நீங்கள் தேடியது "slug 94574"

சென்னை:

விஜயகாந்த் கடந்த 2005-ம் ஆண்டு தொடங்கிய தே.மு.தி.க. இதுவரை 5 பொதுத்தேர்தல்களை சந்தித்துள்ளது. ஒவ்வொரு தேர்தலிலும் தே.மு.தி.க.வின் நிலைப்பாடு என்ன என்பது முக்கியத்துவம் வாய்ந்ததாக மாறி உள்ளது.

தமிழக அரசியலில் மிக குறுகிய காலத்தில் 10 சதவீத வாக்கு வங்கிகளை பெற்ற கட்சி என்ற சிறப்பு தே.மு.தி.க.வுக்கு உண்டு. தமிழக சட்டசபை தேர்தலில் தே.மு.தி.க. பிரித்த வாக்குகள் ஏதாவது ஒரு வகையில் தி.மு.க.வுக்கும், அ.தி.மு.க.வுக்கும் மாறி மாறி வெற்றி-தோல்வியை கொடுத்துள்ளன.

இதன் காரணமாக தே.மு. தி.க. தமிழக அரசியலில் தவிர்க்க முடியாத சக்தியாக உள்ளது. கடந்த 2 தேர்தல்களில் ஒரு இடத்தில் கூட வெற்றி பெற முடியாத நிலைக்கு தள்ளப்பட்ட தே.மு.தி.க.வுக்கு வாக்கு சதவீதமும் குறைந்து விட்டதாக கணிக்கப்பட்டுள்ளது.

2009-ம் ஆண்டு பாராளுமன்ற தேர்தலின்போது தே.மு.தி.க.வுக்கு 10 சதவீத வாக்குகள் இருந்தது. ஆனால் அதன் பிறகு 2011, 2014, 2016 ஆகிய ஆண்டுகளில் நடந்த தேர்தல்களில் தே.மு. தி.க.வின் வாக்கு சதவீதம் குறைந்து போனது.

குறிப்பாக கடந்த சட்டசபை தேர்தலில் தே.மு.தி.க.வுக்கு ஏற்கனவே இருந்த தொண்டர்களில் பாதி பேர்தான் வாக்களித்தனர். தற்போது அந்த கட்சிக்கு 3 முதல் 5 சதவீத வாக்குகளே இருப்பதாக அரசியல் நிபுணர்கள் கணித்துள்ளனர்.

தே.மு.தி.க.வுக்கு வாக்கு சதவீதம் குறைந்து விட்டாலும் வெற்றியை நிர்ணயிக்கும் சக்தியாக அது இருப்பதாக கருதப்படுகிறது. இதை கருத்தில் கொண்டுதான் அ.தி.மு.க. மூத்த தலைவர்கள் கடந்த சில தினங்களாக தே.மு.தி.க. தலைவர்களுடன் பேசி வருகிறார்கள்.

அ.தி.மு.க. கூட்டணியில் தே.மு.தி.க. இடம் பெற வேண்டும் என்று முதலில் காய்களை நகர்த்தியது பா.ஜனதா தலைவர்கள்தான். எனவே டெல்லி பா.ஜனதா தலைவர்களிடம் தே.மு.தி.க. பேச்சு நடத்தியது. ஆனால் அதில் சுமூக முடிவுகள் எட்டப்படவில்லை.

இதையடுத்து தே.மு.தி.க.வை வழிக்கு கொண்டு வரும் முயற்சிகளில் அ.தி. மு.க. ஈடுபட்டது. ஆனால் 7 முதல் 9 தொகுதிகள் வரை தே.மு.தி.க. கேட்டதால் தொகுதி பங்கீட்டில் இழுபறி உருவானது.

இந்த நிலையில் தி.மு.க. தலைவர் மு.க.ஸ்டாலின் நேற்று விஜயகாந்தை சந்தித்து பேசினார். இதனால் தி.மு.க. அணியில் தே.மு.தி.க. இடம் பெற வாய்ப்பு இருப்பதாக தகவல்கள் வெளியானது.

இதற்கிடையே 40 தொகுதிகளிலும் விருப்ப மனுக்கள் வாங்குவதற்கு தே.மு.தி.க. சார்பில் அறிவிப்பு வெளியிடப்பட்டதால் தே.மு.தி.க. வின் நிலைப்பாட்டில் மாற்றம் உருவாகி இருப்பதாக தகவல்கள் வெளியானது.

