உடுமலை:
உடுமலையிலிருந்து மூணாறு செல்லும் ரோட்டில், சின்னாறு வரையுள்ள 28.80 கி.மீ., மாவட்ட முக்கிய ரோடு பிரிவின் கீழ் நெடுஞ்சாலைத்துறை உடுமலை உட்கோட்டத்தால் பராமரிக்கப்பட்டு வருகிறது.
ஆனைமலை புலிகள் காப்பகம், உடுமலை, அமராவதி வனசரகங்களின் வழியாக செல்லும் ரோட்டில், 18வது கி.மீ.,ல் சின்னாறு அருகே அபாய வளைவு பகுதி உள்ளது.இருபுறங்களிலும் மலைச்சரிவுடன் குறுகலாக செல்லும் இந்த கொண்டை ஊசி வளைவில், நாள்தோறும் உடுமலையிலிருந்து கேரள மாநிலத்திற்கு நூற்றுக்கணக்கான வாகனங்கள் செல்கின்றன.இந்த அபாய வளைவில், இரு வாகனங்கள் விலகிச்செல்ல முடியாததால், வளைவின் முதற்பகுதியிலுள்ள இடைவெளியில், வாகனங்கள் நிறுத்தப்பட்டு, ஒவ்வொரு வாகனமாக அப்பகுதியை கடந்து செல்கின்றன.இவ்வாறு வனப்பகுதியில்மலைச்சரிவில் அமைந்துள்ள பாலத்தில், விபத்துகளை தவிர்க்க, நெடுஞ்சாலைத்துறை சார்பில் ரோட்டின் இருபுறங்களிலும் இரும்பு தடுப்புகள் அமைக்கப்பட்டுள்ளன.இதனால் வாகனங்கள் கட்டுப்பாட்டை இழந்து சென்றாலும் மலைச்சரிவில் விழுந்து விபத்திற்குள்ளாவது தவிர்க்கப்பட்டு வருகிறது.
இருப்பினும் பல்வேறு காரணங்களால், தடுப்பு சரிவது உள்ளிட்ட பிரச்னைகள் ஏற்பட்டு வருகின்றன.இந்த அபாய வளைவு பகுதியை மேம்படுத்த வேண்டும் என இரு மாநில வாகன ஓட்டுனர்களும் தொடர்ந்து வலியுறுத்தி வருகின்றனர்.நாள்தோறும் உடுமலை பகுதியிலிருந்து காய்கறிகள் மற்றும் இதர பொருட்கள் மறையூர் வழியாக மூணாறுக்கு கொண்டு செல்லப்படுகிறது. மேலும், சுற்றுலா பயணிகள்,இரு மாநில தொழிலாளர்கள் இந்த ரோட்டை நம்பியே உள்ளனர்.அபாய வளைவு பகுதியில் தடுப்பு கம்பிகள் விழுந்து போக்குவரத்து தடைபட்டால் இரு மாநில மக்களும் பாதிக்கப்படுவார்கள்.
இந்த அவலத்தை தவிர்க்க, நெடுஞ்சாலைத்துறை சார்பில் வளைவு பகுதியை மேம்படுத்தி, பாலம் அமைக்க வேண்டும் என நீண்ட காலமாக கோரிக்கை விடுத்தும் எவ்வித நடவடிக்கையும் எடுக்கப்படவில்லை.எனவே உடுமலை-மூணாறு ரோட்டில், அபாய வளைவு பகுதியை மேம்படுத்த வேண்டும் என வாகன ஓட்டுனர்கள் வலியுறுத்தி உள்ளனர்.
