கர்நாடகா

நாடு முழுவதும் நவராத்திரி பண்டிகை உற்சாகமாக கொண்டாடப்பட்டது. வடமாநிலங்கள் உள்பட நாட்டின் பல்வேறு பகுதிகளில் கோவிலுக்கு அருகே பந்தல் அமைத்து துர்கா அம்மன் சிலையை நிறுவி சிறப்பு பூஜைகள் நடத்தி பக்தர்கள் வழிபாடு செய்தனர்.

அந்த வகையில் பெங்களூரு நகரில் உள்ள பகுதியிலும் நவராத்திரியையொட்டி கோவிலுக்கு அருகே துர்கா அம்மன் சிலை நிறுவி பந்தல் அமைக்கப்பட்டிருந்தது. ஏராளமான பக்தர்கள் திரண்டு வந்து சாமி தரிசனம் செய்தனர். அப்போது சாமி தரிசனத்தில் கலந்து கொண்டிருந்த ஐ.டி ஊழியர் ஒருவர் ஒரு கையில் லேப்டாப்பை திறந்தபடியும் மறுகையில் செல்போனை வைத்து கொண்டு வேலை பார்த்தபடியும் பூஜையில் கலந்து கொண்டார்.

இதுதொடர்பான வீடியோ வலைத்தளத்தில் வெளியானது. அதில், 'கடமை உணர்ச்சிக்கு ஒரு அளவே இல்லையா?", "முழு மனதுடன் வேலையை செய்யுங்கள்" உள்ளிட்ட கருத்துகளை பதிவிட்டு இதனை இணையவாசிகள் விமர்சித்து வருகிறார்கள்.

தமிழ்நாட்டில் இன்று வடகிழக்கு பருவமழை தொடங்கியது. வங்கக்கடலில் காற்றழுத்த தாழ்வு மண்டலம் உருவாகியுள்ளதால் வடதமிழகத்தின் பலவேறு பகுதிகளில் கனமழை கொட்டி தீர்த்து வருகிறது.

கொட்டும் கனமழையால் சென்னையின் பல்வேறு இடங்களில் மழைநீர் தேங்கியுள்ளதால் பொதுமக்களின் இயல்பு வாழ்க்கை பாதித்துள்ளது.

இந்நிலையில், பெங்களூரு நகரில் இன்று பெய்த கனமழையால் சாலைகள் முழுக்க வெள்ளக்காடாகின. இதனால் கடுமையான போக்குவரத்து நெரிசல் ஏற்பட்டது.

இதனையடுத்து பெங்களூருவிற்கு வானிலை மையம் ஆரஞ்சு அலர்ட் விடுத்துள்ளதால் பள்ளிகளுக்கு விடுமுறை அளிக்கப்பட்டுள்ளது.

பெங்களூரில் உள்ள நிறுவனங்கள் தங்களது தொழிலாளர்களை வீட்டில் இருந்து பணிபுரிய அனுமதிக்க வேண்டும் என்று கர்நாடக அரசு கோரிக்கை விடுத்துள்ளது.

பத்திரிகையாளர் கௌரி லங்கேஷ் கொலை வழக்கில் குற்றம்சாட்டப்பட்ட இருவருக்கு இந்து அமைப்புகள் உற்சாக வரவேற்பு அளித்த சம்பவம் சர்ச்சையை ஏற்படுத்தி இருக்கிறது.

கொலை வழக்கில் சிக்கி கடந்த ஆறு ஆண்டுகளாக சிறைவாசம் அனுபவித்த பரசுராம் வாக்மோர் மற்றும் மனோகர் யாதவ் ஆகிய இருவரும் கடந்த அக்டோபர் 11 ஆம் தேதி ஜாமினில் வெளியே வந்தனர். இருவருக்கும் பெங்களூரு செஷன்ஸ் நீதிமன்றம் கடந்த அக்டோபர் 9 ஆம் தேதி ஜாமின் வழங்கி உத்தரவிட்டது.

