சேலம்:
சேலம் அம்மாப்பேட்டை நந்தனார் தெருவை சேர்ந்தவர் அழகேசன். இவருக்கு மேனகா (வயது 33) கலை மகள் (26) உள்பட 3 மகள்கள் உள்ளனர். இதில் ஒருவருக்கு திருமணம் பேசி நிச்சயம் செய்யப்பட்டது.
இந்த நிலையில் மணமகன் வீட்டார், அழகேசன் வீட்டிற்கு வந்துள்ளனர். அப்போது அழகேசன் வீட்டில் இல்லை. அவர் வெளியே சென்றிருந்தார். மகள்கள் மட்டும் வீட்டில் இருந்தனர். அவர்கள் மணமகன் வீட்டாருக்கு டீ, காபி கொடுக்கவில்லை என தெரிகிறது. தங்களை சரியாக கவனிக்காதது குறித்து மணமகன் குடும்பத்தினர் அழகேசனிடம் புகார் கூறினர்.
இதனால் வெளியே சென்றிருந்த அழகேசன் வீட்டிற்கு வந்து மேனகா, கலைமகள் மற்றும் மற்றொரு மகள் ஆகியோரை அழைத்து சத்தம் போட்டதாக தெரிகிறது. இதில் அவர்கள் மனம் உடைந்தனர். 3 பேரும் சேர்ந்து தற்கொலை முடிவை எடுத்தனர். இன்று காலை வீட்டில் யாரும் இல்லாத நேரத்தில் பூச்சிக்கொல்லி மருந்தான குருணை மருந்தை வாங்கி 3 பேரும் ஓரே நேரத்தில் குடித்து தற்கொலைக்கு முயன்றனர்.
இதையறிந்த உறவினர்கள் பதறி துடித்தனர். உடனடியாக மேனகா, கலைமகள் உள்பட பேரையும் மீட்டு உறவினர்கள் சேலம் அரசு மருத்துமனையில் சேர்த்தனர். அங்கு அவர்கள் தீவிர சிகிச்சைப் பிரிவில் அனுமதிக்கப்பட்டனர். தொடர்ந்து அவர்களுக்கு டாக்டர்கள் சிகிச்சை அளித்து வருகிறார்கள்.
இந்த சம்பவம் குறித்து தகவல் அறிந்ததும், அம்மாப்பேட்டை போலீசார் நேராக அழகேசன் வீட்டிற்கு சென்று விசாரணை நடத்தினர். மேலும் இது தொடர்பாக வழக்குப்பதிவு செய்து விசாரணை மேற்கொண்டு வருகிறார்கள்.
