நெருங்கி வரும் கார்த்திகை தீப திருவிழா: தருமபுரி, கிருஷ்ணகிரியில் அகல் விளக்குகள் தயாரிப்பு பணிகள் தீவிரம்

தருமபுரி,

இந்துக்களின் முக்கிய பண்டிகைகளில் ஒன்றான திருக்கார்த்திகை தீபவிழா அடுத்த மாதம் 6-ந் தேதி கொண்டாடப்படுகிறது. அன்றைய தினம் வீடுகளில் வரிசையாக தீபங்கள் ஏற்றி அழகுபடுத்துவது வழக்கம்.

இதுபோல் கோவில்களி லும், பக்தர்கள் புதிய விளக்குகளில் தீபங்கள் ஏற்றுவர். அகல் விளக்கு என்பது எண்ணெய் விளக்கின் ஒரு வகையாகும். இது பொதுவாக களி மண்ணால் செய்யப்பட்டு, பருத்தி திரியால், நெய் அல்லது நல்லெண்ணை கொண்டு எரியூட்டப்படும். விளக்கேற்றுவதால் துன்ப இருள் அகற்றப்பட்டு மகா லட்சுமி வாசம் செய்வாள் என்று நம்பப்படுகிறது.

அகல்விளக்கு தீபம் ஏற்றுவது குறித்து கோவில் குருக்கள் தெரிவிக்கையில், அகல், எண்ணெய், திரி, சுடர் இவையெல்லாம் சேர்ந்ததே விளக்கு ஆகும். விளக்கு ஏற்றும் இடத்தில் மகாலட்சுமி குடியிருப்பாள் என்பது ஐதீகம். எந்த கடவுளுக்கு தீபம் ஏற்றினாலும் அகல் விளக்கில் தீபம் ஏற்றுவது உகந்தது. அதற்கு காரணமும் உண்டு. அகல் விளக்கு என்பது ஐம்பூதங்களான அதாவது நீர், நிலம், நெருப்பு, காற்று, ஆகாயம் ஆகியவற்றை கொண்டு செய்யப்படுகிறது.

களிமண்ணில் நீரை ஊற்றி, ஒளியில் காயவைத்து, காற்றின் உதவிக்கொண்டு, நெருப்பில் இட்டு ஒரு அழகான அகல் விளக்கை ஏழை தொழிலாளி உற்பத்தி செய்கிறார். இன்னுமொரு காரணம், அகல் விளக்கை வாங்குவதால் அந்த ஏழைக் குடும்பம் பிழைக்கிறது. நம்மை அறியாமல் ஒரு நல்ல செயலை செய்கிறோம். அகல் விளக்கை ஏற்றுவதையே அம்பாள் விரும்புகிறாள் என்றார்.

இப்படி சிறப்பு வாய்ந்த தீபத்திருவிழாவையொட்டி, தமிழகத்தில் பல்வேறு இடங்களில் அகல்விளக்கு கள் தயாரிக்கும் பணி தீவிரமடைந்து வருகிறது. தருமபுரியை அடுத்த அதியமான்கோட்டை, கிருஷ்ணாபுரம் உள்ளிட்ட பல்வேறு இடங்களிலும். கிருஷ்ணகிரி மாவட்டத்திலும் தயாரிக்கும் பணி தீவிரமாக நடைபெற்று வருகிறது. இதில் 100-க்கும் மேற்பட்ட தொழிலாளர்கள் ஈடுபட்டுள்ளனர்.

இந்த பகுதிகளில் உற்பத்தி செய்யப்படும் அகல் விளக்குகளை சென்னை, சேலம், கோவை, ஈரோடு, திருச்சி, நாமக்கல் உள்ளிட்ட பல்வேறு மாவட்டங்களை சேர்ந்த வியாபாரிகள் மொத்தமாக ஆர்டர் கொடுத்துள்ளனர் என்று கூறும் விளக்கு உற்பத்தியாளர்கள் மேலும் கூறுகையில் தருமபுரி மாவட்டத்தை சேர்ந்த பல்வேறு சிறு வியாபாரிகளும் அகல் விளக்குகள் கேட்டு முன்பதிவு செய்துள்ளனர்.

50 முதல் 250 மில்லி எண்ணெய் கொள்ளளவு கொண்ட அகல் விளக்குகள் உற்பத்தி செய்யப்பட்டு வருகிறது. மேலும் ஒரு முகம், பஞ்சமுகம், பாவை விளக்கு என பல்வேறு வகையான அகல் விளக்குகள் உற்பத்தி செய்யப்படுகிறது. ஒரு விளக்கு அளவுக்கு ஏற்றார் போல் ரூ.3 முதல் ரூ.50 வரை விற்பனை செய்யப்படுகிறது. இதனை வியாபாரிகள் வாங்கி சென்று லாபம் மற்றும் போக்குவரத்து செலவு சேர்த்து விற்பனை செய்கிறார்கள்.

சமீபத்தில் பெய்த மழையால் விளக்குகள் உற்பத்தி சற்று பாதித்தது. ஆனாலும் அவ்வப்போது அடித்த வெயிலை பயன்படுத்தி அகல்விளக்கு பணியை துரிதப்படுத்தி வருகிறோம். இன்று பிளாஸ்டிக், பீங்கான், மெழுகால் ஆன விளக்குகளை சிலர் பயன் படுத்தினாலும், பாரம்பரியமான அகல் விளக்குகளுக்கு என்றும் மவுசு குறையாது.

இவ்வாறு அகல் விளக்கு உற்பத்தியாளர்கள் தெரிவிக்கின்றனர்.