ஜாமின் கிடைத்த நிலையில், இருவரும் கடந்த 11 ஆம் தேதி பரப்பன அக்ரஹாரா சிறையில் இருந்து வெளியே வந்தனர். அங்கிருந்து சொந்த ஊரான விஜயபுராவுக்கு சென்ற பரசுராம் மற்றும் மனோகர் ஆகிய இருவருக்கும் உள்ளூர் வாசிகளான இந்து அமைப்பினர் மாலை அணிவித்து உற்சாக வரவேற்பு அளித்துள்ளனர்.

சிறையில் இருந்து ஜாமின் பெற்று வந்த இருவரை இந்து அமைப்பினர் சத்ரபதி சிவாஜி சிலை அருகே அழைத்து சென்று இருவருக்கும் மாலை அணிவித்தனர். அதன்பிறகு அருகில் அருந்த கோவில் ஒன்றுக்கு அழைத்து செல்லப்பட்டனர்.

கொலை வழக்கில் குற்றம்சாட்டப்பட்டு சிறையில் இருந்து ஜாமினில் வெளியே வந்துள்ள இருவருக்கு உள்ளூரில் இந்து அமைப்பினர் வரவேற்பு கொடுத்த சம்பவம் முகம் சுளிக்க செய்தது.

பெங்களூரு:

கர்நாடக மாநில துணை முதல்-மந்திரி டி.கே. சிவக்குமார் நிருபர்களிடம் கூறியதாவது:-

நவம்பர் 1-ந் தேதி கர்நாடகாவிற்கு முக்கியமான நாள். அன்றைய தினத்தை மாநிலதினமாக (கர்நாடக ராஜ்யோத்சவா) கொண்டாடுறோம். கன்னட மொழி மற்றும் மாநிலத்தின் பெருமையை வளர்க்கும் வகையில் கர்நாடக மாநிலம் முழுவதும் உள்ள அனைத்து நிறுவனங்கள், மற்றும் கல்வி மையங்கள், தொழிற்சாலைகள், வணிக நிறுவனங்கள் மற்றும் பிற நிறுவனங்கள் அன்றைய தினம் கட்டாயமாக கர்நாடகா மாநில கொடியை ஏற்றி வைக்க கர்நாடக வளர்ச்சித்துறை அமைச்சர் என்ற முறையில் உத்தரவிடுகிறேன்.

தனியார் மற்றும் அரசு கல்வி நிறுவனங்களில் கன்னட மொழி மீது மாணவர்களிடையே அன்பையும், பாசத்தையும் வளர்க்கும் வகையில் கொண்டாட்டங்களை கட்டாயமாக நடத்த வேண்டும். சுதந்திர தினம் மற்றும் குடியரசு தினத்தை போன்று நவம்பர் 1-ந் தேதியும் பள்ளிகள் மற்றம் கல்லூரிகளில் கலச்சார நிகழ்ச்சிகளை நடத்த வேண்டும்.

நவம்பர் 1-ந் தேதியன்று கன்னட மொழியை கொண்டாடுவது கட்டாயமாக்கப்பட வேண்டும். இந்த நாள் மாநிலம் உருவானதை குறிக்கிறது. மேலும் கன்னட மொழி மற்றும் மாநிலத்தின் கலாச்சார பாரம்பரியத்தை மதிக்க வேண்டியதன் முக்கியத்துவத்தை கருத்தில் கொண்டு இதை அனைவரும் கடைபிடிக்க வேண்டும்.

இவ்வாறு அவர் கூறினார்.

ஊரு கண்ணு... உறவு கண்ணு... நல்ல கண்ணு... நொள்ள கண்ணு... என குழந்தைகளுக்கு தாய்மார்கள் கண்திருஷ்டி கழிப்பதை பார்த்து இருப்போம்.

அதுபோல் விவசாயிகள் தாங்கள் வளர்க்கும் பயிர்களுக்கும் கண் திருஷ்டி படாமல் இருக்க பிய்ந்து போன துடைப்பம், காலணியை தொங்கவிடுவது வழக்கம்.

