நீங்கள் தேடியது "ரெட்அலர்ட்"

மதுரை:

திருப்பரங்குன்றம் இடைத்தேர்தல் பணிகளில் அ.தி.மு.க.வுக்கு ஈடு கொடுக்கும் வகையில் அம்மா மக்கள் முன்னேற்றக்கழமும் தீவிர பணியாற்றி வருகிறது.

ஆர்.கே.நகரில் அ.தி.மு.க.வுக்கு அதிர்ச்சி தகவல்கள் கொடுத்தது போல அ.தி.மு.க. கோட்டை என்று கருதப்படும் திருப்பரங்குன்றத்திலும் அதிசயத்தை நடத்திக்காட்ட தினகரன் புதிய வியூகங்களை வகுத்து வருகிறார்.

இதற்காக வருகிற 7-ந் தேதி திருப்பரங்குன்றத்தில் பொதுக்கூட்டம் நடத்த அ.ம.மு.க. முடிவு செய்தது. அதில் துணை பொதுச் செயலாளர் தினகரன் மற்றும் முக்கிய நிர்வாகிகள் பங்கேற்று நலத்திட்ட உதவிகள் வழங்குவதாக இருந்தது.

இதற்காக திருப்பரங்குன்றம் பூங்கா பஸ் நிறுத்தம் அருகே சுமார் 8 ஏக்கர் பரப்பளவில் இடம் தேர்வு செய்யப்பட்டு இருந்தது. இந்த இடத்தில் பொதுக்கூட்டம் நடத்த போலீஸ் அனுமதிக்கு அ.ம.மு.க. நிர்வாகிகள் விண்ணப்பித்தனர். ஆனால் போலீசார் அனுமதி தரவில்லை.

இந்த நிலையில் பொதுக்கூட்டம் நடத்த அனுமதி கேட்டு மதுரை ஐகோர்ட்டிலும் வழக்கு தொடரப்பட்டது. ஆனாலும் போலீஸ் அனுமதி வழங்குவதில் தாமதம் ஏற்பட்டது.

இதனிடையே 7-ந் தேதி பலத்த மழை பெய்யும் என்று “ரெட் அலர்ட்” விடுக்கப்பட்டுள்ளதால் பொதுக்கூட்டத்தை ரத்து செய்யும்படி கட்சி நிர்வாகிகளுக்கு தினகரன் உத்தரவிட்டுள்ளார்.

இதனால் 7-ந் தேதி திருப்பரங்குன்றத்தில் தினகரன் பங்கேற்பதாக இருந்த பொதுக்கூட்டம் ரத்து செய்யப்பட்டுள்ளது. பின்னர் மறுதேதியில் கூட்டம் நடத்த அ.ம.மு.க. நிர்வாகிகள் முடிவு செய்துள்ளனர். #TTVDhinakaran

சென்னை:

தமிழ்நாடு முழுவதும் வரும் 7-ந்தேதி மிக பலத்த மழை பெய்யும் என்று “ரெட் அலர்ட்” விடுக்கப்பட்டுள்ளது.

இதையடுத்து பல்வேறு முன் எச்சரிக்கை நடவடிக்கைகளை தமிழக அரசு மேற்கொண்டுள்ளது. இது தொடர்பாக கூடுதல் தலைமைச்செயலாளரும், வருவாய் நிர்வாக ஆணையருமான சத்யகோபால் கூறியதாவது:-


சில இடங்களில் மட்டுமே மிக, மிக பலத்த மழை பெய்ய வாய்ப்புள்ளது. எனவே ரெட் அலர்ட் பற்றி பொதுமக்கள் பயப்படவோ அல்லது பீதி அடையவோ தேவை இல்லை. என்றாலும் மக்களின் நலன் கருதியே முன் எச்சரிக்கை நடவடிக்கைகள் எடுக்கப்பட்டுள்ளன.

பலத்த மழை பெய்யும் போது எத்தகைய நடவடிக்கைகளில் ஈடுபட வேண்டும் என்று மாவட்ட கலெக்டர்களுக்கு அறிவுறுத்தப்பட்டுள்ளது. இதற்கிடையே மிக பலத்த மழை பெய்யும் போது எந்தெந்த இடங்களில் பாதிப்பு ஏற்படும் என்று ஆய்வு செய்து பட்டியல் தயாரித்துள்ளோம். முன்பு நடந்த பாதிப்பு பகுதிகளை அடிப்படையாகக் கொண்டு இந்த பட்டியல் தயாரிக்கப்பட்டுள்ளது.

அதன்படி 4399 இடங்களில் மழை வெள்ளப் பாதிப்பு ஏற்படும் என்று கண்டு பிடித்துள்ளோம். இதில் 578 இடங்களில் மிக பலத்த பாதிப்பு ஏற்படக்கூடும். 892 இடங்களில் அதிகபட்ச பாதிப்பும், 1206 இடங்களில் மிதமான பாதிப்பும், 1723 இடங்களில் குறைவான பாதிப்பும் ஏற்பட வாய்ப்புள்ளது.

7-ந்தேதி மழை பாதிப்பு ஏற்படும் பட்சத்தில் பொதுமக்களுக்கு உடனுக்குடன் உதவிகள் செய்ய குழுக்கள் உருவாக்கப்பட்டுள்ளன. 1275 போலீசார் கொண்ட சிறப்பு பேரிடர் மேலாண்மைக் குழு அமைக்கப்பட்டுள்ளது. இது தவிர கடலோர மாவட்டங்களில் 80 பேருக்கும், பிற மாவட்டங்களில் 60 பேருக்கும் மீட்புப் பணிக்கான குழுக்கள் உருவாக்கப்பட்டுள்ளன.

மேலும் 692 பல்துறை மண்டலக் குழுக்கள் அமைக்கப்பட்டுள்ளன. துணை கலெக்டர்கள் மேற்பார்வையில் இயங்கும் இந்த குழுக்கள் மூலம் உடனுக்குடன் உதவிகள் செய்யப்படும். இந்த குழுக்கள் நாளை (சனிக்கிழமை) முதல் பாதிப்பு ஏற்பட வாய்ப்புள்ள பகுதிகளுக்கு சென்று முகாமிட்டு பணிகளை மேற்கொள்ளும்.

692 குழுக்களிலும் 30 ஆயிரத்து 759 பேர் இடம் பெற்றுள்ளனர். இவர்கள் மக்களை மீட்க ஒருங்கிணைந்து செயல்படுவார்கள். மழை அளவு அதிகரிக்கும் போது நீர் நிலைகளில் இருந்து தண்ணீரை திறக்கவும் கலெக்டர்களுக்கு அறிவுறுத்தி இருக்கிறோம்.

அதுபோல பள்ளி, கல்லூரிகளுக்கு விடுமுறை அளிக்கவும் உத்தரவிடப்பட்டுள்ளது. மேலும் மீனவர்களுக்கு தேவையான உதவிகள் செய்யவும் நடவடிக்கைகள் எடுக்கப்பட்டுள்ளன.

இவ்வாறு வருவாய் நிர்வாக ஆணையர் சத்யகோபால் கூறினார். #TNRain #TNRedAlert