உடற்பயிற்சி

மதிய உணவு உட்கொண்டதும் பலரும் சிறிது நேரம் நடைப்பயிற்சி மேற்கொள்ள ஆர்வம் காட்டுகிறார்கள். சாப்பிட்ட உடனேயே உட்காரவோ, தூங்காமலோ சில நிமிடங்கள் நடப்பது நல்லது என்று ஊட்டச்சத்து நிபுணர்களும், மருத்துவர்களும் பரிந்துரைக்கிறார்கள். அதன்படி உணவு உட்கொண்டதும் 10 நிமிடங்கள் நடப்பதால் கிடைக்கும் 10 நன்மைகள் இவை...

செரிமானத்தை மேம்படுத்தும்

உணவு உட்கொண்ட பின்பு நடப்பது செரிமான அமைப்பின் செயல்பாடுகளை தூண்டி உணவை துரிதமாக நொதிக்கச்செய்ய உதவும். அதன் மூலம் வீக்கம், வாயுத்தொல்லை, மலச்சிக்கல் போன்ற பிரச்சனைகளை தடுக்கலாம்.

ரத்த சர்க்கரை அளவை சீராக்கும்

சாப்பிட்ட பிறகு சிறிது தூரம் நடை போடுவது இன்சுலின் உணர் திறனை அதிகரிக்கச் செய்யும். அதனால் ரத்தத்தில் உள்ள சர்க்கரை அளவு குறையக்கூடும். குறிப்பாக நீரிழிவு நோயாளிகள் சாப்பிட்டதும் நடக்கும் பழக்கத்தை பின்பற்றுவது பயனுள்ளதாக இருக்கும். 

உடல் எடையை நிர்வகிக்கும்

உணவு உண்டதும் நடைபயணம் மேற்கொள்வதை வழக்கமாக்கிக்கொள்வது கலோரிகள் எரிக்கும் அளவை அதிகரிக்கச் செய்யும். இது உடல் எடை குறைவதற்கோ, உடல் எடையை சீராக பராமரிப்பதற்கோ உதவி புரியும். இந்த மென்மையான நடைப்பயிற்சி உடலில் கொழுப்பு சேர்வதை தடுக்கவும் வழிவகை செய்யும்.

இதய ஆரோக்கியத்தை மேம்படுத்தும்

நடைப்பயிற்சி ரத்த ஓட்டத்தை அதிகரிக்கச் செய்யும். இதயத்தை பலப்படுத்தும். இதய நோய் அபாயத்தை குறைக்கும். மேலும் ரத்த அழுத்தம் மற்றும் கொலஸ்ட்ரால் அளவையும் குறைக்க உதவும்.

மன அழுத்தத்தை குறைக்கும்

சாப்பிட்டதும் மேற்கொள்ளும் இந்த உடல் செயல்பாடு எண்டோர்பின்களை வெளியிட துணை புரியும். இது மனநிலையை மேம்படுத்தக்கூடியது. மன அழுத்தத்தையும் குறைக்கக்கூடியது. சிறந்த மனநலத்தை பேணுவதற்கும், ஒட்டுமொத்த நல்வாழ்வுக்கும் வழிவகுக்கும்.

வளர்சிதை மாற்றத்தை அதிகரிக்கும்

இந்த குறுகிய நடைப்பயிற்சி வளர்சிதை மாற்ற விகிதத்தையும் அதிகரிக்கச் செய்யும். நாள் முழுவதும் கலோரிகளை எரிக்கவும் உதவி புரியும். ஒட்டுமொத்த உடல் ஆற்றல் திறனையும், உடல் எடையையும் சீராக நிர்வகிக்க உதவும்.

நெஞ்செரிச்சலை தடுக்கும்

நடைப்பயிற்சி மேற்கொள்வது வயிற்று அமிலங்களின் செயல்பாடுகளை சீராக்க உதவி செய்யும். அமில ரிப்ளக்ஸ் மற்றும் இரைப்பை உணவுக்குழாய் ரிப்ளக்ஸ் நோய் அபாயத்தையும் குறைக்கும். மேலும் நெஞ்செரிச்சல் மற்றும் அஜீரண கோளாறுகள் ஏற்படுவதையும் தடுக்கும்.

ஆழ்ந்த தூக்கத்திற்கு வித்திடும்

உணவு உட்கொண்ட பிறகு மென்மையான நடைப்பயிற்சி செய்வது சர்க்காடியன் ரிதத்தின் செயல்பாடுகளை ஒழுங்குபடுத்தி சிறந்த தூக்கத்திற்கு ஊக்குவிக்கும். அத்துடன் செரிமானம் துரிதமாக நடைபெறுவதும், மன அழுத்தம் குறைவதும் நிம்மதியான, ஆழ்ந்த தூக்கத்திற்கு பங்களிக்கும்.

மூட்டுகளைப்பலப்படுத்தும்

நடைபயிற்சி தசைகள் மற்றும் மூட்டுகளை பலப்படுத்தும். அந்த பகுதிகளில் ஏற்படும் வலியை தடுக்கவும் உதவும். மூட்டுகளை நெகிழ்வாகவும், ஆரோக்கியமாகவும் வைத்திருக்க நடைப்பயிற்சி செய்வதுதான் சிறந்த வழி.

உடல் ஆற்றலை மேம்படுத்தும்

சாப்பிட்ட பிறகு மந்தமான உணர்வு ஏற்படக்கூடும். நடைப்பயிற்சி செய்வது உடலின் ஆற்றல் மட்டங்களை அதிகரிக்க செய்துவிடும். மனதை தெளிவுபடுத்தவும், கவனத்தை மேம்படுத்தவும், சோர்வு உணர்வுகளைக் குறைக்கவும் உதவும்.

காலையில் வெறும் வயிற்றில் எதுவும் சாப்பிடாமல் உடற்பயிற்சி செய்வது, பெட்ரோல் இல்லாமல் காரை ஓட்ட முயற்சி செய்வது போன்றது.

உடற்பயிற்சி செய்யும்போது நம் உடலுக்குஅதிக சக்தி தேவைப்படும். அதனால் கட்டாயமாக வெறும் வயிற்றில் உடற்பயிற்சி செய்யக் கூடாது.

உடற்பயிற்சி செய்வதற்குப் போதுமான சக்தி இல்லாமல் போனால் உடலில் இருக்கும் நம்முடைய இயக்கத்துக்குத் தேவையான ஆற்றலை உடற்பயிற்சி உறிஞ்ச ஆரம்பிக்கும். வெறும் வயிற்றில் பயிற்சி செய்தால் உடலில் ரத்த சர்க்கரை அளவில் மாற்றங்கள் ஏற்படும். அது பயிற்சிக்குப் பின்பு அதிக சோர்வை உண்டாக்கும்.