பொதுவாக முருங்கைக்காய் அதிகம் விளையும் பட்சத்தில் கண்திருஷ்டி படக்கூடாது என்பதற்காக முருங்கை மரத்தில் பிய்ந்து போன துடைப்பம், காலணியை தொங்கவிடுவது பழங்காலம் தொட்டே நடைமுறையில் உள்ளது. அதுபோல் தோட்டங்களிலும் வெள்ளரிக்காய், கொய்யா பழம், நெல்லிக்கனி, தேங்காய் அதிகமாக விளைந்திருந்தாலும் இதே பாணியை விவசாயிகளும் கடைபிடிப்பது வாடிக்கையானது. மேலும் சோள காட்டு பொம்மையையும் வைப்பதும் நமக்கு தெரிந்த விஷயம்.

இந்த வாடிக்கையிலும் வேடிக்கையான விஷயம் நம்ம கர்நாடகத்தில் அரங்கேறி வருகிறது. அதாவது வெள்ளரிக்காய் பயிரிட்டுள்ள விவசாயி, அதன் மீது கண்பட கூடாது என்பதற்காக நடிகைகளின் படங்களை கம்புகளில் கட்டி தொங்கவிட்டுள்ளார். அடடே... இது கொஞ்சம் புதுசா இருக்கே.. என தோன்றுகிறதா...

ஆம்.... இந்த நூதன சிந்தனை கர்நாடக மாநிலம் ராமநகர் மாவட்டம் சன்னப்பட்டணா தாலுகா காரஹள்ளி கிராமத்தை சேர்ந்த விவசாயிக்கு தோன்றியது. இதன் விளைவாக தனது தோட்டத்தில் பயிரிட்டுள்ள வெள்ளரிக்காய் மீது கண் திருஷ்டி படக்கூடாது என்பதற்காக நடிகைகளின் படங்களை தொங்கவிட்டுள்ளார்.

அதாவது ராதிகா பண்டிட், ராகிணி திவேதி, ராஸ்மிகா மந்தனா, ஸ்ரீலீலா, சோனல் உள்ளிட்ட நடிகைகளின் படங்களை சிறிய பேனர் போல் அச்சிட்டு தனது தோட்டத்தில் கம்புகளை நட்டு தொங்கவிட்டுள்ளார். இவ்வாறு செய்தால் தோட்டத்திற்கு வருவோரின் கண்கள் வெள்ளரிக்காய் மீது படாமல், நடிகைகளை தான் பார்க்கும், இதன் மூலம் வெள்ளரிக்காய் மீது கண்திருஷ்டி படாமல் விளைச்சல் அதிகரித்து நல்ல மகசூல் கிடைக்கும் என அந்த விவசாயி கருதியதாகவும், அதனால் இந்த யோசனையை அவர் நடைமுறைப்படுத்தி இருப்பதாகவும் சொல்லப்படுகிறது.

தனது வெள்ளரிக்காய் தோட்டத்தில் விவசாயி, நடிகைகளின் படங்களை கட்டி தொங்கவிட்டது சமூக வலைதளங்களிலும் வைரலாகி வருகிறது.

கர்நாடக மாநிலத்தில் நூதன முறையில் கொள்ளை சம்பவத்தில் ஈடுபட்ட நகரத்பேட்டையைச் சேர்ந்த கொள்ளையன் மஞ்சுநாதன் என்பவர் போலீசிடம் வசமாக சிக்கியுள்ளான்.

புறாக்களை பயன்படுத்தி தான் கொள்ளையடிக்கும் முறை குறித்து போலீசார் நடத்திய விசாரணையில் தெரிவித்துள்ளான்.