இந்த நிலையில் தே.மு.தி.க. எந்த அணியில் சேரும் என்பது நேற்று இரவு வரை மதில்மேல் பூனையாக இருந்தது. ஆனால் இன்று காலை இது குறித்து சில தெளிவான தகவல்கள் தெரியவந்தன.

தி.மு.க. மூத்த தலைவர் ஒருவரிடம் தே.மு.தி.க.வுக்கு தி.மு.க. அணியில் எத்தனை தொகுதிகள் ஒதுக்கப்பட வாய்ப்பு இருக்கிறது என்று கேட்டபோது அவர் மாறுபட்ட தகவலை தெரிவித்தார்.

அவர் கூறுகையில், “தி.மு.க. கூட்டணியில் தொகுதி ஒதுக்கீடு பேச்சு வார்த்தைகள் நடந்து முடிந்து விட்டன. 40 தொகுதிகளிலும் எந்தெந்த கட்சிகள் எத்தனை இடங்களில் போட்டியிடும் என்பதை நாங்கள் தீர்மானித்து விட்டோம். இனி எங்கள் அணியில் தே.மு.தி.க. இடம் பெற வாய்ப்பு இல்லை” என்றார்.

தே.மு.தி.க. மூத்த தலைவர்கள் சிலர் இதுபற்றி கூறுகையில், “தி.மு.க. கூட்டணியில் சேர மாட்டோம். டி.டி.வி.தினகரன் பக்கம் போகும் பேச்சுக்கே இடமில்லை. எங்களது பலம் எங்களுக்கு தெரியும். விரைவில் எங்களது முடிவை அறிவிப்போம்” என்றனர்.

இந்த நிலையில் தே.மு.தி.க. தலைவர்களுடன் அ.தி.மு.க. தலைவர்கள் தொடர்ந்து பேச்சுவார்த்தைகளில் ஈடுபட்டுள்ளனர். நேற்று இரவும் தே.மு.தி.க.வுடன் அ.தி.மு.க. பேசியது. இன்று காலையிலும் அந்த பேச்சு வார்த்தை நீடித்தது.

அ.தி.மு.க. - தே.மு.தி.க. இடையே தொகுதிகள் எண்ணிக்கை மட்டுமே இழுபறியாக இல்லை. எந்தெந்த தொகுதிகள் என்பதிலும் இழுபறி நீடித்தப்படி உள்ளது. அதுபோல பா.ஜனதா தரப்பில் இருந்தும் சில உறுதி மொழிகளை தே.மு.தி.க. எதிர்பார்க்கிறது.

அ.தி.மு.க. கூட்டணியில் வரும் பட்சத்தில் தாங்கள் விரும்பும் தொகுதிகளை கண்டிப்பாக தந்தே தீர வேண்டும் என்று தே.மு.தி.க. தலைவர்கள் பிடிவாதமாக உள்ளனர். எனவே பேச்சு வார்த்தை ஓரிரு தினங்கள் நீடிக்கும் என்றே கூறப்படுகிறது.

இரு தரப்பினரும் விட்டு கொடுத்தால்தான் அ.தி.மு.க. அணியில் சுமூகமாக தே.மு.தி.க. இடம் பெறும் என்று கூறப்படுகிறது. எனவே அ.தி.மு.க- தே.மு.தி.க. இடையே எப்போது தொகுதி பங்கீடு உடன்பாடு ஏற்படும் என்பது இழுபறியாகவே உள்ளது.

2 நாளில் இதில் என்ன முடிவு ஏற்படும் என்பது தெரிந்து விடும் என்று எதிர் பார்க்கப்படுகிறது. #parliamentelection #admk #vijayakanth #bjp

திருவனந்தபுரம்:

கேரள மாநிலம் பாலக்காட்டில் நேற்று பாரதீய ஜனதா கட்சியின் இளைஞரணி மாநாடு மற்றும் பொதுக்கூட்டம் நடந்தது. பாரதீய ஜனதா கட்சியின் தேசிய தலைவர் அமித்ஷா, கூட்டத்தில் பங்கேற்றார். அவர் பேசியதாவது:-

வருகிற பாராளுமன்ற தேர்தல் மிக முக்கிய தேர்தல் இந்த தேர்தலில் மோடி தலைமையிலான ஆட்சி மீண்டும் அமைய வேண்டும். அப்போதுதான் நாடு வளர்ச்சி பாதையில் செல்லும். அதற்கு கேரள மக்கள் பாரதீய ஜனதா கட்சி தலைமையிலான தேசிய ஜனநாயக கூட்டணிக்கு ஆதரவு அளிக்கவேண்டும்.

