நீங்கள் தேடியது "இடைத்தேர்தல்"

ஈரோடு கிழக்கு தொகுதி எம்.எல்.ஏ.வாக இருந்த ஈ.வி.கே.எஸ்.இளங்கோவன் மறைவால் அந்த தொகுதியில் அடுத்த மாதம் (பிப்ரவரி) 5-ந் தேதி இடைத்தேர்தல் நடக்கிறது.

கடந்த 10-ந்தேதி வேட்பு மனு தாக்கல் தொடங்கியது. வருகிற 17-ந்தேதி மனு தாக்கல் செய்ய கடைசி நாள்.

தி.மு.க. கூட்டணியில் தனது கைவசம் இருந்த இந்த தொகுதியில் காங்கிரஸ் போட்டியிட விரும்பாததால் தி.மு.க. போட்டியிடுகிறது. தி.மு.க. சார்பில் சந்திரகுமார் வேட்பாளராக அறிவிக்கப்பட்டு உள்ளார். இவர் தே.மு.தி.க.வில் இருந்தபோது இந்த தொகுதியில் போட்டியிட்டு வெற்றி பெற்றவர் என்பது குறிப்பிடத்தக்கது.

பிரதான எதிர்க்கட்சியான அ.தி.மு.க. விக்கிரவாண்டி இடைத்தேர்தலை புறக்கணித்ததை போல் ஈரோடு கிழக்கு தொகுதியிலும் போட்டியிடாமல் புறக்கணித்துள்ளது. அதன் கூட்டணி கட்சியான தே.மு.தி.க.வும் போட்டியிடவில்லை என்று அறிவித்து விட்டது.

எனவே தி.மு.க.வை எதிர்த்து போட்டியிட போவது யார் என்ற கேள்வி எழுந்துள்ளது. தற்போதைய நிலையில் நாம் தமிழர் கட்சி மட்டும் போட்டியிட போவதாக அறிவித்துள்ளது. வேட்பாளர் இன்னும் அறிவிக்கப்படவில்லை.

இந்நிலையில், ஈரோடு கிழக்கு இடைத்தேர்தலை புறக்கணிப்பதாக பாஜக தலைமையிலான தேசிய ஜனநாயக கூட்டணி அறிவித்துள்ளது.

அதிமுக பொதுச் செயலாளர் எடப்பாடி பழனிசாமி தலைமையில் அதிமுக மாவட்ட செயலாளர்கள் கூட்டம் நடைபெற்றது.

கூட்டத்தில், ஈரோடு கிழக்கு இடைத்தேர்தலில் அதிமுக போட்டியா ? புறக்கணிப்பா ? என்பது குறித்து முடிவு எடுக்கப்பட்டுள்ளது.

முன்னதாக, செய்தியாளர்கள் சந்திப்பில், "நீட் தேர்வு விவகாரத்தில் முதலமைச்சர் கையை விரித்து விட்டார். மத்திய அரசு தான் நீட் தேர்வை ரத்து செய்யமுடியும் என்று முதலமைச்சர் தற்போது கூறுகிறார். நீட் தேர்வு ரத்து என்று கூறி மாணவர்கள், பெற்றோர்களை திமுக அரசு ஏமாற்றி விட்டது" என்றார்.

மேலும், தந்தை பெரியாருக்கு எதிராக பேசிய சீமானுக்கு கண்டனம் தெரிவித்தார். திமுக ஆட்சி மீடு குற்றச்சாட்டுகளை இபிஎஸ் அடுக்கினார்.

இந்நிலையில், ஆலோசனை கூட்டத்தின் முடிவில் ஈரோடு கிழக்கு இடைத்தேர்தலில் அதிமுக போட்டியில்லை என தெரிவித்துள்ளது.

அதன்படி, வரும் பிப்ரவரி மாதம் 5ம் தேதி நடைபெற உள்ள ஈரோடு கிழக்கு இடைத்தேர்தலை புறக்கணிப்பதாக அதிமுக பொதுச் செயலாளர் எடப்பாடி பழனிசாமி அறிவித்துள்ளார்.

ஏற்கனவே விக்கிரவாண்டி இடைத்தேர்தலை அதிமுக புறக்கணித்த நிலையில், ஈரோடு கிழக்கு இடைத்தேர்தலும் புறக்கணிக்கப்பட்டுள்ளது.

" ஏற்கனவே நடந்த ஈரோடு கிழக்கு இடைத்தேர்தலில் ஆளுங்கட்சி அதிகாரத்தை தவறாக பயன்படுத்தியது.

பணம், மது, தங்கக்காசு, சொலுசு, குக்கர் உள்ளிட்ட பரிசு பொருட்கள் வழங்கப்பட்டன.

அராஜகங்கள், வன்முறைகளை கட்டவிழ்த்துவிட்டு, மக்களை சுதந்திரமாக வாக்களிக்க விட மாட்டார்கள்.

மேலும், சட்டம்றற- ஒழுங்கு முற்றிலும் சீர்கெட்டுள்ளதால் ஈரோடு கிழக்கு இடைத்தேர்தலை புறக்கணிக்கிறோம்" என கூறப்பட்டுள்ளது.

ஈரோடு:

ஈரோடு கிழக்கு தொகுதி தி.மு.க. வேட்பாளரான வி.சி.சந்திரகுமார் (வயது 57) ஈரோடு கிராமடையில் குடும்பத்துடன் வசித்து வருகிறார். வி.சி.சந்திரகுமாரின் மனைவி அமுதா. இவர்களுக்கு ஒரு மகனும், ஒரு மகளும் உள்ளனர்.

வி.சி.சந்திரகுமார் ஜவுளி மொத்த வியாபாரம் செய்து வருகிறார். 1987-ம் ஆண்டு ஈரோடு அ.தி.மு.க வார்டு பிரதிநிதியாக இருந்தார். பின்னர் நடிகர் விஜயகாந்த் மீது கொண்ட பற்றால் விஜயகாந்த் ரசிகர் மன்ற தலைவராக செயல்பட்டார்.

பின்னர் விஜயகாந்த் 2005-ம் ஆண்டு தே.மு.தி.க.வை தொடங்கிய போது வி.சி.சந்திரகுமார் தே.மு.தி.க.வில் இணைந்து அக்கட்சியின் கொள்கை பரப்பு செயலாளராக பணியாற்றினார்.

2008-ம் ஆண்டு ஈரோடு தொகுதி மறுசீரமைக்கப்பட்டு ஈரோடு கிழக்கு, ஈரோடு மேற்கு என பிரிக்கப்பட்டது. ஈரோடு கிழக்கு தொகுதியில் முதலியார் பிரிவினருக்கு கணிசமான ஓட்டு வங்கி உள்ளது.