மஞ்சுநாதன் ஒவ்வொரு முறை கொள்ளையடிக்க செல்லும்போதும், புறாக்களை தன்னுடன் எடுத்துச் செல்வது வழக்கம். அப்போது, வீடுகளை நோட்டமிடும் மஞ்சுநாதன், இலக்கை எட்டியவுடன் சம்பந்தப்பட்ட வீட்டின் மீது இரண்டு புறாக்களை விடுவிப்பான்.

பறவைகள் பெரும்பாலும் கூரை அல்லது பால்கனிக்கு பறந்து, சிறிய கவனத்தை ஈர்க்கும். ஆர்வமுள்ள குடியிருப்பாளர்கள் புறாக்களை எதிர்கொண்டால், மஞ்சுநாதன் அங்கு செல்வதில்லை. ஒரே வேளை புறாவை யாரும் நெருங்கவில்லை எனில், வீட்டில் புகுந்து கொள்ளையடிப்பதை வழக்கமாக கொண்டுள்ளான்.

பூட்டிய வீட்டை அடையாளம் கண்டவுடன், மஞ்சுநாத் இரும்பு கம்பியை பயன்படுத்தி வீட்டின் முன்பக்க கதவை உடைத்து உள்ளே புகுந்து, தங்க நகைகள் மற்றும் பணத்தை குறிவைத்து கொள்ளையில் ஈடுபட்டு வந்துள்ளான்.

இவ்வாறு, நகரம் முழுவதும் குறைந்தது 50 கொள்ளை சம்பவத்தில் ஈடுபட்டுள்ளதாக விசாரணையில் தெரியவந்துள்ளது.

இந்த விசாரணையை தொடர்ந்து, மஞ்சுநாதன் இதுவரை கொள்ளையடித்த பொருட்களை போலீசார் மீட்டெடுப்பார்கள் என்று எதிர்பார்க்கப்படுகிறது.

பெங்களூரு நகரில் கேக் சாப்பிட்ட 5 வயது குழந்தை உயிரிழந்த சம்பவம் அதிர்ச்சியை ஏற்படுத்தியுள்ளது.

ஸ்விக்கியில் டெலிவரி ஊழியராக பணிபுரியும் பாலராஜ் என்பவர் வாடிக்கையாளர் ஒருவர் ஆர்டர் செய்து கேன்சல் செய்த கேக்கை வீட்டிற்கு எடுத்து வந்துள்ளார். அந்த கேக்கை சாப்பிட்ட பாலராஜின் 5 வயது குழந்தை உயிரிழந்துள்ளது.

மேலும் அந்த கேக்கை சாப்பிட்ட பாலராஜ் மற்றும் அவரது மனைவி நாகலட்சுமி ஆகியோர் மருத்துவமனையில் தீவிர சிகிச்சை பிரிவில் (ICU) சிகிச்சை பெற்று வருகின்றனர்.

இந்த சம்பவம் தொடர்பாக பேசிய ஸ்விக்கியின் செய்தித் தொடர்பாளர், "பெங்களூருவில் நடந்த இந்த துரதிர்ஷ்டவசமான சம்பவத்தால் நாங்கள் மனம் உடைந்துள்ளோம். பாதிக்கப்பட்ட குடும்பத்தினருக்கு தேவையான அணைத்து உதவிகளையும் எங்களது குழுவினர் செய்து வருகிறார்கள்.

இந்த விவகாரம் தொடர்பாக அதிகாரிகள் விசாரணை நடத்துவதற்கு நாங்களும் முழு ஒத்துழைப்பு அளித்து வருகிறோம். உணவுப் பாதுகாப்பே எங்களுக்கு முதன்மையானது. ஸ்விக்கி ஆப்பில் உள்ள அனைத்து உணவகங்களும் FSSAI உரிமத்தை கட்டாயம் வைத்திருக்க வேண்டும்" என்று தெரிவித்தார்.

இந்த சம்பவம் குறித்து போலீசார் விசாரணை மேற்கொண்டு வருகின்றனர்.

