நீங்கள் தேடியது "slug 96812"

பெரும்பாறை:

கொடைக்கானல் கீழ்மலை கிராமமான பெரும்பாறை அருகே கொம்பபட்டியில் காளியம்மன், சந்தனமூர்த்தி கோவில் உள்ளது. நேற்று இரவு கோவிலில் பூஜை முடிந்தபிறகு பூசாரி கோவிலை பூட்டி விட்டு சென்று விட்டார்.

இன்று காலை பக்தர்கள் கோவிலுக்கு சென்றபோது கோவிலின் கதவு பூட்டு உடைக்கப்பட்டிருந்தது. இது குறித்து பூசாரிக்கு தகவல் தெரிவிக்கப்பட்டது. இதனிடையே பொதுமக்கள் அங்கு ஏராளமானோர் குவிந்தனர்.

கோவிலில் இருந்த 3 அடி உயரம் உள்ள உண்டியலை மர்ம நபர்கள் திருடிச் சென்றது தெரிய வந்தது. கோவிலின் மற்ற பொருட்கள் எதுவும் திருடு போகவில்லை. இது குறித்து தாண்டிக்குடி போலீசாருக்கு புகார் அளிக்கப்பட்டது.

போலீசார் சம்பவ இடத்துக்கு வந்து முக்கிய தடயங்களை பதிவு செய்தனர். இந்த கோவிலில் கடந்த சில வருடத்திற்கு முன்பு அம்மன் கழுத்தில் இருந்த தங்க தாலி திருடு போனது. அதன்பிறகு சில மாதங்கள் கழித்து கோவில் பீரோ உடைக்கப்பட்டு அதில் இருந்த அம்மனின் வெண்கல சிலை மாயமானது.

அந்த சிலை தண்ணீர் இல்லாத ஒரு தொட்டியில் மறைத்து வைக்கப்பட்டது கண்டு பிடிக்கப்பட்டது. அதன்பிறகு கோவிலின் ஒரு பகுதியில் சேவலை வெட்டி அதன் ரத்தத்தை மர்ம நபர்கள் சுவரில் தடவி விட்டு சென்றனர்.

தொடர்ந்து 3 முறை கொள்ளை நடந்த கோவிலில் தற்போது மீண்டும் உண்டியல் திருட்டு நடந்திருப்பது பக்தர்கள் மத்தியில் பெரும் பரபரப்பை ஏற்படுத்தி உள்ளது. எனவே இக்கோவிலுக்கு போதிய பாதுகாப்பு அளிப்பதோடு கொள்ளையர்களையும் விரைந்து கைது செய்ய வேண்டும் என பொதுமக்கள் வலியுறுத்தி உள்ளனர்.

தேனி:

தேனி அன்னஞ்சி விலக்கு என்.ஜி.ஓ. காலனியை சேர்ந்தவர் ஜஸ்டின் சாந்தகுமார் (வயது50). இவர் தேனி மாவட்ட கலெக்டர் அலுவலகத்தில் அலுவலக மேலாளராக பணியாற்றி வருகிறார். இவரது மனைவி ஆசிரியையாக வேலை பார்த்து வருகிறார்.

சம்பவத்தன்று அவர்கள் இருவரும் நாகர்கோவிலில் நடந்த ஒரு ஜெபகூட்ட நிகழ்ச்சிக்காக வீட்டை பூட்டிவிட்டு சென்று விட்டனர். அப்போது இவர்கள் வீட்டிற்குள் புகுந்த மர்ம நபர்கள் கொள்ளையடித்து சென்றனர்.

இவர்கள் வீடு திறந்து கிடந்ததை பார்த்த அக்கம் பக்கத்தினர் போன் மூலம் தகவல் தெரிவித்தனர். இதனால் அதிர்ச்சி அடைந்து அவர்கள் வீட்டுக்கு திரும்பினர். அங்கு வந்து பார்த்தபோது வீட்டின் கதவு உடைக்கப்பட்டிருந்தது. மேலும் பீரோ லாக்கரும் உடைக்கப்பட்டு அதில் இருந்த 25 பவுன் தங்க நகைகள், ரூ.3 ஆயிரம் மதிப்பிலான வெள்ளி பொருட்கள், ரொக்க பணம், ரூ.5 லட்சத்து 27 ஆயிரத்து 800 ஆகியவை கொள்ளையடிக்கப்பட்டிருந்தது.

கொள்ளை போன பொருட்களின் மொத்த மதிப்பு ரூ.9 லட்சத்து 800 ஆகும். இது குறித்து அல்லிநகரம் போலீஸ் நிலையத்தில் ஜஸ்டின் சாந்தகுமார் புகார் அளித்தார்.

போலீசார் சம்பவ இடத்துக்கு வந்து விசாரணை நடத்தினர். கைரேகை நிபுணர்கள் மற்றும் மோப்ப நாய் வரவழைக்கப்பட்டும் விசாரணை நடத்தப்பட்டது.

திருத்தணி:

திருத்தணி, கம்பர் தெருவை சேர்ந்தவர் ரவிக்குமார். இவர் திருத்தணி பைபாஸ் சாலை ஏரிக்கரை பகுதியில் சிக்கன் பக்கோடா விற்பனை செய்யும் கடை நடத்தி வருகிறார்.

இவரது மனைவி மற்றும் குடும்பத்தினர் அரக்கோணத்தில் உள்ள உறவினர் வீட்டுக்கு சென்று விட்டனர். ரவிக்குமார் மட்டும் வீட்டில் இருந்தார்.

