தடையை மீறி போராட்டம் - தி.மு.க., காங். எம்.எல்.ஏ.க்கள் உள்பட 1886 பேர் மீது வழக்கு

கன்னியாகுமரி அருகே உள்ள கோவளத்துக்கும், கீழமணக்குடிக்கும் இடையே சர்வதேச சரக்கு பெட்டக மாற்று முனைய துறைமுகம் அமைக்க மத்திய அரசு நடவடிக்கை மேற்கொண்டுள்ளது.

இதற்கு அந்த பகுதி மீனவர்கள் கடும் எதிர்ப்பு தெரிவித்து போராட்டத்தில் ஈடுபட்டு வருகிறார்கள். அவர்களுக்கு குமரி மாவட்டத்தைச் சேர்ந்த தி.மு.க. மற்றும் காங்கிரஸ் எம்.எல்.ஏ.க்கள் 6 பேரும் ஆதரவு தெரிவித்து உள்ளனர்.

துறைமுகத்துக்கு எதிர்ப்பு தெரிவித்து பொதுமக்களுடன் இணைந்து நேற்று நாகர்கோவில் கலெக்டர் அலுவலகத்தை முற்றுகையிடப்போவதாக எம்.எல்.ஏ.க்கள் அறிவித்து இருந்தனர். ஆனால் முற்றுகை போராட்டத்துக்கு போலீசார் தடை விதித்தனர்.

போலீசாரின் இந்த நடவடிக்கைக்கு கண்டனம் தெரிவித்து மீனவர்கள் ஆங்காங்கே மறியல் போராட்டத்தில் ஈடுபட்டனர். கன்னியாகுமரி, மேலமணக்குடி, கீழ மணக்குடி, சங்குத்துறை கடற்கரை, ஆரோக்கியபுரம், புதுக்கிராமம், குளச்சல் சைமன்காலனி, குறும்பனை, ராஜாக்கமங்கலம் துறை, நாகர்கோவில் எஸ்.எல்.பி. பள்ளி என 10 இடங்களில் மறியல் போராட்டம் நடந்தது.

மேலும் போலீசாரின் தடையை மீறி தி.மு.க. எம்.எல்.ஏ.க்கள் சுரேஷ்ராஜன், ஆஸ்டின், மனோதங்கராஜ், காங்கிரஸ் எம்.எல்.ஏ.க்கள் பிரின்ஸ், ராஜேஷ்குமார் ஆகியோர் தொண்டர்களுடன் வந்து நாகர்கோவில் கலெக்டர் அலுவலகம் முன்பு முற்றுகை போராட்டத்தில் ஈடுபட்டனர். போலீசார் அவர்களை தடுத்தபோது தள்ளுமுள்ளு ஏற்பட்டது. போலீசார் லேசான தடியடி நடத்தி அவர்களை கலைந்து போகச் செய்தனர். பின்னர் போராட்டத்தில் ஈடுபட்ட எம்.எல்.ஏ.க்கள் உள்ளிட்டோரை போலீசார் கைது செய்தனர். மாலையில் அவர்கள் அனைவரும் விடுவிக்கப்பட்டனர்.

மீனவர்களின் மறியல் போராட்டம் மற்றும் கலெக்டர் அலுவலகம் முற்றுகை தொடர்பாக எம்.எல்.ஏ.க்கள் சுரேஷ்ராஜன், ஆஸ்டின், மனோதங்கராஜ், பிரின்ஸ், ராஜேஷ்குமார் உள்ளிட்ட 1886 பேர் மீது போலீசார் வழக்குப்பதிவு செய்தனர். இவர்களில் 887 பேர் பெண்கள்.

இவர்கள் மீது இந்திய தண்டனை சட்டம் 341 (சட்டத்திற்கு கட்டுப்படாமல் இருத்தல்), 143 (சட்ட விரோதமாக கூடுதல்), 188 (பொதுப்பணியில் உள்ள அதிகாரியின் உத்தரவுக்கு கீழ்படியாமை) ஆகிய 3 பிரிவுகளில் வழக்குப்பதிவு செய்யப்பட்டு உள்ளது.