கர்நாடக மாநிலம் பெங்களூருவில் உள்ள பன்னர்கட்டா தேசிய பூங்காவில் சஃபாரி சென்று கொண்டிருந்த இருந்த பேருந்தின் ஜன்னல் மீது எதிர்பாராதவிதமாக சிறுத்தை பாய்ந்ததால் சுற்றுலாப் பயணிகள் அதிர்ச்சியடைந்தனர்.

இது தொடர்பான வீடியோ இணையத்தில் தற்போது வைரலாகி வருகிறது. அந்த வீடியோவில் பேருந்து ஜன்னலில் சிறுத்தை தலையை விட்டு பார்க்கிறது. இதனைப் பார்த்த அச்சமடைந்த சுற்றுலாப் பயணிகள் கூச்சலிட்டு அலறத் தொடங்கினர்.

கர்நாடக வனத்துறை அமைச்சர் ஈஷ்வர் காந்த்ரே கடந்த ஜூன் மாதம் பன்னர்கட்டா உயிரியல் பூங்காவில் சிறுத்தை சஃபாரியை தொடங்கி வைத்தார். இதனால் உயிரியல் பூங்காவிற்கு வரும் மக்கள் வனவிலங்குகளை மிக அருகில் பார்த்து மகிழ்ச்சியடைந்து வருகின்றனர்.

கூட்டணி ஆட்சியில் மேற்கொண்ட பணிகளையும், காங்கிரஸ் செய்த வளர்ச்சி பணிகள் குறித்து விவாதிக்க தயாரா? என்று முதல்-மந்திரி சித்தராமையாவுக்கு, மத்திய மந்திரி குமாரசாமி சவால் விடுத்துள்ளார்.

பெங்களூருவில் நேற்று மத்திய கனரக தொழில் துறை மந்திரி குமாரசாமி நிருபர்களிடம் கூறியதாவது:-

சித்தராமையாவுக்கு எதிராக எதிர்க்கட்சிகள் பொறாமைப்படுவதாக திரும்ப திரும்ப குற்றம்சாட்டு வருகிறார். மூடா முறைகேடு வழக்கில் அவரது மனைவி பெயரை இழுத்து விட்டதாக எதிர்க்கட்சிகள் மீது குற்றம்சாட்டுகிறார்.

நீங்கள் வீட்டில் இருந்த உங்களுடைய மரியாதைக்குரிய மனைவியை இழுத்து விட்டீர்கள். இது நாங்களும், எதிர்க்கட்சிகளும் அல்ல. அவரது பெயரில் நீங்கள் செய்ய தவறால் அவர் பெயரை வெளியில் கொண்டு வந்துள்ளீர்கள்.

முதல்-மந்திரி சித்தராமையா எனக்கு குதிரை கொடுத்ததாகவும், அந்த குதிரையில் ஏறி சவாரி செய்ய தெரியவில்லை என்றும் கூறி இருக்கிறார். அடிக்கடி அவரை பார்த்து எதிர்க்கட்சிகள் வயிறு எரிவதாக கூறி வருகிறார். வால்மீகி வளர்ச்சி ஆணையத்தில் நிதிமுறைகேடு செய்தது யார்?. மாநிலத்தில் இந்த முறை எதிர்பார்ப்பை மீறி மழை பெய்து வருகிறது. ஆனால் ஏரி, குளங்களை நிரப்பும் வேலையை இந்த அரசு செய்யவில்லை.

எங்கள் கட்சியின் 38 எம்.எல்.ஏ.க்கள் சேர்ந்து காங்கிரசுடன் கூட்டணி அமைத்திருந்தோம். கூட்டணி ஆட்சியில் காங்கிரசார் எங்களுக்கு சரியான ஒத்துழைப்பு அளிக்கவில்லை. அப்படி இருந்தும் நான் முதல்-மந்திரியாக இருந்த 14 மாதங்களில் பல்வேறு வளர்ச்சி பணிகளை செய்திருந்தேன். தற்போது மாநிலத்தில் தனிப்பெரும்பான்மை பலத்துடன் காங்கிரஸ் ஆட்சி நடக்கிறது.

