திடீரென வந்த சரக்கு ரெயில்... தண்டவாளத்தில் படுத்து உயிர் தப்பிய பெண்: வைரலாகும் வீடியோ

தெலுங்கானா மாநிலத்தில் தண்டவாளத்தை கடக்க முயன்றபோது ரெயில் வருவதை கண்ட பெண் துரிதமாக செயல்பட்டு தண்டவாளத்தில் படுத்து உயிர் பிழைத்த வீடியோ சமூக வலைதளத்தில் வைரலாகி உள்ளது.

தெலுங்கானா மாநிலம் விகர்பாத்தின் நவாந்த்கியில் ஒரு பெண் தண்டவாளத்தை கடக்க முயன்றபோது திடீரென ரெயில் ஒன்று வருவதை கவனித்தார். உடனே அந்த பெண் தண்டவாளத்தில் படுத்துக்கொண்டார்.

ரெயில் தனக்கு மேலே சென்று கொண்டிருப்பதை உணர்ந்து பதற்றம் அடைந்தாலும், அந்த பெண் அசையாமல் படுத்துக் கொண்டார். ஒரு கட்டத்தில் அவள் தலையை தூக்க முயன்றாலும், அந்த சம்பவத்தை படமெடுக்கும் ஒருவர் அவளை தலையை கீழே வைக்கும்படி அறிவுறுத்துகிறார்.

பதட்டமான சில நொடிகளுக்குப் பிறகு, ரெயில் கடந்து செல்கிறது. அவள் பாதுகாப்பாக தண்டவாளத்திலிருந்து எழுந்தாள். அவளது தோழியான மற்றொரு பெண், தண்டவாளத்தின் அருகே காத்திருப்பதை வீடியோவில் காண முடிகிறது.

இந்த சம்பவம் உள்ளூர்வாசிகளை அதிர்ச்சியிலும் ஆச்சரியத்திலும் ஆழ்த்தி உள்ளது. அந்த பெண்ணின் சிந்தனை திறன் மற்றும் அதிர்ஷ்டம் அவரது உயிரை காப்பாற்றி உள்ளதாக அவர்கள் தெரிவித்தனர்.