நீங்கள் தேடியது "slug 96812"

மயிலாடுதுறை:

நாகை மாவட்டம் மயிலாடுதுறையில் சீர்காழி மெயின் ரோட்டில் வள்ளாலகரம் வெங்கடேசா நகரில் செல்வ விநாயகர் கோவில் அமைந்துள்ளது.

இக்கோவிலுக்கு இன்று காலை அதே பகுதியை சேர்ந்த சோமு பிள்ளை என்பவர் வந்தார். அப்போது கோவில் உண்டியல் உடைக்கப்பட்டு இருந்ததை கண்டு அதிர்ச்சி அடைந்தார். மேலும் விநாயகர் சிலையில் இருந்த வெள்ளி கீரிடமும் திருட்டு போய் இருந்தது.

உடனே இதுபற்றி அவர் மயிலாடுதுறை போலீசுக்கு தகவல் கொடுத்தார். அதன் பேரில் போலீசார் விரைந்து வந்து கோவிலில் விசாரணை நடத்தினர்.

நள்ளிரவில் மர்ம கும்பல் கோவிலுக்குள் புகுந்து கொள்ளையடித்து விட்டு சென்றது தெரிய வந்தது. திருட்டு போன வெள்ளி கீரிடம் 820 கிராம் ஆகும்.

கோவில் உண்டியலில் சுமார் ரூ.10 ஆயிரத்துக்கும் மேல் காணிக்கை பணம் இருந்திருக்கலாம் என்று கூறப்படுகிறது.

விநாயகர் கோவிலில் கொள்ளையடித்த மர்ம கும்பலை போலீசார் வலைவீசி தேடி வருகிறார்கள். இந்த சம்பவம் மயிலாடுதுறை பகுதியில் பரபரப்பை ஏற்படுத்தியுள்ளது.

ஆண்டிப்பட்டி:

ஆண்டிப்பட்டி அருகே கடமலைக்குண்டு கண்டமனூர் சாலையில் அய்யனார் கோவில் உள்ளது. இந்த கோவிலை கடமலைக்குண்டுவைச் சேர்ந்த விஜயகுமார் என்பவர் பராமரித்து இரவு காவலாளியாக வேலை பார்த்து வருகிறார்.

சம்பவத்தன்று வழக்கம் போல் பூஜைகள் முடிந்ததும் கோவில் கதவை மூடிச் சென்றார். மறு நாள் காலை வந்து பார்த்த போது கோவிலில் இருந்த சோலார் பேனல் திருடப்பட்டு இருந்தது கண்டு அதிர்ச்சியடைந்தார். இது குறித்து கடமலைக்குண்டு போலீசில் புகார் அளிக்கப்பட்டது.

அதன் பேரில் போலீசார் வழக்கு பதிவு செய்து விசாரித்தனர். வரு‌ஷநாடு அருகே உள்ள தும்மக் குண்டுவைச் சேர்ந்த முத்துப்பாண்டி (வயது 22), விக்னேஷ் (24) ஆகியோர் சோலார் பேனலை திருடியது தெரிய வந்தது. 2 பேரையும் போலீசார் கைது செய்து அவர்களிடம் இருந்த சோலார் பேனலையும் பறிமுதல் செய்தனர்.

ஸ்ரீபெரும்புதூர்:

ஸ்ரீபெரும்புதூரை அடுத்த மாத்தூரில் ஆக்சிஸ் வங்கியின் ஏ.டி.எம். மையம் உள்ளது. நேற்று நள்ளிரவு வந்த மர்ம கும்பல் ஏ.டி.எம். எந்திரத்தை உடைத்து கொள்ளையில் ஈடுபட முயன்றனர். அப்போது அவ்வழியாக ரோந்து போலீசார் வாகனத்தில் வந்தனர்.

உடனே கொள்ளையர்கள் அங்கிருந்து தப்பிச் சென்று விட்டனர். சந்தேகமடைந்த போலீசார் ஏ.டி.எம். மையத்திற்குள் வந்து பார்த்த போது ஏ.டி.எம். எந்திரம் உடைக்கப்பட்டு இருந்தது தெரிந்தது.

சரியான நேரத்தில் போலீசார் வந்ததால் பல லட்சம் ரூபாய் தப்பியது. ஏ.டி.எம்.எந்திரத்தை மர்ம கும்பல் கடப்பாரையால் உடைத்து உள்ளனர். பணம் இருக்கும் பெட்டியை உடைக்க முடியாததால் அவர்கள் ஏமாற்றத்துடன் தப்பிச் சென்றிருக்கிறார்கள்.