கூட்டணி ஆட்சியில் நான் 14 மாதங்களில் செய்த வளர்ச்சி பணிகள் குறித்தும், தற்போது சித்தராமையா தலைமையிலான 15 மாதங்களில் நடந்த வளர்ச்சி பணிகள் குறித்தும் விவாதிக்க தயாராக உள்ளேன். இதற்கு சித்தராமையா தயாரா?.

பெங்களூருவில் மழை வந்தாலே வீடுகள், குடியிருப்புகள் தண்ணீரில் மூழ்கி விடுகிறது. இதனை தடுக்க இந்த ஆட்சியில் என்ன நடவடிக்கை எடுத்தார்கள். சாதிவாரி கணக்கெடுப்பு அறிக்கை அரசுக்கு கிடைத்து பல மாதங்கள் ஆகி விட்டது.

தற்போது அரசியல் காரணங்களுக்காக சாதிவாரி கணக்கெடுப்பு குறித்து சித்தராமையா பேசுகிறார். காங்கிரஸ் ஆட்சியில் மக்களுக்கான பிரச்சினைகளை தீர்ப்பதில் முற்றிலும் தோல்வி அடைந்து விட்டனர். பெங்களூருவில் சாலை பள்ளங்களை மூட டி.கே.சிவக்குமார் கெடு விடுத்திருந்தார்.

சாலை பள்ளங்கள் மூடப்படவில்லை. தற்போது பெய்யும் மழையால் இன்னும் என்னவெல்லாம் ஆனது என்பதே தெரியவில்லை. முதல்-மந்திரிக்கும், மந்திரிகளுக்கும் மக்கள் பிரச்சினைகளை தீர்ப்பதில் அக்கறை கிடையாது.

இவ்வாறு அவர் கூறினார்.

கர்நாடகாவில் இஸ்ரேல் என்ற பெயரில் ஓடிய தனியார் பஸ் சர்ச்சையை ஏற்படுத்தியுள்ளது. கர்நாடக மாநிலம் மங்களூரில் மூட்பித்ரி[Moodbidri]-முல்கி [Mulki] ரூட்டில் தனியார் டிராவல்ஸ் பஸ் ஒன்றின் பெயர் இணையத்தில் வைரலாகி கண்டனங்களை குவித்தது.

அதாவது லெஸ்டர் கடீல் [Lester Kateel] என்ற நபர் இஸ்ரேல் டிராவல்ஸ் என்ற பெயரில் புதிதாக பஸ் சேவையை தொடங்கியிருந்தார். 12 வருடமாக இஸ்ரேலில் வேலை பார்த்த லெஸ்டர் கடீல் அதை நினைவுகூரும் விதமாக இஸ்ரேல் டிராவல்ஸ் என்று பெயர் வைத்துள்ளார். ஆனால் இஸ்ரேல் என எழுதப்பட்டிருக்கும் பஸ்ஸின் புகைப்படம் இணையத்தில் பெரும் விவாதத்தை ஏற்படுத்திய நிலையில் விட்டால் போதும் என்று தனது பஸ்ஸின் பெயரை கடீல் மாற்றியுள்ளார்.

பாலஸ்தீன நகரங்களின் மீது கடந்த 1 வருட காலமாக இஸ்ரேல் நடத்தி வரும் தாக்குதலில் 41 ஆயிரத்துக்கும் அதிகமானோர் உயிரிழந்தனர். மேலும் 97 ஆயிரத்துக்கும் அதிகமானோர் படுகாயமடைந்துள்ளனர். இன்று அதிகாலை காசாவில் மசூதி மற்றும் பள்ளியின் மீது நடந்த தாக்குதலில் 26 பேர் பலியானார்கள்.