வலிமையான மற்றும் தோரணையான பெரிய பைசப்ஸ் பெற முயற்சி செய்பவர்கள் தம்பில்ஸ் வைத்து மாங்கு மாங்கு என்று பயிற்சி செய்வதை பார்த்திருப்போம். ஆனால் முறையான பயிற்சி செய்தால் மட்டுமே நிறைவான பலன் கிடைக்கும்.

தம்பில்ஸ்சை வைத்து கடுமையான உடற்பயிற்சி செய்தால் மட்டுமே வலிமையான மற்றும் தோரணையான பெரிய கைகளை பெற முடியாது. ஏனெனில் கைகளில் மூன்றில் இரண்டு மடங்கு ட்ரைசப்ஸ் உள்ளது. இதில் மூன்றில் ஒரு பங்கு உள்ள பைசப்ஸ் பகுதிகளுக்கு மட்டும் அதிக கவனம் செலுத்துவதால் நல்ல பலன் கிடைக்காது.

எனவே ட்ரை சப்ஸ் மற்றும் பைசப்ஸ் பகுதிகளுக்கு உடற்பயிற்சியை முறையாக செய்துவர வேண்டும்.

ட்ரை சப்ஸ்:

ட்ரை சப்ஸ் என்பது லாங் ஹெட், லாட்டரல் ஹெட், மிடயல் ஹெட் என்று மூன்று பகுதிகளாக உள்ளது. எனவே இது ட்ரைசப்ஸ் என்று அழைக்கப்படுகிறது.

எடுப்பனா பைசப்ஸ்சை பெற முதலில் ட்ரை சப்ஸ் பகுதியில் உள்ள மூன்று ஹெட்களுக்கும் பயிற்சி கொடுக்க வேண்டும். ஒவ்வொரு பகுதிக்கும் தனித் தனியாக அழுத்தம் கொடுத்து பயிற்சி செய்ய பல டம்பில் கர்ல் பயிற்சிகள் உள்ளன.

பைசப்ஸ் :

பைசப்ஸ் பகுதிக்கும் ட்ரை சப்ஸ் பகுதிக்கும் இடையில் பிரேக்யாலிஸ் எனப்படும் சதைப் பகுதி காணப்படும்.

இந்த பிரேக்யாலிஸ் பகுதிக்கு அழுத்தம் கொடுக்கும் பயிற்சி செய்வதன் மூலம் பைசப்ஸ் பகுதிக்கும் ட்ரை சப்ஸ் பகுதிக்கும் இடையே உள்ள இடைவெளி அதிகமாகம். இது ஆர்ம்ஸ் பருமனாக வளர உதவுகிறது.

உடல் எடை குறைக்க மிகவும் எளிதான வழி வெந்நீர் குடிப்பது என்று சொல்லப்படுகிறது. ஆனால் உடல் எடை குறைய உடற்பயிற்சி, உணவுக் காட்டுபாடு போன்றவற்றுடன் வெது வெதுப்பான தண்ணீர் குடிப்பது பலன் தரும்.

வெந்நீர் உடல் எடை குறைப்பதற்கு உதவுகிறது என்பது உண்மைதான் ஆனால் அது மட்டுமே இரண்டு வாரங்களில் 20 கிலோ வரைக்கும் எடை குறைக்க உதவாது.

காலையில் சற்று வெதுவெதுப்பான நீரைக் குடிக்கும்போது, உடல் அதன் வெப்பநிலையை மாற்றி வளர்சிதை மாற்றத்தை துரிதப்படுத்துகிறது.

உணவுக்கு 30 நிமிடங்களுக்கு முன் வெதுவெதுப்பான நீரைக் குடிப்பது, வயிற்றை நிரம்பி அதிக கலோரிகளை உட்கொள்வதைக் கட்டுப்படுத்த உதவுகிறது.

வெதுவெதுப்பான நீருடன் எலுமிச்சைச் சாறு மற்றும் தேனை சேர்ப்பதன் மூலம், உடல் வளர்சிதை மாற்ற விகிதத்தை மேலும் துரிதப்படுத்த முடியும்.

பொதுவாக சூடான நீர் உடலின் வெப்பநிலையை உயர்த்தி வியர்வையை ஏற்படுத்தி உடலின் நச்சுக்கள் வெளியேற உதவுகிறது.

மேலும் ரத்தத்தில் உள்ள நச்சுகளை நீர்த்துப்போகச் செய்ய உதவுகிறது. இதன் மூலம் உடலில் இருந்து கழிவுப்பொருட்களை வெளியேற்றுவதை எளிதாக்குகிறது.

உடல் எடை குறைய சுடுதண்ணீர் எவ்வாறு குடிக்க வேண்டும் ?

வெந்நீர் உடல் எடையை குறைப்பதில் உதவுகிறது. இருப்பினும் அதில் சில பொருட்களைச் சேர்ப்பதன் மூலம் எடை இழப்பைத் துரிதப்படுத்தலாம். அவை

பூண்டு:

பூண்டில் ஆன்டி-ஆக்ஸிடன்ட்கள் நிறைந்துள்ளது. மேலும் பூண்டு சிறுநீரக செயல்பாட்டை மேம்படுத்த உதவுகிறது. இது கெட்ட கொழுப்பைக் கரைக்க உதவுகிறது, எடை இழப்புக்கு பூண்டு நல்லது.

எலுமிச்சை:

சுடு தண்ணீரில் எலுமிச்சைச் சாறு சேர்த்து குடிப்பது சிறுநீரகக் கற்களைத் தடுக்க உதவுகிறது மற்றும் நோய் எதிர்ப்பு அமைப்பு ஆதரவு மற்றும் நீரிழிவு நோய்க்கு எதிராக உதவுகிறது. மேலும், எலுமிச்சை சாறு கொழுப்பை எரிப்பதில் முக்கிய பங்கு வகிக்கிறது.

தேன் :

தேன் ஆண்டிமைக்ரோபியல், ஆன்டிகான்சர், ஆண்டிடியாபெடிக், ஆன்டிவைரல் மற்றும் ஆன்டிபராசிடிக் தாக்கங்களுடன் ஆன்டி-ஆக்ஸிடன்ட்கள் மற்றும் அழற்சி எதிர்ப்பு போன்ற பல பண்புகளைக் கொண்டுள்ளது. மேலும் வளர்சிதை மாற்றத்தை துரிதப்படுத்துவதில் உதவுகிறது.

