நீங்கள் தேடியது "போளூர்"

போளூர்:

போளூர் பொத்தரையை சேர்ந்தவர் பாண்டுரங்கன் மகன் பச்சையப்பன் (வயது 25). கட்டுமான தொழிலாளி. இவருக்கும், கலசப்பாக்கம் நாயுடுமங்கலம் காரப்பள்ளம் கிராமத்தை சேர்ந்த புருஷோத்தமன் மகள் பூஜா என்கிற தரணிக்கும் (21), கடந்த 2 ஆண்டுகளுக்கு முன்பு திருமணம் நடந்தது.

இந்த நிலையில், பச்சையப்பனுக்கு வேறொரு பெண்ணுடன் கள்ளத்தொடர்பு ஏற்பட்டது. இதுதொடர்பான தகராறில், நேற்று முன்தினம் நள்ளிரவு மனைவி பூஜாவை பச்சையப்பன் அடித்துக் கொன்றார்.

இதையடுத்து, அவர் தப்பி ஓடிவிட்டார். போளூர் சப்-இன்ஸ்பெக்டர் கிருஷ்ணமூர்த்தி மற்றும் போலீசார் வழக்குப்பதிந்து பச்சையப்பனை தீவிரமாக தேடினர். நேற்றிரவு அவர் பிடிபட்டார்.

பச்சையப்பனை கைது செய்த போலீசார் விசாரணையை தொடங்கினர். ஆனால், போலீசாரின் விசாரணைக்கு அவர் ஒத்துழைப்பு தரவில்லை. வாய்திறக்காமல் அமைதியாக இருந்தார்.

எனினும், போலீசார் கிடுக்கிப்பிடியாக விசாரணையை தீவிரப்படுத்தியுள்ளனர். கொலை செய்யப்பட்ட பூஜாவிற்கு திருமணமாகி 2 ஆண்டுகளே ஆவதால், உதவி கலெக்டர் உமாமகேஸ்வரியும் மேல் விசாரணை நடத்தி வருகிறார்.

போளூர்:

திருவண்ணாமலை மாவட்டம் ஜவ்வாதுமலை ஒன்றியம் முடக்காட்டூர் மலை கிராமத்தில் ஊராட்சி ஒன்றிய நடுநிலைப்பள்ளி உள்ளது.

இந்த பள்ளி தலைமை ஆசிரியராக ரவி என்பவர் பணியாற்றி வருகிறார். இவர் பள்ளிக்கு சரியாக வராமலும், மாணவர்களுக்கு பாடங்கள் நடத்தாமலும் பணியில் அலட்சியமாக இருந்ததாக பல்வேறு குற்றச்சாட்டுகள் இருந்தன.

கடந்த கல்வியாண்டில் தலைமை ஆசிரியருக்கு எதிராக மலை கிராம மக்கள் போராட்டத்தில் ஈடுபட்டனர். அவர் இருக்கும் வரை பிள்ளைகளை பள்ளிக்கு அனுப்ப மாட்டோம் என கூறி மாணவர்களை அழைத்து சென்று விட்டனர்.

இதுகுறித்து ஜமுனாமரத்தூர் வட்டார கல்வி அலுவலர் கோவிந்தராஜிடம் புகார் அளித்தனர்.

இதனை தொடர்ந்து வட்டார கல்வி அலுவலர் விசாரணை நடத்தினார். கடந்த ஜனவரி மாதம் தலைமை ஆசிரியர் ரவிக்கு கட்டாய விடுப்பு அளிக்கப்பட்டது.

இந்த நிலையில் கோடை விடுமுறைக்கு பின்னர் பள்ளி திறக்கப்பட்டதும். ரவி மீண்டும் பணிக்கு திரும்பினார். இதனால் கோபமடைந்த கிராம மக்கள் தங்களது பிள்ளைகளை பள்ளிக்கு அனுப்ப மறுத்து போராட்டம் செய்தனர். இதனால் ஒருவாரமாக பள்ளி செயல்படவில்லை.

ஆசிரியர்கள் மட்டும் பள்ளிக்கு வந்து சென்று கொண்டிருந்தனர். இதுகுறித்து போளூர் மாவட்ட கல்வி அலுவலர் ராஜேந்திரன் பள்ளிக்கு நேரில் சென்று விசாரணை நடத்தினார்.

அப்போது தலைமை ஆசிரியரை இடமாற்றம் செய்யக் கோரி பொதுமக்கள் மனு அளித்தனர். இதனையடுத்து தலைமை ஆசிரியர் ரவியை சஸ்பெண்டு செய்து மாவட்ட கல்வி அலுவலர் உத்தரவிட்டார்.

இதைத் தொடர்ந்து கிராம மக்கள் தங்களது பிள்ளைகளை பள்ளிக்கு அனுப்பினர். #tamilnews

போளூர்:

திருவண்ணாமலை மாவட்டம் செங்கம் அருகே உள்ள திரும்பட்டை சேர்ந்தவர் சக்திவேல் (வயது 29). கூலித் தொழிலாளி. இவரது மனைவி சத்யா (28). இவர்களது பெண் குழந்தை துர்கா (4).

போளூர் காங்கேயனூரில் சத்யாவின் தாய் வீடு உள்ளது. தாய் வீட்டில் ஒரு நிகழ்ச்சி நடந்தது. இதில் சத்யா தனது கணவர் மற்றும் குழந்தையுடன் சென்று கலந்து கொண்டார்.