இதன் காரணமாக 2011-ம் ஆண்டு ஈரோடு கிழக்கு தொகுதியில் நடந்த தேர்தலில் அ.தி.மு.க கூட்டணியில் தே.மு.தி.க. சார்பில் வி.சி. சந்திரகுமார் போட்டியிட்டார்.

அப்போது அந்த தேர்தலில் வி.சி.சந்திரகுமாரை எதிர்த்து தி.மு.க சார்பில் தற்போதைய அமைச்சர் சு.முத்துசாமி போட்டியிட்டார். அந்த தேர்தலில் வி.சி.சந்திரகுமார் 69 ஆயிரத்து 166 வாக்குகள் பெற்றார்.

அவரை எதிர்த்து போட்டியிட்ட முத்துசாமி 58 ஆயிரத்து 522 வாக்குகள் பெற்றார். இந்த தேர்தலில் சந்திரகுமார் 10 ஆயிரத்து 644 வாக்குகள் வித்தியாசத்தில் வெற்றி பெற்று ஈரோடு கிழக்கு தொகுதியின் முதல் எம்.எல்.ஏ.வாக தேர்ந்தெடுக்கப்பட்டார்.

பின்னர் 2016-ம் ஆண்டு வி.சி.சந்திரகுமார் தே.மு.தி.க தலைமையிடம் ஏற்பட்ட கருத்து வேறுபாடு காரணமாக தி.மு.க.வில் இணைந்தார். அவருக்கு தி.மு.க.வில் மாநில கொள்கை பரப்பு அணி இணை செயலாளர் பொறுப்பு வழங்கப்பட்டது.

2016-ம் ஆண்டு நடந்த ஈரோடு கிழக்கு தொகுதி தேர்தலில் தி.மு.க சார்பில் வி.சி.சந்திரகுமார் போட்டியிட்டார். அவரை எதிர்த்து அ.தி.மு.க சார்பில் கே.எஸ்.தென்னரசு போட்டியிட்டார்.

இந்த தேர்தலில் சந்திரகுமார் 57 ஆயிரத்து 85 வாக்குகள் பெற்றார். அவரை எதிர்த்து போட்டியிட்ட தென்னரசு 64 ஆயிரத்து 879 வாக்குகள் பெற்று 7 ஆயிரத்து 794 வாக்குகள் வித்தியாசத்தில் வெற்றி பெற்றார்.

பின்னர் சந்திரகுமார் தி.மு.க.வில் தீவிரமாக பணியாற்றி வருகிறார். 2019-ம் ஆண்டு பாராளுமன்ற தேர்தலில் சேலம் தொகுதி பொறுப்பாளராக பணியாற்றினார். 2021 சட்டமன்ற தேர்தலில் குமாரபாளையம் தொகுதி பொறுப்பாளராகவும் 2023-ம் ஆண்டு பாராளுமன்ற தேர்தலில் திருச்செங்கோடு சட்டமன்ற தொகுதி பொறுப்பாளராகவும் பணியாற்றினார். அரவக்குறிச்சி, விக்கிரவாண்டி இடைத்தேர்தலில் முழு நேரமாக தேர்தல் பணியாற்றியதும் குறிப்பிடத்தக்கது.

சென்னை:

ஈரோடு கிழக்கு தொகுதி எம்.எல்.ஏ.வாக இருந்த ஈ.வி.கே.எஸ்.இளங்கோவன் மரணம் அடைந்ததை தொடர்ந்து இடைத்தேர்தல் அறிவிக்கப்பட்டது. அதன்படி ஈரோடு கிழக்கு சட்டமன்ற தொகுதி இடைத்தேர்தல் அடுத்த மாதம் (பிப்ரவரி) 5-ந்தேதி நடக்கிறது.

இதை முன்னிட்டு இன்று (வெள்ளிக்கிழமை) முதல் வேட்புமனு தாக்கல் தொடங்கியது. வருகிற 17-ந் தேதி கடைசி நாள் ஆகும். இன்று ஒரேநாளில் 3 சுயேட்சை வேட்பாளர்கள் வேட்புமனு தாக்கல் செய்துள்ளனர். வருகிற 13-ந்தேதி மற்றும் 17-ந் தேதி ஆகிய நாட்கள் மட்டுமே வேட்புமனுக்களை வேட்பாளர்கள் தாக்கல் செய்ய முடியும். மற்ற நாட்கள் அரசு விடுமுறை நாட்கள் ஆகும். 18-ந் தேதி மனுக்கள் பரிசீலனை செய்யப்படும். வேட்புமனுவை திரும்ப பெற 20-ந் தேதி கடைசி நாளாகும்.

ஈரோடு கிழக்கு இடைத்தேர்தலில் திமுக போட்டியிடுமா? அல்லது திமுக கூட்டணியில் இடம்பெற்றுள்ள காங்கிரஸ் போட்டியிடுமா? என்பது குறித்து குழப்பமான சூழ்நிலை நிலவி வந்தது.

இந்நிலையில், ஈரோடு கிழக்கு இடைத்தேர்தலில் திமுக போட்டியிடும் என அறிவிப்பு வெளியாகியுள்ளது. இந்த அறிவிப்பை திமுக கூட்டணியில் இடம்பெற்றுள்ள காங்கிரஸ் கட்சியின் மாநில தலைவர் செல்வபெருந்தகை அறிவித்துள்ளார்.

ஈரோடு:

ஈரோடு கிழக்கு தொகுதிக்கான இடைத்தேர்தல் வரும் பிப்ரவரி 5-ந் தேதி நடைபெற உள்ளது. இதற்கான வேட்புமனு தாக்கல் இன்று தொடங்கி வருகின்ற 17-ந் தேதி வரை நடைபெற உள்ளது. தொடர்ந்து, விடுமுறை நாட்கள் தவிர மீதமுள்ள 13, 17-ந் தேதிகளில் என மொத்தம் 3 நாட்கள் மட்டுமே வேட்பு மனு தாக்கல் நடைபெறும்.

இதையடுத்து 18-ந் தேதி வேட்புமனுக்கள் மீதான பரிசீலனை நடைபெறுகிறது. 20-ந் தேதி வேட்புமனுக்கள் வாபஸ் பெற கடைசி நாளாகும். அன்று மாலை இறுதி வேட்பாளர் பட்டியல் வெளியிடப்படும்.

தொடர்ந்து பிப்ரவரி 5-ந் தேதி வாக்குப்பதிவு நடைபெறுகிறது. 8-ந் தேதி சித்தோட்டில் உள்ள அரசு பொறியியல் கல்லூரியில் வாக்கு எண்ணிக்கை நடைபெறுகிறது.

