பூதலூர்:
தஞ்சை மாவட்டம் பூதலூரை அடுத்த திருக்காட்டுப்பள்ளியில் ஏழை மக்கள் பலரும் சொந்தவீடு இல்லாமல் வாடகை வீடுகளிலும், அரசு இடத்தில் குடிசை அமைத்தும் வசித்து வருகின்றனர். அவ்வாறு வீடுகள் இல்லாத ஏழைகள் பயன் பெற வேண்டும் என்ற நோக்கத்தில் திருக்காட்டுப்பள்ளி அருகில் கூடணாணால் கிராமத்தில் அரசு இடத்தில் தமிழ்நாடு குடிசை மாற்று வாரியத்தின் மூலம் வீடுகள் கட்டித்தர வேண்டும் என்று கோரிக்கை விடப்பட்டது.
அதன் அடிப்படையில் பாரத பிரதமரின் வீட்டு வசதி திட்டத்தில் நகர்ப்புற வீடில்லாத ஏழைகள் பயன்பெற ரூ.16 கோடியில் வீடுகள்கட்ட நிதி ஒதுக்கப்பட்டது.
தமிழக குடிசை மாற்று வாரியத்தின் திருச்சி கோட்டத்தின் வழியாக கூடணாணால் கிராமத்தில் அடுக்குமாடி வீடுகள் கட்டும் பணி தொடங்கி உள்ளன. மத்திய. மாநில அரசு மற்றும் பயனாளியின் பங்களிப்புடன் 350 சதுரஅடியில் அனைத்து வசதிகளும் கொண்டு 240 வீடுகள் கட்டப்பட்டு வருகின்றன.
வீடுகள் கட்டப்பட்டு வரும் இடத்தில் உள்ள மண்ணின் தன்மை பரிசோதனைக்கு உட்படுத்தப்பட்டது. மண் பரிசோதனை முடிவுகள் அடிப்படையில் 10 அடி ஆழத்திற்கு அஸ்திவாரம் தோண்டப்பட்டது. அஸ்திவாரம் முழுமையும் சிமிண்ட் கான்கிரீட் போடப்பட்டுள்ளது. அதில் இருந்து தூண்கள் அமைக்கப்பட்டுள்ளன. அஸ்திவாரத்தில் போடப்பட்டுள்ள சிமெண்ட் கான்கிரிட் தளத்தில் ஆங்காங்கு செவ்வக வடிவில் பள்ளம் அமைக்கப்பட்டுள்ளது.
இது போன்று செய்வதால் முழு கட்டிடமும் முழுமையாக வலுவுடன் இருக்கும் என்றும். இது போன்ற அஸ்திவாரத்தின் மேல் வீடுகள் அமைக்கப்படும் போது விரிசல்கள் ஏற்படாது என்றும் பொறியாளர்கள் தெரிவித்தனர்.
இந்த வருட இறுதியில் அல்லது 2019-ம் ஆண்டில் வீடுகள் அனைத்தும் தயாராகி திருக்காட்டுப்பள்ளி நகரில் வீடுகள் இல்லாத ஏழைமக்களுக்கு அவர்களின் பங்களிப்புடன் ஒப்படைக்கப்படும் என்று குடிசை மாற்று வாரியத்தினர் தெரிவித்தனர்.