இன்று காலை சத்யா தனது கணவர், குழந்தையுடன் செங்கம் திரும்பினார். 3 பேரையும் போளூர் பஸ் நிலையத்தில் விடுவதற்காக ஒரே பைக்கில் ஏற்றிக் கொண்டு சத்யாவின் தம்பி பார்த்திபன் (25) அழைத்துச் சென்றார்.

காங்கேயனூர் கிராமப் பகுதியில் இருந்து மெயின் ரோட்டிற்கு வந்த போது போளூரில் இருந்து செங்கம் நோக்கி அதிவேகத்தில் வந்த டெம்போ வேன் பைக் மீது மோதியது.

இதில் பைக்கில் சென்ற குழந்தை உள்பட 4 பேரும் தூக்கி வீசப்பட்டு நடுரோட்டில் விழுந்து பலத்த காயமடைந்தனர். பார்த்திபனும், சத்யாவும் சம்பவ இடத்திலேயே துடி துடித்து பரிதாபமாக உயிரிழந்தனர்.

குழந்தை துர்காவும், சக்திவேலும் ரத்த வெள்ளத்தில் துடி துடித்தபடி உயிருக்கு போராடினர். அவர்களை பொதுமக்கள் மீட்டு போளூர் அரசு ஆஸ்பத்திரிக்கு அனுப்பி வைத்தனர்.

அங்கு சிகிச்சை பலனின்றி குழந்தை துர்கா பரிதாப மாக உயிரிழந்தது. சக்திவேல் நிலைமை கவலைக் கிடமாக இருப்பதால் மேல் சிகிச்சைக்காக திருவண்ணாமலை அரசு ஆஸ்பத்திரிக்கு மாற்றப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது.

சாலை விபத்தில் ஒரே குடும்பத்தில் குழந்தை உள்பட 3 பேர் பலியானதால் ஆத்திரமடைந்த உறவினர்கள் மற்றும் அப்பகுதி மக்கள் 100-க்கும் மேற்பட்டோர் திரண்டு மறியல் போராட்டம் செய்தனர்.

போளூர் டி.எஸ்.பி. சின்ராஜ் மற்றும் இன்ஸ்பெக்டர் சுரேஷ்பாபு, போலீசார் விரைந்து வந்து சமரச பேச்சுவார்த்தை நடத்தினர்.

தற்போது விபத்து நடந்த இடத்தில் வேகத்தடை அமைக்க வேண்டும் என்று பல ஆண்டுகளாக கோரிக்கை விடுத்து வருகிறோம். ஆனால், நெடுஞ்சாலைத்துறையினர் வேகத்தடை அமைக்க வில்லை.

இதனால் அடிக்கடி விபத்து ஏற்படுகிறது. உயிரிழப்புகளும் தொடர்கிறது. தற்போது 3 உயிர்கள் பலியாகியுள்ளது. இதற்கு நெடுஞ்சாலைத்துறையினர் தான் காரணம் என்றுக்கூறி போலீசாருடன் பொது வாக்குவாதம் செய்தனர்.

இதையடுத்து, இன்று மாலைக்குள் வேகத்தடை அமைக்க நடவடிக்கை எடுக்கப்படும் என்று டி.எஸ்.பி. உறுதி அளித்ததையடுத்து பொதுமக்கள் கலைந்து சென்றனர். இச்சம்பவத்தால் அப்பகுதியில் பரபரப்பு ஏற்பட்டது.

போளூர்:

வேலூர் பாகாயத்தில் வசிக்கும் ஒரே குடும்பத்தை சேர்ந்த 12 பேர், காரில் வேளாங்கண்ணிக்கு சுற்றுலா சென்று விட்டு நேற்றிரவு ஊர் திரும்பினர். திருவண்ணாமலை மாவட்டம் போளூர் அருகே எட்டிவாடி கிராமத்தில் உள்ள தனியார் கல்லூரி அருகே இன்று காலை 6 மணியளவில் வந்து கொண்டிருந்தனர்.

அப்போது, குடியாத்தம் சந்தப்பேட்டையில் இருந்து வந்த லோடு ஆட்டோவும், காரும் எதிர்பாராதவிதமாக நேருக்கு நேர் மோதியது. இதில் காரும், ஆட்டோவும் நசுங்கி உருகுலைந்தது.

இந்த கோர விபத்தில் காரில் இருந்த வைஷ்ணவி (வயது 13) என்ற சிறுமி மற்றும் ஆட்டோவில் இருந்த ரவி (52) ஆகிய 2 பேரும் பலத்த காயமடைந்து, சம்பவ இடத்திலேயே பலியாகினர். மேலும் காரில் இருந்த வெங்கடேசன், லட்சுமி, ராஜ் குமார், நவீன், அனு, துளசி, கருணாஸ், பரத், சீனு, அருண் மற்றும் ஆட்டோ டிரைவர் என 11 பேர் படுகாயமடைந்தனர்.

களம்பூர் போலீசார் சம்பவ இடத்திற்கு விரைந்து வந்து பலியான 2 பேரின் உடல்களையும் மீட்டு பிரேத பரிசோதனைக்காக ஆரணி அரசு ஆஸ்பத்திரிக்கு அனுப்பி வைத்தனர்.

படுகாயமடைந்த 11 பேரும் போளூர் மற்றும் வேலூர் அடுக்கம்பாறை அரசு ஆஸ்பத்திரிகளில் அனுமதிக்கப்பட்டுள்ளனர். அவர்களில் சிலரது நிலைமை கவலைக்கிடமாக இருப்பதால் தீவிர சிகிச்சை அளிக்கப்பட்டு வருகிறது.

விபத்து குறித்து போலீசார் வழக்குப்பதிவு செய்து தீவிர விசாரணை நடத்தி வருகின்றனர். #tamilnews