ஜூனியர் ஆசிய கோப்பை ஹாக்கி: தாய்லாந்தை 11-0 என வீழ்த்தியது இந்தியா

மஸ்கட்:

10-வது ஜூனியர் ஆசிய கோப்பை ஹாக்கி போட்டி (21 வயதுக்கு உட்பட்டோர்) ஓமன் தலைநகர் மஸ்கட்டில் நடந்து வருகிறது. டிசம்பர் 4-ம் தேதி வரை நடைபெறும் இந்தப் போட்டியில் பங்கேற்றுள்ள 10 அணிகள் இரு பிரிவாக பிரிக்கப்பட்டுள்ளன.

ஏ பிரிவில் நடப்பு சாம்பியன் இந்தியா, தென் கொரியா, ஜப்பான், சீனதைபே, தாய்லாந்தும், பி பிரிவில் பாகிஸ்தான், மலேசியா, வங்காளதேசம், ஓமன், சீனாவும் இடம் பிடித்துள்ளன.

ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோதும். லீக் சுற்று முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் அரையிறுதிக்கு தகுதி பெறும். அத்துடன், அடுத்த ஆண்டு நடைபெறும் ஜூனியர் உலகக் கோப்பை போட்டிக்கும் தகுதி பெறும்.

இந்நிலையில், இந்திய அணி தனது தொடக்க லீக் ஆட்டத்தில் தாய்லாந்தை சந்தித்தது. ஆரம்பம் முதலே இந்திய வீரர்கள் அதிரடியாக ஆடினர்.

இறுதியில் இந்தியா 11-0 என அபார வெற்றி பெற்றது. தாய்லாந்து தான் ஆடிய இரு ஆட்டங்களில் தோல்வி அடைந்துள்ளது.