நீங்கள் தேடியது "slug 98971"

மயிலாடுதுறை,

மயிலாடுதுறை மாவட்டத்தில் உள்ள ஆதரவற்ற குழந்தைகள் காப்பகத்தில், பராமரிக்கப்பட்டு வந்த லக்ஷ்மி என்ற 2 கைகளும் இல்லாத மாற்றுத்திறனாளி மாணவி பிளஸ்-2 பொதுத்தேர்வில் ஆசிரியர் உதவியுடன் தேர்வு எழுதி தேர்ச்சி பெற்றார்.

இதனை சசிகலா இன்று தொலைபேசியில் தொடர்பு கொண்டு காப்பக நிர்வாகி கலாவதி மற்றும் வெற்றி பெற்ற மாணவி லட்சுமி ஆகியோரிடம் உரையாடினார்.

லட்சுமியிடம் பேசிய அவர் மனமார்ந்த வாழ்த்துக்களை தெரிவித்ததோடு விரைவில் நேரில் வந்து சந்திப்பதாகவும் தெரிவித்தார்.

இந்த வாழ்த்து தனக்கு மிகுந்த மகிழ்ச்சியை அளிப்பதாக லட்சுமி என்ற மாணவி தெரிவித்துள்ளார்.

சென்னை:

அ.தி.மு.க. பொதுக்குழு மற்றும் செயற்குழு கூட்டம் நாளை மறுநாள் (23-ந்தேதி) சென்னை வானகரத்தில் உள்ள ஸ்ரீவாரு திருமண மண்டபத்தில் நடைபெறுகிறது.

இந்த கூட்டத்தில் அ.தி.மு.க.வுக்கு ஒற்றை தலைமை வேண்டும் என்ற தீர்மானத்தை கொண்டு வர எடப்பாடி பழனிசாமி தரப்பு முடிவு செய்துள்ளது.

இதற்கு அ.தி.மு.க. ஒருங்கிணைப்பாளர் ஓ.பன்னீர்செல்வம் தரப்பு கடும் எதிர்ப்பு தெரிவித்து உள்ளது.

பொதுக்குழு கூட்டத்தை தள்ளி வைக்க வேண்டும் என்று ஓ.பன்னீர்செல்வம், எடப்பாடி பழனிசாமிக்கு கடிதம் அனுப்பி உள்ளார்.

இந்த நிலையில் முன்னாள் அமைச்சரும், திருவள்ளூர் மத்திய மாவட்ட செயலாளருமான பெஞ்சமின், பொதுக்குழு கூட்டத்துக்கு பாதுகாப்பு கேட்டு சென்னை ஐகோர்ட்டில் மனுதாக்கல் செய்தார்.

அதில் அ.தி.மு.க. பொதுக்குழு கூட்டம் வருகிற 23-ந்தேதி நடைபெறுகிறது. இதில் முன்னாள் அமைச்சர்கள், எம்.பி.க்கள், எம்.எல்.ஏ.க்கள் உள்ளிட்ட 2,600 பேர் கலந்து கொள்கின்றனர்.

எனவே இந்த கூட்டத்துக்கு போலீஸ் பாதுகாப்பு வேண்டும் என்று கடந்த 7 மற்றும் 15-ந்தேதி மனு கொடுத்தும் இதுவரை பரிசீலிக்கவில்லை. இதனால் போலீஸ் பாதுகாப்பு வழங்க ஆவடி போலீஸ் கமிஷனர், திருவேற்காடு போலீஸ் இன்ஸ்பெக்டர் ஆகியோருக்கு உத்தரவிட வேண்டும் என்று கூறி இருந்தார்.

இந்த வழக்கு இன்று நீதிபதி சதீஷ்குமார் முன்னிலையில் விசாரணைக்கு வந்தது.

இதில் போலீஸ் தரப்பில் ஆஜரான மாநில தலைமை குற்றவியல் அரசு வக்கீல் அசன் முகமது ஜின்னா ஆஜராகி அ.தி.மு.க.வின் பொதுக்குழு, செயற்குழுவின் கால அட்டவணை போலீஸ் தரப்புக்கு இதுவரை வழங்கவில்லை. பொதுக்குழு தொடர்பாக 26 கேள்விகளை போலீசார் கேட்டு இருந்தனர். அதற்கு இதுவரை அ.தி.மு.க. பதில் அளிக்கவில்லை.