இந்த நிலையில் தேர்தல் ஆணையத்தின் அறிவிப்பின்படி இன்று வேட்புமனுத் தாக்கல் தொடங்கியது. தி.மு.க. உள்ளிட்ட பிரதான கட்சிகள் வேட்பாளரை அறிவிக்காத நிலையில், சுயேட்சை வேட்பாளர்கள் சிலர் மட்டும் இன்று வேட்பு மனு தாக்கல் செய்ய வந்தனர்.

முதல் நபராக தேர்தல் மன்னன் சேலம் மாவட்டம் மேட்டூரை சேர்ந்த பத்மராஜன் (64) என்பவர் ஈரோடு கிழக்கு தொகுதி இடைத்தேர்தலில் போட்டியிட மனு தாக்கல் செய்தார்.

நான் இதுவரை 246 தேர்தலில் போட்டியிட்டுள்ளேன். தற்போது ஈரோடு கிழக்கு தொகுதியில் போட்டியிடுவதற்காக இன்று வேட்புமனு தாக்கல் செய்துள்ளேன். இது 247-வது தேர்தலாகும்.

நான் இதுவரை 6 ஜனாதிபதி தேர்தல், 6 துணை ஜனாதிபதி தேர்தல், 33 பாராளுமன்றத்தேர்தல், 76 எம்.எல்.ஏ.க்கள் தேர்தல், மாநகராட்சி மேயர் தேர்தல், கவுன்சிலர் தேர்தல் என போட்டிட்டு உள்ளேன்.

வாஜ்பாய், நரசிம்மராவ், கருணாநிதி, ஜெயலலிதா, சினிமா நடிகர் சரத்குமார் என பலரை எதிர்த்து போட்டியிட்டு உள்ளேன்.

கடைசியாக கேரளா மாநிலம் வயநாட்டில் நடந்த எம்.பி. தேர்தலில் பிரியங்கா காந்தியை எதிர்த்துப் போட்டியிட்டு 286 வாக்குகள் பெற்றேன். தமிழகத்தில் கடைசியாக விக்கிரவாண்டியில் நடந்த இடைத்தேர்தலில் போட்டியிட்டு 16 வாக்குகள் பெற்றேன்.

கடந்த முறை ஈரோடு கிழக்கு தொகுதி இடைத்தேர்தலில் போட்டியிட்டு 8 வாக்குகள் பெற்றேன். தேர்தலில் அதிக முறை போட்டிட்டதற்காக கின்னஸ் சாதனை புத்தகத்திலும் இடம் பெற்றுள்ளேன்.

இன்னும் இந்தியாவில் எத்தனை தேர்தல் வந்தாலும் நான் உயிரோடு இருக்கும் வரை அனைத்து தேர்த லிலும் போட்டியிடுவேன்.

தேர்தலில் போட்டியிடுவதற்காக வேட்புமனு தாக்கல் செய்து அதற்காக பிரசாரம் எல்லாம் செய்ய மாட்டேன். எனது நோக்கம் தேர்தலில் போட்டியிட வேண்டும் என்பது மட்டும்தான்.

இவ்வாறு அவர் கூறினார்.

இதைத்தொடர்ந்து இன்னும் சில சுயேச்சை வேட்பாளர்கள் இன்று மதியம் வரை தேர்தலில் போட்டியிட வேட்பு மனு தாக்கல் செய்தனர். வேட்புமனு தாக்கல் செய்ய வந்த வேட்பாளர்களிடமிருந்து, தேர்தல் அலுவலர்கள் வேட்பாளர் படிவம், இணைக்கப்பட்டுள்ள ஆவணங்கள் மற்றும் டெபாசிட்தொகை ஆகியவற்றை சரி பார்த்தனர்.

அதன்பின்னர், ஈரோடு கிழக்குத் தொகுதி தேர்தல் நடத்தும் அலுவலரும், மாநகராட்சி ஆணையருமான மனிஷ், வேட்பாளர்களிடமிருந்து வேட்புமனுக்களை பெற்றுக்கொண்டார்.

இந்த நடைமுறைகள் முழுவதும் மாநகராட்சி அலுவலக வளாகம் முழுவதும் அமைக்கப்பட்டுள்ள சி.சி.டி.வி. கேமராக்கள் மூலமாக கண்காணிக்கப்பட்டது.

மேலும், வேட்புமனு தாக்கலை முன்னிட்டு மாநகராட்சி அலுவலக நுழைவு வாசல் மற்றும் வளாகம் முழுவதும், ஈரோடு டவுன் டி.எஸ்.பி. முத்துக்கு மரன், இன்ஸ்பெக்டர் அனுராதா ஆகியோர் தலைமையில் 60-க்கும் மேற்பட்ட போலீசார் பாதுகாப்பு பணியில் ஈடுபட்டு வருகின்றனர். 

பெருந்துறை:

2008ல் தொகுதி வரையறை செய்யப்பட்ட போது ஈரோடு கிழக்கு தொகுதி உருவாக்கப்பட்டு 2011ல் அ.தி.மு.க-தே.மு.தி.க கூட்டணியில் வேட்பாளராக களம் இறங்கிய தே.மு.தி.க.வின் வி.சி.சந்திரகுமார் வெற்றி பெற்று முதன்முறையாக எம்.எல்.ஏ. ஆனார்.

2016-ல் தே.மு.தி.க.வில் இருந்து விலகிய வி.சி.சந்திரகுமார் தி.மு.க. வேட்பாளராகவும், கே.எஸ்.தென்னரசு அ.தி.மு.க. வேட்பாளராகவும் போட்டி யிட்டதில் தென்னரசு வெற்றி பெற்றார்.

2021 சட்டப்பேரவை தேர்தலில் ஈ.வி.கே.எஸ். இளங்கோவன் மகன் திருமகன் ஈவெரா தி.மு.க. கூட்டணியில் காங்கிரஸ் வேட்பாளராக களம் இறங்கி வெற்றி பெற்றார். 2023-ல் உடல் நலக்குறைவால் திருமகன் ஈவெரா திடீரென காலமானார்.

இதைத்தொடர்ந்து நடைபெற்ற இடைத்தேர்தலில் ஈ.வி.கே.எஸ். இளங்கோவன் தி.மு.க. கூட்டணியில் காங்கிரஸ் வேட்பாளராக அறிவிக்கப்பட்டு போட்டியிட்டு வெற்றிபெற்றார்.