சபரிமலை அய்யப்பன் கோவில் விவகாரத்தில் அய்யப்ப பக்தர்களுக்கு கம்யூனிஸ்டு அரசு துரோகம் செய்து விட்டது. கோவிலின் ஆச்சாரத்தை பாதுகாக்க போராடிய பக்தர்கள் 2 ஆயிரத்திற்கும் மேற்பட்டோர் கைது செய்யப்பட்டனர். 30 ஆயிரத்திற்கும் மேற்பட்டோர் மீது வழக்குகள் பதிவு செய்யப்பட்டுள்ளது.

அய்யப்ப பக்தர்களை ஏமாற்றி அவர்களுக்கு துரோகம் செய்த கம்யூனிஸ்டு அரசு அதற்கான பலனை அனுபவித்தே தீரும். பக்தர்களுக்கு நீதியை மறுத்து அநீதி இழைத்த கம்யூனிஸ்டுகள் அழிவை சந்திக்கும் காலம் நெருங்கி விட்டது.

உலகம் முழுவதும் கம்யூனிஸ்டுகள் ஓரங்கட்டப்பட்டு வருகிறார்கள். இந்தியாவில் மேற்கு வங்கம் மற்றும் திரிபுராவில் கம்யூனிஸ்டுகளின் ஆட்சி அகற்றப்பட்டு விட்டது. கேரளாவிலும் விரைவில் இந்த நிலை ஏற்படும். இங்கும் கம்யூனிஸ்டுகள் சரிவை சந்திக்கப்போவது உறுதி.

கேரளாவை ஆளும் கம்யூனிஸ்டு அரசு சுப்ரீம் கோர்ட்டு உத்தரவுப்படியே சபரிமலை பிரச்சினையில் நடவடிக்கை எடுத்ததாக கூறுகிறது.

சுப்ரீம் கோர்ட்டு ஏற்கனவே பிறப்பித்த இன்னொரு உத்தரவில் அனைத்து மத வழிபாட்டு தலங்களிலும் கூம்பு வடிவ ஒலிபெருக்கிகளை அகற்ற வேண்டும் என்று கூறி இருந்தது. அதன்படி, அனைத்து மத வழிபாட்டு தலங்களிலும் கூம்பு வடிவ ஒலிபெருக்கிகள் அகற்றப்பட்டு விட்டதா? அனைத்து மசூதிகளிலும் உள்ள கூம்பு வடிவ ஒலிபெருக்கிகளை இந்த அரசு அகற்றி இருக்கிறதா?

கேரள மக்களுக்கு எந்த வளர்ச்சி திட்டங்களையும் செயல்படுத்த விடாமல் இந்த அரசு, அரசியல் செய்கிறது. கம்யூனிஸ்டுகள் ஆட்சிக்கு வந்தால் கேரளாவில் வன்முறை நடக்கும். இதுவே காங்கிரஸ் ஆட்சி நடத்தினால் ஊழல் செய்வார்கள்.

இந்த இரு கட்சியினரும் இதைதான் மாறி மாறி செய்து வருகிறார்கள். அவர்களுக்குத்தான் நீங்கள் வாக்களித்து ஆட்சியில் அமர்த்தி வருகிறீர்கள்.

இந்த முறை கேரள மக்கள் மாற்றத்தை தரவேணடும். பாரதீய ஜனதா கூட்டணிக்கு வாக்களிக்க வேண்டும். கேரளாவில் பாரதீய ஜனதா ஆட்சி அமைத்தால் இந்தியாவிலேயே முதல் மாநிலமாக கேரளா மாறும். ஊழல்வாதிகள், வன்முறையில் ஈடுபட்டோர் ஜெயிலுக்கு செல்வார்கள்.

