நீங்கள் தேடியது "அலட்சியம்"

திருவண்ணாமலை:

திருவண்ணாமலை மாவட்டம் தண்டராம்பட்டை சேர்ந்தவர் ராமசாமி (60) இவருக்கு சொந்தம் என்று சொல்லிகொள்ள யாரும் இல்லை.

இவருக்கு ஒரு கை, ஒரு கால் செயல் இழந்த நிலையில் கேட்பாரற்று சாப்பாடு, தண்ணீர் இல்லாமல் மயங்கிய நிலையில் திருவண்ணாமலை சாலை ஓரத்தில் மயங்கி கிடந்தார்.

இவரை சமூக சேவகர் மணிமாறன் என்பவர் மீட்டு 108 ஆம்புலன்ஸ் மூலம் திருவண்ணாமலை அரசு மருத்துவ கல்லூரி மருத்துவமனையில் சேர்த்தார். அங்கு அவருக்கு முதலுதவி செய்து விட்டு அவசர சிகிச்சை பிரிவில் சேர்த்துவிட்டு வந்து விட்டார்.

மருத்துவமணை ஊழியர்கள் கேட்பாரற்று கிடக்கும் பழைய பொருட்கள் வைக்கும் அறையில் உள்ள ஒரு கட்டிலில் இந்த முதியவரை போட்டுவிட்டு குளுக்கோஸ் ஏற்றுவதற்காக அவரது கையில் ஊசிகளை போட்டு சென்று விட்டனர்.

ஊசி போட்ட இடத்தின் வழியாக நிறைய ரத்தம் அவரது உடம்பில் இருந்து வெளியேறி உள்ளது. முதியவர் மயக்க நிலையில் இருந்ததால் அவரால் பேசக்கூட முடியவில்லை. கூப்பிட்டால் கூட யாருக்கும் கேட்காத நிலையில் கிடந்துள்ளார், அந்த அறையில் இவரை தவிர வேறு ஒருத்தரும் கிடையாது.

இரண்டு நாட்களாக ஒரு வேளை கூட தண்ணீர் சாப்பாடு அவருக்கு மருத்துவமனை நிர்வாகம் தரவில்லை என கூறப்படுகிறது. ரத்தம் வெளியேறிய நிலையில் சோறு தண்ணீர் இல்லாததால் முதியவர் மயக்க நிலையிலேயே கிடந்துள்ளார்.

இரண்டு நாள் கழித்து மணிமாறன் சென்று பார்த்த போதுதான் முதியவரின் பரிதாப நிலையை கண்டார். இது பற்றி புகார் கூறிய பின்னரும் அந்த முதியவருக்கு எந்தவித சிகிச்சையும் அளிக்கவே இல்லை.

சமூக சேவகர் வாங்கி வந்த உணவு மற்றும் தண்ணீரை கொடுத்து சாப்பிட வைத்துள்ளனர். முதியவருக்கு உரிய சிகிச்சை அளிக்க வேண்டுமென சமூக அலுவலர்கள் வலியுறுத்தியுள்ளனர்.

மும்பை:

மராட்டிய மாநிலம் சங்க்லியில் உள்ள அரசு ஆஸ்பத்திரியில், அவினாஷ் தாதாசாகேப் பக்வடே (வயது 50) என்பவர் கல்லீரல் கோளாறு காரணமாக சிகிச்சைக்கு அனுமதிக்கப்பட்டார். நேற்று முன்தினம் அவருடைய குடும்பத்தினரை ஆஸ்பத்திரி நிர்வாகம் தொலைபேசியில் தொடர்பு கொண்டு, அவினாஷ் இறந்து விட்டதாக கூறியது.

அழுதபடி ஆஸ்பத்திரிக்கு சென்ற குடும்பத்தினரிடம், பிரேத பரிசோதனை செய்யப்பட்டு, துணியால் மூடப்பட்ட ஒரு உடலை ஒப்படைத்தது. ஒரு உறவினர் சந்தேகப்பட்டு கேள்வி எழுப்பியபோது, உடலை பெற்றுக்கொண்டு வெளியேறுமாறு ஆஸ்பத்திரி அதிகாரிகள் கண்டிப்புடன் கூறினர்.

அந்த உடலுடன் அவினாஷ் குடும்பத்தினர் வீட்டுக்கு வந்தனர். அஞ்சலி செலுத்த வந்த சில உறவினர்களுக்கு அது அவினாஷ் உடல்தானா என்ற சந்தேகம் ஏற்பட்டது. இதனால், முழுமையாக துணியை அகற்றி பார்த்தனர். அப்போது, அது வேறு ஒருவரது உடல் என்று உறுதி செய்யப்பட்டது.

மீண்டும் ஆஸ்பத்திரிக்கு சென்று பார்த்தபோது, அவினாஷ் சிகிச்சை பெற்று வருவது தெரியவந்தது. அவரை இறந்து விட்டதாக கூறியதுடன், வேறு நபரின் உடலை ஒப்படைத்த ஆஸ்பத்திரி ஊழியர்கள் மீது ஆஸ்பத்திரி சூப்பிரண்டு சுபோத் உகானேவிடம் புகார் தெரிவித்தனர். இதுபற்றி விசாரணை நடத்தி, உரிய நடவடிக்கை எடுக்கப்படும் என்று அவர் உறுதி அளித்தார். அதே சமயத்தில், ஒப்படைக்கப்பட்டது யாருடைய உடல் என்பதும் அடையாளம் காணப்படவில்லை. அந்த உடலுக்கு யாரும் உரிமை கோரவில்லை.