வெந்நீர் குடிப்பதன் நன்மைகள்:

வெதுவெதுப்பான நீரை குடிப்பது மலத்தை மென்மையாக்கி, எளிதாக வெளியேற்றுவதற்கு உதவுகிறது. மேலும், குடல் ஆரோக்கியம் மற்றும் சீரான இயக்கத்தை சீராக்கி உடலில் இருந்து நச்சுகளை முழுமையாக அகற்றுவதற்கு உதவுகிறது.

வெதுவெதுப்பான நீர், இருமல் மற்றும் சளியின் போது சளி உருவாவதைக் குறைக்கிறது. மேலும், மூக்கு ஒழுகுதல், தொண்டை புண் சமயங்களில் நிவாரணம் பெற உதவுகிறது.

எண்ணெயில் பொறித்த நொறுக்குத் தீனிகளை உண்ணும்போது, அதை ஜீரணிக்க சிறந்த வழி வெந்நீரைக் குடிப்பதாகும். ஏனென்றால், இது உடலில் உள்ள நச்சுகளை அகற்ற உதவுகிறது.

வெந்நீரை சருமத் துவாரங்களை சுத்தமாக்கி, முகப்பரு மற்றும் தோல் தொடர்பான பிற பிரச்சனைகளை குறைக்கிறது. இதன் மூலம் சருமம் பளபளப்பாகவும், தெளிவாகவும் தோற்றமளிக்க உதவுகிறது.

சூடான நீர் குடிப்பது தசைகள் பாதிப்பு உடையவர்களுக்கு ரத்த ஓட்டத்தை மேம்படுத்துகிறது. மேலும் மாதவிடாய் காலங்களில் ஏற்படும் வலியைக் குறைப்பதற்கு உதவுகிறது.

காலையில் எழுந்ததும் ஒரு டம்ளர் வெதுவெதுப்பான நீரை குடிப்பது நல்லது. ஏனெனில் இது உடல் வளர்சிதை மாற்றத்தை உடனே ஆரம்பித்து வைக்கிறது. சாப்பிட்டவுடன் சற்று வெது வெதுப்பான நீர் குடிப்பது எளிதாக ஜீரணம் ஆக உதவுகிறது.

அன்றாட வாழ்வில் யோகா செய்வதை வழக்கமாக்கிக்கொள்ள வேண்டும். யோகா செய்வதன் மூலம் உடல் மற்றும் மன ஆரோக்கியத்துக்கு நேர்மறையான தாக்கத்தை ஏற்படுத்த உதவும். இது உடலின் நெகிழ்வுத்தன்மையை அதிகப்படுத்துவதுடன், மனதையும் உடலையும் வளர்ப்பதற்கான முழுமையான அணுகுமுறையாகவும் அமைகிறது. இனி மன ஆரோக்கியத்திற்கு யோகா எவ்வாறு உதவுகிறது என்பதை பார்க்கலாம்.

யோகா செய்வதால் மன அழுத்தம், பதட்டம், மன சோர்வு நீங்கி மன அமைதி கிடைக்கும். மேலும் ஹார்மோன் சமநிலை உணர்வு மற்றும் கட்டுப்படுத்தப்பட்ட சுவாசம், கவனமான இயக்கத்துடன் பதற்றத்தை விடுத்து மனது தளர்வு நிலையை ஏற்படுத்த உதவுகிறது.

வழக்கமாக யோகா பயிற்சி செய்வது கவனத்தை கூர்மையாக்கி தெளிவான சிந்தனையை தருகிறது. இது மனக்கூர்மையையும், அறிவாற்றல் செயல்பாட்டையும் மேம்படுத்துகிறது. யோகாவின் அம்சம் கவனச்சிதறல்களை விடுத்து மனதை தெளிவாக்க உதவுகிறது. தினந்தோறும் யோகா செய்வது மனதை தெளிவடையச் செய்து சரியான நேரத்தில் சரியான முடிவுகளை எடுக்க பெரிதும் உதவுகிறது.

தூக்கம்

தினமும் யோகா செய்வது ஆழ்ந்த தூக்கம் மற்றும் சீரான தூக்கத்தை ஊக்குவிக்கிறது. ஒட்டுமொத்த தூக்கத்தின் தரத்தையும் மேம்படுத்துகிறது. இதற்கு யோகா நரம்புமண்டலத்தில் அமைதியான விளைவுகளை தருகிறது. இது உடல் மற்றும் மனதை அமைதிப்படுத்தி நல்ல இரவு தூக்கத்திற்கு வழிவகுக்கிறது.

தொடர்ந்து சோர்வாக உணர்தல், அதிகமாக சிந்திப்பது மற்றும் பதட்டமாக இருப்பது ஆகியவை மன சோர்வின் அறிகுறிகளாகும். மன சோர்வு காரணமாக, ஒரு நபர் மிகவும் பலவீனமாக உணரலாம். இதனால் உடலின் ஆற்றலும் குறைகிறது. உடலில் வைட்டமின் பி1, பி2 மற்றும் பி3 குறைபாடு காரணமாகவும் பல நேரங்களில் மனச் சோர்வு தொடர்கிறது.

மன சோர்வு மிகவும் பொதுவானது. ஆனால் நீண்ட காலமாக அதை புறக்கணிப்பது உங்கள் மன ஆரோக்கியத்தை பாதிக்கிறது. மன சோர்வு காரணமாக, தூக்கத்தில் பிரச்சனை, தனியாக இருப்பது போன்ற உணர்வு, பசியின்மை, சீக்கிரம் கோபப்படுதல் மற்றும் மெதுவாக சிந்திப்பது போன்ற பல அறிகுறிகள் காணப்படுகின்றன.

மனசோர்வை நீக்கும் வழிமுறைகள்:

மன சோர்வை நீக்க ராகியை உட்கொள்ளலாம். கால்சியம், நார்ச்சத்து, சோடியம் மற்றும் பொட்டாசியம் போன்ற பல வகையான ஊட்டச்சத்துக்கள் ராகியில் காணப்படுகின்றன. இதனை உட்கொள்வதால் மன சோர்வு நீங்கி எலும்புகள் வலுவடையும். இதனை கோதுமை மாவுடன் கலந்து ரொட்டி செய்து சாப்பிடலாம்.

மன சோர்வை நீக்க வால்நட்ஸை உட்கொள்ளலாம். இதில் சோடியம், பொட்டாசியம், கால்சியம், இரும்புச்சத்து மற்றும் வைட்டமின் சி உள்ளது. இதனை உட்கொள்வது உடல் எடையை குறைக்க உதவுகிறது மற்றும் மூளை சக்தியை அதிகரிக்கிறது.