இந்நிலையில் காங்கிரஸ் எம்.எல்.ஏ. இளங்கோவனும் காலமான தால் தமிழ்நாட்டு வரலாற்றிலேயே முதன்முறையாக ஒரே தொகுதிக்கு 2-வது முறையாக இடைத்தேர்தல் நடைபெற போகிறது.

இதுவரை நடைபெற்ற 4 தேர்தலில் தி.மு.க. 2 முறையும், கூட்டணி கட்சியான காங்கிரஸ் 2 முறையும் போட்டியிட்டதில் 1 முறை தி.மு.க.வும், 2 முறை காங்கிரசும், ஒரு முறை அ.தி.மு.க.வும் வெற்றி பெற்றுள்ளன.

2023 இடைத்தேர்தலில் காங்கிரஸ் வேட்பாளர் ஈ.வி.கே.எஸ் இளங்கோவன் 66 ஆயிரம் வாக்குகள் வித்தியாசத்தில் வெற்றி பெற்று எம்.எல்.ஏ. ஆனார்.

இந்நிலையில் எம்.எல்.ஏ. ஈ.வி.கே.எஸ். இளங்கோவன் கடந்த 14ம் தேதி காலமானார். இதையடுத்து இந்த தொகுதி காலியானதாக தேர்தல் ஆணையம் அறிவித்துள்ளது.

டெல்லி சட்டப்பேரவைக்கு பிப்ரவரி மாதம் நடைபெற உள்ள தேர்தலுடன், ஈரோடு கிழக்கு தொகுதியிலும் இடைத்தேர்தல் நடை பெறும் என எதிர்பார்க்கப்படுகிறது.

ஈரோடு கிழக்கு இடைத்தேர்தலில் தி.மு.க. கூட்டணியில் இடம் பெற்றுள்ள காங்கிரசுக்கு வாய்ப்பு அளிக்காமல் தி.மு.க.வே போட்டியிட வேண்டும் என அக்கட்சியினர் எதிர்பார்க்கின்றனர்.

அண்மையில் ஈரோடு வந்து சென்ற முதல்-அமைச்சர் மு.க.ஸ்டாலின், கோவை விமான நிலையத்தில் அளித்த பேட்டியில், ஈரோடு கிழக்கு தொகுதி இடைத்தேர்தலில் கூட்டணி சார்பில் எந்த கட்சி போட்டியிடுவது என்பதை கலந்து பேசி பின்னர் அறிவிக்கப்படும் என்று கூறிச் சென்றார்.

இந்த தொகுதியில் காங்கிரஸ்தான் போட்டியிடும் என்பது உறுதியாகாத நிலையில் ஈரோடு கிழக்கில் தி.மு.க. சார்பில் போட்டியிடுவதற்கான வாய்ப்பை பெறுவதற்காக இப்போதே தி.மு.க.வின் முக்கிய அரசியல் கட்சியினர் மேலிடத்தை அணுகி வருகின்றனர்.

இருப்பினும் ஈரோடு கிழக்கில் காங்கிரஸ் போட்டியிடுவதாக இருந்தால் ஈ.வி.கே.எஸ்.இளங்கோவனின் இளைய மகன் சஞ்சய் சம்பத் போட்டியிடவே அதிக வாய்ப்புள்ளதாக காங்கிரசார் கூறுகின்றனர்.

இதுகுறித்து காங்கிரஸ் வட்டாரங்கள் கூறியதாவது:-கடந்த 2023 இடைத்தேர்தலில் தனது உடல்நிலையை காரணம் காட்டி, தனது இளைய மகன் சஞ்சய் சம்பத்துக்கு போட்டியிட வாய்ப்பளிக்குமாறு ஈ.வி.கே.எஸ் இளங்கோவன், முதல்-அமைச்சர் மு.க.ஸ்டாலினை நேரில் சந்தித்து கேட்டுக் கொண்டார்.

ஸ்டாலினை சந்தித்த பிறகு செய்தியாளர்களிடம் பேசிய இளங்கோவன், எனது இளைய மகன் சஞ்சய் சம்பத்துக்கு சீட்டு கேட்டு தான் முதல்-அமைச்சர் ஸ்டாலினை சந்தித்தேன் என்று கூறிச் சென்றார்.

ஆனால் இளங்கோவன் மீது கொண்ட அன்பினால், இந்த முறை நீங்களே வேட்பாளராக நில்லுங்க! உங்களை ஜெயிக்க வைப்பது எங்கள் கடமை" எனக் கூறி இளங்கோவனை போட்டியிட வைத்தார்.

எதிர்பார்த்தபடியே இளங்கோவன் வெற்றி பெற்றார். எதிர்பாராத வகையில் ஈ.வி.கே.எஸ். இளங்கோவன் காலமானதால் இந்த முறை தந்தை பெரியாரின் குடும்ப வழி தோன்றலான ஈ.வி.கே.எஸ். இளங்கோவனின் இளைய மகன் சஞ்சய் சம்பத்துக்கு சீட்டு கொடுக்க வாய்ப்புள்ளது.

தற்போதைய சூழ்நிலையில் சஞ்சய் சம்பத் மற்றும் அவரது தாயார் வரலட்சுமி இளங்கோவன் உள்ளிட்ட குடும்பத்தினர் இளங்கோவனின் மறைவினால் ஏற்பட்ட துக்கத்தில் இருந்து முழுமையாக இன்னும் மீளவில்லை.

தமிழக அரசியலில் பெரியாரின் வழித் தோன்றலின் அடுத்த வாரிசாக கொள்ளு பேரன் சஞ்சய் சம்பத் உள்ளார். அவருக்கு போட்டியிட வாய்ப்பளிக்க வேண்டும் என இளங்கோவன் குடும்பத்துடன் நெருக்கமாக உள்ள காங்கிரசார், தி.மு.க. தலைமையிடம் கேட்டு வருகின்றனர்.

ஆனால், தி.மு.க.வில் உள்ள 2-ம் கட்ட தலைவர்கள் மற்றும் அமைச்சர்கள் நிலையில் உள்ளவர்கள் காங்கிரசுக்கு 2 முறை வாய்ப்பளிக்கப்பட்டு விட்டதால் இம்முறை இடைத்தேர்தலில் தி.மு.க. வேட்பாளரையே களம் இறக்க வேண்டும் என்று கருதுகிறார்கள். அதற்கு பதிலாக ராஜ்ய சபா தேர்தலில் காங்கிரசுக்கு ஒரு எம்.பி. சீட்டு தருவதாகவும் பேசி வருகிறார்கள்.

