குழித்துறை:
மார்த்தாண்டத்தை அடுத்த நந்தன்காட்டை சேர்ந்தவர் அஜய் (வயது 22). மார்த்தாண்டம் மார்க்கெட்டில் மீன் லோடு இறக்கும் தொழில் செய்து வந்தார். நேற்று மாலை அஜய், மார்க்கெட்டில் மீன் லோடு இறக்கி கொண்டிருந்தார். அப்போது அவரது செல்போனுக்கு ஒரு அழைப்பு வந்தது.
அதனை எடுத்து பேசிய அஜய், அப்படியே உடைந்து போய் அழுதார். பின்னர் அருகில் இருந்தவர்களிடம் இனி வாழ்வதில் பயன்இல்லை என்று கூறிவிட்டு வெளியே சென்றார். அவருக்கு அருகில் இருந்தவர்கள் ஆறுதல் கூறினர். அதன்பின்பு வீட்டிற்கு சென்ற அஜய், தன் அறைக்கு சென்று கதவை மூடிக்கொண்டார். நீண்ட நேரமாகியும் அவரது அறை கதவு திறக்காததால் சந்தேகம் அடைந்த அக்கம் பக்கத்தினர், கதவை உடைத்து திறந்தனர். அங்கு அஜய் , மின் விசிறியில் தூக்குபோட்டு இறந்து கிடந்தார். இது பற்றி உறவினர்கள் மார்த்தாண்டம் போலீசில் புகார் செய்தனர்.
மார்த்தாண்டம் போலீசார் அஜய் உடலை கைப்பற்றி பிரேத பரிசோதனைக்கு அனுப்பி வைத்தனர். மேலும் தற்கொலை குறித்து வழக்குபதிவு செய்தனர்.
அஜய் சாவுக்கு அவருக்கு கடைசியாக வந்த செல்போன் அழைப்பு காரணமாக இருக்கலாம் என்று உறவினர்கள் சந்தேகப்பட்டனர். இது குறித்து அவர்கள் போலீசாரிடம் தெரிவித்தனர். அதன்பேரில் அஜய் சாவுக்கு காதல் பிரச்சினை காரணமா? என்றும் போலீசார் விசாரணை நடத்தி வருகிறார்கள்.
