கற்பழிக்க முயன்ற பேராசிரியரை, போலீசில் சிக்க வைத்த இளம்பெண்

கோவை:

கோவை வடவள்ளி அருகே உள்ள கல்வீரம்பாளையம் முருகன் நகர் நேரு வீதியைச் சேர்ந்தவர் சிவப்பிரகாசம் (வயது 45). கோவையில் உள்ள சில கல்லூரிகளில் கவுரவ பேராசிரியராக பணியாற்றி வருகிறார்.

ஆராய்ச்சி பட்டம் பெறும் மாணவ-மாணவிகள் மற்றும் வேலைவாய்ப்பை எதிர்நோக்கி இருக்கும் மாணவர்கள் இவரிடம் ஆலோசனை பெறுவது வழக்கம். அதேபோல் திருப்பூர் மாவட்டம் கணியம்பூண்டி வச்சிப்பாளையத்தைச் சேர்ந்த 25 வயது பெண், பேராசிரியர் சிவப்பிரகாசத்தை தொடர்பு கொண்டார்.

அந்த பெண் எம்.எஸ்.சி. பட்டதாரி ஆவார். கோவையில் உள்ள தனியார் நிறுவனத்தில் பணியாற்றி வந்தார். அவருக்கு வெளிநாட்டில் போய் வேலை பார்க்க வேண்டும் என்ற ஆசை இருந்தது. இதற்காக அவர் சிவப்பிரகாசத்திடம் ஆலோசனை கேட்டுள்ளார். அதற்கு தனது வீட்டுக்கு வந்து தன்னை சந்திக்குமாறு கூறி இருக்கிறார். இளம்பெண்ணிடம் சிவப்பிரகாசம் சில சான்றிதழ்களை வாங்கி வைத்து இருக்கிறார். வீட்டுக்கு வரும்போது அந்த சான்றிதழ்களை தருவதாகவும் சொல்லி உள்ளார்.

சிவப்பிரகாசம் கூறியதை நம்பி கல்வீரம்பாளையத்தில் உள்ள அவரது வீட்டுக்கு அந்த பெண் மதிய நேரம் சென்றார். அங்கு வீட்டில் சிவப்பிரகாசம் மட்டும் இருந்தார். பெண்ணை ஹாலில் அமர வைத்து பேசிக் கொண்டு இருந்தார். திடீரென பெண்ணின் தோளில் சிவப்பிரகாசம் கையை போட்டார். இதனால் இளம்பெண் அதிர்ச்சி அடைந்தார்.

அந்த பெண் சுதாரிப்பதற்குள் சிவப்பிரகாசம் அவருக்கு பாலியல் தொல்லை கொடுத்துள்ளார். மேலும் இளம்பெண்ணை அவர் கற்பழிக்கவும் முயன்று இருக்கிறார். சிவப்பிரகாசத்திடம் இருந்து தப்பிக்க வழிதேடிய பெண், சமயோகிதமாக திட்டமிட்டார். தான் அவசரமாக கழிவறைக்கு செல்ல வேண்டும் என சிவப்பிரகாசத்திடம் இளம்பெண் கூறி உள்ளார்.

வீட்டுக்குள் இருந்த கழிவறைக்கு சென்று உள்பக்கமாக இளம்பெண் பூட்டிக் கொண்டார். பின்னர் அங்கிருந்தே தனது தோழியை செல்போனில் அழைத்து விவரத்தை கூறி இருக்கிறார். போலீசுக்கு தகவல் தெரிவித்து தன்னை காப்பாற்றுமாறு சொல்லி கெஞ்சி உள்ளார்.

அடுத்த கணமே பெண்ணின் தோழி போலீசுக்கு தகவல் கொடுக்க, போலீசார் பேராசிரியரின் வீட்டுக்கு விரைந்து சென்று கதவை தட்டினர். கதவை திறந்து பார்த்த பேராசிரியர் அதிர்ச்சி அடைந்தார். போலீசை பார்த்ததும் அவருக்கு வியர்த்து கொட்டியது.

போலீசார் அதிரடியாக வீட்டுக்குள் சென்று கழிவறையில் பதுங்கி இருந்த இளம்பெண்ணை மீட்டனர். போலீசாரை கண்டதும் இளம்பெண் கண்ணீர் விட்டு கதறி அழுது நடந்த விவரங்களை கூறினார்.

இதுதொடர்பாக எழுத்துப்பூர்வமாக கோவை அனைத்து மகளிர் போலீஸ்நிலையத்தில் இளம்பெண் புகார் செய்தார். அதன்பேரில் இன்ஸ்பெக்டர் பழனியம்மாள், விசாரணை நடத்தி பெண்ணை கற்பழிக்க முயன்றதாக வழக்குப்பதிவு செய்து பேராசிரியர் சிவப்பிரகாசத்தை கைது செய்தனர்.

ஆலோசனை வழங்குகிறேன் என்ற பெயரில் பெண்ணை தனியாக அழைத்து பேராசிரியர் கற்பழிக்க முயன்ற சம்பவம் கோவையில் பரபரப்பை ஏற்படுத்தி உள்ளது.