ஆனால், தமிழக அரசியலில் ஈ.வி.கே.எஸ் இளங்கோவன் மிகப்பெரிய ஆளுமையாக இருந்தார். இந்த முறை வாய்ப்பளிக்காவிட்டால் அரசியலில் இளங்கோவன் குடும்பத்தின் தொடர்பு துண்டிக்கப்பட்டது போல் ஆகும்.

சஞ்சய் சம்பத்தை தவிர ஈரோடு கிழக்கில் வலுவான காங்கிரஸ் வேட்பாளர் இல்லை என தி.மு.க. தரப்பில் அக்கட்சியின் மேலிடத்தில் கூற வாய்ப்புள்ளது. எனவே சஞ்சய் சம்பத்துக்கு காங்கிரஸ் சார்பில் போட்டிட வாய்ப்பு அளிக்க வேண்டும் என ஈ.வி.கே.எஸ். இளங்கோவனின் ஆதரவு காங்கிரஸார் கூறுகின்றனர்.

ஒருவேளை சஞ்சய் சம்பத்துக்கு வாய்ப்பு மறுக்கப்பட்டால் காங்கிரஸ் சார்பில் போட்டியிட அகில இந்திய காங்கிரஸ் கமிட்டி செயலாளரும், கர்நாடகா மாநில காங்கிரஸ் பொறுப்பாளருமான கோபி, முன்னாள் மாநகர் மாவட்டத் தலைவரும், மாநகராட்சி கவுன்சிலருமான இ.பி.ரவி, முன்னாள் எம்.எல்.ஏ. ஆர்.எம்.பழனிசாமி, மாவட்டத் துணைத் தலைவர் ராஜேஷ் ராஜப்பா, ஈரோடு தெற்கு மாவட்டத் தலைவர் மக்கள் ராஜன் உள்ளிட்டோர் காங்கிரஸ் சார்பில் போட்டியிட திட்டமிட்டு அதற்கான முயற்சிகளில் தீவிரம் காட்டி வருகின்றனர்.

ஈ.வி.கே.எஸ்.இளங்கோவன் குடும்பத்தார் ஈரோடு கிழக்கு தொகுதியில் போட்டியிட விருப்பம் தெரிவிக்காமல் ஒதுங்கிக் கொண்டால் ஈரோடு கிழக்கு தொகுதியில் நாம் (தி.மு.க.) தான் போட்டியிட வேண்டும் என தி.மு.க.வினர் கருதுகின்றனர். அதற்கு தகுந்தபடி ஈரோடு கிழக்கு தொகுதியில் தி.மு.க. சார்பில் போட்டியிட முன்னாள் எம்.எல்.ஏ. வி.சி.சந்திரகுமார், தற்போதைய ஈரோடு தெற்கு மாவட்டத் துணைச் செயலாளர் செந்தில்குமார், மாவட்ட மருத்துவ அணி அமைப்பாளர் டாக்டர் விவேக், மாநகரச் செயலாளர் சுப்பிரமணி, எஸ்.எல்.டி.பி.சச்சிதானந்தம், மாவட்ட இளைஞரணி அமைப்பாளர் திருவாசகம் உள்பட தி.மு.க.வினர் போட்டியிட வாய்ப்பு கேட்டுள்ளனர்.

இத்தொகுதியை பொருத்தவரை முதலியார் சமூக வாக்குகள் அதிகம் உள்ளதால் தி.மு.க. சார்பில் போட்டியிடும் வேட்பாளர்களில் அந்த சமூகத்தை சேர்ந்த வி.சி.சந்திரகுமார், செந்தில்குமார், திருவாசகம், டாக்டர் விவேக் ஆகியோரிடையே பலத்த போட்டி நிலவுகிறது.

தே.மு.தி.க.வில் எம்.எல்.ஏ.வாக இருந்த வி.சி.சந்திரகுமார் அக்கட்சியில் இருந்து விலகி தி.மு.க.வில் இணைந்ததும் 2016ல் போட்டியிட வாய்ப்பு அளிக்கப்பட்டது. அந்த தேர்தலில் அவர் தோல்வி அடைந்தபின் அவருக்கு மறு வாய்ப்பு கிடைக்கவில்லை.

அண்மையில் நடைபெற்ற சந்திரகுமார் மகள் திருமணத்துக்கு முதல்-அமைச்சர் மு.க.ஸ்டாலினும், துணை முதலமைச்சர் உதயநிதி ஸ்டாலினும் வருகை தந்தனர். கட்சித் தலைமையுடன் நெருங்கிய தொடர்பு இருப்பதால் தி.மு.க. போட்டியிடும் பட்சத்தில் தனக்கு சீட்டு கிடைக்கும் என்று நம்புகிறார்.

அதேசமயம் நீண்ட காலமாக கட்சியில் உழைத்து வரும் மாவட்ட துணைச் செயலாளர் செந்தில்குமார் இந்த முறை தனக்கு வாய்ப்பு கிடைக்கும் என்ற நம்பிக்கையில் காத்திருக்கிறார்.

கடந்த 2023-ம் ஆண்டு செந்தில்குமாரின் அண்ணன் இல்லத் திருமண விழாவில் கலந்து கொள்வதற்காக ஈரோடு வருகை தந்த முதல்-அமைச்சர் மு.க.ஸ்டாலினிடம், தேர்தல் நிதியாக ரூ.5 லட்சத்து 55 ஆயிரத்து 555ஐ வழங்கி ஸ்டாலினை ஆச்சரியப்பட வைத்தார்.

அப்போது பேசிய முதலமைச்சர் ஸ்டாலின், செந்தில் குமாருக்கு உரிய நேரத்தில் உரிய பதவி தேடிவரும். அதுவரை காத்திருக்குமாறு கூறிச் சென்றார். எனவே இந்த முறை தி.மு.க. சார்பில் தனக்கு தான் எம்.எல்.ஏ சீட்டு கிடைக்கும் என்று செந்தில்குமார் எதிர்பார்க்கிறார்.

இதேபோல செந்தில்குமாரின் அண்ணன் மகனான மாவட்ட இளைஞரணி அமைப்பாளர் திருவாசகம், துணை முதல்-அமைச்சர் உதயநிதி ஸ்டாலின் உடன் நெருங்கிய தொடர்பில் இருக்கிறார்.

டாக்டர் விவேக், மருத்துவ அணியின் மாவட்ட அமைப்பாளராக கட்சியில் தொடர்ந்து பணியாற்றி வருவதால் தனக்கு தலைமை வாய்ப்பளிக்கும் என எதிர்பார்க்கிறார்.

