ஆலந்தூர்:
மத்திய மந்திரி பொன். ராதாகிருஷ்ணன் சென்னை விமான நிலையத்தில் நிருபர்களிடம் கூறியதாவது:-
ம.தி.மு.க. தோன்றிய நாள் முதல் இந்நாள் வரை தமிழகத்தில் எந்தெந்த திட்டங்களுக்கு ஆதரவு தெரிவித்துள்ளது. என்ன திட்டங்கள் வேண்டும் என்று கேட்டுள்ளது என்ற பட்டியலை போட வேண்டும். எந்த திட்டத்தை பற்றியும் பேசாமல், எந்த திட்டத்துக்கும் குரல் கொடுக்காமல் போராட்டத்துக்கு மட்டும் களம் இறங்கும் ஒரு கட்சியாக ம.தி.மு.க. இருக்கிறது. இது துரதிருஷ்டமானது.
நேற்று பிரதமருக்கு ம.தி.மு.க. கருப்பு கொடி காட்டியது பிரதமருடைய பெயருக்கோ, புகழுக்கோ, எந்த பாதகமும் விளைவிக்கவில்லை. தமிழக மக்களுக்கு தேவையான எய்ம்ஸ் மருத்துவமனைக்கு பிரதமர் அடிக்கல் நாட்டி சென்றுள்ளார்.
இதற்கு முன்பும், லட்சக்கணக்கான மக்களுக்கு வேலை தர, பாதுகாப்பு உபகரணங்கள் போன்ற தொழிற்சாலைகள் ஆயிரக்கணக்கான கோடி ரூபாய் முதலீட்டில் மத்திய அரசு திட்டங்களை ஏற்படுத்தி தந்திருக்கிறது. இதையெல்லாம் அவர்களால் ஏற்றுக்கொள்ள முடியவில்லை.
பா.ஜனதா அரசும், பிரதமர் மோடியும் தமிழகத்துக்கு அங்கீகாரம், வேலைவாய்ப்பு, போன்ற நல்ல திட்டங்களை கொடுத்துள்ளார். இதற்கு நேர்மாறாக சில கட்சிகள் எதிராக செயல்படுகிறார்கள். இது தமிழ்நாட்டு மக்களுக்கு செய்யும் துரோகம்.
நேற்று பிரதமர் கலந்துகொண்ட நிகழ்ச்சியில் தமிழ்த்தாய் வாழ்த்து ஒலிபரப்பவில்லை என்ற சர்ச்சையை ஏற்றுக்கொள்ள முடியாது. பா.ஜனதாவும், பிரதமர் மோடியும் தமிழ்த்தாய் வாழ்த்துக்கும், தமிழுக்கும், தமிழ்த்தாய்க்கும் எந்த அவமானமும் வர விட மாட்டார்கள். ஏற்றுக்கொள்ளவும் மாட்டார்கள்.
கிழக்கு கடற்கரை சாலை விரிவாக்கத்துக்கு மாநில அரசின் ஒப்புதலை பெற்று இருக்கிறோம். அதற்கான வேலைகள் துரிதமாக நடைபெற்றுக் கொண்டிருக்கிறது.
தமிழகத்தில் மெகா கூட்டணி அமைக்கிறவர்களின் செல்வாக்கு மக்கள் மத்தியில் என்ன என்று தேர்தல் நேரத்தில் பார்ப்போம். பா.ஜனதா கூட்டணி உரிய நேரத்தில் அமைக்கப்படும். வருகிற பாராளுமன்ற தேர்தலில் பா.ஜனதா கூட்டணி குறைந்தபட்சம் தமிழகத்தில் 30 தொகுதிகளில் வெற்றி பெறும்.
நாட்டின் நலன் கருதி, தமிழக மக்களின் நலன் கருதி கூட்டணி அமைக்கப்படும். அடுத்த மாதம் 10-ந்தேதி திருப்பூருக்கும், 19-ந்தேதி கன்னியாகுமரிக்கும் பிரதமர் வர இருக்கிறார்.
இவ்வாறு அவர் கூறினார். #PonRadhakrishnan #BJP
