139-வது பிறந்த நாளையொட்டி தியாகி சுப்பிரமணிய சிவா மணிமண்டபத்தில் மாலை அணிவித்து கலெக்டர் சாந்தி மரியாதை

தருமபுரி,

தருமபுரி மாவட்டம், பென்னாகரம் வட்டம், பாப்பாரப்பட்டி, ஒண்ணப்பகவுண்டன அள்ளி ஊராட்சியில் செய்தி மக்கள் தொடர்புத்துறையின் கட்டுப்பாட்டில் உள்ள தியாகி சுப்பிரமணிய சிவா மணிமண்டபத்தில் விடுதலை போராட்ட வீரர் தியாகி சுப்பிரமணிய சிவாவின் 139-வது பிறந்த நாள் விழா நேற்று தருமபுரி செய்தி மக்கள் தொடர்புத்துறையின் சார்பில் ஏற்பாடு செய்து அரசின் சார்பில் சிறப்பாக கொண்டாடப்பட்டது.

இவ்விழாவிற்கு மாவட்ட கலெக்டர் கி.சாந்தி, தலைமையேற்று, தியாகி சுப்பிரமணிய சிவா மணிமண்டபத்தில் வண்ண மலர்களால் அலங்கரிக்கப்பட்டு வைக்கப்பட்டிருந்த விடுதலை போராட்ட வீரர் தியாகி சுப்பிரமணிய சிவாவின் உருவ படத்திற்கு மலர் தூவி மரியாதை செலுத்தினார்.

இதில் சட்டமன்ற உறுப்பினர்கள் ஜி.கே.மணி, கே.பி.அன்பழகன், ஆ.கோவிந்தசாமி, தருமபுரி சட்டமன்ற உறுப்பினர் எஸ்.பி.வெங்கடேஸ்வரன், முன்னாள் சட்டமன்ற உறுப்பினர் தடங்கம். பெ.சுப்பரமணி, தருமபுரி மாவட்ட பால் உற்பத்தியாளர்கள் கூட்டுறவு ஒன்றியத்தலைவர் டி.ஆர்.அன்பழகன் மற்றும் உள்ளாட்சி அமைப்புகளின் பிரதிநிதிகள், கூட்டுறவாளர்கள், அரசு அலுவலர்கள் கலந்துகொண்டு விடுதலை போராட்ட வீரர் தியாகி சுப்பிரமணிய சிவா உருவ படத்திற்கு மலர் தூவி மரியாதை செலுத்தினார்கள்.

பின்னர் அருகில் இருந்த விடுதலை போராட்ட வீரர் தியாகி சுப்பிரமணிய சிவா நினைவிடத்தில் மாவட்ட கலெக்டர் சாந்தி, மலர்மாலை வைத்து மரியாதை செலுத்தினார்.

அதனை தொடர்ந்து தருமபுரி, பாலக்கோடு, பென்னாகரம், தருமபுரி சட்டமன்ற உறுப்பினர்கள் மற்றும் உள்ளாட்சி அமைப்புகளின் பிரதிநிதிகள், கூட்டுறவாளர்கள் மலர்மாலை வைத்து மரியாதை செலுத்தினார்கள்.

விடுதலை போராட்ட வீரர் தியாகி சுப்பிரமணிய சிவா மணிமண்டபத்தில் தியாகி சுப்பிரமணிய சிவா 139-வது பிறந்த நாளையொட்டி செய்தி மக்கள் தொடர்புத்துறையின் கட்டுப்பாட்டில் உள்ள விடுதலை போராட்ட வீரர் தியாகி சுப்பிரமணிய சிவா மணிமண்டபம், தியாகி சுப்பிரமணிய சிவா மணிமண்டப வளாகத்தில் உள்ள பாரதமாதா நினைவாலயம், நூலக கட்டடம், தருமபுரி மாவட்டத்தை சேர்ந்த சுதந்திர போராட்ட தியாகிகள் மற்றும் தமிழறிஞர்ளின் புகைப்படக்கண்காட்சி அரங்க கட்டடம் உள்ளிட்டவை முழுவதும் வண்ண மின் விளக்குகளால் அலங்கரிக்கப்பட்டது.

மேலும், மணிமண்டபத்திலுள்ள தியாகி சுப்பிரமணிய சிவா நினைவிடம், நினைவுத்தூண் உள்ளிட்ட அனைத்து பகுதிகளிலும் வண்ண மலர்கள் கொண்டு அலங்கரிக்கப்பட்டது. தியாகி சுப்பிரமணிய சிவா அவர்களின் பிறந்த நாள் விழாவினை முன்னிட்டு பொதுமக்களுக்கு இனிப்புகள் வழங்கப்பட்டது.

இந்நிகழ்ச்சியில், பென்னாகரம் ஊராட்சி ஒன்றியக்குழு தலைவர் கவிதா உள்பட பலர் கலந்து கொண்டனர்.