கே.கே.நகர்:
திருச்சியில் பன்னாட்டு விமான நிலையம் செயல்பட்டு வருகிறது. இங்கிருந்து வெளிநாடுகளுக்கும், வெளி மாநிலங்களும் விமானங்கள் இயக்கப்பட்டு வருகிறது. வெளிநாடுகளில் இருந்து வருபவர்கள் தங்கம் மற்றும் போதை பொருட்களை கடத்தி வருகின்றனர்.
மேலும் இங்கிருந்து வெளி நாடுகளுக்கு நட்சத்திர ஆமைகளை கடத்தி செல்கின்றனர். இதனை தடுக்க விமான பயணிகளை சுங்கதுறை அதிகாரி கடுமையாக சோதனை செய்கின்றனர். இந்த நிலையில் திருச்சி விமான நிலையத்தில் நேற்று காலை மலேசியா மற்றும் இலங்கையில் இருந்து வந்த பயணிகளிடம் ரூ.7.30 லட்சம் மதிப்புள்ள தங்கம் பறிமுதல் செய்யப்பட்டது. நேற்று காலை மலேசியாவிலிருந்து திருச்சி வந்த மலிண்டோ விமானத்தில் வந்த பயணிகளை சுங்கத்துறை வான் நுண்ணறிவு பிரிவு அதிகாரிகள் சோதனை செய்தனர். அப்போது கடலூரை சேர்ந்த ஹரிபிரகாஷ் என்பவர் உடைமைகளை சோதனை செய்தனர்.
அப்போது அவர் உள்ளாடையில் மறைத்து எடுத்து வந்த ரூ.3.75 லட்சம் மதிப் புள்ள 120 கிராம் தங்கத்தை பறிமுதல் செய்தனர்.
இதே போன்று நேற்று மதியம் இலங்கையில் இருந்து திருச்சி வந்த லங்கன் விமானத்தில் வந்த பயணிகளை சுங்கத்துறை வான்நுண்ணறிவு பிரிவு அதிகாரிகள் சோதனை செய்தனர். அப்போது விருத்தாசலத்தை சேர்ந்த அன்பரசு என்பவர் உடைமைகளை சோதனை செய்தனர். அதில் அவர் உள்ளாடையில் மறைத்து எடுத்து வந்த ரூ.3.55 லட்சம் மதிப்புள்ள 114 கிராம் தங்கத்தை பறிமுதல் செய்தனர். இருவரிடமும் இருந்து ரூ.7.30 லட்சம் மதிப்புள்ள தங்கம் பறிமுதல் செய்யப்பட்டுள்ளது.
