கடந்த 26-ந்தேதி மோட்டார்சைக்கிளில் வந்த 2 பேர் பெட்ரோல் குண்டு வீசிவிட்டு தப்பி சென்றனர். இதில் போலீஸ் நிலைய தகவல் பலகை சேதமானது.

இதுபற்றி போலீசார் வழக்கு பதிவு செய்து மர்ம நபர்களை தேடி வந்தனர். இந்த நிலையில் குளத்தூர் போலீஸ் இன்ஸ்பெக்டர் ராமலட்சுமி மற்றும் போலீசார் குளத்தூர் அண்ணாநகர் காலனி கிழக்கு கடற்கரை சாலை பகுதியில் ரோந்துப்பணியில் ஈடுபட்டனர்.

அப்போது அங்குள்ள பஸ் நிறுத்தம் அருகே சந்தேகப்படும்படி நின்ற 2 பேரை பிடித்து போலீசார் விசாரணை நடத்தினர். விசாரணையில் அவர்கள் அப்பகுதியை சேர்ந்த ராஜ்(19), கீழதெருவை சேர்ந்த சிவக்குமார்(25) ஆகியோர் என்பதும், குளத்தூர் போலீஸ் நிலையம் மீது பெட்ரோல் குண்டு வீசியது அவர்கள்தான் என்றும் தெரியவந்தது.

இதையடுத்து அவர்கள் 2 பேரையும் போலீசார் கைது செய்தனர். கைதான 2 பேரும் போலீசாரிடம் அளித்துள்ள வாக்குமூலத்தில், ’குளத்தூர் போலீசார் அடிக்கடி வாகன சோதனை என்ற பெயரில் எங்களை வழிமறித்ததால் போலீசாரை பழிவாங்கும் நோக்கத்தில் பெட்ரோல் குண்டு வீசினோம்’ என்று தெரிவித்தனர்.

எனினும் தூத்துக்குடி போராட்டத்துக்கும் இவர்களுக்கும் தொடர்பு உள்ளதா என்று போலீசார் விசாரணை மேற்கொண்டு வருகிறார்கள். கைதான 2 பேரும் விளாத்திகுளம் கோர்ட்டில் ஆஜர்படுத்தப்பட்டு கோவில்பட்டி கிளை சிறையில் அடைக்கப்பட்டனர். #tamilnews

விளாத்திகுளம்:

தூத்துக்குடி ஸ்டெர்லைட் ஆலையை மூடக்கோரி கடந்த 22-ந் தேதி நடந்த போராட்டம் வன்முறையில் முடிந்தது. அப்போது நடந்த துப்பாக்கி சூடு மற்றும் தடியடியில் இதுவரை 13 பேர் பலியாகியுள்ளனர்.

இந்த சம்பவத்தையடுத்து தூத்துக்குடியில் பல்வேறு மாவட்டங்களில் இருந்து வரவழைக்கப்பட்ட 3,500 போலீசார் பாதுகாப்பு பணியில் ஈடுபட்டனர். இருந்தபோதிலும் போராட்டக்காரர்கள், போலீசார் மீது கல்வீச்சு மற்றும் பெட்ரோல் குண்டுவீச்சு சம்பவத்தில் தொடர்ச்சியாக ஈடுபட்டு வந்தனர்.

கடந்த 24-ந் தேதி முத்தையாபுரம் போலீஸ் நிலையத்தின் மீது மர்ம நபர்கள் பெட்ரோல் குண்டு வீசினர். இதில் அங்கு நிறுத்தப்பட்டிருந்த மோட்டார் சைக்கிள் மட்டும் எரிந்து நாசமானது. பெட்ரோல் குண்டு வீசியவர்கள் யார் என போலீசார் விசாரணை நடத்தி வருகின்றனர்.

இந்நிலையில் விளாத்திகுளம் அருகே உள்ள குளத்தூர் போலீஸ் நிலையம் மீது மோட்டார் சைக்கிளில் வந்த மர்மநபர்கள் இருவர் பெட்ரோல் குண்டை வீசிவிட்டு அங்கிருந்து தப்பிச்சென்றுவிட்டனர். அந்த குண்டு அங்கிருந்த அறிவிப்பு பலகையின் மீது விழுந்து தீப்பிடித்து எரிந்தது.

இதையடுத்து போலீஸ் நிலையத்தில் பணியில் இருந்த போலீசார் விரைந்து வந்து தீயை அணைத்தனர். பெட்ரோல் குண்டை வீசிய மர்மநபர்களை போலீசார் தேடி சென்றனர். ஆனால் அந்த மர்மநபர்கள் தப்பிச்சென்றுவிட்டனர்.

இதுகுறித்து குளத்தூர் போலீசார் வழக்குப்பதிந்து விசாரணை நடத்தி வருகின்றனர்.