விவசாயி அடித்து கொலை

குடியாத்தம்:

குடியாத்தம் அடுத்த உப்பிரபல்லி கொல்லிமேடு பகுதியை சேர்ந்தவர் சண்முகம். இவருக்கு கோவிந்தசாமி, ரவி (வயது 60), பாபு என்ற 3 மகன்கள் உள்ளனர்.

இதில் கோவிந்தசாமியும், பாபுவும் சில ஆண்டுகளுக்கு முன்பு இறந்து விட்டனர். இவர்களுக்கு சொந்தமாக நிலம் உள்ளது. நிலம் சம்பந்தமாக கோவிந்தசாமி குடும்பத்தினருக்கும், பாபு குடும்பத்தினருக்கும் அடிக்கடி தகராறு ஏற்பட்டு வந்ததாக கூறப்படுகிறது.

இந்த நிலையில் ரவி கடந்த 14-ந் தேதி தனது அக்கா லைலா வீட்டுக்கு சென்றுள்ளார். அப்போது அங்கு வந்த கோவிந்த சாமியின் மகன் ராஜேந்திரன் ( 28) என்பவர் தனது சித்தப்பா ரவியை அழைத்து நிலம் சம்பந்தமாக பேசிக் கொண்டிருந்ததாக கூறப்படுகிறது.

இதில் இருவருக்கும் இடையே வாக்குவாதம் ஏற்பட்டு கைகலப்பாக மாறி ஒருவரை ஒருவர் தாக்கிக் கொண்டதாக தெரிகிறது.

இதில் ஆத்திரமடைந்த ராஜேந்திரன் ரவியை சரமாரியாக தாக்கியுள்ளார். சத்தம் கேட்டு ஓடி வந்த அக்கம் பக்கத்தினர் படுகாயம் அடைந்த ரவியை மீட்டு குடியாத்தம் அரசு மருத்துவமனைக்கு சிகிச்சைக்காக அனுப்பி வைத்தனர். பின்னர் மேல் சிகிச்சைக்காக வேலூர் அடுக்கம்பாறை அரசு மருத்துவமனையில் சேர்த்தனர். இதுகுறித்து தகவல் அறிந்ததும் குடியாத்தம் போலீசார் ராஜேந்திரன் மீது வழக்கு பதிவு செய்து கைது கைது செய்து சிறையில் அடைத்தனர்.

இந்த நிலையில் மருத்துவமனையில் சிகிச்சை பெற்று வந்த ரவி இன்று காலை பரிதாபமாக இறந்தார். இதனைத் தொடர்ந்து குடியாத்தம் போலீசார் ராஜேந்திரன் மீது கொலை வழக்காக பதிவு செய்து விசாரணை நடத்தி வருகின்றனர்.