உச்சநீதிமன்றத்தின் 49-வது தலைமை நீதிபதியாக யு.யு.லலித் பதவியேற்பு- ஜனாதிபதி பதவி பிரமாணம் செய்து வைத்தார்

சுப்ரீம் கோர்ட்டின் தலைமை நீதிபதியாக ஆந்திர மாநிலம் கிருஷ்ணா மாவட்டம் பொன்னாவரம் கிராமத்தை சேர்ந்த என்.வி. ரமணா கடந்த ஆண்டு ஏப்ரல் 24-ந்தேதி பொறுப்பேற்றார். நேற்றுடன் அவர் ஓய்வு பெற்றார். இதையொட்டி சுப்ரீம் கோர்ட்டு வளாகத்தில் அவருக்கு பிரிவுபசார விழா நடந்தது.

என்.வி.ரமணா ஓய்வையொட்டி சுப்ரீம் கோர்ட்டின் புதிய தலைமை நீதிபதியாக உதய் உமேஷ் லலித்தை நியமித்து ஏற்கனவே உத்தரவிடப்பட்டு இருந்தது.

இந்தநிலையில் சுப்ரீம் கோர்ட்டின் புதிய தலைமை நீதிபதியாக யு.யு. லலித் இன்று காலை பதவியேற்றார். அவருக்கு ஜனாதிபதி திரவுபதி முர்மு பதவி பிரமாணம் செய்து வைத்தார். சுப்ரீம் கோர்ட்டின் 49-வது தலைமை நீதிபதியாக லலித் பொறுப்பேற்றார். அவர் சுப்ரீம் கோர்ட்டு தலைமை நீதிபதி பதவியில் 74 நாட்கள் மட்டுமே இருப்பார்.

சுப்ரீம் கோர்ட்டின் புதிய தலைமை நீதிபதியான யு.யு.லலித் 1957-ம் ஆண்டு நவம்பர் 9-ந்தேதி மராட்டிய மாநிலம் சோலாபூரில் பிறந்தார். இவரது தந்தை யு.ஆர். லலித் மும்பை ஐகோர்ட்டின் நாக்பூர் கிளை நீதிமன்றத்தில் கூடுதல் நீதிபதியாகவும், சுப்ரீம் கோர்ட்டின் மூத்த வக்கீலாகவும் இருந்தார்.

யு.யு.லலித் மும்பை அரசு சட்டக்கல்லூரியில் சட்டம் படித்து 1983-ம் ஆண்டு ஜூன் மாதம் வக்கீலாக பதிவு செய்தார். குற்றவியல் சட்டத்தில் நிபுணத்துவம் பெற்ற அவர் 1983 முதல் 1985 வரை மும்பை ஐகோர்ட்டில் வக்கீலாக பணியாற்றினார்.

அதை தொடர்ந்து 1986 முதல் 1992 வரை அப்போதைய அட்டர்னி ஜெனரல் சோலி சொரப்ஜியன் வக்கீல்கள் குழுவில் பணியாற்றினார். பல முக்கியமான வழக்குகளில் ஆஜராகி இருக்கிறார். அவர் 2 முறை சுப்ரீம் கோர்ட்டின் சட்ட சேவைகள் குழுவின் உறுப்பினராகவும் பணியாற்றினார்.

2014-ம் ஆண்டு ஆகஸ்டு 13-ந்தேதி சட்ட புலமை காரணமாக அவர் நேரடியாக சுப்ரீம் கோர்ட்டு நீதிபதியாக நியமிக்கப்பட் டார். இதன் மூலம் கீழ் கோர்ட்டு, ஐகோர்ட்டுகளில் நீதிபதியாக பணியாற்றாமல் சுப்ரீம் கோர்ட்டின் நேரடியாக நீதிபதியாக நியமிக்கப்பட்ட 6-வது நீதிபதி என்ற பெருமையை யு.யு.லலித் பெற்றார். இன்று அவர் சுப்ரீம் கோர்ட்டின் புதிய தலைமை நீதிபதியாக பதவி ஏற்றுள்ளார்.