நீங்கள் தேடியது "slug 95934"

கும்பகோணம்:

கும்பகோணம் அருகே உள்ள தாராசுரம் கவரத் தெருவை சேர்ந்தவர் யோகேஸ்வரி (வயது 13). அப்பகுதியில் உள்ள ஒரு தனியார் பள்ளியில் 8-ம் வகுப்பு படித்து வருகிறார்.

இந்நிலையில் கடந்த 17-ந்தேதி யோகேஸ்வரி வீட்டில் டி.வி. பார்த்துக் கொண்டிருந்தார். இதை அவரது பெற்றோர் கண்டித்துள்ளனர். இதனால் அன்று இரவு முழுவதும் யோகேஸ்வரி மன அழுத்தத்தில் இருந்துள்ளார். இதையடுத்து நேற்று காலை பெற்றோரிடம் கடைக்கு சென்று வருவதாக கூறி சென்றவர் நெடுநேரமாகியும் வீடு திரும்பவில்லை. இதனால் அதிர்ச்சி அடைந்த அவரது பெற்றோர் பல இடங்களில் தேடி பார்த்தனர். ஆனால் எங்கு தேடியும் யோகேஸ்வரி கிடைக்கவில்லை.

இது குறித்து கும்பகோணம் தாலுக்கா போலீசில் யோகேஸ்வரி பெற்றோர் புகார் செய்தனர். அதன் பேரில் போலீசார் வழக்குப்பதிவு செய்து விசாரணை நடத்தி பள்ளி மாணவியை தேடி வருகின்றனர்.

ராஜபாளையம்:

ராஜபாளையம் அருகே உள்ள மீனாட்சிபுரத்தைச் சேர்ந்தவர் மாரியப்பன் (வயது 32), மைக்செட் தொழிலாளி. இவர் திருப்பூரில் வேலை பார்த்தபோது அங்கு ஒரு பெண்ணை காதலித்து திருமணம் செய்து ஊருக்கு அழைத்து வந்துள்ளார்.

சில நாட்களில் மாரியப்பனின் நடவடிக்கை பிடிக்காததால், மனைவி பிரிந்து சொந்த ஊர் சென்று விட்டார். அதன் பிறகு கேரளா சென்ற மாரியப்பன் அங்கு பரமேஸ்வரி என்ற பெண்ணை காதல் திருமணம் செய்து அழைத்து வந்தார். இவர்களுக்கு பெரியசாமி (8), மல்லிகா (5) என 2 குழந்தைகள் உள்ளனர்.

2 குழந்தைகள் ஆன பிறகும் மாரியப்பனின் நடவடிக்கை சரியில்லை என கூறப்படுகிறது. திருட்டு வழக்குகளில் சிக்கி சிறைக்கும் சென்றுள்ளார். இதனால் விரக்தியடைந்த பரமேசுவரி மகனுடன் கேரளா சென்றுவிட்டார்.மகளையும் ஊட்டியில் உள்ள ஒரு பள்ளியில் சேர்த்து விட்டார்.

2 மனைவிகள் பிரிந்த நிலையில் மாரியப்பனின் போக்கில் மாற்றம் ஏற்படவில்லை. இந்த நிலையில் கடந்த 5 மாதங்களுக்கு முன்பு திடீரென மாயமானார். அதன் பின்னர் அவரைப்பற்றி எந்த தகவலும் கிடைக்காததால் தளவாய்புரம் போலீசில் மாரியப்பனின் தாயார் பஞ்சவர்ணம் புகார் செய்தார். போலீஸ் இன்ஸ்பெக்டர் முத்துக்குமரன் வழக்குப் பதிவு செய்து விசாரணை நடத்தி வருகிறார்.

மதுரை:

மதுரை நாராயணபுரம் பேங்க் காலனி கவிமணி 2-வது குறுக்குத் தெருவைச் சேர்ந்தவர் விஜய் ஆனந்த். இவரது மனைவி திவ்யா (வயது 33). இவர்களுக்கு 2 மகன்கள் உள்ளனர்.

விஜய்ஆனந்த் சேலத்தில் உள்ள தனியார் நிறுவனத்தில் பணியாற்றி வருகிறார். கடந்த 5-ந் தேதி வீட்டில் இருந்து வெளியே சென்ற திவ்யா பின்னர் வீடு திரும்பவில்லை. பல இடங்களில் தேடியும் பலன் இல்லை.

