குழித்துறை அருகே நர்சு வீடு புகுந்து 6 பவுன் நகை கொள்ளை

கன்னியாகுமரி:

குழித்துறையை அடுத்த கொடுங்குளம் பகுதியை சேர்ந்தவர் ஜெனட் பாய் (வயது 60). ஓய்வு பெற்ற நர்சு.

இவர் சம்பவத்தன்று வீட்டில் தூங்கிக் கொண்டிருந்தார். மறுநாள் காலையில் எழுந்து பார்த்த போது வீட்டின் பீரோ திறந்து கிடந்தது.

அதில் இருந்த தலா ஒரு பவுன் எடை கொண்ட 6 தங்க வளையல்கள் மாயமாகி இருந்தது. யாரோ மர்ம நபர் வீடு புகுந்து நகைகளை கொள்ளை அடித்து சென்றிருப்பது தெரியவந்தது.

இது பற்றி ஜெனட் பாய் மார்த்தாண்டம் போலீசில் புகார் செய்தார். போலீசார் வழக்கு பதிவு செய்து நகை களை கொள்ளை அடித்து சென்ற மர்ம நபர்களை தேடி வருகிறார்கள்.

மேலும் ஜெனட் பாய் அந்த பகுதியில் உள்ள சிலர் மீது சந்தேகம் இருப்பதாக கூறியுள்ளார். அவர்கள் குறித்தும் போலீசார் விசாரணை நடத்தி வருகிறார்கள்.