நீங்கள் தேடியது "மீன்கள்"

போரூர்:

தமிழகத்தில் விற்பனை செய்யப்படும் மீன்களில் பிணத்தை பதப்படுத்த உதவும் ‘பார்மலின்’ என்ற ரசாயனம் கலந்து இருப்பதாக சில நாட்களாக பீதி ஏற்பட்டுள்ளது. இந்த ரசாயனம் புற்றுநோயை ஏற்படுத்தும் என்பதால் மீன்கள் வாங்க பொதுமக்கள் அச்சம் அடைந்து வருகிறார்கள்.

பெரும்பாலும் ஆந்திராவில் இருந்து வரும் மீன்களில் இந்த ரசாயனம் கலந்து இருப்பதாக தகவல் பரவி உள்ளது. கடந்த சில நாட்களுக்கு முன்பு அசாமில் விற்பனைக்கு வந்த ஆந்திரா மீன்களில் ரசாயனம் கலந்து இருப்பதை அம்மாநில அரசு உறுதி செய்தது. இதையடுத்து ஆந்திரா மீன்களுக்கு அசாம் மாநிலம் தடை விதித்து இருக்கிறது.

சென்னையில் சிந்தாதிரிப்பேட்டை, வானகரம் மார்க்கெட்டுகளில் ஆந்திரா உள்ளிட்ட வெளிமாநில மீன்கள் அதிக அளவு விற்பனை செய்யப்பட்டு வருகின்றன. ரசாயன மீன் பீதியால் இந்த மீன் மார்க்கெட்டுகளில் தற்போது மீன் வாங்க பொதுமக்கள் தயக்கம் காட்டி வருகிறார்கள்.

வானகரம் மீன் மார்க்கெட்டில் மொத்தம் 52 கடைகளில் வியாபாரிகள் மீன் வியாபாரம் செய்து வருகிறார்கள். ரசாயனம் கலந்த மீன்கள் விற்பனை செய்யப்படுவதாக வந்த பீதியால் இங்கு வழக்கத்தை விட மீன் வியாபாரம் குறைந்து விட்டது. விலையும் சரிந்துள்ளது.

இதுகுறித்து மீன் வியாபாரி சரவணன் கூறும்போது, ‘‘ரசாயன மீன் பீதியால் வானகரம் மீன் மார்க்கெட்டுக்கு வரும் வாடிக்கையாளர்களின் எண்ணிக்கை குறைந்து உள்ளன.

இதனால் மீன் விலையும் குறைக்க வேண்டிய கட்டாயம் ஏற்பட்டு இருக்கிறது. மீன்களில் ரசாயனம் கலப்பது இல்லை’’ என்றார்.

மீன்வியாபாரி குரு கூறும் போது, ‘‘ வானகரம் மீன் கார்க்கெட்டு, காசிமேடு, பாண்டிசேரி, கடலூர் ஆந்திரா மாநிலம் விசாகப்பட்டினம் ஆகிய இடங்களில் இருந்து தினமும் 8 முதல் 10 லாரிகளில் மீன்கள் விற்பனைக்கு வருகிறது.

ரசாயன பீதியால் கடந்த வாரத்தை காட்டிலும் மீன்கள் விலை கடுமையாக சரிந்துவிட்டது. நாளை ஆடி மாதம் தொடங்குவதால் மீன் விலை இன்னும் சரிவடையும்’’ என்றார்.

காசிமேடு மீன் மார்க்கெட்டுக்கு கடந்த சில நாட்களாக மீன்வாங்க வருபவர்களின் கூட்டம் அதிகரித்து உள்ளது. பெரும்பாலும் வெளிமாநில மீன்களில் ரசாயனம் கலக்கப்படுகிறது என்பதால் காசிமேட்டில் மீன் வாங்க வியாபாரிகளும், பொது மக்களும் ஆர்வம்காட்டி வருகிறார்கள். இதன் காரணமாக கடந்த வாரத்தை விட மீன்விலை அதிகரித்து இருந்தது. ஞாயிற்றுக்கிழமையான நேற்று வழக்கம்போல் காசிமேடு மார்க்கெட்டில் கூட்டம் அலைமோதியது.

இதுகுறித்து மீனவர்கள் கூறும்போது, ‘‘ரசாயனம் கலப்பு பீதியால் கடந்த வாரம் காசிமேடு பகுதிகளில் மீன் விற்பனை சரிந்தது. இங்கு பிடிக்கப்படும் மீன்கள் விற்பனைக்கே போதாது. அப்படி இருக்க மீன்களை பதப்படுத்த ரசாயனம் கலக்க வேண்டிய அவசியம் இல்லை.

தற்போது காசிமேட்டில் வழக்கம்போல் வியாபாரிகளும், பொதுமக்களும் மீன்கள் வாங்கிச் செல்கிறார்கள்’’ என்றனர்.