எனவே கேரள மக்கள் பாரதீய ஜனதாவை ஆட்சியில் அமர்த்த வேண்டும். எதிர்க்கட்சி கூட்டணியில் பிரதமர் வேட்பாளரே இல்லை. ஆனால் பாரதீய ஜனதா, மோடி மீண்டும் பிரதமராக வாய்ப்பு கேட்கிறது. இம்முறை கேரள மக்கள் அந்த வாய்ப்பை தர வேண்டும்.

இவ்வாறு அவர் பேசினார். #amitshah #bjp #communistparty

திருவாரூர்:

மறைந்த முன்னாள் முதல்வர் ஜெயலலிதாவின் 71-வது பிறந்த நாளை முன்னிட்டு திருவாரூர் மாவட்ட அ.தி.மு.க. சார்பில் இன்று (22-ந் தேதி) திருவாரூர் வன்மீகபுரம் அம்மா அரங்கில் ஏழை எளிய குடும்பங்களைச் சேர்ந்த 120 ஜோடி மணமக்களின் திருமண விழா நடைபெற்றது.

விழாவிற்கு திருவாரூர் மாவட்ட கழக செயலாளரும் உணவு மற்றும் நுகர் பொருள் வழங்கல் துறை அமைச்சருமான இரா.காமராஜ் தலைமை வகித்தார். பாராளுமன்ற உறுப்பினர்கள் நாகை கே.கோபால் தஞ்சாவூர் கு.பரசுராமன் ஆகியோர் முன்னிலை வகித்தனர்.

திருமண நிகழ்ச்சியில் அ.தி.மு.க.வின் துணை ஒருங்கிணைப்பாளர்கள் முன்னாள் அமைச்சர் கே.பி.முனுசாமி, முன்னாள் அமைச்சர் ஆர்.வைத்திலிங்கம், தமிழக அமைச்சர்களான திண்டுக்கல் சி.சீனிவாசன், இரா.துரைக்கண்ணு, வெல்ல மண்டி என்.நடராஜன், எஸ்.வளர்மதி ஆகியோர் கலந்து கொண்டனர்.

மணமக்களுக்கு தங்கத்தாலி, பட்டுப்புடவை, வேட்டி உள்ளிட்ட 70 வகையான திருமண சீர்வரிசை பொருட்கள் மாவட்ட அ.தி.மு.க.வின் சார்பில் வழங்கப்பட்டது.

அ.தி.மு.க. துணை ஒருங்கிணைப்பாளர் கே.பி.முனுசாமி நிருபர்களிடம் கூறியதாவது:-

அ.தி.மு.க.வில் கூட்டணி குறித்த பேச்சுவார்த்தை ரகசியமாக நடைபெற்று வருகிறது. விரைவில் யார்- யார் எங்களுடன் கூட்டணி என்பதை அறிவிப்போம்.

தேர்தல் சமயத்தில் கொள்கை அடிப்படையிலும், வெற்றி நோக்கத்தின் அடிப்படையிலும் கட்சிகளுடன் கூட்டணி வைக்கப்படும். அ.தி.மு.க , பா.ஜனதா இடையே கொள்கை வேறுபாடு இருந்தாலும் மக்கள் நலன் கருதியும், வெற்றி நோக்கம் கருதியும் கூட்டணி வைக்கப்பட்டுள்ளது. பா.ஜனதா, பா.ம.க. வுடன் எண்ணிக்கை அடிப்படையிலான கூட்டணியை வைத்துள்ளோம்.

நடிகர் கமல்ஹாசன் அரசியலில் ஒரு குழந்தை. அவர் பேசுவதெற்கெல்லாம் பெரியவர்கள் பதில் சொல்ல வேண்டிய அவசியமில்லை.

இவ்வாறு அவர் கூறினார்.

இதையடுத்து அமைச்சர் திண்டுக்கல் சீனிவாசன் நிருபர்களுக்கு பேட்டி அளித்தார். அப்போது அவர் கூறியதாவது:-

திருவாரூருக்கு வந்ததும் தினகரனையும் அவரது குடும்பத்தாரையும் எண்ணிப் பார்த்தேன்.

பிரதமர் நரேந்திர மோடி தினகரனின் குடும்பத்தார் பாக்கெட்டில் இருப்பது போல் நாடகமாடினார்கள்.

