அவனியாபுரம்:
மதுரை அவனியாபுரம் மற்றும் அதனை சுற்றியுள்ள பகுதிகள் சில ஆண்டுகளுக்கு முன்பு மாநகராட்சி பகுதியாக அறிவிக்கப்பட்டது.
ஆனால் தற்போது வரை அவனியாபுரம் பகுதியில் மாநகராட்சி சார்பில் எந்த அடிப்படை வசதிகளும் செய்யப்படாமல் நிராகரிக்கப்பட்டு வருவதாக அந்தப்பகுதி மக்கள் புகார் கூறி வருகின்றனர்.
அவனியாபுரம் அருகில் 60-வது வார்டுக்கு உட்பட்ட அயன்பாப்பாகுடி, அய்யனார் கோவில் பகுதிகளில் அடிப்படை வசதிகளும் சரிவர இல்லை.
குடிநீர், சாக்கடை, தெரு விளக்கு, மின்சாரம் உள்ளிட்ட வசதிகளை கேட்டு அந்தப்பகுதி மக்கள் பலமுறை அதிகாரிகளை சந்தித்து மனு கொடுத்தனர். ஆனால் இதுவரை எந்த பலனும் இல்லை.
சாக்கடை வசதி செய்யப்படாததால் அடிக்கடி கழிவுநீர் ரோடு, தெருக்களில் தேங்கி சுகாதார சீர்கேட்டை ஏற்படுத்தி வருகிறது.இதனால் அந்தப்பகுதியில் நோய் பரவும் அபாயமும் ஏற்பட்டுள்ளது.
அடிப்படை வசதிகளை உடனே நிறைவேற்றித் தரக்கோரி இன்று அந்தப் பகுதியைச் சேர்ந்த பெண்கள் உள்பட 50-க்கும் மேற்பட்டோர் அவனியாபுரம் பைபாஸ் ரோட்டில் திரண்டனர். அவர்கள் திடீரென்று சாலையில் அமர்ந்து மறியலில் ஈடுபட்டனர். இதனால்அந்தப்பகுதியில் போக்குவரத்து பாதிக்கப்பட்டது.
இது குறித்து தகவல் அறிந்த அவனியாபுரம் போலீஸ் சப்-இன்ஸ்பெக்டர்கள் செல்வகுமார், ஆண்டவர் மற்றும் போலீசார் சம்பவ இடத்திற்கு வந்து பேச்சுவார்த்தை நடத்தினர். இதன் பின் மறியல் கைவிடப்பட்டது. #tamilnews
