கோவை:
சிறுமுகை அருகே உள்ள பெத்திகுட்டையை சேர்ந்தவர் வீரன் (வயது 45). கூலித் தொழிலாளி. இவரது நண்பர் அதே பகுதியை சேர்ந்த முருகன் (40).
சம்பவத்தன்று இவர்கள் 2 பேரும் மேட்டுப்பாளையம்- சத்தி ரோட்டில் நடந்து சென்றனர். அப்போது அந்த வழியாக வந்த அடையாளம் தெரியாத வேன் 2 பேரும் மீதும் மோதி விட்டு நிற்காமல் சென்றது. இதில் 2 பேரும் பலத்த காயம் அடைந்து உயிருக்கு போராடினர். அவர்களை அந்த வழியாக சென்றவர்கள் மீட்டு கோவை அரசு ஆஸ்பத்திரிக்கு கொண்டு வந்தனர். ஆனால் வரும் வழியிலேயே வீரன் பரிதாபமாக இறந்தார்.
இது குறித்து சிறுமுகை போலீசார் விசாரணை நடத்தி வருகிறார்கள்.
சூலூர் செஞ்சேரிபுதூரை சேர்ந்தவர் குமரேசன் (32). சம்பவத்தன்று இவர் தனது மோட்டார் சைக்கிளில் பல்லடம்-உடுமலை ரோட்டில் சென்றார்.
அப்போது அங்கு நின்று கொண்டு இருந்த லாரி திடீரென பின்னால் வந்தது. இதனை கவனிக்காமல் சென்ற குமரேசன் கண்இமைக்கும் நேரத்தில் லாரி மீது மோதினார்.
இதில் படுகாயம் அடைந்து உயிருக்கு போராடிய அவரை அந்த வழியாக சென்றவர்கள் மீட்டு பல்லடம் அரசு ஆஸ்பத்திரிக்கு கொண்டு சென்றனர் ஆனால் செல்லும் வழியிலேயே குமரேசன் பரிதாபமாக இறந்தார்.
இது குறித்து சூலூர் போலீசார் வழக்குப்பதிவு செய்து விசாரணை நடத்தி வருகிறார்கள்.
சூலூரை சேர்ந்தவர் செல்வராஜ் (34). தனியார் நிறுவன ஊழியர்.
சம்பவத்தன்று இவர் தனது மோட்டார் சைக்கிளில் சூலூர்- எம்.ஜி.புதூர் ரோட்டில் சென்றார். அப்போது திடீரென நாய் குறுக்கே வந்தது. நாய் மீது மோதாமல் இருக்க செல்வராஜ் பிரேக் போட்டார். அப்போது கட்டுப்பாட்டை இழந்து மோட்டார் சைக்கிளில் இருந்து கீழே விழுந்தார். இதில் படுகாயம் அடைந்த செல்வராஜ் அந்த பகுதியில் உள்ள தனியார் ஆஸ்பத்திரியில் சிகிச்சை பலனளிக்காமல் பரிதாபமாக இறந்தார்.
அருப்புக்கோட்டையை சேர்ந்தவர் சாமிநாதன் (25).
சம்பவத்தன்று இவர் தனது மோட்டார் சைக்கிளில் செஞ்சேரி மலை ரோட்டில் சென்றார். அப்போது அந்த வழியாக வந்த லாரி மோட்டார் சைக்கிள் மீது மோதியது. இதில் படுகாயம் அடைந்த சாமிநாதன் ஆஸ்பத்திரிக்கு செல்லும் வழியில் பரிதாபமாக இறந்தார். சுல்தான்பேட்டை போலீசார் விசாரணை நடத்தி வருகிறார்கள்.