அ.தி.மு.க. கூட்டணியில் பா.ம.க. வரமாட்டார்கள் என்று தி.மு.க.வினர் சொன்னார்கள். ஆனால் எங்களுடன் பா.ம.க. வந்த விட்டது. இப்போது காசு கொடுத்து கூட்டணி வைத்ததாக கூறி வருகிறார்கள்.

தி.மு.க.விடம் காசு இல்லையா. ஆசியாவிலேயே பணக்கார குடும்பம் கருணாநிதி குடும்பம் தான். நீங்களும் காசை கொடுத்து கூட்டணி அமைக்க வேண்டியது தானே?. இது காசுக்காக சேர்ந்த கூட்டணி அல்ல.

இவ்வாறு அவர் கூறினார். #kpmunusamy #kamal #admk 

மதுரை:

மதுரை விமான நிலையத்தில் பா.ஜனதா மாநிலத்தலைவர் தமிழிசை சவுந்திரராஜன் இன்று நிருபர்களுக்கு பேட்டியளித்தார். அப்போது அவர் கூறியதாவது:-

தமிழகத்தில் பா.ஜ.க. உடன் யார் வருவார்? பா.ஜ.க. தனிமைப்படுத்தப்படும் தமிழகத்தில் பா.ஜ.க. கால் ஊன்றுமா? கை ஊன்றுமா? என்று பெரிய கேள்விகள் கேட்டுக் கொண்டிருந்தார்கள்.

இன்று அவர்கள் முன்னாலேயே வலிமையான கூட்டணி ஒன்றை ஏற்படுத்தி இருக்கிறோம். மிகப்பிரம்மாண்டமான மெகா கூட்டணி என்று கூறினால் அது அ.தி. மு.க., பா.ஜ.க., பா.ம.க. இடம் பெற்றிருக்கும் கூட்டணிதான். தே.மு.தி.க. எங்களுடன் இணைந்து விடுவார்கள் என்பதில் எந்த சந்தேகமும் இல்லை.

இது மங்களகரமான கூட்டணி. தி.மு.க. பக்கம் எல்லாம் வெட்டு குத்து என்று சொல்லியிருக்கிறார் ஜெயக்குமார்.

தி.மு.க. கூட்டணியில் வன்முறைகளும் இழுபறிகளும் இருக்கின்றது. மதிமு.க, கம்யூனிஸ்ட், விடுதலைச் சிறுத்தைகள் எந்த சூழ்நிலையில் இருக்கிறார்கள் என்று அவர்களுக்கே சந்தேகமாக இருக்கிறது.

எங்களைப் பொறுத்த மட்டில் ஏறக்குறைய தே.மு.தி.க.வை தவிர மற்ற எல்லா கட்சிகளுடனும் சுமுகமாக இணைப்பு நடந்திருக்கிறது. இது கட்டாய திருமணம் போல இந்த கூட்டணி என்று திருநாவுக்கரசு கூறியிருக்கிறார்.

தற்கொலைக்கு சமம் என்று தினகரன் கூறுகிறார். உண்மையிலேயே இயல்பான அன்பான நட்புறவுடன் ஏற்பட்டிருக்கின்ற கூட்டணி. இதை பார்த்தவர்கள் அனைவரும் பதட்டப்படுகிறார்கள். அந்தப் பதட்டத்தின் விளைவாக அவர்கள் இவ்வாறு பேசுகின்றனர்.

28-ந் தேதி அனைத்து மண்டல தலைவர்களுடனும் மோடி காணொளிக்காட்சி மூலம் பேசுகிறார். தமிழ் நாட்டில் மட்டும் 600 இடங்களில் இந்த ஏற்பாடு செய்யப்பட்டிருக்கிறது.

இவ்வாறு தமிழிசை சவுந்தரராஜன் கூறியுள்ளார். #tamilisai #bjp #admk #vijayakanth #parliamentelection

சென்னை:

பாராளுமன்ற தேர்தலில் தமிழ்நாட்டில் அ.தி.மு.க. மற்றும் தி.மு.க. தலைமையில் பெரிய கூட்டணிகள் உருவாகி உள்ளன.