கூட்டத்தில் ஏதேனும் அசம்பாவித சம்பவம் நடக்கும் என ஓ.பன்னீர்செல்வம் கருதினால் அவர் எப்போது வேண்டுமானாலும் போலீசாரை நாடலாம் என்று கூறினார்.

ஓ.பன்னீர்செல்வம் தரப்பில் ஆஜரான மூத்த வக்கீல் அரவிந்த் பாண்டியன் அ.தி.மு.க.வின் பொதுக்குழுவை கூட்ட கட்சியின் ஒருங்கிணைப்பாளர், இணை ஒருங்கிணைப்பாளர்களுக்கு மட்டுமே அதிகாரம் உள்ளது.

எனவே போலீஸ் பாதுகாப்பு கேட்டு இவர்கள் இருவரால் தான் மனு கொடுக்க முடியும்.

3-வது நபரான மனுதாரர் பெஞ்சமின் இதுபோல போலீஸ் பாதுகாப்பு கேட்டு மனு கொடுக்க முடியாது.

எனவே இந்த மனு விசாரணைக்கு உகந்தது அல்ல. இந்த மனுவில் அவர் பொதுக்குழு கூட்டத்தில் யாரோ பிரச்சினை செய்வார்கள். அல்லது கலவரம் செய்வார்கள் என்று கூறி உள்ளார். இது கற்பனையான குற்றச்சாட்டு.

எனவே இந்த மனுவை தள்ளுபடி செய்ய வேண்டும் என்று வாதிட்டார்.

அப்போது குறுக்கிட்ட நீதிபதி மனுதாரர் பெஞ்சமின் அ.தி.மு.க. பொதுக்குழு உறுப்பினரா? இல்லையா? என்று கேள்வி எழுப்பினார். அதற்கு பதில் அளித்த வக்கீல் அரவிந்த் பாண்டியன் மனுதாரர் அ.தி.மு.க.வில் பொதுக்குழு உறுப்பினர் தான். ஆனால் கூட்டத்துக்கு பாதுகாப்பு கேட்டு இது போல வழக்கு தொடர முடியாது.

பொதுக்குழுவில் ஏதாவது பிரச்சினை ஏற்பட வாய்ப்பு இருந்தால் நாங்களே போலீசாரை அணுகுவோம் என்று கூறினார்.

பெஞ்சமின் தரப்பில் ஆஜரான மூத்த வக்கீல் விஜய நாராயணன் இந்த பொதுக்குழு கூட்டத்துக்கு 2,600 பேர் வரை வருகிறார்கள். அனைவருக்கும் அடையாள அட்டை, அவர்கள் வாகனங்களுக்கு பாஸ் ஆகியவை வழங்கப்படும். இருந்தாலும் ஏதேனும் போலீஸ் பாதுகாப்பு கேட்டு மனுதார் வழக்கு தொடர உரிமை உள்ளது என்று கூறினார்.

இதையடுத்து நீதிபதி பொதுக்குழுவுக்கு வருகை தரும் முன்னாள் அமைச்சர்கள், எம்.பி.க்கள், எம்.எல்.ஏ.க்கள் உள்ளிட்ட யாராக இருந்தாலும் கட்சி விதிமுறைகளை பின்பற்ற வேண்டும்.

போலீசாரும் இந்த விஷயத்தில் நடுநிலையாக செயல்பட வேண்டும். அனைத்து தரப்பினருக்கும் பாதுகாப்பு வழங்கி சட்டம் ஒழுங்கை நிலைநாட்ட வேண்டும். பொதுக்குழுவில் கால அட்டவணை மற்றும் நிகழ்ச்சி தொடர்பாக 26 கேள்விகளை போலீசார் கேட்டுள்ளனர். அதற்குரிய விளக்கத்தை மதியம் 1 மணிக்குள் அ.தி.மு.க. போலீசாருக்கு அளிக்க வேண்டும்.

இந்த வழக்கை முடித்து வைக்கிறேன் என்று உத்தரவிட்டார்.