மொத்தத்தில் ஈரோடு கிழக்கு தொகுதியில் தி.மு.க.-காங்கிரஸ் கூட்டணியில் யாருக்கு சீட்டு கிடைக்கும் என்று எதிர்பார்ப்பில் இரு கட்சியினர் மட்டுமல்ல தொகுதி மக்களும் காத்திருக்கின்றனர்.

சென்னை:

ஈரோடு கிழக்கு சட்டசபை தொகுதி கடந்த தேர்தலில் தி.மு.க. கூட்டணியில் காங்கிரசுக்கு ஒதுக்கப்பட்டது. இந்த தொகுதியில் காங்கிரஸ் சார்பில் ஈ.வி.கே.எஸ்.இளங்கோவன் மகன் திருமகன் ஈ.வே.ரா. போட்டியிட்டு வென்றார்.

ஆனால் அடுத்த 2 ஆண்டுகளில் திடீரென்று அவர் மரணம் அடைந்தார். இதனால் அந்த தொகுதி இடைத்தேர்தலை சந்தித்தது. அப்போது மீண்டும் காங்கிரசுக்கே அந்த தொகுதி ஒதுக்கப்பட்டது. ஈ.வி.கே.எஸ். இளங்கோவன் களம் இறக்கப்பட்டார். கடந்த ஆண்டு மார்ச் மாதம் நடைபெற்ற தேர்தலில் இளங்கோவன் வெற்றி பெற்று எம்.எல்.ஏ. ஆனார்.

மகனை போலவே தந்தை இளங்கோவனும் கடந்த 14-ந்தேதி உடல் நலக்குறைவால் மரணம் அடைந்தார்.

இதனால் அந்த தொகுதி காலியானதாக தேர்தல் ஆணையம் அறிவித்துள்ளது. ஒரு தொகுதி காலியானால் 6 மாதங்களுக்குள் தேர்தல் நடத்தப்பட வேண்டும் என்பது விதி. அதன்படி இந்த தொகுதிக்கான தேர்தல் ஏற்பாடுகளை தேர்தல் ஆணையம் தொடங்கி விட்டது.

வருகிற பிப்ரவரி மாதம் டெல்லி மாநில சட்டசபைக்கு தேர்தல் நடைபெற உள்ளது. அப்போது ஈரோடு கிழக்கு தொகுதி தேர்தலும் நடத்தப்படலாம் என்று கூறப்படுகிறது.

பொதுத் தேர்தல் நடத்தப்பட்டு 5 ஆண்டுகள் முடிவடைவதற்குள் 2-வது முறையாக ஈரோடு கிழக்கு தொகுதி இடைத்தேர்தலை சந்திக்கிறது.

மீண்டும் இந்த தொகுதியை காங்கிரசுக்கு கொடுப்பதை விட தி.மு.க.வே போட்டியிட விரும்புகிறது.

கடந்த தேர்தலில் முதலமைச்சர் மு.க.ஸ்டாலின் வேண்டுகோளின் பேரில் ஈ.வி.கே.எஸ்.இளங்கோவன் போட்டியிட்டார். அப்போது தலைவர் என்ற ரீதியில் தி.மு.க.- காங்கிரஸ் கட்சியினர் தீவிரமாக தேர்தல் பணியாற்றினார்கள்.

ஆனால் இந்த தேர்தலில் போட்டியிட காங்கிரஸ் தரப்பில் பலமான வேட்பாளர்கள் இல்லை. ஈ.வி.கே. எஸ்.இளங்கோவன் குடும்பத்தில் இருந்து அவரது மகன் சஞ்சயை போட்டியிட வைக்க திட்டமிட்டார்கள். ஆனால் அவர் இடைத்தேர்தலில் போட்டியிட விரும்பவில்லை என்று கூறி விட்டார்.

அத்துடன் தனது முடிவையும் முதலமைச்சர் மு.க.ஸ்டாலினை சந்தித்து தெரிவித்து விட்டார்.

இந்த சூழ்நிலையில் காங்கிரசில் இருந்து வேறு நபர்களை தேர்வு செய்வதிலும் பிரச்சனை உள்ளது. இடைத்தேர்தலை சந்திக்க செலவு அதிகமாகும். அதற்கு தகுதியானவர்கள் இல்லை என்று கூறப்படுகிறது. எனவே தி.மு.க.வுக்கு விட்டுக் கொடுத்து விடலாம் என்ற முடிவுக்கு காங்கிரஸ் வந்திருப்பதாக கூறப்படுகிறது.

ஈரோடு கிழக்கு தொகுதியின் நிலவரத்தை தமிழக காங்கிரஸ் கமிட்டி சார்பில் டெல்லி மேலிடத்துக்கும் தெரிவித்து இருப்பதாக கூறப்படுகிறது.

இதையடுத்தே முதலமைச்சர் மு.க.ஸ்டாலின் நேற்றைய தனது சுற்றுப் பயணத்தின் போது ஈரோடு மாவட்ட தி.மு.க. நிர்வாகிகளை சந்தித்து விவாதித்தார்.

பின்னர் நிருபர்களிடம் கூறும்போது, ஈரோடு கிழக்கு தொகுதியில் யார் போட்டியிடுவது என்பது பற்றி முறையாக காங்கிரசாருடன் கலந்து பேசி முடி வெடுத்து அறிவிப்போம் என்றார்.

விட்டுக் கொடுக்கும் மன நிலைக்கு காங்கிரஸ் வந்திருப்பதால் ஈரோடு தொகுதியில் தி.மு.க.வே போட்டியிடும் என்று எதிர்பார்க்கப்படுகிறது.

இந்த தொகுதியில் பலத்தை நிரூபிப்பதன் மூலம் கொங்கு மண்டலத்தில் 2026 தேர்தலுக்கான வலுவான அடித்தளத்தை உருவாக்க முடியும் என்று தி.மு.க. கருதுகிறது.

திருவனந்தபுரம்:

கேரள மாநிலத்தில் கடந்த ஏப்ரல் மாதம் நடந்த மக்களவை தேர்தலில் வயநாடு தொகுதியில் போட்டியிட்டு வெற்றிபெற்ற காங்கிரஸ் கட்சியின் முன்னாள் தலைவரான ராகுல்காந்தி, தனது எம்.பி. பதவியை ராஜினாமா செய்தார்.

இதனால் வயநாடு தொகுதிக்கு கடந்தமாதம் (நவம்பர்) 13-ந்தேதி இடைத்தேர்தல் நடத்தப்பட்டது. இதில் காங்கிரஸ் கட்சி சார்பில் ராகுல் காந்தியின் சகோதரி பிரியங்கா காந்தி போட்டியிட்டார். அவர் 6,22,338 வாக்குகள் பெற்று 4 லட்சத்துக்கு அதிகான வாக்குகள் வித்தியாசத்தில் அபார வெற்றி பெற்றார்.

