நீங்கள் தேடியது "தர்மபுரி போராட்டம்"

தருமபுரி:

தருமபுரி மாவட்டம், பென்னாகரம் அடுத்த வட்டவனஹள்ளி ஊராட்சி கோட்டூர் மலை கிராமத்தில் நூற்றுக்கும் மேற்பட்ட குடும்பத்தினர் வசித்து வருகின்றனர். இங்கு முறையான சாலை வசதி இல்லாமல், அத்தியாவசிய தேவைகளுக்கு கழுதை மூலம் பொருட்கள் எடுத்துச் செல்லப்படுகிறது.

மேலும் அரசு பள்ளிக்கு ஆசிரியர்கள் வருவதில்லை. சாலை வசதி இல்லாததால் மேற்படிப்புக்கு மலை கிராமத்தில் இருந்து அப்பகுதி குழந்தைகள் செல்ல முடியாமல் படிப்பை பாதியில் நிறுத்தி நின்று விடுகின்றனர்.

வனப்பகுதியில் இருப்பதால் கடந்த சில ஆண்டுகளுக்கு முன்பு சாலை அமைக்க வனத்துறையிடம் அனுமதி பெறப்பட்டது. ஆனால் இதுவரை சாலை வசதி ஏற்படுத்தி தரவில்லை. இதனால் மலை கிராம மக்கள் 100-க்கும் மேற்பட்டோர் சாலை வசதி கேட்டு ஆதார், வாக்காளர் அடையாள அட்டை, குடும்ப அட்டை உள்ளிட்ட அரசு ஆவணங்களுடன் மாவட்ட கலெக்டர் அலுவலகத்தில் ஒப்படைத்து மனு கொடுக்க வந்திருந்தனர்.

அப்பொழுது போலீசார் 5 பேர் மட்டுமே மாவட்ட கலெக்டரை சந்திக்க உள்ளே செல்ல வேண்டும் என தெரிவித்தனர்.

ஆனால் எல்லோரையும் விட வேண்டுன் என மலை கிராம மக்கள் தெரிவித்து, வாக்குவாதம் செய்து, நுழைவாயிலில் திடீரென தர்ணா போராட்டத்தில் ஈடுபட்டனர்.

இதனைத் தொடர்ந்து 10 பேர் மட்டும் உள்ளே சென்று மனு கொடுத்தனர். மனுவை பெற்றுக்கொண்டு சாலை அமைக்க விரைவில் நடவடிக்கை எடுக்கப்படும் என கலெக்டர் சாந்தி உறுதி அளித்தார்.

கிராம கலெக்டர் அலுவலகம் முன்பு திடீரென்று தர்ணா போராட்டத்தில் ஈடுபட்டதால் அந்த பகுதியில் பெரும் பரபரப்பை ஏற்படுத்தியது. 

பாப்பிரெட்டிப்பட்டி:

தருமபுரி மாவட்டம், பாப்பிரெட்டிப்பட்டி அருகே தனியார் நவீன கிழங்கு ஆலை ஒன்று செயல்பட்டு வருகிறது.

இந்த ஆலையிலிருந்து வெளியாகும் கழிவு நீரை சுத்திகரிக்காமல் சேமித்து வைத்து அப்படியே வெளியேற்றுவதால் பீனி ஆறு மாசடைகிறது.

இதனால் விவசாய நிலங்களும் பாழ்படுகிறது என்று கலெக்டரிடம் சமீபத்தில் விவசாயிகள் சார்பில் மனு தரப்பட்டது.

இதையடுத்து அரசு அதிகாரிகள் விசாரணை நடத்தி அந்த ஆலைக்கு மின் இணைப்பு துண்டிக்கப்பட்டது.

இருப்பினும் ஜெனரேட்டரை பயன்படுத்தி அந்த ஆலை தொடர்ந்து செயல்பட்டு வருவதாக கூறப்படுகிறது.

இந்நிலையில் அந்த ஆலைக்கு எதிராக சுமார் 500-க்கும் மேற்பட்ட விவசாயிகள் திரண்டு இன்று போராட்டத்தில் ஈடுபட்டனர்.

இதே நேரத்தில் ஆலைக்கு கிழங்கு அரைக்க கொடுக்கும் விவசாயிகள் சுமார் 500 பேர் ஆலைக்கு ஆதரவாக போராட்டத்தில் குதித்தனர்.

ஒரே நேரத்தில் 2 தரப்பிலும் நடக்கும் போராட்டத்தால் அங்கு பரபரப்பு நிலவுகிறது. பாப்பிரெட்டிப்பட்டி போலீசார் அங்கு பாதுகாப்புக்கு குவிக்கப்பட்டுள்ளனர்.

இது குறித்து, தகவல் அறிந்து சம்பவ இடத்துக்கு மாவட்ட வருவாய் அலுவலர் அனிதா, அரூர் கோட்டாட்சியர் ஜெயக்குமார், பொதுப்பணித்துறை அதிகாரி செந்தில்குமார், தாசில்தார் சுப்பிரமணி மற்றும் மாசுக்கட்டுப்பாடு, சுற்றுசூழல் அதிகாரிகள் விரைந்து வந்து பேச்சுவார்த்தை நடத்தினர். பின்னர் அந்த ஆலையில் அதிரடியாக சோதனை நடத்தி வருகின்றனர்.