இது குறித்து ஒரகடம் போலீசார் வழக்குப்பதிவு செய்து விசாரணை நடத்தி வருகின்றனர். ஏ.டி.எம். மையத்தில் உள்ள கண்காணிப்பு கேமிராவில் பதிவான வீடியோவை ஆய்வு செய்து கொள்ளையர்களை தேடி வருகிறார்கள்.

மதுரை:

மதுரை புட்டுத்தோப்பு ரோட்டைச் சேர்ந்தவர் பாலசுந்தரம். இவரது மனைவி ஹேமலதா (வயது 42). இவர் தனியார் நிறுவனத்தில் மேலாளராக பணியாற்றி வருகிறார்.

நேற்று இரவு தனது ஸ்கூட்டரில் வெளியே சென்று விட்டு வீட்டுக்கு வந்தார். வீட்டு வாசலில் ஸ்கூட்டரை நிறுத்தி விட்டு ஹெல்மெட்டை கழற்றிக் கொண்டிருந்தார்.

அப்போது அங்கு நின்றிருந்த மர்ம நபர் திடீரென ஹேமலதா கழுத்தில் கிடந்த 16 பவுன் செயினை பறித்துக் கொண்டு மின்னல் வேகத்தில் தப்பினான்.

இது குறித்து ஹேமலதா கரிமேடு போலீசில் புகார் செய்தார். போலீசார் வழக்குப்பதிவு செய்து நகை பறித்தவனை தேடி வருகின்றனர்.

குத்தாலம்:

குத்தாலம் அருகே உள்ள கோவில்குத்தி கிராமத்தை சேர்ந்தவர் செல்வராஜ். (வயது 60) விவசாயி. இவர் நேற்று காலை தன் வீட்டை பூட்டிவிட்டு தனது மனைவியுடன் கடலூர் சென்றார். இதனை நோட்டமிட்ட மர்ம நபர்கள் அங்கு வந்தனர். அவர்கள் வீட்டின் பின்பக்க கதவை உடைத்து உள்ளே புகுந்தனர்.

வீட்டில் இருந்த இரண்டு பீரோவை திறந்து அதில் இருந்த 8 பவுன் நகை, ரூ.3 ஆயிரம் ரொக்கம் ஆகியவற்றை கொள்ளையடித்து தப்பி ஓடிவிட்டனர். கொள்ளைபோனவற்றின் மதிப்பு ரூ.2 லட்சம் ஆகும்.

இந்த நிலையில் இரவு வீட்டிற்கு வந்த செல்வராஜ் கதவு உடைக்கப்பட்டு இருப்பதை கண்டு அதிர்ச்சி அடைந்தார். உள்ளே சென்று பார்த்தபோது பொருட்கள் எல்லாம் சிதறி கிடந்தன. வீட்டுக்குள் புகுந்து மர்ம நபர்கள் கொள்ளையடித்து சென்றது தெரியவந்தது. இதுகுறித்து அவர் குத்தாலம் போலீசுக்கு தகவல் தெரிவித்தார். அதன் பேரில் போலீசார் சம்பவ இடத்துக்கு வந்து கொள்ளை நடந்த வீட்டை பார்வையிட்டு விசாரணை நடத்தினர். வீட்டில் பதிவான கைரேகைகளை சேகரித்தனர். போலீசார் வழக்குப்பதிவு செய்து கொள்ளையர்களை தேடி வருகின்றனர்.

இந்த சம்பவம் அந்த பகுதியில் பரபரப்பை ஏற்படுத்தி உள்ளது.

மதுரை:

மதுரை நகரில் தனியாக நடந்து செல்லும் பெண்களை குறிவைத்து நகை பறிப்பு சம்பவங்கள் அதிக அளவில் நடந்து வருகின்றன. மோட்டார் சைக்கிளில் வரும் கொள்ளையர்கள் ஹெல்மெட் அணிந்து கண் இமைக்கும் நேரத்தில் பெண்களை தாக்கி நகை பறித்துச் செல்வதால் அவர்களை அடையாளம் காண்பதில் போலீசாருக்கு சிக்கல் ஏற்பட்டது.

நாள்தோறும் நகை பறிப்பு, வழிப்பறி போன்றவை தொடர்பான புகார்கள் போலீஸ் நிலையத்தில் குவிந்த வண்ணம் உள்ளன.

இந்த நிலையில் வழிப்பறி கொள்ளையர்களை பிடிக்க மாநகர போலீஸ் கமி‌ஷனர் டேவிட்சன் தேவாசீர்வாதம் போலீசாருக்கு உத்தர விட்டார். மேலும் தனிப் படையும் அமைக்கப்பட்டு தீவிர விசாரணை நடத்தப்பட்டது.