இந்த தேர்தலில் பிரியங்கா காந்தியை எதிர்த்து போட்டியிட்ட கம்யூனிஸ்டு கூட்டணி 2-வது இடத்தையும், பாரதிய ஜனதா கட்சி 3-வது இடத்தையும் பிடித்தன. இந்திய கம்யூனிஸ்ட் கட்சி வேட்பாளர் சத்யன் மொகேரி 2,11,407 வாக்குகளும், பாஜக வேட்பாளர் நவ்யா ஹரிதாஸ் 1,09,939 வாக்குகளும் பெற்றனர்.

இடைத்தேர்தல் வெற்றியை தொடர்ந்து வயநாடு தொகுதி எம்.பி.யாக பிரியங்கா காந்தி கடந்தமாதம் 28-ந்தேதி பொறுப்பேற்றுக் கொண்டார். இந்தநிலையில் வயநாடு தொகுதியில் பிரியங்கா காந்தி பெற்ற வெற்றியை எதிர்த்து, கேரள ஐகோர்ட்டில் வழக்கு தொடரப்பட்டுள்ளது.

வயநாடு தொகுதி இடைத்தேர்தலில் அவரை எதிர்த்து போட்டியிட்ட பாஜக வேட்பாளர் நவ்யா ஹரிதாஸ் தான் வழக்கு தொடர்ந்திருக்கிறார். அவரது சர்பில் ஹரிகுமார் என்ற வக்கீல் கேரள ஐகோர்ட்டில் மனு தாக்கல் செய்திருக்கிறார். அந்த மனுவில் கூறியிருப்பதாவது:-

வயநாடு தொகுதி இடைத்தேர்தலில் போட்டியிட்ட பிரியங்கா தனது மற்றும் குடும்பத்தினரின் சொத்துக்களை சரியாக வெளியிடவில்லை. அவர் தனது மற்றும் தன்னுடைய குடும்பத்தினருக்கு சொந்தமான பல்வேறு சொத்துக்கள் பற்றிய முக்கிய தகவல்களை மறைத்து தவறான தகவல்களை வழங்கியுள்ளார்.

இது தேர்தல் நடத்தை விதிகளுக்கு எதிரானது மற்றும் ஊழல் நடைமுறைகளுக்கு சமமானது. தவறான தகவல்களை வழங்கியதன் மூலம் வாக்காளர்களை தவறாக வழிநடத்தியிருக்கிறார். ஆகவே பிரியங்காவின் வெற்றியை ரத்து செ்ய்ய வேண்டும்.

இவ்வாறு அதில் கூறப்பட்டுள்ளது.

கிறிஸ்துமஸ் மற்றும் புத்தாண்டை முன்னிட்டு கேரள ஐகோர்ட்டுக்கு வருகிற 23-ந்தேதி முதல் ஜனவரி 5-ந்தேதி வரை விடுமுறை ஆகும். ஆகவே அதன்பிறகு பிரியங்கா காந்தியின் தேர்தல் வெற்றிக்கு எதிரான இந்த மனு விசாரணைக்கு வரும் என்று எதிர்பார்க்கப்படுகிறது.

பகுஜன் சமாஜ் கட்சி இனிவரும் காலங்களில் இடைத்தேர்தல்களில் போட்டியிடாது என அக்கட்சியின் தலைவர் மாயாவதி அறிவித்துள்ளார்.

உத்தரப்பிரதேச இடைத்தேர்தலில் படுதோல்வி அடைந்த நிலையில், பகுஜன் சமாஜ் கட்சி (பிஎஸ்பி) தலைவர் மாயாவதி இன்று தேர்தல் ஆணையம் போலி வாக்குகளை தடுக்க கடுமையான நடவடிக்கைகளை எடுக்கும் வரை நாட்டில் எந்த இடைத்தேர்தலிலும் போட்டியிடாது என்று அறிவித்தார்.

இதுதொடர்பான பத்திரிக்கையாளர் சந்திப்பில், பத்திரிக்கையாளர் சந்திப்பில், இவிஎம் குறித்து கேள்வி எழுப்பிய மாயாவதி, அதன் மூலம் போலி வாக்குப்பதிவு நடைபெறுவதாகவும், பகுஜன் சமாஜ் கட்சியை பலவீனப்படுத்த சதி நடப்பதாகவும் கூறினார்.

இதுகுறித்து மேலும் அவர் கூறுகையில், " உத்தரப்பிரதேசத்தில் சமீபத்தில் நடந்த ஒன்பது சட்டமன்றத் தொகுதிகளுக்கான இடைத்தேர்தலில், வாக்குப்பதிவு செயல்முறை மற்றும் நேற்று அறிவிக்கப்பட்ட முடிவுகள் குறித்து பரவலாக விவாதிக்கப்படுகிறது.

முன்னதாக, முறைகேடு மற்றும் மோசடி மூலம் வாக்குச் சீட்டுகளைப் பயன்படுத்தி போலி வாக்குகள் போடப்பட்டன, இப்போது அதேபோன்ற நடவடிக்கைகள் EVMகளைப் பயன்படுத்தி மேற்கொள்ளப்படுகின்றன. இது ஜனநாயகத்திற்கு கவலையும் வருத்தமும் அளிக்கிறது.

இதுபோன்ற சூழ்நிலையில், தேர்தல் ஆணையம் போலி வாக்குப்பதிவைத் தடுக்க கடுமையான நடவடிக்கைகளை எடுக்கும் வரை, நாங்கள் எந்த இடைத்தேர்தலிலும் போட்டியிட மாட்டோம் என்று எங்கள் கட்சி முடிவு செய்துள்ளது.

இவ்வாறு அவர் கூறியுள்ளார்.

லக்னோ:

உத்தர பிரதேச மாநிலத்தில் உள்ள 9 தொகுதிகளுக்கு இடைத்தேர்தல் நடைபெற்றது. தேர்தலில் பதிவான வாக்குகள் எண்ணப்பட்டன.

இதில் காசியாபாத், கெய்ர், புல்பூர், மஜவான், குண்டர்கி, கதேஹரி, ஆகிய 7 தொகுதிகளில் வெற்றி பெற்றுள்ளது. பா.ஜ.க. கூட்டணியில் உள்ள ஆர்.எல்.டி. கட்சி மீராபூர் தொகுதியில் வெற்றி பெற்றது. சமாஜ்வாடி கட்சி 2 தொகுதிகளைக் கைப்பற்றியது.

