முழங்கைகளில் வலி, விளையாட்டு பயிற்சி செய்யும் போது வலி அதிகரிப்பது இவை `டென்னிஸ் எல்போ' என்ற முழங்கை வாதத்தில் அதிகமாக காணப்படும். `டென்னிஸ் எல்போ' அல்லது `லேட்டிரல் எபிகாண்டிலைடிஸ்' என்பது முழங்கைகளில் ஏற்படுகின்ற ஒரு வாதம் ஆகும். இது முழங்கையில் உள்ள தசைகள் மற்றும் தசை நாண்களை அதிகமாகப் பயன்படுத்துவதால் ஏற்படுகிறது. `டென்னிஸ் எல்போ' பெரும்பாலும் மணிக்கட்டு மற்றும் கையின் தொடர்ச்சியான இயக்கங்களுடன் தொடர்புடையது.
இதன் பெயர் `டென்னிஸ் எல்போ' என இருந்தாலும் டென்னிஸ் விளையாடாமல் கைகளால் தொடர் வேலை செய்யும் பிளம்பர்கள், கொத்தனார்கள், ஓவியர்கள், தச்சர்கள், இறைச்சி கடைக்காரர்கள், டிரைவிங், சமையல் செய்பவர்கள், கணினியைப் பயன்படுத்துபவர்கள் ஆகியோருக்கு இந்த பாதிப்பு ஏற்படுகிறது. அதிக நேரம் கைகளை பயன்படுத்தி வேலை செய்வது, முன் கை தசைகளை தொடர்ச்சியாக இயக்குவது மற்றும் தசை அழுத்தம் தரும் பணிகளை செய்யும் போது டென்னிஸ் எல்போ பாதிப்பு வருகிறது.
அறிகுறிகள்:
முழங்கைகளில் வலி, கைகளால் வேலை செய்தால் வலி அதிகரித்தல், நடுக்கம், கையை மடக்க முடியாமல் விறைப்பாக இருத்தல், முழங்கைகளில் வீக்கம், கைகளில் பலவீனம் போன்றவை காணப்படும்.
இந்த நோயை எக்ஸ்-ரே, சி.டி. அல்லது எம்.ஆர்.ஐ. ஸ்கேன் பரிசோதனைகள் செய்து அறியலாம். டென்னிஸ் எல்போ பிரச்சினைக்கு தீர்வாக கீழ்க்கண்ட சித்த மருந்துகள் பயன்தரும். இவற்றை அரசு அங்கீகாரம் பெற்ற சித்த மருத்துவரின் ஆலோசனையின் பேரில் எடுத்துக்கொள்ள வேண்டும்.
1) பறங்கி ரசாயனம் 500 மி.கி. உணவுக்குப்பின் இரு வேளை.
2) அமுக்கரா சூரணம் 1 கிராம், குங்கிலிய பற்பம் 200 மி.கி., அயவீரச் செந்தூரம் 200 மி.கி., முத்துச்சிப்பி பற்பம் 200 மி.கி. உணவுக்குப்பின் இருவேளை தேன் அல்லது வெந்நீரில் கலந்து சாப்பிட வேண்டும்.
3) முழங்கையில் வலி உள்ள இடத்தில் உளுந்து தைலம் வைத்து தேய்க்க வேண்டும்.
4) கை தசைகளை வலுப்படுத்தும் புரத உணவுகள் மற்றும் பயிற்சிகளை தொடர்ந்து செய்ய வேண்டும்.