சென்னை:

அ.தி.மு.க.வில் ஒற்றை தலைமையை கொண்டு வர வேண்டும் என்பதில் முன்னாள் முதல்-அமைச்சர் எடப்பாடி பழனிசாமி மிகவும் உறுதியாகவும், தீவிரமாகவும் உள்ளார்.

அ.தி.மு.க. மூத்த தலைவர்கள், மாநில நிர்வாகிகள், மாவட்ட செயலாளர்கள், அணி தலைவர்கள், ஒன்றிய, நகர, கிளை கழக நிர்வாகிகளின் கருத்தும் ஒற்றை தலைமையை நோக்கியே இருக்கிறது. அ.தி.மு.க.வில் உள்ள 80 சதவீதத்துக்கும் மேற்பட்டவர்கள் ஒற்றை தலைமையை விரும்புகிறார்கள்.

அ.தி.மு.க. ஒருங்கிணைப்பாளராக இருக்கும் ஓ.பன்னீர்செல்வம் ஒற்றை தலைமையை விரும்பவில்லை. தற்போது இருப்பது போல தனக்குரிய அதிகாரங்கள் அப்படியே இருக்க வேண்டும் என்று விரும்புகிறார்.

இதனால் அ.தி.மு.க.வில் கடந்த ஒரு வாரமாக பெரும் குழப்பம் நிலவுகிறது. ஓ.பன்னீர்செல்வத்தை சமரசம் செய்ய அ.தி.மு.க. மூத்த தலைவர்கள் மேற்கொண்ட முயற்சிகள் அனைத்தும் தோல்வியில் முடிந்தன.

இந்த பரபரப்புக்கிடையே அ.தி.மு.க. செயற்குழு, பொதுக்குழு கூட்டம் வருகிற 23-ந்தேதி (வியாழக்கிழமை) சென்னையில் நடைபெற உள்ளது. இதில் செயற்குழு, பொதுக்குழு உறுப்பினர்கள் மட்டுமே கலந்துகொள்ள உள்ளனர். கூட்டத்தில் புதிய நிர்வாகிகள் தேர்வுக்கு ஒப்புதல் அளிக்கப்பட உள்ளது.

அதோடு சில முக்கிய தீர்மானங்களும் பொதுக்குழு கூட்டத்தில் கொண்டுவரப்பட உள்ளது. சில விதிகளை மாற்றி புதிய அம்சங்களை சேர்க்கவும் திட்டமிட்டுள்ளனர். அந்த சமயத்தில் ஒற்றை தலைமை குறித்தும் தீர்மானம் கொண்டுவரப்படலாம் என்று எதிர்பார்க்கப்படுகிறது.

அ.தி.மு.க.வி.ல் தனது கையெழுத்து மற்றும் ஒப்புதல் இல்லாமல் எந்த மாற்றமும் செய்ய முடியாது என்று ஓ.பன்னீர்செல்வம் கூறி இருந்தார். ஆனால் தீர்மானங்கள் கொண்டு வரவும், நிறைவேற்றவும் ஓ.பி.எஸ். கையெழுத்து தேவையில்லை என்பது சட்ட நிபுணர்கள் மூலம் உறுதிபடுத்தப்பட்டுள்ளது. எனவே பொதுக்குழு கூட்டத்தில் ஒற்றை தலைமை தீர்மானம் கொண்டுவர வாய்ப்புள்ளது.

அப்படி கொண்டுவரும் பட்சத்தில் தலைவர் அல்லது பொதுச்செயலாளர் பதவி கொண்டுவரப்பட்டு அதற்கு தேர்தல் நடத்த அறிவிப்புகள் வெளியிடப்படும் என்று எதிர்பார்க்கப்படுகிறது. ஆனால் அதற்கு இடம் கொடுத்து விடக்கூடாது என்பதற்காக ஓ.பன்னீர்செல்வம் அடுத்தடுத்து நடவடிக்கைகளில் ஈடுபட்டுள்ளார்.

ஒற்றை தலைமை தீர்மானம் கொண்டுவரப்பட்டால் அதை எதிர்த்து கோர்ட்டில் வழக்கு தொடரவும் அவர் முடிவு செய்து இருப்பதாக தெரிவிக்கப்பட்டுள்ளது. ஆனால் அந்த வழக்கை மிக எளிதாக எதிர்கொண்டு வெற்றி பெற முடியும் என்று எடப்பாடி பழனிசாமி ஆதரவாளர்கள் நம்பிக்கையுடன் உள்ளனர்.