இந்நிலையில், உபி இடைத்தேர்தல் வெற்றி குறித்து முதல் மந்திரி யோகி ஆதித்யநாத் கூறியதாவது:

உத்தர பிரதேசத்தில் நடந்த இடைத்தேர்தலில் பிரதமர் நரேந்திர மோடியின் தலைமையால் வெற்றி கிடைத்துள்ளது.

பிரதமர் மோடியின் கொள்கைகள் மீது மக்கள் தங்கள் நம்பிக்கையை வெளிப்படுத்தியுள்ளனர்.

வெற்றி பெற்ற வேட்பாளர்களுக்கு வாழ்த்துகள். நாட்டு மக்கள் பிரதமர் மோடி மீது அசைக்க முடியாத நம்பிக்கை வைத்துள்ளனர் என புகழாரம் சூட்டியுள்ளார்.

ஜார்கண்ட், மகாராஷ்டிரா சட்டமன்றத் தேர்தல் மற்றும் பல்வேறு மாநிலங்களில் நடந்த மக்களவை மற்றும் சட்டமன்ற இடைத்தேர்தல்களில் பதிவான வாக்குகள் எண்ணப்பட்டு வருகின்றன.

அந்த வகையில் பீகாரில் காலியாக இருந்த தராரி,ராம்கர், இமாம்கன்ஜ், பெலாகன்ஜ் ஆகிய 4  சட்டமன்றத் தொகுதிகளுக்கான இடைத்தேர்தல் வாக்குப்பதிவு கடந்த நவம்பர் 13 ஆம் தேதி நடந்தது. இதன் வாக்குகள் இன்று எண்ணப்பட்ட நிலையில் முடிவுகள் வெளியாகி உள்ளன.

பிரபல அரசியல் வியூக வகுப்பாளரான பீகாரை சேர்ந்த பிரசாத் கிஷோர் புதிதாக தொடங்கிய ஜன் சுராஜ் கட்சி முதல்முதல் முறையாக தேர்தல் களம் கண்டது. பீகாரின் 4 தொகுதிகளின் இடைத்தேர்தலில் ஜன் சுராஜ் கட்சி சார்பில் வேட்பாளர்கள் நிறுத்தப்பட்டனர்.

தராரி தொகுதியில் கிரண் சிங், ராம்கரில் சுஷில் குமார் சிங், இமாம்கன்ஜ் தொகுதியில் ஜிதேந்திர பாஸ்வான், பெலாகன்ஜ் தொகுதியில் முகமத் அமாஜத் ஆகியோரை வேட்பாளர்களாகவும் அறிவித்தார்.

கடந்த காந்தி ஜெயந்தி அன்று கட்சி தொடங்கிய பிரசாத் கிசோர் பீகாரில் ஆளும் நிதிஷ் குமாரின் ஐக்கிய ஜனதா தளம், லாலு பிரசாத்தின் ராஷ்டிரிய ஜனதா தளம் ஆகிய கட்சிகள் மீது கடுமையான விமர்சனங்களை முன்வைத்தார்.

பிரதமர் மோடி பீகாரின் வளங்களை குஜராத் பக்கம் திருப்புவதாக விமர்சித்தார். 30 ஆண்டுகால ஆட்சிக்கு முடிவு கட்ட வேண்டிய நேரம் வந்துவிட்டது, உங்களுக்கு நல்லது செய்யவே வந்துள்ளேன் என்று வாக்குறுதி அளித்தார். 4 தொகுதிகளில் மட்டும் 100க்கும் மேற்பட்ட தேர்தல் பிரசார கூட்டங்களை நடத்தினார்.

ஆனாலும் இந்த நான்கு தொகுதிகளிலும் பிரசாத் கிசோர் கட்சி படுதோல்வியை சந்தித்துள்ளது. மற்ற கட்சிகளை விட வாக்கு வித்தியாசத்திலும் பின் தங்கி உள்ளது. 4 தொகுதி இடைத்தேர்தலிலும் பாஜகவின் என்டிஏ கூட்டணி வெற்றி பெற்றுள்ளது.

பிரசாத் கிஷோர் வகுத்துக் கொடுத்த வியூகங்கள் மூலம் இந்தியாவில் பல அரசியல் கட்சிகளின் தேர்தலில் வெற்றிக்கு காரணமானவர். கடந்த 2014 ஆம் ஆண்டில் பாஜக மத்தியில் ஆட்சியை பிடிக்க முக்கிய பங்காற்றினார்.

அதுவரை இருந்த தேர்தல் பிரசார மாடல்களை உடைத்து பப்ளிசிட்டி, கூட்டணி கணக்கு, வாக்கு வங்கி உள்ளிட்டவற்றில் கவனம் செலுத்தினாலே வெற்றி பெறலாம் என்ற டிசைனை அறிமுகப்படுத்தியவரும் இவரே. இந்நிலையில் தற்போது அவரது கட்சி பங்கேற்ற முதல் தேர்தலில் படுதோல்வியை சந்தித்துள்ளது பேசுபொருளாகியுள்ளது. 

மகாராஷ்டிரா, ஜார்க்கண்ட் மாநிலங்களில் சட்டமன்ற தேர்தல் நடைபெற்று வரும் நிலையில் பல்வேறு மாநிலங்களில் இடைத்தேர்தல்கள் நடைபெற்று வருகிறது.

உத்தரபிரதேச மாநிலத்தில் 9 தொகுதிகளுக்கான இடைத்தேர்தல் வாக்குப்பதிவு இன்று காலையில் இருந்து விறுவிறுப்பாக நடைபெற்று வருகிறது.

இந்நிலையில், உத்தரப் பிரதேச இடைத்தேர்தல் வாக்குப் பதிவில், இஸ்லாமிய வாக்காளர்களை போலீசார் வாக்களிக்க விட மறுப்பதாக உத்தரபிரதேச எதிர்க்கட்சி தலைவர் அகிலேஷ் யாதவ் தனது எக்ஸ் பக்கத்தில் வீடியோ வெளியிட்டு புகார் அளித்தார்.

முஸ்லிம் பெண்களிடம் புர்காவை கழற்ற கூறியும் முஸ்லிம் ஆண்களிடம் தேவையின்றி ஆதார் அட்டை மற்றும் வாக்காளர் அடையாள அட்டைகளை போலீசார் கேட்கும் வீடியோ இணையத்தில் வேகமாக பரவி வந்தது.

இதனையடுத்து, முஸ்லிம் மக்களை வாக்களிக்க விடாமல் தடுத்த 7 காவலர்களை சஸ்பெண்ட் செய்ய தேர்தல் ஆணையம் உத்தரவிட்டுள்ளது.