மன சோர்வைத் தவிர்க்க, உடலை நீரேற்றமாக வைத்திருப்பது அவசியம். குறைந்த அளவு தண்ணீர் குடிப்பதால், உடலின் சரியான ரத்த ஓட்டம் தடைபடுகிறது. இது உடல் மற்றும் மன சோர்வு பிரச்னைகளுக்கு வழிவகுக்கும். மன சோர்வைத் தடுக்க, நாள் முழுவதும் 7 முதல் 8 கிளாஸ் தண்ணீர் குடிக்கவும்.

மன சோர்வைத் தவிர்க்க, தினசரி சுய-கவனிப்பு வழக்கத்தைப் பின்பற்றவும். சுய பராமரிப்பு வழக்கத்தை பின்பற்றுவது பதட்டத்தை குறைக்கும் மற்றும் உங்கள் மனநிலையும் புத்துணர்ச்சியுடன் இருக்கும். சுய பாதுகாப்பு வழக்கத்தைப் பின்பற்றுவது உங்களுக்கு மன அமைதியைத் தரும், மேலும் நீங்கள் உங்கள் மீது கவனம் செலுத்தவும் முடியும்.

உடற்பயிற்சி

மன சோர்வைக் குறைக்க உடற்பயிற்சி செய்வது மிகவும் அவசியம். உடற்பயிற்சி செய்வது நோய்களின் அபாயத்தைக் குறைக்கும். மேலும் மனநலமும் நன்றாக இருக்கும். மன சோர்வை நீக்க உடற்பயிற்சி, யோகா, சுவாசப் பயிற்சி போன்றவற்றில் ஈடுபடவும்.

மன சோர்வை நீக்க இயற்கையான வழிமுறைகளை பின்பற்றலாம். இருப்பினும், உங்களுக்கு ஏதேனும் நோய் அல்லது ஒவ்வாமை பிரச்சனை இருந்தால், உங்கள் மருத்துவரிடம் கேட்ட பிறகு இந்த வழிமுறைகளைப் பின்பற்றவும்.

ரத்த தானம் செய்வதில் பல வழிகள் உள்ளன. நீங்கள் ரத்தத்தை தானம் செய்யலாம் அல்லது ரத்தத்தில் உள்ள பிளாஸ்மா, சிவப்பு ரத்த அணுக்கள் மற்றும் பிளேட்லேட்கள் போன்ற ரத்த கூறுகளை மட்டும் தானம் செய்யலாம்.

ரத்த தானம் செய்யும்போது அதில் உள்ள எந்திரமானது ரத்தத்தை பல்வேறு கூறுகளாக பிரித்து அவற்றை உடலுக்கு வழங்குகிறது. ஒவ்வொரு ரத்த நன்கொடையை செய்யும்போதும் அதை எவ்வளவு பாதுக்காப்பாக செய்ய முடியும் என்பதுதான் மிகவும் முக்கியம்.

ஒவ்வொரு 56 நாட்களுக்கு ஒருமுறையும் நீங்கள் முழுமையாக ரத்த தானம் செய்ய முடியும். எனவே ஒரு ஆண்டிற்கு சுமாராக 6 முறை ரத்த தானம் செய்ய முடியும் என நியூயார்க் ரத்த மையத்தின் தலைமை மருத்துவ அதிகாரியான புரூஸ் சாச்சிஸ் கூறுகிறார். அதே போல நீங்கள் ரத்த பிளேட்லேட்கள் மற்றும் பிளாஸ்மாவை அதிகமாக தானம் செய்யலாம்.

யாரெல்லாம் ரத்த தானம் செய்ய கூடாது?

ரத்த தானம் செய்வதற்கு குறைந்தது 18 வயது பூர்த்தியாகி இருக்க வேண்டும். ஆனால் ஆரோக்கியமான உடல் நிலையை கொண்டிருக்கும் பட்சத்தில் 16 முதல் 17 வயதுடையவர்கள் பெற்றோர் அல்லது பாதுக்காவலரின் ஒப்புதலுடன் நன்கொடை அளிக்கலாம். ஆனால் 75 வயதுக்கு மேல் உள்ளவர்கள் மருத்துவரிடம் கடிதம் பெற்ற பிறகே ரத்த தானம் செய்ய முடியும்.

அமெரிக்க மக்கள் தொகையில் சுமார் 38 சதவீதம் மக்கள் ரத்த தானம் செய்யும் தகுதியை பெற்றுள்ளனர். சில தற்காலிகமான காரணங்கள் கூட ரத்த தானம் செய்வதை தடுக்கின்றன.

கர்ப்பிணிகள்

கர்ப்பிணி பெண்களுக்கு கர்ப்ப காலத்தில் கூடுதல் இரும்புச்சத்து தேவைப்படுகிறது. மேலும் அவர்களுக்கு கர்ப்ப காலங்களில் லேசான ரத்த சோகை ஏற்படுவதாலும் அவர்கள் ரத்த தானம் செய்வதில் நிறைய சிக்கல்கள் உள்ளன, எனவே அவர்கள் ரத்த தானம் செய்ய முடியாது. அவர்கள் குழந்தை பிறந்து ஆறு மாதங்களுக்கு பிறகே ரத்த தானம் செய்யும் தகுதியை பெறுகின்றனர்.

மருந்துகள் எடுத்துக்கொள்பவர்கள்

சில மருந்துகளை உட்கொள்பவர்கள் தற்காலிகமாக ரத்த தானம் செய்யும் தகுதியை இழக்கின்றனர். அவர்களை எடுத்துக்கொள்ளும் மருந்தை பொறுத்து காலம் மாறுப்படும். எடுத்துக்காட்டாக கூமாடின் அல்லது வார்ஃபிலோன் போன்ற மருத்துகளை நீங்கள் எடுத்துக்கொள்கிறீர்கள் என்றால் அந்த மருந்தை நிறுத்திய ஏழு நாட்களுக்கு பிறகே நீங்கள் ரத்த தானம் செய்ய முடியும்.

ஆனால் தடிப்பு தோல் அழற்சிக்கான வாய்வழி ரெட்டினாய்டு சிகிச்சையான சோரியாடேன் செய்தவர்கள் மூன்று ஆண்டுகள் கழித்தே ரத்த தானம் செய்ய முடியும்.

படிக்கட்டுகளில் ஏறுவது உங்கள் தசை மற்றும் எலும்பு ஆரோக்கியத்திற்கு மட்டுமல்ல இதயத்திற்கும் நல்லது. படிக்கட்டுகள் ஏறும்போது கால்கள் மற்றும் தசைகள் அதில் பங்கேற்கும். இது இதயத் துடிப்பை உயர்த்தி, அதன் செயல்திறனை ஊக்குவிக்கிறது. இதனால் உடல் முழுவதும் சிறந்த ரத்த ஓட்டத்தை ஊக்குவிக்கிறது.