மதுரை தத்தனேரி அருள்தாஸ்புரத்தைச் சேர்ந்தவர் குருசாமி. இவரது மகள் கற்பகவள்ளி. மனநிலை பாதிக்கப்பட்ட இவர் கோரிப்பாளையம் பள்ளிவாசலில் சிகிச்சை பெற்று வந்தார்.

சம்பவத்தன்று கற்பக வள்ளி திடீரென மாயமானார். பல இடங்களில் தேடியும் பலன் இல்லை.

இந்த 2 சம்பவங்கள் குறித்து தல்லாகுளம் போலீஸ் இன்ஸ்பெக்டர் பெத்துராஜ் வழக்குப்பதிவு செய்து விசாரித்து வருகிறார்.

சென்னை:

திருச்சியை சேர்ந்தவர் எம்.ஆனந்த் மோகன். இவர், சென்னை ஐகோர்ட்டில் தாக்கல் செய்துள்ள மனுவில் கூறியிருப்பதாவது:-

புதுக்கோட்டை மாவட்டம், திருக்கோகர்ணம் என்ற ஊரில் ஹகோகரணேஸ்வரர்-பிரஹதம்பாள் திருக்கோவில் உள்ளது. ஆயிரம் ஆண்டுகளுக்கு முன்பு ராஜராஜசோழனின் மகன் ராஜேந்திரசோழன், 3 அடி உயரம் கொண்ட பச்சை மரகத கல்லால் ஆன ஸ்ரீ பிரகதம்பாள் சாமி சிலை செய்து, இந்த கோவிலில் வைத்தார்.

பின்னர், புதுக்கோட்டை சமஸ்தானத்தை ஆண்ட ஸ்ரீ மார்த்தாண்ட பைரவ தொண்டைமான், இந்த சிலையை எடுத்து விட்டு, அதற்கு பதில் கிரானைட் கற்களால் ஆன மாற்றுச் சிலையை செய்து கோவிலில் வைத்து விட்டார்.

அதேநேரம், அந்த பச்சை மரகத சிலையை திருச்சியில் உள்ள தொண்டைமான் அரசுகளுக்கு சொந்தமான விருந்தினர் மாளிகையில், ஒரு இடத்தில் புதைத்து வைத்தார். இந்த நிலையில், அந்த விலை மதிக்க முடியாத பச்சை மரகத சிலை, பூமியில் இருந்து தோண்டி எடுக்கப்பட்டு விட்டது. அந்த சிலை புதைக்கப்பட்ட நிலம், தற்போது கார்த்திக் தொண்டைமானுக்கு சொந்தமானதாக உள்ளது.

எனவே, மாயமான சிலை குறித்து சிலை கடத்தல் தடுப்பு பிரிவு போலீசிடம் கடந்த 2013ம் ஆண்டு 2 முறையும், கடந்த ஜூன் மாதமும் புகார் செய்தேன். இதுவரை எந்த நடவடிக்கையும் எடுக்கப்படவில்லை.

எனவே, என் புகார் மீது வழக்குப்பதிவு செய்து, விலை மதிக்க முடியாத பச்சை மரகத சாமி சிலையை மீட்கும்படி ஐ.ஜி. பொன்.மாணிக்கவேலுக்கு உத்தரவிட வேண்டும்.

இவ்வாறு அதில் கூறியிருந்தார்.

இந்த மனு நீதிபதிகள் ஆர்.மகாதேவன், ஆதிகேசவலு ஆகியோர் முன்பு இன்று விசாரணைக்கு வந்தது. மனுதாரர் சார்பில் வக்கீல் கோபால கிருஷ்ணன் ஆஜராகி வாதிட்டார்.

இதையடுத்து, இந்த மனுவுக்கு சிலைக் கடத்தல் பிரிவு ஐ.ஜி. பொன்.மாணிக்கவேல் வருகிற 20ந்தேதிக்குள் பதில் அளிக்க வேண்டும் என்று நீதிபதிகள் நோட்டீசு அனுப்ப உத்தரவிட்டனர்.

திருவள்ளூர்:

திருவள்ளூரை அடுத்த பெருமாள்பட்டு கிராமத்தைச் சேர்ந்தவர் சந்திரன் இவரது மகள் வெங்கடம்மாள்(30) பிகாம் பட்டதாரி. இவருக்கு வருகிற செப்டம்பர் 12-ம் தேதி திருமணம் நடக்க இருந்தது. திருமண பத்திரிகை விநியோகம் செய்து வருகின்றனர்.