ஒற்றை தலைமை விவகாரத்தில் அ.தி.மு.க. தலைவர்கள் மற்றும் தொண்டர்கள் மத்தியில் யாருக்கு அதிக ஆதரவு இருக்கிறது என்று எடப்பாடி பழனிசாமிக்கும், ஓ.பன்னீர்செல்வத்துக்கும் இடையே கடந்த ஒருவாரமாக மிகப் பெரிய பலப்பரீட்சை நடந்தது. இதில் எடப்பாடி பழனிசாமி எட்டி பிடிக்க முடியாத வேகத்தில் முன்னேறி உள்ளார்.

அ.தி.மு.க.வின் அனைத்து பிரிவுகளிலும் எடப்பாடி பழனிசாமிக்கு அதிக ஆதரவு இருக்கிறது. ஓ.பன்னீர்செல்வத்தின் சொந்த மாவட்டமான தேனி மாவட்ட நிர்வாகிகள் கூட எடப்பாடி பழனிசாமியை தான் ஆதரிக்கிறார்கள்.

அ.தி.மு.க. மூத்த தலைவர்களில் பெரும்பாலானவர்கள் இதுவரை தங்களது நிலைப்பாட்டை வெளியில் சொல்லாமல் இருந்தனர். ஆனால் நேற்று முதல் அ.தி.மு.க. மூத்த நிர்வாகிகள் எடப்பாடி பழனிசாமிக்கு ஆதரவாக கருத்து தெரிவித்து வருகிறார்கள். எடப்பாடி பழனிசாமி தலைமையில் ஒற்றை தலைமை இருந்தால்தான் அ.தி.மு.க. பலமாக இருக்கும் என்று பெரும்பாலானவர்கள் கருத்து தெரிவித்துள்ளனர்.

அதேசமயத்தில் எடப்பாடி பழனிசாமி அதிகாரப்பூர்வமாக எந்த கருத்தையும் வெளியிடவில்லை. அவர் தனது வீட்டில் இருந்தபடி மூத்த தலைவர்கள் மூலம் காய்களை நகர்த்தி வருகிறார்.

ஓ.பன்னீர்செல்வத்துக்கு ஆதரவு கொடுக்கும் தலைவர்கள் யார், யார் என்று தகவல்கள் சேகரித்து வருகிறார்கள். அதன் அடிப்படையில் அதிரடி நடவடிக்கைகளும் ஓசையின்றி நடந்து வருகின்றன.

நேற்று ஓ.பன்னீர்செல்வத்தை அ.தி.மு.க.வில் இருந்து நீக்கப்பட்ட புகழேந்தி சந்தித்து பேசினார். இதற்காக ஓ.பன்னீர்செல்வத்திடம் விளக்கம் கேட்க வேண்டும் என்று பெரும்பாலான அ.தி.மு.க. தலைவர்கள் கோரிக்கை விடுத்துள்ளனர்.

இதேபோன்று சசிகலா ஆதரவாளர்களும் மறைமுகமாக ஓ.பன்னீர்செல்வத்துக்கு ஆதரவாக செயல்படுவதாக தெரியவந்துள்ளது. இதுபற்றியும் எடப்பாடி பழனிசாமி ஆதரவு தலைவர்கள் கண்காணித்துக் கொண்டு இருக்கிறார்கள்.

எனவே அ.தி.மு.க.வில் சில அதிரடி நடவடிக்கைகள் நடந்தாலும் ஆச்சரியப்படுவதற்கில்லை என்று கூறப்படுகிறது.

பரமக்குடி:

அ.தி.மு.க.வில் ஒற்றைத்தலைமை கோஷம் உச்சத்தை அடைந்துள்ள நிலையில் முன்னாள் முதல்-அமைச்சர் எடப்பாடி பழனிச்சாமி, ஓ.பன்னீர்செல்வம் ஆதரவாளர்கள் தனித்தனியாக ஆலோசனை நடத்தி வருகின்றனர்.