நேற்று இரவு அவர் வீட்டின் கதவை மூடிவிட்டு அறையில் தூங்கினார். நள்ளிரவில் வந்த மர்ம கும்பல் வீட்டின் கதவை உடைத்து புகுந்தனர். அவர்கள் மற்றொரு அறையில் இருந்த பீரோவை உடைத்து 11 பவுன் நகை, ரூ.40 ஆயிரம் ரொக்கத்தை கொள்ளையடித்து தப்பி சென்று விட்டனர். ரவிக் குமார் வேறொரு அறையில் தூங்கியதால் அவருக்கு கொள்ளை நடந்தது தெரிய வில்லை.

இன்று அதிகாலை அவர் எழுந்தபோது வீட்டில் நகை- பணம் கொள்ளை போய் இருப்பது தெரிந்தது.

இதுகுறித்து திருத்தணி போலீசில் புகார் செய்யப்பட்டது. டி.எஸ்.பி. சேகர், இன்ஸ்பெக்டர் விநாயகம் ஆகியோர் விசாரணை நடத்தினர்.

திருவள்ளூர்:

திருவள்ளூர் அகரம் தெருவை சேர்ந்தவர் வெங்கட்ராமன் (51). தனியார் கம்பெனி ஊழியர். இவர் நேற்று வழக்கம்போல் வேலைக்கு சென்றார். இவரது மனைவி வீட்டை பூட்டிவிட்டு வேப்பம்பட்டில் உள்ள தாய் வீட்டுக்கு சென்றுவிட்டார்.

இரவு வீடு திரும்பி வந்து பார்த்தபோது வீட்டின் முன்பக்க கதவு பூட்டு உடைக்கப்பட்டு இருந்தது. அதிர்ச்சி அடைந்த அவர் உள்ளே சென்று பார்த்த போது பீரோ உடைக்கப்பட்டு, அதில் இருந்த 8 சவரன் நகை மற்றும் 10 ஆயிரம் கொள்ளை போனது தெரிந்தது.

இதுகுறித்து திருவள்ளூர் டவுன் போலீசார் வழக்குப்பதிவு விசாரித்து வருகின்றனர்.

செஞ்சி:

விழுப்புரம் மாவட்டம் செஞ்சி அருகே உள்ள தென்பாலை கிராமத்தை சேர்ந்தவர் முருகன் (வயது 39). இவர் தேவனூரில் உள்ள மின்சார வாரியத்தில் மின்பாதை ஆய்வாளராக வேலை பார்த்து வருகிறார்.

இவர் அதே பகுதியில் உள்ள தனக்கு சொந்தமான வயல்வெளியில் மாட்டு கொட்டகை அமைத்துள்ளார். நேற்று இரவு மாடு கன்று ஈன்றது. இதனால் முருகன் தனது வீட்டை பூட்டி விட்டு வயல்வெளிக்கு சென்று விட்டார். இதனை நோட்டமிட்ட மர்ம மனிதர்கள் நள்ளிரவில் அங்கு வந்தனர். அவர்கள் வீட்டின் கதவை உடைத்து உள்ளே புகுந்தனர்.

பீரோவை உடைத்து அதில் இருந்த 11 பவுன் தங்க நகை மற்றும் ரூ.20 ஆயிரம் ரொக்கப்பணம் ஆகியவற்றை கொள்ளையடித்தனர். பின்னர் அங்கிருந்து தப்பி ஓடி விட்டனர். கொள்ளை போன பொருட்களின் மொத்த மதிப்பு ரூ.2 லட்சம் ஆகும்.

இன்று காலை வயல்வெளியில் இருந்து வீட்டுக்கு முருகன் திரும்பி வந்தார். வீட்டின் கதவை உடைக்கப்பட்டது இருப்பதை பார்த்து அதிர்ச்சியடைந்தார். உள்ளே சென்று பார்த்த போது பொருட்கள் எல்லாம் சிதறி கிடந்தன. மர்ம மனிதர்கள் நகை மற்றும் பணத்தை கொள்ளையடித்து சென்றது தெரிய வந்தது.

கொள்ளை சம்பவம் பற்றி சத்தியமங்கலம் போலீசுக்கு முருகன் தகவல் தெரிவித்தார். போலீசார் சம்பவ இடத்துக்கு விரைந்து வந்தனர். வீட்டில் பதிவாகியிருந்த கைரேகைகளை சேகரித்தனர். இது குறித்த புகாரின் பேரில் போலீசார் வழக்குப்பதிவு செய்தனர். கொள்ளையடித்த மர்ம மனிதர்களை வலைவீசி தேடி வருகின்றனர். இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.

பெரம்பூர்:

கொடுங்கையூர் எழில்நகர் தொப்பை விநாயகர் கோவில் தெருவை சேர்ந்தவர் மாலான்கோ. இவர் தனது வீட்டு அருகிலேயே மளிகை கடை வைத்து நடத்தி வருகிறார்.

இவர் குடும்பத்துடன் சொந்த ஊரான கோவில்பட்டிக்கு சென்றிருந்தார். இன்று காலையில் அனைவரும் வீடு திரும்பினர். அப்போது வீட்டின் பூட்டு உடைக்கப்பட்டிருந்தது.

ரூ.10 ஆயிரம் பணம் மற்றும் 10 பவுன் நகையை கொள்ளையர்கள் கொள்ளையடித்து சென்றனர். இதுபற்றி கொடுங்கையூர் போலீசார் விசாரணை நடத்தி வருகிறார்கள்.