நெல்லை:
சங்கரன்கோவில் அருகே உள்ள பெருமாள்பட்டி கிராமத்தை சேர்ந்தவர் மாரியப்பன். இவரது மகன் சமுத்திரம் (வயது18). இவர் சமீபத்தில் பிளஸ்-2 தேர்வு எழுதினார். அதில் பெயிலாகி விட்டதால், சங்கரன் கோவிலில் உள்ள டுட்டோரியலில் படித்து வந்தார். இந்த நிலையில் சமுத்திரத்திற்கு சரியாக படிக்க முடியாததால் மனஉளைச்சல் அடைந்தார். நேற்று வீட்டில் தனியாக இருந்த சமுத்திரம் தூக்குபோட்டு தற்கொலை செய்து கொண்டார். இது குறித்து சின்னக்கோவிலான்குளம் போலீசார் வழக்குப்பதிவு செய்து விசாரணை நடத்தி வருகின்றனர்.
பணகுடி அருகே உள்ள பழவூரை அடுத்த கண்ணன்குளம் கிராமத்தை சேர்ந்தவர் தவசிமுத்து. இவரது மகன் ஹரிகரன் (25). இவர் கடந்த 18-ந்தேதி விஷம் குடித்த நிலையில் உயிருக்கு போராடி கொண்டிருந்தார். அவரை மீட்டு நாகர்கோவில் அரசு ஆஸ்பத்திரியில் அனுமதித்தனர். அங்கு சிகிச்சை பலன் இல்லாமல் நேற்று பரிதாபமாக இறந்தார்.
இதுகுறித்து பழவூர் போலீசார் வழக்குப்பதிவு செய்து விசாரணை நடத்தி வருகிறார்கள்.
பாளை அருகே உள்ள திருவண்ணநாதபுரம் பொட்டல் பகுதியை சேர்ந்தவர் பிச்சமுத்து. இவரது மனைவி அழகம்மாள் (75). இவருக்கு பல்வேறு நோய்கள் இருந்ததால் அதற்காக மாத்திரை சாப்பிட்டு வந்தார். ஆனாலும் நோய் குணமாக வில்லை என்று கூறப்படுகிறது. இதில் மனமுடைந்த அழகம்மாள் அளவுக்கு அதிகமாக அனைத்து மாத்திரை களையும் மொத்தமாக தின்று விட்டார். இதனால் உயிருக்கு ஆபத்தான நிலையில் அவரை பாளை அரசு ஆஸ்பத்திரியில் அனுமதித்தனர். அங்கு சிகிச்சை பலன் இல்லாமல் நேற்றிரவு அவர் பரிதாபமாக இறந்தார்.
இதுகுறித்து பாளை போலீசார் வழக்குப்பதிவு செய்து விசாரணை நடத்தி வருகிறார்கள்.