இதனிடையில் ஒற்றை தலைமையை ஓ. பன்னீர்செல்வம் ஏற்க வேண்டும் என்று மதுரை, விருதுநகர், ராமநாதபுரம் உள்ளிட்ட மாவட்டங்களில் சுவரொட்டிகள் ஒட்டப்பட்டன.

இதைத்தொடர்ந்து எடப்பாடி பழனிச்சாமி ஆதரவாளர்களும் ஒற்றை தலைமையை எடப்பாடி பழனிச்சாமி ஏற்க வேண்டும் என்று மதுரை உள்ளிட்ட சில மாவட்டங்களில் சுவரொட்டி ஒட்டினர்.

இந்த நிலையில் ராமநாதபுரம் மாவட்டம் பரமக்குடியில் ஓ.‌பன்னீர்செல்வம் மற்றும் சசிகலா ஆகியோர் ஒன்றுகூடி ஒற்றை தலைமை ஏற்க வாருங்கள் என்று போஸ்டர் ஒட்டப்பட்டுள்ளது. இது அ‌தி.மு.க. தொண்டர்கள் மத்தியில் பரபரப்பை ஏற்படுத்தியுள்ளது.

மேலும் மதுரை மாவட்டம் உசிலம்பட்டி பகுதியில் அ.தி.மு.க. ஒற்றை தலைமையை ஓ.பன்னீர்செல்வம் ஏற்க வேண்டும் என்று அவரது ஆதரவாளர்கள் சுவரொட்டி ஓட்டியுள்ளனர். ஒற்றை தலைமை கோஷத்தில் எடப்பாடி பழனிச்சாமிக்கு ஆதரவு அதிகரித்ததால் ஓ.பன்னீர்செல்வம், அ.தி.மு.க.வில் இருந்து தன்னை நிராகரிக்க முடியாது என்று தெரிவித்தார். இந்தப் பிரச்சினை எப்போது முடிவுக்கு வரும்? என்று தொண்டர்கள் ஆவலுடன் உள்ளனர்.

சென்னை:

அ.தி.மு.க.வில் அமைப்பு ரீதியான கட்சி நிர்வாகிகள் தேர்தல் சட்ட திட்ட விதி 30 பிரிவு 2-ன் படி 5 ஆண்டுகளுக்கு ஒரு முறை நடத்தபட வேண்டும்.

ஜெயலலிதா மறைவுக்கு பிறகு 2019-ம் ஆண்டு கட்சி நிர்வாகிகள் தேர்தல் நடத்தி இருக்க வேண்டும். ஆனால் அந்த கால கட்டத்தில் கொரோனா பரவியதால் தேர்தல் நடத்துவதில் காலதாமதம் ஏற்பட்டது.

கொரோனா பரவல் கட்டுக்குள் வந்த பிறகு கடந்த 2021-ம் ஆண்டு டிசம்பர் மாதம் உள்கட்சி தேர்தல் முறையாக அறிவிக்கப்பட்டு ஒவ்வொரு பதவிகளுக்கும் தேர்தல் நடத்தப்பட்டது.

முதலில் கட்சியின் ஒருங்கிணைப்பாளராக ஓ.பன்னீர்செல்வம், இணை ஒருங்கிணைப்பாளராக எடப்பாடி பழனிசாமி ஆகியோர் போட்டியின்றி தேர்ந்தெடுக்கப்பட்டனர். அதன் பிறகு கிளை கழக நிர்வாகிகள், பேரூராட்சி வார்டு கழக நிர்வாகிகள், நகர வார்டு கழக நிர்வாகிகள் மற்றும் மாநகராட்சி வட்ட கழக நிர்வாகிகள் தேர்தல் நடத்தப்பட்டது.

அதன் பிறகு கடந்த ஏப்ரல் மாதம் ஒன்றிய கழக செயலாளர், மாவட்ட கழக செயலாளர் பதவிகளுக்கு தேர்தல் நடத்தி முடிக்கப்பட்டது.

தேர்ந்தெடுக்கப்பட்ட கட்சி நிர்வாகிகள் பட்டியலை தேர்தல் கமிஷனிலும் அ.தி.மு.க. தலைமை சமர்ப்பித்தது.

