தருமபுரி அருகே குரங்குகள் அட்டகாசத்தால் பொதுமக்கள் அவதி

தருமபுரி:

தருமபுரி மாவட்டம் ஒட்டப்பட்டி அடுத்துள்ள வள்ளுவர் நகரில் 300-க்கும் மேற்பட்ட குடும்பத்தினர் வசித்து வருகின்றனர். தற்போது இங்கு குரங்குகளின் அட்டகாசம் தாங்க முடியாத அளவு உள்ளது. இது குறித்து பொதுமக்கள் கூறியதாவது:-

பொதுமக்கள் வெளியே எந்த பொருளையும் எடுத்து செல்ல முடியாத அளவு குரங்குகள் அட்டகாசம் செய்து வருகிறது. பெரியவர்கள் முதல் சிறியவர்கள் வரை பயந்த நிலையிலேயே வெளியே வந்து செல்கின்றனர். பொதுமக்கள் வெளியிலேயே பொருட்களை கொண்டு செல்லும் பொழுது குரங்குகள் கையிலிருந்து பொருட்களை பறித்துச் செல்கின்றன. அப்படி தர மறுத்தால் குரங்குகள் மனிதர்கள் மீது ஏறி விழுந்து காயப்படுத்துகின்றன. இதனால் பொதுமக்கள் வெளியில் செல்ல அச்சப்பட்டு கொண்டு வீட்டின் உள்ளேயே முடங்கி கிடக்கின்ற நிலை நிலவுகிறது.

மேலும் இங்கு உள்ள சாலைகள் மிகவும் மோசமான நிலையில் உள்ளது. இந்த சாலை தார் சாலையாக இல்லாமல் ஜல்லிகள் கொட்டிக்கிடக்கும் சாலையாக உள்ளது. மேலும் இவற்றால் வாகனங்கள் பழுது ஆவதுடன் சிறுசிறு விபத்துகள் ஏற்படுகின்றன.

இதன் தொடர்ச்சியாக பெரிய விபத்துக்கள் ஏற்படுவதற்குள் நகராட்சி நிர்வாகம் இவற்றை தடுத்து நிறுத்த வேண்டும். மழை நேரங்களில் இந்த சாலை நீர்த்தேக்கத் தொட்டியாகவும் செயல்படுகின்ற அவலநிலை உள்ளது.

எனவே இத்தகைய சூழ்நிலையில் இருந்து வள்ளுவர் நகர் பொதுமக்களை காப்பாற்ற நகராட்சி நிர்வாகமும் வனத்துறையும் போர்க்கால அடிப்படையில் செயல்பட வேண்டும்.

இவ்வாறு அவர்கள் கூறினர்.