படிக்கட்டுகள் ஏறுவது உடல்நலன் தொடர்பானது. படிக்கட்டு ஏறுதல் மற்றும் நடைபயிற்சி இரண்டையும் கூட செய்யலாம். படிக்கட்டுகள் ஏறுவது உடலின் மெட்டாபாலிசத்தை சீராக இயங்க வைக்கும். தசை வளர்ச்சி அடையும். கூடவே உடல் எடையை நிர்வகிப்பதற்கும் உதவும்.

பணி சூழல், அவசரமான வாழ்வியல் முறை ஆகியவற்றின் காரணமாக உடற்பயிற்சி யோகா உள்ளிட்டவைகளுக்கு நேரம் ஒதுக்குவது என்பது எளிதானதாக இருக்காது. இருப்பினும், அதை பழக்கப்படுத்த வேண்டும். காலையில் எழுந்து விறுவிறுப்பான நடைப்பயிற்சி செய்ய முடியவில்லை என்றால் கவலை வேண்டாம். மாடிப் படி இருந்தால் அதில் ஏறி இறங்கலாம்.

படிக்கட்டுகளில் ஏறி செய்யும் உடற்பயிற்சியினால் ஏற்படும் நன்மைகள்:

* படிக்கட்டுகளில் ஏறி, இறங்கும்போது உங்களின் முட்டிக்கால், நெஞ்சு பகுதியில் உள்ள தசைகள் நன்றாக இயங்கும். இது `standing crunches' செய்வது போல. தொடர்ந்து செய்தால் தசை வலுப்பெறுவதுடன் உடலிலுள்ள கெட்ட கொழுப்பு குறையும். உடலின் கீழ் பகுதியில் உள்ள கொழுப்பை குறைக்க இது மிகவும் உதவியாக இருக்கும்.

* உடலின் தசை வளர்ச்சிக்கு உதவுவதோடு வளர்சிதை மாற்றத்திற்கும் இது நல்லது . நடைப்பயிற்சி எவ்வளவு நல்லதோ அதே அளவு படிக்கட்டுகளில் ஏறி உடற்பயிற்சி செய்வது நல்லது.

* இந்த முறை உடற்பயிற்சியால் கலோரி எரிக்கப்படுகிறது. அடிவயிற்றில் உள்ள தசைகளை நன்றாக செயல்பட தூண்டுவதால் செரிமான தொடர்பான பிரச்சனைகள் ஏற்படாமல் இருக்க உதவுகிறது.

* எல்லாரும் நடைப்பயிற்சி செய்யலாம். ஏனெனில், சிலருக்கு படிக்கட்டுகளில் ஏறி இறங்கும் உடற்பயிற்சி செட் ஆகாது. வயதானவர்கள், மூட்டு பிரச்சனைகள் இருப்பவர்களுக்கு இது உகந்தது அல்ல. மேலும் படிக்கட்டுகளில் ஏறுவதால் சோர்வாக உணர்ந்தால் நடைபயிற்சியை மேற்கொள்ளலாம்.

எந்தவொரு உடல் செயல்பாடும் எண்டோர்பின்களை வெளியிடுவதற்கு வழிவகுக்கிறது. மன அழுத்தத்தை தவிர்க்க உதவுகிறது. எதையேனும் தொடர்ச்சியாக செய்வது உடல்நலனுக்கு நல்லது.

இன்றைய காலகட்டத்தில் உடல் உழைப்பு அதிகம் இல்லாத வேலைகளை செய்பவர்களின் எண்ணிக்கை அதிகமாகிக்கொண்டே இருக்கிறது. டிஜிட்டல் யுகத்தில் கணினி முன்பு அமர்ந்து நீண்ட நேரம் வேலை செய்யும் நிலை இருக்கிறது. நவீன வாழ்க்கைமுறையும் அதற்கேற்பத்தான் அமைந்திருக்கிறது.

அப்படி உட்கார்ந்த வாழ்க்கை முறையை பின்பற்றுவது ஆரோக்கியத்தில் குறிப்பிடத்தக்க தாக்கத்தை ஏற்படுத்தும் என்று ஆராய்ச்சிகள் கூறுகின்றன. இதே நிலை தொடரும்போது இதய நோய், நீரிழிவு, புற்றுநோய் ஏற்படுவதற்கான அபாயமும் அதிகரிக்கும் என்றும் எச்சரிக்கின்றன.

உட்காருவதற்கும், நிற்பதற்கும், உடற்பயிற்சிக்கும், தூங்குவதற்கும் தினமும் குறிப்பிட்ட நேரத்தை கண்டிப்பாக ஒதுக்க வேண்டும். அதனை மையமாகக்கொண்டு சர்வதேச ஆராய்ச்சியாளர்கள் ஆய்வு மேற்கொண்டனர். 40 முதல் 75 வயது வரை உள்ள 2 ஆயிரம் பேரின் தினசரி செயல்பாடுகள் ஆய்வுக்கு உட்படுத்தப்பட்டது. உட்காருதல், நின்றல், உறங்குதல், உடல் செயல்பாடுகளில் ஈடுபடுதல் போன்றவற்றில் தினமும் எவ்வளவு நேரம் ஈடுபடுகிறார்கள் என்பது கவனத்தில் கொள்ளப்பட்டது.

அதனை அடிப்படையாகக் கொண்டு ஒருவர் தினமும் எந்தெந்த செயல்களுக்கு எவ்வளவு நேரத்தை செலவிட வேண்டும் என்ற முடிவுக்கு ஆய்வாளர்கள் வந்திருக்கிறார்கள். அதன்படி தினமும் 6 மணி நேரம் வரை உட்கார்ந்திருக்கலாம், 5 மணி 10 நிமிடங்கள் வரை நிற்கலாம். இரண்டு மணி நேரம் 10 நிமிடங்கள் வரை லேசானது முதல் மிதமான உடல் செயல்பாடுகளில் ஈடுபடலாம்.

அதேபோல் 2 மணி நேரம் மற்றும் 10 நிமிடங்கள் வரை மிதமானது முதல் தீவிரமான உடல் செயல்பாடுகளை மேற்கொள்ளலாம். 8 மணி 20 நிமிடங்கள் வரை தூங்குவதற்கு ஒதுக்கலாம் என்று நேரத்தை வகைப்படுத்தி இருக்கிறார்கள்.

நீரிழிவு நோயால் பாதிக்கப்பட்டவர்கள் உட்காருவதற்கு அதிக நேரத்தை செலவிட்டதை மாற்றியமைத்து லேசான உடல் செயல்பாடுகளில் கூடுதல் நேரத்தை செலவிட்டிருக்கிறார்கள். அவர்களின் சர்க்கரை அளவில் குறிப்பிடத்தக்க மாற்றம் ஏற்பட்டிருப்பதும் தெரியவந்துள்ளது.