கட்சி சட்ட திட்ட விதிப்படி தேர்ந்தெடுக்கப்பட்ட புதிய கட்சி நிர்வாகிகள் பட்டியலுக்கு செயற்குழு, பொதுக் குழுவில் ஒப்புதல் பெற வேண்டும். இதற்காக அ.தி.மு.க. செயற்குழு, பொதுக்குழு கூட்டம் வருகிற 23-ந்தேதி (வியாழன்) சென்னை வானகரத்தில் நடைபெற உள்ளது.

இந்த செயற்குழு, பொதுக்குழு கூட்டத்தில் பங்கேற்க சுமார் 2900 உறுப்பினர்களுக்கு அழைப்பு அனுப்பப்பட்டு உள்ளது. வழக்கமாக பிற அணிகளின் மாவட்ட செயலாளர்கள், துணை நிர்வாகிகளை சிறப்பு அழைப்பாளர்களாக பங்கேற்குமாறு செயற்குழு, பொதுக்குழு கூட்டத்துக்கு அழைப்பு அனுப்பப்படுவது வழக்கம். ஆனால் இந்த செயற்குழு, பொதுக்குழு கூட்டத்தில் பங்கேற்க சிறப்பு அழைப் பாளர்களுக்கு அழைப்பு அனுப்பப்படவில்லை.

சிறப்பு அழைப்பாளர்களையும் கூட்டத்தில் பங்கேற்க செய்ய வேண்டும் என்று ஓ.பன்னீர்செல்வம் வலியுறுத்துவதாக தகவல்கள் வெளியாகி வருகிறது.

ஆனால் இதற்கு எடப்பாடி பழனிசாமி இது வரை ஒத்துக்கொள்ளவில்லை. கட்சியில் அமைப்பு ரீதியாக தேர்தல் நடத்தி முடிக்கப்பட்டுள்ளதால் அதில் தேர்ந்தெடுக்கப்பட்ட வர்களை வைத்து செயற்குழு, பொதுக்குழுவை நடத்தி தேர்தல் கமிஷனுக்கு தகவல் தெரிவிக்க வேண்டும் என்று எடப்பாடி பழனிசாமி விரும்புகிறார்.

தேர்ந்தெடுக்கப்படாத பிற அணிகளின் மாவட்ட செயலாளர்கள், துணை நிர்வாகிகளை பங்கேற்க வைத்தால் அதில் சசிகலா ஆதரவாளர்கள் யாராவது கட்சிக்கு விரோதமாக கருத்துக்களை தெரிவித்து குழப்பத்தை ஏற்படுத்த முயலக்கூடும் என நினைப்பதால் சிறப்பு அழைப்பாளர்களை அழைக்க வேண்டாம் என எடப்பாடி பழனிசாமி முடிவு செய்துள்ளார்.

அ.தி.மு.க. செயற்குழு, பொதுக்குழு கூட்டத்தில் சசிகலா ஆதரவாளர்கள் போலி உறுப்பினர்கள் போர்வையில் பங்கேற்று ஒற்றை தலைமை கோஷம் எழுப்பி குழப்பத்தை ஏற்படுத்தி விடக்கூடாது என்பதற்காக இந்த முடிவு எடுக்கப்பட்டுள்ளதாக தெரிகிறது.

இதனால் இதுபற்றி விவாதிப்பதற்கும், செயற்குழு, பொதுக்குழு கூட்டத்தில் நிறைவேற்றப்பட உள்ள தீர்மானங்களை இறுதி செய்வதற்காகவும் இன்று மாவட்ட செயலாளர்கள், தலைமைக்கழக நிர்வாகிகள் கூட்டம் அ.தி.மு.க. தலைமை கழகத்தில் நடைபெற்றது.

கூட்டத்தில் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி, துணை ஒருங்கிணைப்பாளர்கள் கே.பி.முனுசாமி, வைத்திலிங்கம், அவைத்தலைவர் தமிழ் மகன் உசேன் உள்ளிட்ட தலைமை கழக நிர்வாகிகள், மாவட்டச் செயலாளர்கள் 150 பேர் பங்கேற்றனர்.

செயற்குழு, பொதுக்குழு கூட்டத்தில் யார்-யாரை பேச அழைப்பது, என்னென்ன பிரச்சினைகளை எதிர்கொள்வது என்பது குறித்து விரிவாக விவாதித்தனர்.

