திருமணமான 7 நாளில் புதுமாப்பிள்ளை தற்கொலை

திருச்சி:

திருச்சி உறையூர் சிவந்தி பிள்ளையார் கோவில் தெருவைச் சேர்ந்தவர் சிவக்குமார் மகன் கார்த்திக் (வயது 27). இவர் அந்த பகுதியில் பால் வியாபாரம் செய்து வந்தார்.

இவருக்கும், இவரது உறவுக்கார பெண் ஒருவருக்கும் பெரியோர்களால் நிச்சயம் செய்யப்பட்டு கடந்த ஏழு நாட்களுக்கு முன்பாக திருமணம் நடைபெற்றது.

இந்த நிலையில் கடந்த இரண்டு தினங்களுக்கு முன்பாக கார்த்திக்கின் மனைவிக்கு உடல் நலம் சரியில்லாமல் இருந்துள்ளது.

இதனால் கார்த்திக் தன் மனைவியை மருத்துவமனைக்கு சிகிச்சைக்காக அழைத்து சென்றுள்ளார்.

அதன் பின்னர் கார்த்திக் மனைவி அவரது தாய் வீட்டிற்கு சென்றதாக கூறப்படுகிறது. இதனால் மனமுடைந்த கார்த்திக் தனிமையில் யாருடனும் பேசாமல் விரக்தியாக இருந்துள்ளார்.

இதையடுத்து சம்பவத்தன்று வீட்டில் ஆள் இல்லாத சமயம் பார்த்து மின்விசிறியில் தூக்குப்போட்டு தற்கொலை செய்து கொண்டார்.

இது குறித்து உறையூர் காவல் நிலைய போலீசார் வழக்கு பதிவு செய்து விசாரணை நடத்தி வருகின்றனர்.