ஆக்கிரமிப்பின் போது சீனாவுடன் டிஸ்கோ ஆடிக் கொண்டிருந்தீர்களா?: பிரதமருக்கு ஒவைசி கேள்வி

பாட்னா:

தெலுங்கானா மாநிலத்தைச் சேர்ந்த ஏ.ஐ.எம்.ஐ.எம். கட்சி உத்தர பிரதேசம், பீகார் உள்பட சில வட மாநிலங்களில் தங்கள் கட்சி சார்பில் வேட்பாளர்களை நிறுத்தியுள்ளது.

இந்நிலையில், பீகார் மாநிலம் பாடலிபுத்ரா பாராளுமன்ற தொகுதியில் ஏ.ஐ.எம்.ஐ.எம். கட்சி வேட்பாளரை ஆதரித்து அதன் தலைவரும், ஐதராபாத் எம்.பி.யுமான அசாதுதீன் ஒவைசி பிரசாரம் செய்தார்.

அப்போது அசாதுதீன் ஒவைசி பேசுகையில், இதெல்லாம் ஒரு பிரதமர் பேசும் பேச்சுக்களா? எங்களுக்கு அதுபோல் பேசத் தெரியாதா? 2,000 சதுர கிலோ மீட்டர் பரப்பளவு கொண்ட நமது நிலத்தை ஆக்கிரமித்தபோது மோடி அவர்களே சீனாவுடன் டிஸ்கோ டான்ஸ் ஆடிக் கொண்டிருந்தீர்களா? என்று கேட்க விரும்புகிறேன் என தெரிவித்தார்.

முன்னதாக பாடலிபுத்ராவில் பிரதமர் நரேந்திர மோடி பிரசாரம் செய்தபோது, ஓட்டு ஜிகாத்துக்காக, முஸ்லிம்களை குளிர்விக்க, எதிர்க்கட்சிகள் 'முஜ்ரா' எனப்படும் பெண்களை ஆடவிட்டு மகிழ்வித்து வருகின்றன என குற்றம்சாட்டினார்.