மேலும் தமிழகத்தில் சிறப்பான எதிர்க்கட்சியாக செயல்படுவது, ஜனாதிபதி தேர்தலில் அ.தி.மு.க.வின் நிலைப்பாடு ஆகியவை பற்றியும் ஆலோசிக்கப்பட்டதாக தெரிகிறது.

செயற்குழு, பொதுக்குழுவில் ஆட்சியை இழந்ததற்கான காரணம் குறித்து பலர் கண்டிப்பாக பேசுவார்கள். அது மட்டுமல்ல சசிகலா விவகாரம் குறித்தும் கருத்து மோதல்கள் ஏற்படும். ஒற்றை தலைமை கோஷத்தை யாராவது எழுப்பினால் அதை எவ்வாறு எதிர்கொள்வது என்பது பற்றியும் விவாதிக்கப்பட்டது.

மாவட்ட கழக செயலாளர்கள் தங்களது கட்டுப்பாட்டில் உள்ள பொதுக்குழு உறுப்பினர்களுக்கு அழைப்பிதழ் வழங்கி 'மினிட்' புத்தகத்தில் கையெழுத்து வாங்க வேண்டும் என்று கட்டளையிடப்பட்டுள்ளது.

தற்போது அ.தி.மு.க.வில் வழிகாட்டுதல் குழு உள்ளது. இந்த குழுவுக்கு பதிலாக உயர் மட்டக்குழு உருவாக்க படக்கூடும் என தெரிகிறது.

உயர் மட்டக்குழுவின் தலைவராக ஓ.பன்னீர்செல்வம், செயல் தலைவராக எடப்பாடி பழனிசாமி பொறுப்பேற்க வாய்ப்பு உள்ளது.

இதில் ஓ.பன்னீர்செல்வம் ஆதரவாளர்கள் 9 பேர், எடப்பாடி பழனிசாமி ஆதரவாளர்கள் 9 பேர் உள்ளிட்ட 20 பேர் அடங்கிய குழுவாக உயர்மட்டக்குழு மாற்றி அமைக்கப்படும் என்றும் இதற்கான அறிவிப்பு பொதுக்குழு கூட்டத்தில் வெளியாகலாம் என்றும் எதிர்பார்க்கப்படுகிறது.

இந்த ஆலோசனை கூட்டத்தின்போது நிர்வாகிகள், மாவட்ட செயலாளர்கள் மத்தியில் அ.தி.மு.க. ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி ஆகியோர் பேசியதாவது:-

வருகிற 23-ந்தேதி நடைபெறும் அ.தி.மு.க. செயற்குழு மற்றும் பொதுக்குழு கூட்டத்தில் ஒற்றை தலைமை பற்றியும், பொதுச்செயலாளர் பதவி பற்றியும், சசிகலா பற்றியும் யாரும் பேசக்கூடாது. குரல் எழுப்பவும் கூடாது. இதை மாவட்ட செயலாளர்கள் மிகுந்த கவனத்துடன் கண்காணித்து மிகவும் எச்சரிக்கையாக செயல்பட வேண்டும். கட்சியை நாங்கள் இருவரும் சேர்ந்து நடத்தி செல்வோம்.

செயற்குழு, பொதுக்குழு கூட்டத்தில் கொண்டு வரப்படும் தீர்மானங்களுக்கு முழுமையான ஆதரவு கொடுக்க வேண்டும். அமைதியான முறையில் பொதுக்குழு கூட்டத்தை நடத்தி முடிக்க அனைவரும் முழு ஒத்துழைப்பு தர வேண்டும்.

இவ்வாறு அவர்கள் கூறினார்கள்.

இன்று நடைபெற்ற அ.தி.மு.க. ஆலோசனை கூட்டத்தில் செல்போன் அனுமதிக்கப்படவில்லை. வழக்கமாக கூட்டம் நடந்து கொண்டிருக்கும் போதே அதுபற்றிய தகவல்கள் வெளியே கசிவதாக புகார் எழுந்த நிலையில் இன்று செல்போனுக்கு தடை விதிக்கப்பட்டிருந்தது.