தி.மு.க. தலைமையிலான கூட்டணியில் காங்கிரஸ், ம.தி.மு.க., விடுதலை சிறுத்தைகள், மார்க்சிஸ்ட் கம்யூனிஸ்டு, இந்திய கம்யூனிஸ்டு, முஸ்லிம் லீக், மனிதநேய மக்கள் கட்சி ஆகியவை இடம் பிடித்துள்ளன. அ.தி.மு.க. தலைமையிலான அணியில் பாரதிய ஜனதா, பா.ம.க., புதிய நீதிக்கட்சி, இந்திய ஜனநாயக கட்சி, புதிய தமிழகம் ஆகிய கட்சிகள் இடம் பெற்றுள்ளன.

விஜயகாந்தின் தே.மு.தி.க., ஜி.கே.வாசனின் த.மா.கா. ஆகிய இருகட்சிகளும் ஆளும் அ.தி.மு.க. கூட்டணியில் இடம் பெற கடந்த சில தினங்களாக பேச்சுவார்த்தை நடத்தின. ஆனால் தொகுதிகள் எண்ணிக்கை ஒதுக்கீட்டில் சுமூக முடிவு எட்டப்படாததால் அ.தி.மு.க. கூட்டணியில் தே.மு.தி.க. இடம் பெறுவதில் இழுபறி நீடித்தப்படி உள்ளது.

அ.தி.மு.க. கூட்டணியில் இதுவரை பா.ம.க.வுக்கு 7 தொகுதிகள், பாரதிய ஜனதாவுக்கு 5 தொகுதிகள், என்.ஆர்.காங்கிரஸ் கட்சிக்கு 1 தொகுதி ஒதுக்கப்பட்டுள்ளன. மொத்தம் உள்ள 40 தொகுதிகளில் 13 தொகுதிகள் ஒதுக்கப்பட்டு விட்ட நிலையில் மீதம் 27 தொகுதிகள் இருக்கின்றன.

இந்த 27 தொகுதிகளில் தமிழ் மாநில காங்கிரஸ், புதிய நீதி கட்சி, இந்திய ஜனநாயக கட்சி, புதிய தமிழகம் ஆகிய கட்சிகளுக்கு தலா 1 இடத்தை ஒதுக்க அ.தி.மு.க. முடிவு செய்துள்ளது. இந்த 4 கட்சிகளையும் இரட்டை இலை சின்னத்தில் போட்டியிடுமாறு அ.தி.மு.க. தலைவர்கள் கூறி வருகிறார்கள்.

சிறிய கட்சிகளுக்கு 4 இடங்கள் ஒதுக்கியது போக மீதம் 23 தொகுதிகள் உள்ளன. இதில் 20 தொகுதிகளில் களம் இறங்க அ.தி.மு.க. திட்டமிட்டுள்ளது. அந்த வகையில் எஞ்சி இருப்பது 3 தொகுதிகள்தான்.

எனவே அந்த 3 தொகுதிகளை ஏற்றுக் கொள்ளுமாறு தே.மு.தி.க. தலைவர்களிடம் அ.தி.மு.க. தலைவர்கள் கூறியுள்ளனர். இது தே.மு.தி.க. தலைவர்களுக்கு கடும் அதிர்ச்சியையும், அதிருப்தியையும் கொடுத்துள்ளது. தே.மு.தி.க.வினர் முதலில் 14 தொகுதி வேண்டும் என்றனர். பிறகு 9 தொகுதி கேட்டனர்.

அ.தி.மு.க., பா.ஜனதா தரப்பில் அவை ஏற்கப்படாததால் நேற்று தே.மு.தி.க. தலைவர்கள் சற்று இறங்கி வந்தனர். பா.ம.க.வுக்கு கொடுக்கப்பட்டிருப்பது போல 7 தொகுதிகளாவது தாருங்கள் என்று கேட்டனர். ஆனால் இதையும் அ.தி.மு.க. ஏற்கவில்லை.

மூன்று தொகுதிகள் மட்டுமே தர முடியும் என்று அ.தி.மு.க. சார்பில் திட்டவட்டமாக தெரிவிக்கப்பட்டது. இதனால் அ.தி.மு.க. கூட்டணியில் தே.மு.தி.க. இடம் பெறுமா? என்பதில் தொடர்ந்து இழுபறி நீடித்தப்படி உள்ளது.

