120 கோடி ரூபாய் பாக்கியை கட்டுங்கள், அல்லது வான்கடே மைதானத்தை விட்டு வெளியேறுங்கள்- மராட்டிய அரசு அதிரடி

மும்பையில் உள்ள வான்கடே கிரிக்கெட் மைதானம் புகழ்பெற்ற மைதானங்களில் ஒன்று. இந்த மைதானம் 43,977.93 சதுர மீட்டர் பரப்பளவில் கட்டடுப்பட்டுள்ளது. இந்த மைதானம் மகாராஷ்டிரா அரசுக்கு சொந்தமானது. இதை 50 வருடத்திற்கு முன்பு மும்பை கிரிக்கெட் சங்கம் லீஸ்க்கு வாங்கியது.

இந்த லீஸ் கடந்த வருடம் பிப்ரவரி மாதத்துடன் முடிவடைந்தது. ஆனால் மும்பை இந்தியன்ஸ் புதுப்பிக்கவில்லை. அத்துடன் மகாராஷ்டிரா அரசுக்கு 120 கோடி ரூபாய் பாக்கி வைத்துள்ளது.



இந்நிலையில் 120 கோடி ரூபாய் பாக்கி பணத்தை கட்டுங்கள். அதன்பின் லீஸ்-ஐ புதுப்பியுங்கள். அல்லது மைதானத்தை விட்டு வெளியேறுங்கள் என்று மும்பை கிரிக்கெட் சங்கத்திற்கு மகாராஷ்டிரா அரசு நோட்டீஸ் அனுப்பியுள்ளது.

நோட்டீஸ் அனுப்பிய மும்பை நகர கலெக்டர் இதுகுறித்து பிடிஐ நிறுவனத்திற்குக் கூறுகையில் ‘‘பாக்கி தொகை நிலுவை குறித்த பிரச்சனை இருக்கும்போதே, மும்பை கிரிக்கெட் சங்கம் லீஸ்க்கு விண்ணப்பித்துள்ளது. அவர்களுடைய பெருமையை பார்க்கும்பொழுது 120 கோடி ரூபாய் சிறிய தொகைதான். இடைக்கால கூட்டமோ அல்லது கால நீட்டிப்போ கிடையாது. மே 3-ந்தேதி கூட்டத்திற்குப்பின் அடுத்தக்கட்ட நடவடிக்கை குறித்து முடிவு செய்வோம்’’ என்றார்.