கட்சி நிர்வாகிகளின் செல்போன்களை வாங்கி வெளியே வைத்திருப்பதற்காக தனியாக ஆட்கள் நியமிக்கப்பட்டிருந்தனர். அவர்கள் கூட்டத்துக்கு சென்ற நிர்வாகிகளிடம் இருந்து செல்போன்களை வாங்கிய பிறகே உள்ளே அனுப்பினார்கள்.

சென்னை:

முன்னாள் அமைச்சர் டி.ஜெயக்குமார் சென்னை போலீஸ் கமிஷனர் அலுவலகத்தில் உள்ள குற்றப்பிரிவு போலீசில் இன்று கையெழுத்து போட்டு விட்டு நிருபர்களுக்கு பேட்டி அளித்தார். அப்போது அவர் கூறியதாவது:-

அ.தி.மு.க.வை மீட்டு எடுப்பேன் என்று சசிகலா கூறி இருக்கிறார். சசிகலாவுக்கு அ.தி.மு.க.வில் ஒருபோதும் இடமில்லை. பணத்தை வைத்து அரசியல் செய்யலாம் என சசிகலா நினைக்கிறார். டெல்லி உயர் நீதிமன்றமும் தேர்தல் கமிஷனும் தெளிவான தீர்ப்பை வழங்கி உள்ளன.

சசிகலாவின் கருத்தை தொண்டர்களும் தமிழக மக்களும் பொருட்படுத்தவில்லை. அவர் கூறுவதை உதாசீனப்படுத்தும் கருத்தாகத்தான் அனை வரும் பார்ப்பார்கள். அவர் கூறும் கருத்து பெரிய அளவில் தாக்கமும் ஏற்படுத்தாது.

அ.ம.மு.க.வில் இருந்து பலர் அ.தி.மு.க.வில் வந்து இணைகிறார்கள். கூடிய விரைவில் அ.ம.மு.க. என்ற கட்சி இருக்காது. தொண்டர்கள், பொதுமக்கள் ஆதரவு இல்லாமல் பணத்தை வைத்து மட்டும் அரசியல் செய்து வருகிறார்கள்.

இவ்வாறு அவர் கூறினார்.

திண்டிவனம்:

முன்னாள் முதல்-அமைச்சர் ஜெயலலிதாவின் தோழி சசிகலா இன்று திண்டிவனம் வந்தார். அவர் நிருபர்களிடம் கூறியதாவது:-

தமிழகத்தில் தி.மு.க. ஆட்சி முடிந்து ஓராண்டு ஆகிறது. இந்த ஓராண்டில் சட்டம்-ஒழுங்கு சரியில்லை.

சுமார் 600-க்கும் மேற்பட்ட கொலை சம்பவங்கள் நடந்துள்ளது. இதற்கு காரணம் காவல்துறையை 3 பிரிவுகளாக பிரித்ததுதான். ஒரே தலைமையின் கீழ் காவல்துறை இருந்தால் சட்டம்-ஒழுங்கு பாதுகாக்கப்பட்டு இருக்கும். ஜெயலலிதா ஆட்சி காலத்தில் சட்டம்-ஒழுங்கு கட்டுப்பாட்டுக்குள் இருந்தது.

டெல்டா மாவட்டங்களில் தற்போது விவசாயிகள் நெல் விதை இல்லாமல் தவிக்கிறார்கள். இது பற்றி உடனடியாக அரசு நடவடிக்கை எடுக்க வேண்டும். பாரதிய ஜனதா கட்சி தமிழகத்தில் வளர்வதாக அந்த கட்சியினர்தான் கூறுகிறார்கள். தமிழகத்தில் பாரதிய ஜனதாக வளரவில்லை.

தற்போது உள்ளாட்சி அமைப்புகளில் பெண் பஞ்சாயத்து தலைவர்களின் கணவர்கள் குறுக்கீடு ஏராளமாக உள்ளது. இதனை கண்டிக்கிேறாம்.

எனக்கு மக்கள் ஆதரவு அதிகம் உள்ளது. எனவே, அ.தி.மு.க. கொடி மற்றும் கட்சியை விரைவில் கைப்பற்றுவோம்.

இவ்வாறு அவர் கூறினார்.