இந்த நிலையில் தே.மு.தி.க. தலைவர் விஜயகாந்த்தை நேற்று மதியம் காங்கிரஸ் முன்னாள் தலைவர் திருநாவுக்கரசர் சந்தித்துப் பேசினார். தி.மு.க. கூட்டணிக்கு தே.மு.தி.க.வை இழுக்கவே இந்த சந்திப்பு நடந்ததாக தகவல்கள் வெளியானது.

ஆனால் தங்கள் கூட்டணியில் தே.மு.தி.க.வை சேர்க்கும் திட்டம் இல்லை என்று தி.மு.க. - காங்கிரஸ் தலைவர்கள் அறிவித்தனர். இதனால் தி.மு.க. கூட்டணியில் தே.மு.தி.க. இடம் பெற வாய்ப்பு இல்லை என்பது உறுதியானது.

இந்த நிலையில் தே.மு.தி.க. 3 விதமான முடிவுகளில் ஏதாவது ஒன்றை எடுக்க வேண்டிய நிலைக்கு தள்ளப்பட்டுள்ளது.

1. தி.மு.க., அ.தி.மு.க. கூட்டணிகளை தவிர்த்து விட்டு டி.டி.வி.தினகரன் அல்லது கமல்ஹாசனுடன் கூட்டணி சேருவது.

2. யாருடனும் கூட்டணி சேராமல் தனித்துப் போட்டியிடுவது.

3. அ.தி.மு.க. தரும் தொகுதிகளைப் பெற்று கொண்டு, அந்த கூட்டணியில் சேர்ந்து போட்டியிடுவது.

மேற்கண்ட மூன்று விதமான முடிவுகளில் அ.தி.மு.க.வுடன் கூட்டணி அமைத்து போட்டியிடுவதையே பெரும்பாலான தே.மு.தி.க. மூத்த தலைவர்கள் விரும்புகிறார்கள். எனவே அ.தி.மு.க. தலைவர்களிடம் பேசி, அதிகபட்சம் எவ்வளவு தொகுதிகளை கேட்டுப் பெற முடியுமோ அவ்வளவு தொகுதிகளை வாங்கலாம் என்ற மன நிலைக்கு தே.மு.தி.க.வினர் வந்துள்ளனர்.

இதைத் தொடர்ந்து அ.தி.மு.க. தலைவர்களும் சற்று இறங்கி வந்திருப்பதாக தெரிகிறது. தே.மு.தி.க.வுக்கு கூடுதலாக ஓரிரு தொகுதிகளை விட்டுக் கொடுப்பது பற்றி அ.தி.மு.க. மூத்த தலைவர்கள் ஆலோசித்து வருகிறார்கள்.

சில தொகுதிகளின் வெற்றி வாய்ப்பை கருத்தில் கொண்டு தே.மு.தி.க.வுக்கு 5 தொகுதிகளை ஒதுக்க அ.தி.மு.க. தரப்பில் ஏகமனதாக முடிவு செய்யப்பட்டு இருப்பதாக தகவல்கள் வெளியாகியுள்ளது. அ.தி.மு.க. மூத்த மந்திரி ஒருவரும் இதை உறுதிப்படுத்தினார்.

இதை அடிப்படையாக கொண்டு தே.மு.தி.க.விடம் அ.தி.மு.க. தலைவர்கள் மீண்டும் பேச்சுவார்த்தை நடத்தி வருகிறார்கள். இன்றும் அந்த பேச்சுவார்த்தை நீடித்தது.

அ.தி.மு.க. ஒதுக்கி கொடுக்கும் 5 தொகுதிகளை தே.மு.தி.க. ஏற்குமா, என்று பல்வேறு தரப்பிலும் சந்தேகம் எழுந்துள்ளது. ஆனால் அந்த 5 தொகுதிகளும் நாங்கள் விரும்பும் தொகுதிகளாக இருக்க வேண்டும் என்று தே.மு.தி.க. தலைவர்கள் நிபந்தனை விதித்துள்ளனர்.

தே.மு.தி.க.வின் இந்த நிபந்தனையை அ.தி.மு.க. ஏற்றுக் கொண்டால் தொகுதி பங்கீடு சுமூகமாக முடிந்து விடும் என்று கூறப்படுகிறது. இன்று அல்லது நாளை இதில் இறுதி கட்ட முடிவு எடுக்கப்பட உள்ளது.  #DMDK #Vijayakanth #ADMK