வயது, ஒட்டுமொத்த உடல்நலம், உடல் திறன், வேலை மற்றும் தனிப்பட்ட விருப்பம் போன்ற விஷயங்களை கருத்தில் கொண்டு மருத்துவரின் ஆலோசனை பெற்று ஒவ்வொரு செயல்பாட்டுக்கும் குறிப்பிட்ட நேரத்தை ஒதுக்குவது நல்வாழ்வுக்கு வித்திடும் என்பது ஆராய்ச்சியாளர்களின் கருத்தாக இருக்கிறது.

சின்முத்திரை என்னும் சொற்றொடர் ஞான அடையாளம் எனப் பொருள்படும். சித் ஞானம் முத்திரை அடையாளம், எனவே ஞானப் பொருளின் அடையாளக் குறிப்பாக திகழ்வது சின்முத்திரை எனலாம்.

தென்முகக் கடவுளாகிய தட்சிணாமூர்த்தி தம் திருக்கையால் சின்முத்திரையைக் காட்டிக் கொண்டிருக்கிறார். வலது கைக் கட்டைவிரல் சுட்டுவிரலுடன் ஒன்றையொன்று வளைந்து சார்ந்து நிற்க, ஏனைய மூன்று விரல்களும் விலகி தனித்து சேர்ந்து நின்று கொண்டிருக்கும் நிலை சின்முத்திரை ஆகும்.

நடுவிரல், மோதிர விரல், சுண்டு விரல் என்னும் மூன்றும் முறையே, ஆணவம், மாயை, கன்மம், என்னும் மும்மலங்களை குறிப்பனவாகும்.

நடு விரல் நீண்டு, முனைந்து நிற்பதனால் ஆணவ மலத்தைக் குறிப்பதாக உள்ளது. அதற்கு அடுத்த விரல் மாயா மலத்தை குறிப்பது என்பதனை புலப்படுத்தவே மாயா மல சம்பந்தமான பொன் முதலியவற்றால் இயன்ற மோதிரத்தினை அதன்கண் நாம் அணிந்து கொள்கிறோம். ஏனைய மலங்களை காட்டிலும் அனுபவித்து தீர்ப்பதனால் விரைவில் அழிந்தொழிந்து போகும் தன்மையது கன்ம மலமாதலின் அது சுண்டு விரலால் குறிக்கப்படுவதாயிற்று.

ஆணவ மலம் நெல்லுக்கு உமியும், செம்பிற் கழிம்பும் போல உயிருள்ள அன்றே தொன்றுதொட்டு இருந்து வருவது ஆதலின் அது சகசமலம் எனப்படும், ஏனைய மாயா கன்ம மலங்கள் உயிருக்கு இடையில்வந்து சேர்வனவாதலின் ஆகந்துக மலம் எனப்படும். இவ்வுண்மையினையும் இவ்விரல்களின் வரிசை முறை தெரவிப்பதாக உள்ளது.

பெருவிரலின் உதவியின்றி நாம் எதனையும் எடுத்து பிடித்தல் முதலியன செய்தல் இயலாது, ஆதலின் அது சின் முத்திரையில் பதியினைக் குறிக்கிறது. சுட்டு விரல் தன்னியல்பில் ஏனைய மூன்று விரல்களோடு சேராது பெருவிரலை தொட்டு நிற்கிறது. அது பசு எனப்படும்.

கட்டை வரலின் அடியில் சுட்டுவிரல் சென்று சேர்ந்து படிந்து நிற்பது முத்தி நிலையில் உயிர்கள் சிவத்தின் திருவடிகளில் சென்று ஒன்றி நிற்றலைப் புலப்படுத்துகின்றது. உயிர்கள் பிறப்பு இறப்புத் துன்பகளிலிருந்து விடுபடுதல் வேண்டுமாயின் மும்மலங்களின் தொடர்பை விட்டு பதிப் பொருளின் திருவடிகளை அடையப் பெறுதல் வேண்டும். அதனை விளக்கவே சின்முத்திரையில் சுட்டு விரல் தான் சேர்ந்துள்ள ஏனைய மூன்று விரல்களை பிரிந்து கட்டை விரலின் அடியில் சென்று வளைந்து பணிந்து தொட்டுக்கொண்டிருக்கிறது. சின் முத்திரை விளக்கும் இந் நுண்பொருள் உண்மையினை உணர்த்துகிறது.

'எக்சர்சைஸ் செஞ்சுட்டு வந்தவுடனே, சர்க்கரைப் பொருள்கள், கேக், ஜூஸ் போன்றவற்றை உட்கொண்டால், செய்த உடற்பயிற்சிக்கான பலன் கிடைக்காது' என ஒரு கருத்து இருக்கிறது. `இது உண்மைதான்' என்கிறது மருத்துவம். தவிர்க்கவேண்டிய பொருள்களின் பட்டியலில், சர்க்கரையைப்போலவே வேறு சில உணவுப் பொருள்களும் இருக்கின்றன. அந்த வகையில், உடற்பயிற்சிக்கு முன்னரும் பின்னரும் சாப்பிடக் கூடாதவை, சாப்பிடவேண்டியவை, எவ்வளவு தண்ணீர் குடிக்க வேண்டும், உணவுக்கும் உடற்பயிற்சிக்குமான இடைவெளி எவ்வளவு நேரம் இருக்க வேண்டும் என்பதை பார்க்கலாம்.

``வீட்டிலேயே உடற்பயிற்சி செய்பவர்கள், ஜிம்முக்குப் போய் பயிற்சி செய்பவர்கள் என இரண்டு வகையினர் இருக்கிறார்கள். வீட்டிலேயே பயிற்சி மேற்கொள்கிறவர்களில் சிலர், சாப்பிட்டவுடனேயே உடற்பயிற்சியை ஆரம்பித்துவிடுவார்கள். ஜிம்மில் வொர்க்-அவுட் செய்பவர்கள் சிலர் காலை எழுந்ததுமே ஜிம்முக்குக் கிளம்பிவிடுவார்கள். இவர்களெல்லாம் உடற்பயிற்சிக்கு முன்னர் சாப்பிடவேண்டிய உணவில் அக்கறை காட்டுவதில்லை. உடம்பில் எனர்ஜி இல்லாமல், உடற்பயிற்சிகளைச் செய்யக் கூடாது. உண்மையில் தசை, தொடை போன்ற பகுதிகளுக்கான பயிற்சி செய்பவர்களிலிருந்து, மன அமைதிக்காக மெடிடேஷன் செய்பவர்கள் வரை அனைவருக்கும் அவரவர் செய்யும் பயிற்சிக்கேற்ப எனர்ஜி தேவை.

உடற்பயிற்சிக்கு முன்னர்...

