புதுக்கோட்டை அருகே ஆடுகளை திருடி தலைகளை துண்டாக்கி கொன்ற கும்பல்

கந்தர்வக்கோட்டை:

புதுக்கோட்டை மாவட்டம் கந்தர்வக்கோட்டை வேம்பன்பட்டியை சேர்ந்தவர் இளங்கோ , விவசாயி. இவர் 15 ஆடுகளை வளர்த்து வருகிறார். நேற்றிரவு அவர் வீட்டின் அருகே உள்ள கொட்டகையில் ஆடுகளை அடைத்து வைத்திருந்தார்.

இந்தநிலையில் இன்று காலை பார்த்த போது ஆடுகளை காணவில்லை. இதையடுத்து இளங்கோ தேடி சென்ற போது, அப்பகுதியில் உள்ள ஒரு இடத்தில் ஆடுகள் மேய்ந்து கொண்டிருந்தன. மேலும்2 ஆடுகள் தலைகள் துண்டிக்கப்பட்ட நிலையில் இறந்து கிடந்தன. இது குறித்து இளங்கோ, கந்தர்வக்கோட்டை போலீசில் புகார் செய்தார். அதன்பேரில் போலீசார் விசாரணை நடத்தி வருகின்றனர். 

நேற்றிரவு இளங்கோ வீட்டிற்கு வந்த மர்மநபர்கள், ஆடுகளை திருடி , மறைவான பகுதிக்கு சென்றதும் ஆடுகளை வெட்டிக்கொன்று  கறிகளை எடுத்து செல்ல திட்டமிட்டிருக்கலாம். பொதுமக்கள் நடமாடுவதை அறிந்து அதனை கைவிட்டு விட்டு சென்றிருக்கலாம் என போலீசார் கருதுகின்றனர். அல்லது ஏதாவது பிரச்சினை காரணமாக இளங்கோவின் எதிராளிகள் இந்த செயலில்  ஈடுபட்டனரா? என்று பல்வேறு கோணங்களில் போலீசார் விசாரணை நடத்தி வருகின்றனர்.