காசிமேட்டு மீன் மார்க்கெடில் மீன்விலை விபரம் வருமாறு (அடைப்புக்குள் கடந்த வாரம் விலை):-

பெரிய வஞ்சிரம் ரூ.700 (500), சிறிய வஞ்சிரம் ரூ.400 (320), வவ்வால் ரூ.380 (310), சங்கரா ரூ.220 (190), சீலா ரூ.200 (180), கொடுவா ரூ.250 (200), கவளை ரூ.70 (35), நாக்குமீன் ரூ.280 (200), பாறை ரூ.280 (220), கிழங்காமீன் ரூ.200 (180), வாள மீன் ரூ.125 (90).

பெரம்பலூர்:

ஆந்திரா, புதுச்சேரி உள்ளிட்ட பல்வேறு மாநிலங்களில் இருந்தும் சென்னை, கடலூர், புதுக்கோட்டை, ராமேசுவரம் உள்ளிட்ட தமிழகத்தின் பல்வேறு பகுதிகளில் இருந்தும் திருச்சி புத்தூர் மீன் மார்க்கெட்டுக்கு கடல் மீன்கள் உள்பட பல்வேறு வகையான மீன்கள் விற்பனைக்கு கொண்டு வரப்படுகிறது. அங்கிருந்து பெரம்பலூர் சிறு வியாபாரிகள் மீன்களை கொள்முதல் செய்து வந்து பெரம்பலூரில் விற்பனை செய்வது வழக்கம். இந்நிலையில் கடந்த சில வாரங்களாக மீன்களின் விலை கடுமையாக உயர்ந்துள்ளது.

பெரம்பலூர் நகரில் உள்ள மீன் கடைகளில் கிலோ ரூ.150-க்கு விற்ற ரோகு வகை மீன் தற்போது ரூ.180-க்கும், கிலோ ரூ.170-க்கு விற்ற கட்லா மீன் ரூ.200-க்கும், கிலோ ரூ.170-க்கு விற்ற பாப்பு லெட் மீன் ரூ.180-க்கும், கிலோ ரூ.800-க்கு விற்ற வஞ்சிரம் மீன் ரூ.900-க்கும், கிலோ ரூ.300-க்கு விற்ற சீலா மீன் ரூ.350-க்கும் விற்கப்படுகிறது. மேலும் அயிலைபாறை மீன் கிலோ ரூ.250-க்கும், கொடுவா பாறை ரூ.250-க்கும், தேங்காய் பாறை ரூ.200-க்கும், நெத்திலி ரூ.250-க்கும், இறால் ரூ.300-க்கும், அயிலைசம்பா ரூ.120-க்கும், மத்தி ரூ.120-க்கும், சங்கரா ரூ.250-க்கும், பிளாச்சி ரூ.350-க்கும் விற்பனை செய்யப்படுகிறது.

கண்ணாடி பாறை கிலோ ரூ.350-க்கும், கிளி மீன் ரூ.300-க்கும், விறால் ரூ.500-க்கும், உயிர்மீன் (மயிலை) ரூ.150-க்கும், வாழை மீன் ரூ.350-க்கும், பால்சுறா, வஞ்சிரம் பாறை ரூ.400-க்கும், நண்டு ரூ.250-க்கும், புளூ நண்டு ரூ.450-க்கும், கடல் வவ்வால் ரூ.450-க்கும், கடல் விறால் ரூ.350-க்கும், கடல் கெழுத்தி ரூ.300-க்கும், அயிலை ரூ.250-க்கும், ஜிலேபி ரூ.130-க்கும், பங்கஸ் வகை மீன் ரூ.180-க்கும் விற்பனை செய்யப்படுகிறது.

மீன்களின் விலை அதிகரித்தது குறித்து பெரம்பலூரை சேர்ந்த பெண் மீன் வியாபாரி ஒருவர் கூறுகையில், “தமிழகம் முழுவதும் உள்ள கடல் பகுதிகளில் மீன்கள் இனப்பெருக்கத்திற்காக கடந்த ஏப்ரல் 15-ந்தேதி முதல் வருகிற 14-ந்தேதி மீன்பிடி தடை காலம் அமலில் இருப்பதால் விசைப்படகுகளில் மீனவர்கள் மீன்பிடிக்க கடலுக்கு செல்வதில்லை. நாட்டுப்படகு மீனவர்கள் மட்டுமே கடலுக்கு சென்று மீன் பிடித்து வருகின்றனர். இதனால் மீன்களின் வரத்து குறைந்துள்ளதால், அவற்றின் விலை கடுமையாக உயர்ந்துள்ளது. கண்மாயில் பிடிக்கப்படும் கெண்டை, கட்லா மீன்களை மொத்த வியாபாரிகள் விற்பனை செய்கின்றனர். அவற்றின் விலையும் கடுமையாக உயர்ந்துள்ளது. மீன்பிடி தடைகாலம் முடிந்த பின்னரே மீன்களின் விலை கணிசமாக குறையும்” என்றார். இந்நிலையில் மீன் கடைகளுக்கு மீன் வாங்க வந்தவர்கள், மீன்கள் விலை அதிகமாக இருந்ததால் குறைந்த அளவில் மீன்களை வாங்கி சென்றனர்.