சாப்பிடும் உணவுகள், ரத்த சர்க்கரை அளவை கணிசமாக உயர்த்துவதாக இருக்க வேண்டும். காரணம், ரத்த சர்க்கரை அளவு அதிகமாகும்போது அடுத்த சில மணி நேரங்களுக்கு உடல் எனர்ஜெட்டிக்காக இருக்கும். அந்த வகையில், வொர்க்-அவுட் செய்வதற்கு முன்னர் சாப்பிடவேண்டிய உணவுகளின் பட்டியல் இங்கே...

* ஆப்பிள்

* ஆரஞ்சு

* பேரிக்காய்

* பப்பாளி

* பீனட் பட்டர் தடவிய முழு தானிய ரொட்டி

* ஓட்ஸ்

* தயிர்

*கிரீன் டீ

* நட்ஸ்.

உடற்பயிற்சிக்குப் பின்னர்...

உடற்பயிற்சி செய்யும்போது, உடலிலிருக்கும் சக்தி அனைத்தும் பயன்படுத்தப்பட்டிருக்கும். எனவே, உடற்பயிற்சிக்குப் பின்னர் உட்கொள்ளும் உணவுகள் அனைத்தும் எளிதில் விழுங்கக்கூடிய, அதிகம் மென்று சாப்பிட அவசியமில்லாத உணவுகளாக இருக்க வேண்டும். பொதுவாக, உடற்பயிற்சி செய்து முடித்ததும் பலரும் எனர்ஜிக்காக எலெக்ட்ரோலைட்ஸ், புரோட்டீன் டிரிங்ஸ் போன்றவற்றை உட்கொள்வார்கள். அவர்கள், அவற்றுக்குப் பதிலாக

* தண்ணீர்

* இளநீர்

* வாழைப்பழம் போன்றவற்றை உட்கொள்ளலாம்.

* வொர்க்-அவுட் செய்யும்போது, உடலிலிருக்கும் அமினோ அமிலம் அனைத்தும் நீங்கிவிடும் என்பதால், அமினோ அமிலம் அதிகமிருக்கும் உணவுகளை உட்கொள்ளலாம். தசைக்கான வலிமையை அதிகரிப்பதில் அமினோ அமிலத்துக்கு முக்கியப் பங்கு இருக்கிறது. அந்த வகையில், அவித்த முட்டை, தயிர், மோர், பால் போன்றவற்றை உட்கொள்வது மிக நல்லது. கொழுப்புச்சத்து அதிகமுள்ள உணவுகளை முழுமையாக தவிர்த்துவிட வேண்டும்.

உகந்த நேரம்

* செரிமானத்துக்குப் பிறகுதான், தேவையான சக்தி உடலுக்குக் கிடைக்கும் என்பதால், 20 - 30 நிமிடங்களுக்குள் செரிமானம் ஆகக்கூடிய வாழைப்பழம், பேரீச்சம்பழம் போன்றவற்றை உட்கொள்ளவும்.

* உடற்பயிற்சி செய்யப் போவதற்கு, 40 முதல் 60 நிமிடங்களுக்கு முன்னர் சாப்பிட்டுவிட வேண்டும்.

* உடற்பயிற்சி செய்து முடித்த அடுத்த ஒரு மணி நேரம், மிகவும் மதிப்புவாய்ந்தது. காரணம், அந்த நேரத்தில்தான் தசைகள் சத்துக்காகக் காத்திருக்கும். அப்போது சாப்பிடும் உணவு, நீங்கள் செய்த உடற்பயிற்சியை முழுமையாக்கி, உடல் வலிமைக்கு வலுசேர்க்கும்.

* உடற்பயிற்சி செய்து முடித்த 20 நிமிடங்களுக்குள் ஏதாவதொரு ஹெல்த்தி ஸ்நாக்ஸைச் சாப்பிட வேண்டும். அதிகபட்சம் 3 முதல் 4 மணி நேரத்துக்குப் பிறகு, உணவு உட்கொள்ளலாம்.

தண்ணீர் அவசியம்!

* உடற்பயிற்சிக்கு முன்னரும் பின்னரும், 2 முதல் 3 டம்ளர் தண்ணீர் குடிக்க வேண்டும்.

* உடற்பயிற்சியின்போது, ஒவ்வொரு 15 - 20 நிமிடங்களுக்கும் சிறிது தண்ணீர் குடிக்கவும். பெரும்பாலும் பயிற்சி செய்யும்போது அதிகமாக தண்ணீர் தாகம் எடுக்கும். தாகம் எடுத்தவுடன் வேக வேகமாக தண்ணீர் அருந்திவிடாமல், கொஞ்சம் கொஞ்சமாகக் குடிக்கவும்.

ஃபிட்னெஸுக்கான....

* சர்க்கரைப் பொருள்களையும், கொழுப்புச்சத்துள்ள உணவுகளையும் அன்றாட உணவிலிருந்து முழுமையாகத் தவிர்த்துவிடுங்கள்.

* முழுதானிய உணவுகள், பழங்கள், காய்கறிகளை உணவில் அதிகம் சேர்த்துக்கொள்ளவும். உடலில் நீர் வறட்சி ஏற்படாத அளவுக்குத் தண்ணீர் குடிக்கவும்.

* அத்லெட்ஸ், பாடி-பில்டர்ஸ் போன்ற அதிகமாக உடற்பயிற்சி செய்பவர்கள், பயிற்சியாளர்களின் பரிந்துரைப்படி தண்ணீரோடு சேர்த்து ஸ்போர்ட்ஸ் டிரிங்ஸ், எலெக்ட்ரோலைட்ஸ் போன்றவற்றை அருந்தலாம்.

* தினசரி உணவில், 55-60 சதவிகிதம் கார்போஹைட்ரேட்ஸ் (ஓட்ஸ், பீன்ஸ், பழங்கள், காய்கறிகள், கோதுமை, பாஸ்தா போன்றவை), 15-20 சதவிகிதம் கொழுப்புச்சத்து (மீன், நட்ஸ்), 15-20 சதவிகிதம் புரதம் (மீன், சிக்கன், குறைந்த கொழுப்புச்சத்துள்ள பால் பொருள்கள்) உட்கொள்ளலாம்.

* முழு உணவாக ஒரே நேரத்தில் உட்கொள்வதற்குப் பதிலாக, உணவைப் பிரித்து 5 முதல் 7 தடவையாகச் சாப்பிடுங்கள்.