கடந்த வாரம் தொடர் வழிப்பறியில் ஈடுபட்ட 5 பேரை சுப்பிரமணியபுரம் போலீசார் கைது செய்து 158 பவுன் நகையை பறிமுதல் செய்தனர். இந்த நிலையில் மேலும் 6 பேர் சிக்கினர்.

நகை பறிப்பில் ஈடுபட்டவர்களை பிடிக்க சட்டம், ஒழுங்கு துணை கமி‌ஷனர் சசிமோகன் தலைமையில் அமைக்கப்பட்டிருந்த தனிப்படை போலீசார் கூடல்நகர் பகுதியில் நகை பறிப்பு, வழிப்பறியில் ஈடுபட்டது தொடர்பாக விசாரணை நடத்தினர்.

அப்போது அந்தப் பகுதியில் பொருத்தப்பட்டிருந்த சி.சி.டி.வி. கேமிரா பதிவுகளை ஆய்வு செய்தபோது 6 பேர் கொண்ட கும்பல் அடிக்கடி நகை பறிப்பில் ஈடுபட்டது தெரியவந்தது.

போலீசார் நடத்திய தீவிர விசாரணையில், அவர்கள் மதுரை ஆனையூரைச் சேர்ந்த பிரகாஷ் (வயது 28), சப்பாணி கோவில் தெருவைச் சேர்ந்த தினேஷ் (24), வண்டியூரைச் சேர்ந்த அஜித் (23), புதூர் கார்த்திக் (25), வில்லாபுரம் மொட்டை செல்வம் (24), ராமநாதபுரம் மாவட்டம், கமுதியைச் சேர்ந்த காளிமுத்து ஆகிய 6 பேர் என தெரியவந்தது.

போலீசார் அவர்களை கைது செய்து கிடுக்கிப்பிடி விசாரணை நடத்தினர். அப்போது அவர்கள் மதுரை நகர் மற்றும் புறநகர் பகுதிகள், அண்டை மாவட்டங்களில் 30 நகை பறிப்பு, வழிப்பறி சம்பவங்களில் ஈடுபட் டுள்ளது தெரியவந்தது.

ஆள் நடமாட்டம் இல்லாத பகுதிகளில் நடந்து செல்லும் இளம்பெண்கள், முதியவர்களை குறிவைத்து கொள்ளைகளில் இந்த கும்பல் ஈடுபட்டுள்ளது. இவர்களிடம் இருந்து போலீசார் 85 பவுன் நகையை பறிமுதல் செய்துள்ளனர். தொடர்ந்து வழிப்பறி கும்பலிடம் விசாரணை நடந்து வருகிறது.

இந்த வழக்கில் துரிதமாக செயல்பட்டு வழிப்பறி கொள்ளையர்களை கைது செய்த போலீசாரை, மாநகர போலீஸ் கமி‌ஷனர் பாராட்டினார்.

அச்சம்பத்து:

மதுரை கோச்சடை கானை அம்பலக்காரர் தெருவைச் சேர்ந்தவர் கல்யாணசுந்தரம். இவரது மனைவி கண்ணம்மாள் (வயது 54). தெற்குவாசல் பகுதியில் பால்வாடி ஆசிரியையாக பணிபுரிந்து வருகிறார்.

நேற்று கல்யாணசுந்தரம் பழனி கோவிலுக்கு பாத யாத்திரையாக சென்றார். பின்னர் அவரது மனைவி வேலைக்கு சென்று விட்டார்.

பட்டப்பகலில் வீடு பூட்டிக் கிடந்ததை நோட்டமிட்ட மர்ம நபர்கள் பின்புற கதவை உடைத்து உள்ளே புகுந்தனர். அங்குள்ள அறையில் வைத்திருந்த 31 பவுன் நகைகள், ரூ.30 ஆயிரம் ஆகியவற்றை அவர்கள் கொள்ளையடித்து தப்பினர்.

இதுகுறித்து எஸ்.எஸ்.காலனி போலீசில் புகார் செய்யப்பட்டது. போலீசார் வழக்குப்பதிவு செய்து விசாரணை நடத்தி வருகிறார்கள்.

நகை-பணம் கொள்ளை நடந்த பகுதி பரபரப்பான குடியிருப்பு பகுதியாகும். இங்கு பட்டப்பகலில் திருட்டு நடந்திருப்பது அங்கு வசிக்கும் மக்களிடையே பீதியை ஏற்படுத்தி உள்ளது.