நீங்கள் தேடியது "Zero Shadow Day"

திருச்சி:

தினமும் சூரியன் நமக்கு மேல் உச்சியில் செல்வதுபோல தெரிந்தாலும், ஆண்டுக்கு 2 நாட்கள் மட்டுமே மிகச் சரியாக உச்சியில் வரும். அப்போது ஒரு பொருளின் மேல் விழும் சூரிய வெளிச்சத்தின் விளைவாக, நிழல் அப்பொருளின் பரப்புக்கு உள்ளேயே விழுவதால் அதன் நிழலைப் பார்க்க முடியாது.

இந்த நிகழ்வு வெறும் ஓரிரு நிமிடங்கள் மட்டுமே நடைபெறும். இந்த நாட்களை நிழல் இல்லா நாள் அல்லது பூஜ்ய நிழல் நாள் என்கின்றனர்

இதன்படி நடப்பாண்டு திருச்சி மாவட்டத்தில் இன்று (புதன்கிழமை) திருச்சி, மணப்பாறை, வையம்பட்டி, மருங்காபுரி, மணிகண்டம், திருவெறும்பூர் பகுதிகளிலும் நாளை ( வியாழக்கிழமை) புள்ளம்பாடி, லால்குடி, மண்ணச்சநல்லூர், ஸ்ரீரங்கம், முசிறி, தா.பேட்டை, தொட்டியம் பகுதிகளிலும், நாளை மறுநாள் (19-ந்தேதி) துறையூர் உப்பிலியபுரம் பகுதிகளிலும் நிழல் இல்லா நாள் அமைகிறது.

இது தொடர்பாக தமிழ்நாடு அறிவியல் இயக்க திருச்சி மாவட்ட செயலாளர் மணிகண்டன் கூறுகையில்,

இந்த எளிய வானியல் நிகழ்வை அவரவர் வீடுகளிலேயே செய்து பார்க்கலாம். உரிய நேரத்தில் சமதள பரப்பளவில் ஏதேனும் ஒரு உருளையான பொருளை செங்குத்தாக வைத்து அதன் நிழல் விழவில்லையா என்பதை பார்க்கலாம்.

உங்கள் ஊரில் எப்போது நிழல் இல்லா நேரம் என்பதை அறிந்து கொள்ள https:// alokm.com/zsd.html என்ற இணையதளத்தில் சென்று, ஊர் பெயரை தட்டச்சு செய்தால் உரிய நேர விவரம் கிடைக்கும் என்றார்.

உடுமலை :

சூரியனால் ஏற்படும் ஒரு பொருளின் நிழல் காலையில் அதிக நீளத்தோடு இருந்து உச்சி நேரத்தில் குறையும். பின், சூரியன் மறையும் வரை மீண்டும் நீள்கிறது. அதேநேரம், ஓராண்டில் இரு முறை சூரியனால் ஏற்படும் நிழலை காண இயலாது. அவ்வகையில் ஒரு பொருளின் நேர் மேலாக 90 டிகிரி உச்சியில், சூரியன் வரும் நிகழ்வு, பூஜ்ய நிழல் தினமாக அழைக்கப்படுகிறது.அந்த நிகழ்வு உடுமலையில் கலிலியோ அறிவியல் கழகம் வாயிலாக கண்டறியப்பட்டது.

குறிப்பாக ராகல்பாவி ஊராட்சி ஒன்றிய துவக்கப்பள்ளியில் எளிய பொருட்களின் வாயிலாக பூஜ்ய நிழலை கண்டு களித்தனர்.இதேபோல என்.வி., மெட்ரிக் பள்ளி மாணவர்கள், மைதானத்தின் வட்ட வடிவில் நின்று பூஜ்ய நிழலை கண்டறிந்தனர்.இதன் ஒருங்கிணைப்பாளர் கண்ணபிரான் கூறியதாவது:-

பூஜ்ஜிய நிழலை கண்டறியும் வகையில் ஒரு பொருளைக்கொண்டு சரியாக பிற்பகல் 12:23 மணிக்கு, உற்று நோக்கப்பட்டது.அப்போது சூரியனால் ஏற்பட்ட பொருளின் நிழல் நேர்குத்தாக கீழே விழுந்தது. அப்போது, பொருளின் நிழல் தென்படவில்லை. மாணவர்களிடையே அறிவியல் திறனை மேம்படுத்தவும், வானியலில் ஆர்வத்தை ஏற்படுத்தவும் இது போன்ற நிகழ்வுகள் ஊக்கப்படுத்தப்படுகிறது. இவ்வாறு அவர்கள் கூறினர்.