* முதன்முறையாக உடற்பயிற்சி செய்யும் சிலர், வார்ம்-அப் செய்யாமல் நேரடியாகப் பயிற்சிகளை மேற்கொள்வதுண்டு. வார்ம்-அப் செய்யாமல், பயிற்சியைத் தொடங்கவேண்டாம். புதிதாக ஜிம் போகும் சிலர், ஆர்வத்தில் அளவுக்கதிகமாக பயிற்சி செய்துவிடுவதுமுண்டு. கொஞ்சம் கொஞ்சமாக உங்கள் பயிற்சி நேரத்தையும், பயிற்சி முறைகளையும் அதிகப்படுத்துங்கள். அதுதான் உடலுக்கும் ஆரோக்கியத்துக்கும் நல்லது.

எந்த நேரத்தில் உடற்பயிற்சி செய்தாலும் அது நல்லதுதான். ஆனால், உடற்பயிற்சியால் உண்டாகும் சிறந்த பலனை அடைவதற்கு நேரம் முக்கியம். அதிலும் உடற்பயிற்சி செய்வதற்கான சிறந்த நேரம் என்பது ஆண்களுக்கும் பெண்களுக்கும் வேறுபடலாம்.

பெண்கள் காலையில் உடற்பயிற்சி செய்யும்போது உடலில் உள்ள அதிக கொழுப்பு கரைவதாகவும், இதுவே ஆண்கள் மாலை நேரத்தில் உடற்பயிற்சி செய்யும்போது நிகழ்வதாக தெரியவந்துள்ளது.

ஒவ்வொரு பாலினத்திற்கும் வேறுபடும் ஹார்மோன்கள் மற்றும் உறங்கும் நேரம், விழித்திருக்கும் நேரம், உணவு உண்ணும் நேரம் என அனைத்து உடல் செயல்பாடுகளையும் கட்டுப்படுத்தும் நம் 'உடல் கடிகாரம்' ஆகியவை இதில் முக்கிய பங்கு வகிக்கலாம்.

நல்ல ஆரோக்கியமான, சுறுசுறுப்பான 30 ஆண்கள் மற்றும் 26 பெண்களிடையே இந்த ஆய்வு மேற்கொள்ளப்பட்டது. இவர்கள் அனைவரும் 25 முதல் 55 வயதுக்கு உட்பட்டவர்கள். 12 வாரங்கள் அவர்களிடையே நடத்தப்பட்ட ஆய்வில், ஸ்ட்ரெச்சிங், ஓட்டம், ரெசிஸ்டன்ட் எனப்படும் எதிர்ப்பு பயிற்சி, தசையை வலுவாக்கும் பயிற்சிகள் என, பல்வேறு விதமான உடற்பயிற்சிகளை அவர்கள் மேற்கொள்வதால் ஏற்படும் விளைவுகள் கண்காணிக்கப்பட்டன.

ஆய்வுக்கு உட்படுத்தப்பட்டவர்களுள் ஒரு குழுவினர் காலை 8:30 மணிக்கு முன்னதாக உடற்பயிற்சி செய்தனர். மற்றொரு குழுவினர் அதே உடற்பயிற்சிகளை மாலை 6 மணி முதல் 8 மணிக்கு இடைப்பட்ட நேரத்தில் மேற்கொண்டனர். அனைத்து பங்கேற்பாளர்களும் பிரத்யேகமாக தயாரிக்கப்பட்ட குறிப்பிட்ட உணவுமுறையைக் கடைபிடித்தனர்.

பங்கேற்பாளர்களின் ரத்த அழுத்தம் மற்றும் உடல் கொழுப்பின் அளவை ஆராய்ச்சியாளர்கள் ஆய்வுகாலத்தில் பரிசோதித்து வந்தனர். மேலும், இந்த காலகட்டத்தில் அவர்களின் உடல் நெகிழ்வு தன்மை, பலம், ஏரோபிக் ஆற்றல் ஆகியவையும் பரிசோதிக்கப்பட்டது.

இந்த ஆய்வில் பங்கேற்ற அனைவரும் எந்த நேரத்தில் உடற்பயிற்சி மேற்கொண்டிருந்தாலும் அவர்களுடைய ஒட்டுமொத்த உடல்நலனும் மேம்பட்டுள்ளது.

"ஒவ்வொரு பிரச்னைக்கும் ஒவ்வொரு நேரம் சிறந்தது"

"உங்களால் எந்த நேரத்தில் உடற்பயிற்சி மேற்கொள்ள முடியுமோ, அந்த நேரம்தான் உடற்பயிற்சி செய்ய சிறந்த நேரமாகும். உங்களின் நேரத்திற்கு ஏற்ப உடற்பயிற்சியை மேற்கொள்ளலாம்.

வயிற்றுப்பகுதியில் உள்ள கொழுப்பை குறைக்க விரும்பும் மற்றும் தங்களின் ரத்த அழுத்தத்தைக் குறைக்க முயலும் பெண்கள் காலையில் உடற்பயிற்சி செய்வதை இலக்காக வைக்க வேண்டும்.

கல்லீரல் உள்ளிட்ட உடல் உள்ளுறுப்புகளை சுற்றியுள்ள வயிற்றுப்பகுதி கொழுப்புகள் ஆபத்தானது என்பதால் இது மிகவும் முக்கியமானது.

எனினும், உடலின் மேல்பகுதியில் தசை பலத்தை அதிகரிக்க முயற்சிக்கும் பெண்கள் மற்றும் தங்களின் மனநிலை, உட்கொள்ளும் உணவை மேம்படுத்த விரும்பும் பெண்களும் மாலையில் உடற்பயிற்சி செய்ய வேண்டும்.

ஆண்கள் காலை, மாலை என எந்த நேரத்தில் உடற்பயிற்சி செய்தாலும் அவர்களின் உடல்பலம் அதிகரிக்கும்.

ஆனால், "தங்களின் இதயநலன், வளர்சிதை மாற்றம் (மெட்டபாலிசம்) மற்றும் மனநலனை மேம்படுத்த விரும்பும் ஆண்களுக்கு மாலை நேர உடற்பயிற்சி சிறந்ததாக உள்ளது.

மாலை நேர உடற்பயிற்சி வளர்சிதை மாற்ற நலனை மேம்படுத்துவதுடன், உடல் பருமன், இரண்டாம் வகை நீரிழிவு நோய் மற்றும் பக்கவாதம் போன்றவை ஏற்படுவதற்கான ஆபத்துகளையும் குறைக்கிறது.

பெண்களுக்கு அதிகளவில் வயிற்றுப்பகுதியில் கொழுப்புகள் இருப்பதால், அவர்கள் காலையில் அதிகளவிலான கொழுப்பை எரிக்கலாம் என ஆராய்ச்சியாளர்கள் கூறுகின்றனர். ஏற்கெனவே கூறப்பட்டதுபோல உடல் கடிகாரமும் இதற்கு காரணமாக இருக்கலாம்.