மேலும் லெபானானிலும் இஸ்ரேல் தாக்குதலில் உயிரிழப்பு எண்ணிக்கை 2 ஆயிரத்தைக் கடந்துள்ளது. இந்த சூழலில் இஸ்ரேல் டிராவல்ஸ் என்று பெயர் வைப்பது பலரின் மனதையும் புண்படுத்தும் வகையில் உள்ளதாக இருப்பதால் கடீலுக்கு கண்டங்கள் எழுந்தது.

எனவே இஸ்ரேல் டிராவல்ஸ் என்ற பெயரை ஜெருசலேம் டிராவல்ஸ் என்று மாற்றியுள்ளார் ஓனர் கடீல். ஜெருசலேம் என்பது புனிதமான இடமாக கருதப்படுவதால் யாருக்கும் படிப்பில்லை என்ற வகையில் அவர் இந்த பெயர் மாற்றத்தை செய்துள்ளார்.

பெங்களூர்:

கர்நாடகா மாநிலத்தில் கடந்த சில நாட்களாக மழை தீவிரம் அடைந்து வருகிறது. நேற்று மாலை மைசூருவில் சுமார் 1 மணி நேரம் பலத்த மழை கொட்டியது. இதன் காரணமாக குளிர்ந்த காற்று வீசியது.

மேலும் இன்று முதல் 4 நாட்களுக்கு மைசூரு, குடகு, சாம்ராஜ்நகர், மாண்டியா, ஹாசன், தும்கூர், பெங்களூரு மாநகரம், பெங்களூரு புறநகர், ராம்நகர், சிக்கபள்ளாபூர், கோலார் உள்ளிட்ட இடங்களில் இடியுடன் கூடிய பலத்த மழை பெய்யும் என்று வானிலை மையம் அறிவித்துள்ளது. மேலும் தாவணகெரே, சித்ரதுர்கா, குடகு, மைசூரு, சாம்ராஜ்நகர் உள்பட 11 மாவட்டங்களுக்கு மஞ்சள் எச்சரிக்கை விடுக்கப்பட்டுள்ளது.

ரூ.50 கோடி பணம் கேட்டு மிரட்டியதாக தொழிலதிபர் விஜய் டாடா புகாரில் மத்திய அமைச்சர் எச்.டி.குமாரசாமி மீது பெங்களூரு போலீசார் வழக்குப்பதிவு செய்துள்ளனர்.

விஜய் டாடா அளித்த புகாரில், "மதசார்பற்ற ஜனதா தள தலைவர் ரமேஷ் கவுடா ஆகஸ்ட் 24ஆம் தேதி தனது வீட்டுக்கு வந்தார். அப்போது மத்திய அமைச்சர் எச்.டி. குமாரசாமிக்கு போன் போட்டு என்னிடம் கொடுத்தார். என்னிடம் போனில் பேசிய குமாரசாமி சன்னபட்னா இடைத்தேர்தலுக்காக ரூ.50 கோடி பணம் கேட்டு மிரட்டினார். பணம் ஏற்பாடு செய்யவில்லை என்றால், ரியல் எஸ்டேட் தொழிலை நடத்த முடியாது என்றும் பெங்களூரில் பிழைப்பு கூட நடத்த முடியாது என்று மிரட்டினார்.

சன்னபட்னா தொகுதி இடைத்தேர்தலில் நிகில் குமாரசாமி (எச்.டி. குமாரசாமியின் மகன்) போட்டியிட உள்ளதாகவும் அதற்கு ரூ.50 கோடி தேவை என்று ரமேஷ் கவுடா மிரட்டினார்" என்று தெரிவித்துள்ளார்.

சன்னபட்னா சட்டமன்ற உறுப்பினராக இருந்த எச்.டி. குமாரசாமி மண்டி மக்களவை தொகுதியில் வெற்றிபெற்று மத்திய அமைச்சராக நியமிக்கப்பட்டார். இதனையடுத்து சன்னபட்னா இடைத்தேர்தலில் மதச்சார்பற்ற ஜனதா தளம் வேட்பாளராக நிகில் குமாரசாமி வேட்பாளராக அறிவிக்கப்பட்டார்.