நேற்று முன்தினம் வீட்டில் இருந்த வெங்கடம்மாளை காணவில்லை. அக்கம்பக்கம், நண்பர்கள் மற்றும் உறவினர்கள் வீடுகளில் தேடியும் கிடைக்கவில்லை.

இதுகுறித்து அவரது தந்தை சந்திரன் செவ்வாய்பேட்டை காவல் நிலையத்தில் புகார் அளித்தார். புகாரின் பேரில் செவ்வாப்பேட்டை போலீசார் வழக்குப் பதிவு செய்து விசாரணை நடத்தி வருகின்றனர்.

முதுகூர் கிராமத்தை சேர்ந்தவர் பொன்னுவேல் இவரது மகள் தமிழரசி(17) கடந்த 17-ம் தேதி கல்லூரிக்கு சென்ற மாணவி மீண்டும் வீடு திரும்பவில்லை. நண்பர்கள் மற்றும் உறவினர்கள் வீடுகளில் தேடியும் கிடைக்கவில்லை.

இதுகுறித்து மப்பேடு போலீசார் வழக்குப் பதிந்து விசாரணை நடத்தி வருகின்றனர்.

நயப்பாக்கம் கிராமத்தை சேர்ந்தவர் கோபி. இவரது மகள் யுகா (19) கடந்த 17-ம் தேதி கடைக்கு சென்ற யுகாவை காணவில்லை . இதுகுறித்து மணவாளநகர் போலீசார் வழக்குப் பதிந்து விசாரணை நடத்தி வருகின்றனர்.

மதுரை:

கோவை மாவட்டம், மேட்டுப்பாளையம் பஜனை கோவில் தெருவைச் சேர்ந்தவர் சார்லஸ். இவரது மகன் பேட்ரிக் (வயது 19). கேட்டரிங் படித்து வருகிறார்.

படிப்பில் போதிய திறன் இல்லாததால் ஆங்கில திறனை வளர்த்துக் கொள்வதற்காக பேட்ரிக், மதுரை எஸ்.எஸ்காலனி நாவலர் நகரில் உள்ள தனது தாத்தா சாம்சன் வீட்டில் கடந்த ஜூன் மாதம் முதல் தங்கி இருந்து படித்து வந்தார்.

இந்த நிலையில் கடந்த 18-ந் தேதி தாத்தாவிடம் சொல்லிக்கொள்ளாமல் பேட்ரிக் வீட்டை விட்டு வெளியேறினார்.

அவரது தாயார் சுக்கேஷினி போனில் தொடர்பு கொண்டு கேட்ட போது, திண்டுக்கல்லில் உள்ள நண்பர் வீட்டுக்கு வந்திருப்பதாக தெரிவித்தார். அதன்பிறகு 19-ந் தேதி முதல் பேட்ரிக்கின் செல்போன் சுவிட் ஆப் செய்யப்பட்டு இருந்தது.

அவர் எங்கே சென்றார் என்ற விவரம் தெரியவில்லை. இது குறித்து பேட்ரிக்கின் தாயார் சுக்கேஷினியும், தாத்தா சாம்சனும் கொடுத்த புகாரின் பேரில் எஸ்.எஸ்.காலனி போலீஸ் இன்ஸ்பெக்டர் சங்கர் கண்ணன் வழக்குப்பதிவு செய்து விசாரித்து வருகிறார்.

மதுரை சோலையழகுபுரம், மகாலட்சுமி கோவில் 3-வது சந்து, அன்னமுத்து காம்பவுண்டைச் சேர்ந்தவர் வெங்கட்ராமன். இவரது மகன் மணிகண்டன் (வயது 34). ஆட்டோ டிரைவரான இவருக்கு திருமணம் ஆக வில்லை.

கடந்த 24-ந் தேதி இரவு மணிகண்டன் வெளியே சென்று வருவதாக கூறி விட்டு மோட்டார் சைக்கிளில் சென்றவர் அதன் பின்னர் வீடு திரும்பவில்லை. பல இடங்களில் தேடிப்பார்த்தும் தகவல் கிடைக்கவில்லை.

இது குறித்து அவரது தாயார் வசந்தா கொடுத்த புகாரின் பேரில் ஜெய் ஹிந்துபுரம் போலீஸ் இன்ஸ்பெக்டர் ரமணி வழக்குப் பதிவு செய்து விசாரித்து வருகிறார்.